युहन्ना 12 - पुर्वीय मगरबेथानियाङ येशू ( मत्ती २६:६-१३ ; मर्कूस १४:३-९ ) 1 छुटकारौ चाड राखी डेनाङ छ याक अघी येशू फेरी बेथानिया लाङ्घाङ राहा। होला लाजरस ङुमन्या। होसकी येशूये सीच लकीङ जीवाटाक्ङन्या। 2 होखुरीकै येशूओ लागी नाबीलुङ ज्यामा टयार खासा। मार्ठै ज्याच गाचठोकको याम्हन लेया, अनी लाजरसचहीँ येशूखाटा ज्याकी ङुचको मढ्याङ काट जना लेया। 3 होडीकबेला मरीयमै जटामसीलकीङ खास्च आढा लीटर टडीक बासना राछ महङ्गो अट्टर राकार येशूओ मीकुवाङ व्हाकार मोल्न्ह याहा, अनी लहो मीछामै सीटा। होसे अट्रौ बासनै इम न न्हेपा। 4 टर येशूकी न्हुइङ ढोका याछ चेला यहूदास स्करीयोटै डेया, 5 “इसे अट्टर च सोम सय चाँडीयो सीक्काङ आर्लार पैसा चहीँ गरीबकोलाक यान्हाङ सेम्ह माछान्च लेया र?” 6 होचे साँच्ची न गरीबकोलाक माया जाटार डेच होइन, हीजैडेनाङ होसे खुस लेया। पैसौ ठैली होसकी लाकी याम्हन्या र होचे होटै पैसा डोन्च जाट्नन्या। 7 येशूये डेया, “इसकी हीर माडेनी! ङाकी ठाक्च डीनौ लागी इचे इसे अट्टर काम याछ हो। 8 गरीबको च सढैँ नाखुरीक खाटा न छान्ले, टर ङा च नाखुरीक खाटा सढैँ माछान्ले।” 9 येशू बेथानियाङ ले डेच कुरा सेयार वास्टै यहूदीको होला होसको लेठाङ राहा। होखुरीक येशूकी ङोस्की मट्टै होइन, टर होसकै सीच लकीङ जीवाटाक्च लाजरसकी र ङोस्की डेम राम्हन्या। 10 होटबाटै मुख्य पुजाहारीकै लाजरसकी र साट्की डेम योजना जाटा। 11 हीजैडेनाङ लाजरस सीचलकीङ जीवाचबाटै यहूदीको मढ्याङ वास्टै जना होखुरीकखाटा भाम नुङार येशूकी विश्वास जाट्की पामन्या। यरूशलेमाङ येशूकी स्वागट जाट्च ( मत्ती २१:१-११ ; मर्कूस ११:१-११ ; लुका १९:२८-४० ) 12 पीउर्हाक लेखो छुटकारौ चाडाङ राछ वास्टै भर्मीकै येशू यरूशलेमाङ राम्हन ले डेच कुरा सेया। 13 होखुरीक खजुरौ हाँगाको लार येशूकी स्वागट जाट्की डेम राहा, र च्याक्चै डेया, “होसन्ना! परमप्रभुओ म्यार्मीनाङ राछ इस्राएलुङ महाराजा कुडीक आसीसीट ले!” 14 येशू काट गढौ बछेडा डुपार होसे मीटाक काल्हा। इसे बारेयाङ धर्मशास्त्राङ इट डेम रीक्ङने, 15 “ए यरूशलेमुङ भर्मीको, माबीर्हीनी! ङोस्नी, नाखुरीकुङ महाराजा गढौ काट बछेडा मीटाक काल्हार राम्हन ले।” 16 होडीक बेला चहीँ येशूओ चेलाकै इसे घटनौ बारेयाङ माबुझडीसा। टर येशू सीचलकीङ जीवाम सोवार स्वर्गौ महीमाङ ल्हेस्न भ्यारखीङ मट्टै होखुरीकै इसे पट्ट न कुराको होसकुङ बारेयाङ रीक्ङन्या, र होसे भर्मीकै होसकुङ लागी इसे पट्ट न काम जाट्च लेसा डेयार बुझडीसा। 17 येशूये लाजरसकी चीहानीङ आर्घार सीच लकीङ जीवाटाक्नाङ डाङ्च भर्मीकै इसे कुरा साँच्ची न छान्च न हो डेयार सेटाक्ङ न ङुवा। 18 होसकै याङ्च अचम्मौ काम जाट्नने डेम सेचबाटै भर्मीकुङ बाड्को भीड होसकोकी डुप्की राम्हन्या। 19 टब फरीसीकै मेखुरीक-मेखुरीक डेकी ठाला, “कानै हीर जाट्की माय्होका। ङोस्नी ट, संसारुङ पट्ट न भर्मीको होच्यो न्हुङ-न्हुङ व्हामभ्यामने!” परदेशीकै येशूकी डुप्की पाच 20 होडीक बेला ग्रीकको र कुडीक जना छुटकारौ चाडाङ आराधना जाट्की डेम यरूशलेमाङ राम्हन्या। 21 होखुरीकै गालीलुङ बेथसेदा लाङ्घीङ राछ फीलीप लेठाङ नुङार डेया, “ए हजुर, कानकी येशूकी डुप्च मीमन ले।” 22 फीलीपै नुङार अन्द्रियासकी सेटाका, अनी फीलीप र अन्द्रियास नीस न नुङार इसे कुरा येशूकी सेटाका। 23 येशूये होखुरीककी डेया, “अब भर्मीयो मीजौ महीमा छान्च बेला राम्हन ले। 24 साँच्ची न, ङा नाखुरीककी डेले, इडीक गहुँओ डाना झाङ पर्यार मासीया डेनाङ होसे काट मट्टै छान्ले। टर होसे सीया डेनाङ चहीँ होचे वास्टै मीस्या स्याटाक्ले। 25 लहो जीवनकी माया जाट्चये जीवन गुमडीले, टर लहो जीवनकी इसे संसाराङ घृणा जाट्चये चहीँ सेन्र मासीच जीवन डुप्ले। 26 सुये ङौ सेवा जाट्च मीमन जाट्ले होचे ङाकी डुट्की पर्ले, अनी ङा कुला छान्ले, ङौ सेवा जाट्च र होला न छान्ले। ङौ सेवा जाट्चकी ङौ बोये आदर जाट्ले। येशूये लाहा सीकी पर्च बारेयाङ डेच 27 “इडीक बेला ङौ प्राण ब्याकुल छान्नने, ङाकी ही डेइङ, ही डेइङ लेखा छान्नने! ‘ए बोइ, ङाकी इसे राम्हन लेच कष्टलकीङ जीवाक्नी’ डेकी? होइन, इसे डुख भोग्डीकी न ङा इसे संसाराङ राछ हो। 28 ए बोइ, नाकुङ म्यार्मीनौ महीमा जाट्नी।” टब स्वर्ग लकीङ याङ्च सोर राहा, “ङै ङौ म्यार्मीनौ महीमा जाट्नने र फेरी र महीमा जाट्ले।” 29 इसे सोर सेयार होला टोङ्छ भर्मीयो भीडै डेया, “इसे च सर्घा घुरुङ्च हो!” कुडीक जनै चहीँ डेया, “होसकोखाटा स्वर्गदूत ङाक्च हो!” 30 येशूये होखुरीककी डेया, “इसे सोर ङौ लागी राछ होइन, टर नाखुरीकुङ लागी हो। 31 अब इसे संसारकी न्याय जाट्च बेला छान्नने। अनी इसे संसारुङ सासक शैतानकी बाहीर लोल्हे। 32 अनी ङा पृथ्वी लकीङ गाराङ्ङ आल्ल्हे, ङा पट्ट न भर्मीकोलाक लाहा पट्टी पार्ले।” 33 इसे कुरा डेनाङ लाहा कुटजाट्न सीकी पर्च हो डेच बारेयाङ येशूये डेच हो। 34 भर्मीकुङ भीडै येशूकी गीना, “मुक्ति याछ ख्रीष्ट च सधैँभरी जीवाम ङुले डेम व्यवस्थालकीङ कानै सेमने। होटडेनाङ भर्मीयो मीजा गाराङ्की न पर्ले डेयार नाको कुटजाट्न डेकी य्होक्ले? नाकै डेच इसे भर्मीयो मीजा चहीँ सु हो ट?” 35 येशूये होखुरीककी डेया, “अझै कालाप बेर ज्योति नाखुरीक खाटा ङुले। ज्योति नाखुरीक खाटा लेठर लहो लामाङ व्हानी, नभा च छुम्छये नाखुरीककी हुप्ले। छुम्ठाङ व्हाचये लाहा कुलाक नुङ्ङन ले डेच थाहा माडीन्ल्हे। 36 नाखुरीक खाटा ज्योति लेनाङ न होसे मीटाक विश्वास जाट्नी, र नाखुरीक ज्योतियो सन्टान छान्ले।” इसे कुरा डेम भ्यारखीङ येशू होटै नुङा, अनी होखुरीक लकीङ आरच्युहार ङुवा। यहूदीकै विश्वास माजाट्च 37 येशूये यहूदीकुङ म्याहासाङ न इडीक वास्टै अचम्मौ चीन्हको जाट्नाङ र होखुरीकै होसको मीटाक विश्वास माजाटा। 38 इटजाट्न यशैया अगमवक्तै डेच कुरा पुरा छान्न राहा, “ए प्रभु, कानै डेच कुरा सुये विश्वास जाटा? अनी प्रभुये जाट्च शक्तिशाली काम सुकी टान्हाका?” 39 होटबाटै होखुरीकै विश्वास जाट्की माय्होका, हीजैडेनाङ यशैया अगमवक्तै फेरी इट डेमने, 40 “परमेश्वरै होखुरीकुङ मीमीक माडाङ्च खास्न याम्हने र होखुरीकुङ मीमन कठोर खास्न याम्हने। होटबाटै होखुरीकुङ मीमीकै माडाङ्ले, मीमनै माबुझडीस्ले र ङा लेठाङ ल्हेस्न मार्हाले। नभा च होखुरीक ङा लेठाङ ल्हेस्च लेया र ङै होखुरीककी गेपाक्की पर्च लेया।” 41 इसे कुरा चहीँ यशैया अगमवक्तै येशूओ बाड्को महीमा डाङार होसकुङ न बारेयाङ डेमन्या। 42 र पनी वास्टै यहूदी अगुवाकै येशूमीटाक विश्वास जाटा। टर फरीसीको खाटा होखुरीक बीर्हीछ बाटै लहे जाट्च विश्वासौ बारेयाङ सुकीर माडेया, हीजैडेनाङ अरुकै इसे कुरा थाहा डीन्छ लेनाङ होखुरीककी यहूदीकुङ सभाङुच इमलकीङ छ्युक्ङ याछ लेया। 43 हीजैडेनाङ होखुरीकै परमेश्वरलकीङ डुप्च प्रशंसा डेनाङ भर्मीकोलकीङ डुप्च प्रशंसा जाक्ङन्या। विश्वास माजाट्चकी न्याय जाट्ले 44 येशूये बाड्को सोरै डेया, “ङाकी विश्वास जाट्चये ङाकी मट्टै होइन, टर ङाकी बीर्न्हकाच मीटाक र विश्वास जाट्ले। 45 अनी सुये ङाकी डाङ्ले, होचे ङाकी बीर्न्हकाचकी र डाङ्ले। 46 ङा मीटाक विश्वास जाट्चको सुर छुम्ठाङ ङुकी मापर्ख्यौ डेयार ङा इसे संसाराङ ज्योति छानार राछ हो। 47 इडीक सुयेर ङौ बचन सेम र पालन माजाट्ले डेनाङ ङा होच्यो न्याय माजाट्ले। हीजैडेनाङ ङा संसारौ न्याय जाट्की राछ होइन, टर संसारकी जीवाक्की डेम राछ हो। 48 सुये ङाकी र ङौ बचनकी इन्कार जाट्ले होच्यो न्याय छान्ले। अन्टीम डीनाङ ङै ङाक्च इसे न बचनै होसकी न्याय जाट्ले। 49 हीजैडेनाङ ङै ङाल्हौ बीचारै ङाक्च होइन, टर ङै ही डेकी पर्च हो र कुटजाट्न डेकी पर्च हो, होसे पट्ट न कुराको ङाकी बीर्न्हकाच बोये न ङाकी आज्ञा याछ हो। 50 ङा वार्ल्हे, होसकुङ आग्यै सेन्र मासीच जीवन याल्हे। होटबाटै ङा ही ङाक्ले, होसे पट्ट न बोये ङाकी डेकी लैडीच अनुसार न ङा ङाक्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.