मत्ती 28 - पुर्वीय मगरयेशू सीच लकीङ जीवाच ( मर्कूस १६:१-११ ; लुका २४:१-१२ ; युहन्ना २०:१-१८ ) 1 म्हुङ बाट्च डीनौ पीउर्हाक लेखो आइतबार झीसमीसाङ न मरीयम मग्डलीनी र अर्को मरीयम येशूकी डाच चीहान ङोस्की नुङा। 2 होडीक बेला मोसोमायाङ बाड्को भुइँचालो नुङा, हीजैडेनाङ स्वर्ग लकीङ प्रभु परमेश्वरौ काट दूत म्हाका झाल्न राहार चीहानुङ ल्हुङ्की सारीया र होसे मीटाक ङुवा। 3 होच्यो मीटाहा सर्घाङ पीझ्यानाङ लेखा न ट्याङ्छ र बढीन चहीँ हीउँ ल्याक्च न फोक्सा बोच लेया। 4 होसे सीपाहीको बीर्हीयार ठेरठेर बुरुक्ङ सीच बराबर न छाना। 5 टर स्वर्गदूतै होसे मास्टो भर्मीकोलाक डेया, “नाखुरीक माबीर्हीनी, ङाकी थाहा ले, नाखुरीक क्रूसाङ टङ्गडीयार साट्च येशूकी पामन ले। 6 होसको इला माले, होसकै डेनाङ लेखा न होसको सीच लकीङ जीवाम सोमने। रान्ही होसकोकी डाच ठाउँ ङोस्नी। 7 छीटो नुङार होसकुङ चेलाकोलाक खबर यान्ही, ‘होसको च सीच लकीङ जीवाम सोमने र होसको नाखुरीक डेनाङ अघी गालीलाङ नुङ्ङ न ले। नाखुरीकै होसकोकी होला डाङ्ले।’ अब ङै डेकी पर्च कुरा नाखुरीककी डेम याम्हे।” 8 होसे मास्टो भर्मीकोलाक बीर्हीम र सेया र मार्हाङ्ङ र सेया। होखुरीक चीहान लकीङ झोसार खेव्हा र होसकुङ चेलाकोलाक ङ्होस्की खेर्न नुङा। 9 होटै मोसोमायाङ येशूये होखुरीककी डुपार डेया, “झोर्ले!” होखुरीक खेरेप नुङार होसकुङ मीकु घोवार झोरा र जय-जयकार जाटा। 10 येशूये होखुरीककी डेया, “माबीर्हीनी नुङार ङौ चेलाकोलाक गालीलाङ नुङ्की डेम यान्ही र ङाकी होला होखुरीकै डाङ्ले।” सीपाहीकुङ खबर 11 जब होसे मास्टोको लामाङ नुङ्ङ न लेनाङ, चीहानाङ रुङ्की ङुच सीपाहीको कुडीक जना चहीँ सहराङ नुङार मुख्य पुजाहारीकोलाक होला छान्च पट्ट न घटनाकुङ बारेयाङ सेटाका। 12 मुख्य पुजाहारीको र अगुवाको भेला छानार अब ही जाटीङ डेयार सल्लाह जाटा र होखुरीकै सीपाहीकोलाक वास्टै पैसा याहा 13 र डेया, “नाखुरीकै याङ्च डेनी, ‘कान नाबीक मीस्न ङुच बेलाङ येशूओ चेलाको राहार होच्यो लास खुसार आल्ल्हेसा।’ 14 इडीक इसे कुरा हाकीमौ मेनकेपाङ टाहा डेनाङ, कान होसे खाटा कुरा खाटाक्ले र नाखुरीककी जोगडीले।” 15 होसे रुङ्च सीपाहीकै पैसा लार मुख्य पुजाहारीकै पाहाक्नाङ लेखा न जाटा। अनी इसे कुरा यहूदीकुङ मीघ्याङ चाहाँसम्म र फैलडीस्न ने। येशूओ महान आज्ञा ( मर्कूस १६:१४-१८ ; लुका २४:३६-४९ ; युहन्ना २०:१९-२३ ; प्रेरित १:६-८ ) 16 टब एघार जना चेलाको होसे गालीलुङ डाँडाङ नुङा, होला येशूये होखुरीककी नुङ्की डेमन्या। 17 होखुरीकै येशूकी डाङा र दन्डवट जाटा, टर कुडीकै चहीँ होसकोकी सङ्खा जाटा। 18 टब येशू होखुरीक लेठाङ खेरेप राहार डेया, “स्वर्ग र पृथ्वीयाङ पट्ट न अधिकार ङाकी याम्हने। 19 होटबाटै नुङ्नी, र पट्ट जाटीकुङ भर्मीकोलाक चेलाको खास्नी, अनी परमेश्वर बोइ, मीजा र पवित्र आत्मौ म्यार्मीनाङ बप्तिस्मा यान्ही। 20 ङै नाखुरीककी आज्ञा जाट्च पट्ट न कुरा पालना जाट्की होखुरीककी पाहाक्नी। सेनी, ङा संसारौ अन्टीम डीन सम्म न सढैँ नाखुरीक खाटा न ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.