युहन्ना 18 - पुर्वीय मगरयेशूकी घोच ( मत्ती २६:४७-५६ ; मर्कूस १४:४३-५० ; लुका २२:४७-५३ ) 1 येशूये इटजाट्न प्रार्थना जाट्न भ्याच न्हुइङ लहो चेलाकोखाटा कीडोरोन खोल्सा पारीयुङ जैटुनौ बगैँचा भीत्री नुङा। 2 होसे ठाउँ येशूकी घोवाक्ङ याछ यहूदासकी र थाहा लेया, हीजैडेनाङ येशू लहो चेलाकोखाटा होला नुङ्च जाट्नन्या। 3 टब होडीक न बेला मुख्य पुजाहारीको र फरीसीकै बीर्न्हकाच कुडीक जना रोमी सीपाहीको, परमेश्वरौ मन्दिराङ पहरा याछकोलाक लार यहूदास होसे बगैँचा भीत्री पर्या। होखुरीकै मीहुटाङ हतियारको, राँको र बट्टी बुमन्या। 4 येशूकी अब लाहा मीटाक आइपर्न राछ पट्ट न कुराको थाहा लेया। होटबाटै अगाडी नुङार होसकै होसे भर्मीकोलाक गीना, “नाखुरीकै सुकी पामनले?” 5 होखुरीकै डेया, “नासरतुङ येशूकी।” येशूये होखुरीककी डेया, “ङा होसे न हो।” येशूकी घोवाक्ङ याछ यहूदास र होखुरीक खाटा न टोङ्ह ङुमन्या। 6 येशूये होखुरीककी, “ङा होसे न हो” डेच बीट्टीकै होखुरीक न्हुङ्लाक सरीस्चै झाङ पछारीसा। 7 फेरी येशूये होखुरीककी गीना, “होइन, नाखुरीकै सुकी पाच?” होखुरीकै फेरी डेया, “नासरतुङ येशूकी।” 8 येशूये जवाफ याहा, “ङै अघी न डेकी क्योटा ङा होसे न हो। इडीक नाखुरीकै ङाकी न पाच हो डेनाङ इखुरीककी चहीँ नुङ्की यान्ही।” 9 (इटजाट्न, “ए बोइ, नाकै ङाकी याछको मढ्याङ, ङै काट जनाकीर माम्हास्ने” डेयार येशूये पहीला न ङाक्च बचन पुरा छान्न राहा।) 10 टब सीमोन पत्रुसै चहीँ लाहाखाटा लेच तरवार डोनार प्रधान पुजाहारीयो नोकर माल्खस डेचओ डोर मेन्केप च्वाट्टै चेम याहा। 11 टर येशूये पत्रुसकी डेया, “नाकुङ तरवार डापाङ कानी! ही परमेश्वर बोये ङाकी याछ डुखौ कचौरा लकीङ ङै मागाकी र?” येशूकी हन्नास लेठाङ आल्छ 12 टब कप्तान, होच्यो सीपाहीको र यहूदी अगुवाकै बीर्न्हकाच परमेश्वरौ मन्दिराङ पहरा ङुचकै येशूकी घोवार छ्याका। 13 होटै न्हुइङ होखुरीकै येशूकी पहीला हन्नास लेठाङ आल्हा। हन्नास चहीँ होसे वर्षौ प्रधान पुजाहारी कैयाफौ मामा लेया। 14 इसे न कैयाफै, “पट्ट न भर्मीको नास छान्की डेनाङ च काट जना भर्मी सीकीयाङ न सेम्ह छान्ले” डेयार यहूदी अगुवाकोलाक सल्लाह याम्हन्या। पत्रुसै येशूकी माचीन्डीले डेच ( मत्ती २६:६९-७० ; मर्कूस १४:६६-६८ ; लुका २२:५५-५७ ) 15 सीमोन पत्रुस र अर्को काट जना चेला येशूओ न्हुङ-न्हुङ नुङा। होसे अर्को चेलै चहीँ प्रधान पुजाहारीकी सेम्ह चीन्डीमन्या, होटबाटै होसे येशू खाटा न प्रधान पुजाहारीयो आर्भा भीत्री पर्या। 16 टर पत्रुस चहीँ आर्भा बाहीर न टोङ्ह ङुमन्या। होसे प्रधान पुजाहारीकी चीन्डीच चेला ल्हेसार बाहीर नुङा, र आर्भुङ गालामाङ पाल्या ङुच मास्टो जजाकी डेयार पत्रुसकी भीत्री राका। 17 पत्रुस भीत्री नुङ्चै जाट्नाङ होसे मास्टो जजै होसकी गीना, “ही नाको र होसे भर्मीयो चेलाको मढ्य काट होइन र?” पत्रुसै डेया, “ङा होइन।” 18 साप्फी जुङ्छ बाटै नोकरको र पहरा याछको पट्टको म्हे वरीपरी टोङ्हार म्हे गुप्म ङुमन्या। पत्रुस र नुङार होखुरीकुङ छेवाङ म्हे गुप्चै टोङ्हा। प्रधान पुजाहारीये येशूकी गीन्च ( मत्ती २६:५९-६६ ; मर्कूस १४:५५-६४ ; लुका २२:६६-७१ ) 19 प्रधान पुजाहारीये येशूकी होसकुङ चेलाको र शिक्षौ बारेयाङ गीना। 20 येशूये होसकी डेया, “ङै पट्टकुङ म्याहासाङ पट्टये सेच जाट्न खुल्ला ठावाङ ङाक्ङने। ङै ङौ शिक्षा पट्ट न यहूदीको भेला छान्च सभाङुच इमकोवाङ र परमेश्वरौ मन्दिराङ याम्हने। ङै सुयेर थाहा माडीन्ह हीर माङाक्ने। 21 नाकै ङाकी हीजै गीन्च? ङौ शिक्षा सेचकोलाक न गीन्नी। ङै ही डेया होसे कुराको पट्ट न होखुरीककी न थाहा ले।” 22 येशूये इटजाट्न जवाफ याछ न्हुइङ होसको छीनी टोङ्छ काट जना परमेश्वरौ मन्दिराङ पहरा याछ पालेइ येशूकी ठप्पड ङाप्चै इट डेया, “ही नाङ प्रधान पुजाहारीकी इटजाट्न जवाफ याल्हे?” 23 येशूये होसकी डेया, “इडीक ङै गल्टी डेमने डेनाङ होच्यौ प्रमाण टान्हाक्नी, टर इडीक ङै सत्य ङाक्ने डेनाङ ङाकी नाको हीजै हीर्कडीले?” 24 टब हन्नासै येशूकी छ्याक्च न अवस्ठाङ प्रधान पुजाहारी कैयाफा लेठाङ बीर्न्हका। पत्रुसौ दोस्रो र तेस्रो इन्कार ( मत्ती २६:७१-७५ ; मर्कूस १४:६९-७२ ; लुका २२:५८-६२ ) 25 होडीक बेला सम्म र सीमोन पत्रुस टोङ्हार म्हे गुप्म न लेया। अरु म्हे गुप्चकै होसकी गीना, “ही नाको र होसे भर्मीयो चेलाको मढ्युङ काट जना होइन र?” पत्रुसै इन्कार जाट्चै डेया, “ङा होइन!” 26 टब म्हे गुप्चको मढ्याङ पत्रुसै मेन्केप चेम याछ भर्मीयो काट जना लहो पर्च होला लेया। होसे र प्रधान पुजाहारीयो न नोकर लेया। होचे डेया, “ही ङै नाकोकी होसे भर्मीखाटा बगैचाङ डाङ्च होइन र?” 27 पत्रुसै फेरी “होइन” डेयार इन्कार जाटा। होडीक न बेला तुरुन्तै भाल्या राका। पीलातसौ म्याहासाङ येशू ( मत्ती २७:१-२ , ११-३१ ; मर्कूस १५:१-२० ; लुका २३:१-५ , १३-२५ ) 28 तब गोराक न यहूदी अगुवाकै येशूकी कैयाफौ इमलकीङ रोमी बडा-हाकीमौ दरबाराङ राका। टर होखुरीक रीटी अनुसार अशुद्ध छान्ले डेयार दरबार भीत्री मापर्या। हीजैडेनाङ छुटकारौ चाडाङ भोज ज्याकी माडीन्ल्हे डेम होखुरीकै लाहाकी चोखो डाच मीमन जाट्नन्या। 29 होटबाटै बडा-हाकीम पिलातस होखुरीककी डुप्की लाहा न बाहीर ख्योव्हार गीना, “नाखुरीकै इसे भर्मीयो विरोधाङ हीयो दोष लैडीले?” 30 होखुरीकै डेया, “इडीक इसे भर्मी दोषी मालेनाङ च कानै नाकोलेठाङ माराक्च लेया।” 31 होटै पिलातसै होखुरीककी डेया, “इसे भर्मीकी आल्न्ही र नाखुरीकुङ लहो व्यवस्था अनुसार इसकी न्याय जाट्नी।” यहूदी अगुवाकै डेया, “कानकी च भर्मी साट्च अधिकार माले।” 32 लाहा कुटजाट्न सीकी पर्ले डेयार येशू लहे न डेच कुरा पुरा छान्की याङ्च छान्नन्या। 33 पिलातस दरबार भीत्री ल्हेस्न नुङा, र येशूकी आर्घार गीना, “ही नाको यहूदीकुङ राजा हो?” 34 येशूये डेया, “ही नाको लहे न ङौ बारेयाङ गीन्च हो की अरु सुयेर नाकोकी डेच हो?” 35 पिलातसै डेया, “ही ङा यहूदी हो र? नाकुङ लहो न जाटी र मुख्य पुजाहारीकै नाकोकी ङा लेठाङ राक्च हो। नाकै ही अपराध जाट्नने?” 36 येशूये डेया, “ङौ राज्य इसे संसारुङ होइन। इडीक इसे संसारुङ हो डेनाङ च ङौ चेलाको ङाकी यहूदीको लकीङ जीवाटाक्की होखुरीक खाटा पुन्छ लेया। टर ङौ राज्य इसे संसारुङ होइन।” 37 पिलातसै येशूकी डेया, “होट हो डेनाङ नाको राजा न हो ट?” येशूये डेया, “ङा राजा हो डेयार नाको लाहा न डेम न ले। ङा सत्यौ गबाही याखी जन्मडीस्च हो, र इच्यो लागी न संसाराङ राछ हो। सुये सत्य जाक्ले होखुरीकै ङौ कुरा सेले।” 38 पिलातसै येशूकी गीना, “सत्य चहीँ ही हो ट?” इडीक गीनार पिलातसै बाहीर ख्योहार यहूदी अगुवाकोलाक डेया, “ङै च इसे भर्मीयाङ दण्ड याखी पर्च दोष हीर माडुपा। 39 नाखुरीकुङ चलन अनुसार वर्षेनी छुटकारौ चाडाङ काट जना कैदीकी नाखुरीकुङ लागी ङा डास्न याल्हे। होटबाटै इसे वर्ष ङै होसे यहूदीकुङ राजा डेचकी डास्न याखी डेच नाखुरीक मीमन जाट्ले?” 40 टब होखुरीकै इट डेम च्याक्चै डेया, “होसकी होइन! टर बारब्बाकी डास्न यान्ही!” (बारब्बाचहीँ सरकार विरोधी लेया।) |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.