मर्कूस 2 - पुर्वीय मगरपक्षाघात छान्चकी गेपाक्च ( मत्ती ९:१-८ ; लुका ५:१७-२६ ) 1 कायाक नीसयाक न्हुइङ येशू कफर्नहुमाङ ल्हेसा र भर्मीकै होसको इमाङ न ले डेम सेया। 2 अनी वास्टै भर्मीको होसको लेठाङ भेला छाना। होखुरीक होला मासीन्हा र गालाम बाहीर सम्म र ठाउँ मालेया। येशूये होखुरीककी परमेश्वरौ बचन पाहाक्ङन लेया। 3 होडीक न बेला भर्मीको राहा, र बुलीजना भर्मीकै काट पक्षाघात छानार छाच भर्मीकी होसको लेठाङ बुवार राका। 4 टर भर्मीकुङ बाड्को भीडै जाट्नाङ होखुरीकै छाच भर्मीकी भीत्री येशूलेठाङ टाहाक्की माय्होका। होटबाटै होसको ङुच ठाऔ सीढा ढेनामुङ छानाकी होखुरीकै खोल्हा र होसे पक्षाघाती छानार छाच भर्मी मीस्च होसे खाट खाटा न म्हाका झालाका। 5 अनी येशूये होखुरीकुङ विश्वास डाङार होसे पक्षाघातीकी डेया, “ए मीजा, नाकुङ पापको क्षमा छाना।” 6 टर होला लेच धर्मगुरुकै लहो मीमनाङ इट डेयार बीचार जाट्नन लेया, 7 “इसे भर्मी हीजै इटजाट्न ङाक्ने? इसे च परमेश्वरौ निन्दा टी हो! परमेश्वरै बाहेक अरु सुयेर पाप क्षमा जाट्की य्होक्ले र?” 8 होखुरीकै याङ्च कुरा बीचार जाट्न न ले डेच येशूये तुरुन्तै लहो मीमनाङ ठाहा छानार होखुरीककी डेया, “हीजै नाखुरीक याङ्च बीचार जाट्ले? 9 इसे पक्षाघातीकी ‘नाकुङ पापको क्षमा छाना’ डेकी र ‘सोनी, नाकुङ खाट सोटार व्हानी’ डेकी कुसे चहीँ सजीलो ले? 10 टर भर्मीयो मीजाकी इसे पृथ्वीयाङ पाप क्षमा जाट्च अधिकार ले डेम नाखुरीकै वार्न्ही।” अनी होसकै होसे पक्षाघात छानार छाच भर्मीकी डेया, 11 “ङा नाकोकी डेले, सोनी, नाकुङ खाट सोट्नी र इमाङ नुङ्नी।” 12 होटै होसे सोवा र तुरुन्तै खाट सोटार पट्टकुङ म्याहासीङ व्हाकी क्योटा अनी भर्मीको अचम्म मन्डीचै छक्क पर्या “कानै याङच च सेन्र न माडाङन्या” डेचै होखुरीकै परमेश्वरौ महीमा जाटा। येशूये लेवीकी मेखोल्हाकी डुट्की डेम आर्घाच ( मत्ती ९:९-१३ ; लुका ५:२७-३२ ) 13 येशू फेरी कायाक गालील टालौ छेवाङ नुङा। भर्मीकुङ बाड्को भीड होसको लेठाङ राहा र होसकै होखुरीकी शिक्षा याहा। 14 होटै नुङ्चै जाट्नाङ होसकै अल्फायासौ मीजा लेवीकी कर सोट्च ठावाङ ङुमङुच डाङा र येशूये होसकी डेया, “ङाकी डुट्नी।” होटै होसे सोवा र येशूकी डुटा। 15 अनी होसको र चेलाको लेवीयो इमाङ ज्यामा ज्याकी डेम ङुनाङ होसकोकी डुट्च वास्टै जना कर सोट्चको र अरु पापी भर्मीको र येशू खाटा न ज्याकी ङुवा। 16 येशू पापीको र कर सोट्चकोखाटा ज्याम ङुच डाङार फरीसी डलुङ धर्मगुरुकै होसकुङ चेलाकोलाक डेया, “होसको हीजै कर सोट्चको र पापीको खाटा ङुवार ज्याच?” 17 इसे कुरा सेयार येशूये होखुरीककी डेया, “माछाच कोलाक बैड्यौ खाँचो मापर्ले, टर छाचकोलाक मट्टै खाँचो पर्ले। ङा धर्मीकोलाक होइन टर पापीकोलाक आर्घाकी डेम राछ हो।” उपवास ङुच बारेयाङ गीन्च ( मत्ती ९:१४-१७ ; लुका ५:३३-३९ ) 18 बप्तिस्मा याछ युहन्नौ चेलाको र फरीसीको उपवास ङुमन्या। अनी कुडीक जना भर्मीकै चहीँ येशू लेठाङ राहार डेया, “युहन्नौ चेलाको र फरीसीकुङ चेलाको च उपवास ङुले, टर नाकुङ चेलाको हीजै उपवास माङुले?” 19 होटै येशूये होखुरीककी डेया, “ही ब्याहुला होखुरीक खाटा लेठर जन्टीको उपवास ङुले र? ब्याहुला होखुरीक खाटा लेठर होखुरीक उपवास माङुले। 20 टर समय राल्हे, जब ब्याहुलाकी होखुरीक लकीङ भाग्ले, टब होखुरीक होसे डीन उपवास ङुले। 21 “सुयेर ठोट्र्या बढीनाङ नयाँ बढीनौ टाल्हो माकाले, नभा च नयाँ बढीन खुम्चडीस्ले र च्याहार ख्योल्हे, होटै झन मास्च र बाड्को व्हाङ छान्ले। 22 “सुयेर नयाँ डाखमड्य ठोट्र्या छालौ मसकाङ माकाले, नभा च होसे डाखमड्यै छालौ मसककी भास्न याल्हे र डाखमड्य र मसक नीस न नास छान्ले। टर नयाँ डाखमड्यकी चहीँ नयाँ मसकाङ न काले।” म्हुङ बाट्च डीनौ प्रभु ( मत्ती १२:१-८ ; लुका ६:१-५ ) 23 कायाक म्हुङ बाट्च डीनाङ येशू गहुँ बारीयो लाम छान्चै नुङ्ङ न लेया। नुङ्चै जाट्नाङ होसकुङ चेलाकै गहुँओ बाला ढुम्की ठाला। 24 इसे डाङार फरीसीकै होसकोकी डेया, “ङोस्नी, म्हुङ बाट्च डीनाङ व्यवस्थै ही जाट्की माछान्ले डेमने होसे न हीजै जाट्ले इखुरीकै?” 25 येशूये होखुरीककी डेया, “जब दाउद र होसे खाटा लेचको हीर मालेम मीटुक रन्छीच बेलाङ दाउदै ही जाटा? नाखुरीकै सेन्र मापरेस्ने? 26 प्रधान पुजाहारी अबियाथारौ पालोवाङ परमेश्वरौ मन्दिराङ दाउद पर्या र परमेश्वरकी चढडीच रोटो ज्या। होसे रोटो चहीँ पुजाहारीकै बाहेक अरु सुयेर ज्याकी माछान्च लेया। अनी होसे रोटो दाउदै मेल्हाखाटा लेचकोलाक र याहा।” 27 अनी येशूये होखुरीककी डेया, “म्हुङ बाट्च डीन भर्मीकुङ लागी खास्च हो टर भर्मी म्हुङ बाट्च डीनौ लागी होइन। 28 होटबाटै भर्मीयो मीजा म्हुङ बाट्च डीनौ र प्रभु हो।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.