याकुब 3 - पुर्वीय मगरमेलेटकी अधिनाङ डाकी 1 ङौ विश्वासी डाजेभाइको र डै बहीनीको, नाखुरीक मीघ्याङ वास्टै जना शिक्षक छान्की मापानी। हीजैडेनाङ पाहाक्चकुङ च अरुकोलाक डेनाङ झन कठोर न्याय छान्ले डेच कुरा नाखुरीककी ठाहा न ले। 2 काल्हा पट्टकै धेरै भुल जाट्ले। टर कुसे भर्मीये लहे ङाक्च कुराङ भुल माजाट्ले, होचे लहौ पुरै शरीरकी र अधिनाङ डाकी य्होक्ले, अनी होसे न सिद्ध छान्च भर्मी हो। 3 घोडाकी लहे डेच मन्डीख्यौ डेयार मेङ्गेराङ लगाम काम याल्हे अनी होसकी कुलाक आलआल सेले, होलाक न कानै आल्खी य्होक्ले। 4 होटजाट्न न बा-बाड्सो जहाजको र बाड्को नाम्सुओ बलै नुङ्ङन लेनाङ र होसकी काट जहाज क्योट्च सीङौ बहनाकी कर्नढारै लहो इच्छा अनुसार कुलाक आल्खी मीमन सेले होलाक न आल्खी य्होक्ले। 5 होटजाट्न न मेलेट र काट मार्जा अङ्ग छान्नाङ र बा-बाड्सो कुराकुङ घमन्ड जाट्ले। आर्मीट्नी ट, कुटजाट्न म्हेओ काट मार्जा डेनाङ मार्जा झील्कै बा-बाड्सो जङ्गलकोलाक सीकाकार नास जाट्ले। 6 मेलेट र म्हे ल्याक्च न हो। इसे शरीरुङ अङ्गको मढ्य पट्ट डेनाङ दुष्ट हो। इचे पुरै शरीरकी न अशुद्ध खास्ले। अनी नरकीङ ख्योछ म्हेये होच्यौ जीवनकी न सीकाक्ङ याल्हे। 7 भर्मीये पट्ट न कीसीमुङ पसुको, भुर्च ग्वाजाको, झाङ घसारीसार व्हाच र डीयाङ व्हाच, जीवजन्तुकोलाक टह लैडीकी य्होक्ले, अनी भर्मीये न टह र लैडीमने। 8 टर मेलेटकी कुसे भर्मीये र टह लैडीकी माय्होक्ले। मेलेट चहीँ दुष्ट, टह मालक्डीस्च र बीर्हीमसेच बीसै न्हेप्च छान्ले। 9 अनी काल्है काल्हौ प्रभु परमेश्वर बोइकी इसे न मेलेटै प्रंशसा जाट्ले, र इसे न मेलेटै फेरी परमेश्वरौ सोरुपाङ खास्च भर्मीकोलाक सराप याल्हे। 10 इटजाट्न काट न मेङेरीङ प्रंशसा र सराप र ख्योल्हे। ए ङौ विश्वासी डाजेभाइको र डै बहीनीको, याङ्च च माछान्की पर्च हो! 11 ही काट न मुहानीङ जाप्च र खाच डी ख्योल्हे र? 12 ङौ विश्वासी डाजेभाइको र डै बहीनीको, अन्जीरौ म्यार्टुङाङ जैटुन स्याकी माय्होक्ले, र अङ्गुरौ म्यार्टुङाङ अन्जीर स्याकी माय्होक्ले। छा सेस्च डीयो मुहानीङ र जाप्च डी ख्योखी माय्होक्ले। साँचो बुद्धि परमेश्वर लकीङ राल्हे 13 नाखुरीकुङ मीघ्याङ सुर बुझकी र ग्यानी भर्मी ले डेनाङ होचे लहो सेछ चालचलन लकीङ बुद्धियो नम्रताङ काम जाटार टान्हाक्की पर्ले। 14 टर इडीक नाखुरीकुङ मीमनाङ आहारीस र स्वार्थ ले डेनाङ लहो बुद्धियो घमण्ड जाटार सत्यौ विरुधाङ पाप माजाट्नी। 15 याङ्च बुद्धि ढेनाम परमेश्वर लकीङ राछ होइन, इसे च संसार र शरीर लकीङ हो, अनी सैटान लकीङ राछ हो। 16 हीजैडेनाङ कुला आहारीस र स्वार्थ ले, होला भाँडभैलो र हरेक कीसीमुङ दुष्ट कामको छान्ले। 17 टर ढेनाम स्वर्गलकीङ राछ बुद्धि चहीँ शुद्ध छान्ले, शान्ति याछ, सोझो र खाट्चजा छान्ले। याङ्च बुद्धि दयालु छान्ले, र सेछ कामौ मीस्या स्याटाक्ले। इसे पक्षपाती र कपटी माछान्ले। 18 शान्ति राक्चकै मेलमीलापौ काम जाटार धार्मिकतौ मीस्या बटुलीले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.