प्रेरित 19 - पुर्वीय मगरपावल एफीसस सहराङ 1 अपोल्लोस कोरिन्थीयाङ लेनाङ पावल भीत्री एसीया इलाका छान्चै एफीसस सहराङ टाराहा। होचे होला कुडीक जना विश्वासी कोलाक र डुपा। 2 पावलै होखुरीककी डेया, “नाखुरीकै विश्वास जाट्नाङ पवित्र आत्मा डुपा?” होखुरीकै डेया, “पवित्र आत्मा ले डेच च कानै सेरमासेमे।” 3 अनी पावलै होखुरीककी गीना, “होट डेनाङ नाखुरीकै कुङ्च बप्तिस्मा ला ट?” होखुरीकै डेया, “युहन्नौ बप्तिस्मा।” 4 टब पावलै डेया, “युहन्नै याछ बप्तिस्मा चहीँ पश्चात्तापौ बप्तिस्मा लेया। होचे च ‘ङा डेनाङ न्हुइङ राछकी विश्वास जाट्नी’ डेयार भर्मीकोलाक सेटाका। होसे डेनाङ न्हुइङ राछ चहीँ येशू हो।” 5 इसे कुरा सेयार होखुरीकै प्रभु येशूओ म्यार्मीनाङ बप्तिस्मा ला। 6 जब पावलै होखुरीक मीटाक नीस न मीहुट डा र पवित्र आत्मा होखुरीक मीटाक राहा। अनी होखुरीक अन्य भासाङ ङाका र अगमवाणी जाटा। 7 होखुरीक जम्मा बार्ह जना लेया। 8 पावल सभा ङुच इमाङ नुङार सोम महीनासम्म परमेश्वरौ राज्यौ बारेयाङ होखुरीक खाटा साहास जाटार बहस जाट्चै भर्मीकोलाक बुझडीम याखी पा। 9 टर कुडीक जनै चहीँ मीमन कठोर खासार विश्वास माजाटा। होखुरीकै प्रभुओ लामौ बारेयाङ अरुकुङ अगाडी न विरोध जाट्चै मासेछ कुराको ङाक्की ठाला। होटबाटै पावल होखुरीककी डासार नुङा। विश्वासी कोलाक आल्हार टुरान्नस डेठुङ काट स्कुलाङ डीन-डीनै बहस जाट्चै डुप्म न ङुवा। 10 इसे काम नीस वर्ष सम्म छान्न न ङुवा होटबाटै एसीयाङ ङुच पट्ट न भर्मीकै यहूदी र ग्रीक नीसै न प्रभुओ बचन सेया। 11 परमेश्वरै पावलौ मीहुटीङ बा-बाड्सो अचम्मौ कामको जाटा। 12 इला सम्म छाना की भर्मीकै पावलौ जीवाङ रुमाल र मीज्याट्रो छुवाकार बीरामीको लेठाङ आल्न्हन्या। इटजाट्न होखुरीकुङ जीउलकीङ रोग गेप्न्या र दुष्टआत्मा र ख्योम्हन्या। 13 दुष्टआत्मा छ्युक्की डेम ठाउँ-ठावाङ छेर्हाम व्हाच कुडीक जना झारफुक जाट्च यहूदीकै र दुष्टआत्मा लग्ठीस्चकोलाक प्रभु येशूओ म्यार्मीन लाचै इट डेया, “पावलै प्रचार जाट्च येशूओ म्यार्मीनाङ ङा नाङ्की ख्योखी आज्ञा जाट्ले!” 14 होला काट जना स्केवास म्यार्मीनुङ यहूदी प्रधान पुजाहारीयो साट जना लेन्जा मीजाकै इसे काम जाट्नन्या। 15 टर दुष्टआत्मै होखुरीककी डेया, “येशूकी ङा चीन्डीले र पावलौ बारेयाङ र ङै सेमने टर नाखुरीक चहीँ सु हो?” 16 होसे दुष्टआत्मा लग्डीस्च भर्मी होखुरीक मीटाक फोर्जोछै राहार होखुरीक पट्टकी जुवार पछारीया। होटै होखुरीक होसे इमीङ नाङ्ग्या र घाइट्या छानार भोग्डीसा। 17 इसे कुरा एफीससाङ ङुच यहूदी र ग्रीककै सेया। अनी होखुरीक पट्टको बीर्हीया र प्रभु येशूओ म्यार्मीनौ प्रशंसा जाटा। 18 अनी विश्वास जाट्चको धेरै जना राहा र होखुरीकै लाहा-लहे जाट्च मासेछ कामकुङ बारेयाङ सुइकार जाटा। 19 होखुरीक मढ्याङ वास्टै जनै टुनामुना जाट्च लाहा-लहो कीताबको बटुलीयार राका र पट्टकुङ म्याहासाङ होखुरीकै सीकाक्ङ याहा। होसे कीताबौ मोल जाट्नाङ पचास हजार चाँडीयो सीक्कौ हीसाब छाना। 20 होटै इटजाट्न न प्रभुओ बचन शक्ति साली रुपाङ फैलडीस्चै नुङा। एफीसस सहराङ हुल्डुङ्गा 21 इसे घटनाको न्हुइङ, पावल माकेडोनीया र अखैयुङ लाम छान्चै यरूशलेम नुङ्च नीढो जाटा। होचे डेया, “होला टार्हखीङ च ङा रोम सहराङ र नुङ्की न पर्ले।” 22 होटै मेल्हौ नीस जना लाफा तिमोथी र इरास्तसकी पावलै माकेडोनीयाङ बीर्न्हका, टर मेल्हा चहीँ कालाप डीन एसीयाङ न ङुवा। 23 होडीक बेला एफीससाङ प्रभुओ लामौ बारेयाङ खुप खैलाबैला मचडीसा। 24 डेमेटीरीयस डेच काट जना भर्मी चाँडीयो सील्पकार लेया। होचे आर्तेमिस डेबीयो मन्दिरुङ ल्याक्च न चाडीयो मूर्तिको खास्नन्या। इसे काम लकीङ मेल्हार मेल्है काम जाट्की डाच कारीगरकै र साप्फी पैसा कमडीमन्या। 25 डेमेटीरीयसै मेन कारीगरको र अरु मेखुरीक लेखा न काम जाट्च भर्मीकोलाक भेला जाटार डेया, “ए भाइको, नाखुरीककी थाहा न ले, इसे ब्यापार लकीङ न काल्हाकै वास्टै पैसा कमडीमने। 26 नाखुरीकै डाङ्ने र सेमने, एफीससाङ मट्टै होइन टर पट्ट न एसीयाङ मीहुटै खास्च देवताको चहीँ हीर न होइन डेम होसे पावलै वास्टै जसो भर्मीकोलाक बहकडीमन ले। 27 इटजाट्न कानुङ ब्यापारौ मट्टै होइन, टर महान डेबी आर्तेमिसौ मन्दिर समेट बेकामुङ छान्ले। अनी पट्ट न एसीया र संसारभरीयुङ भर्मीकै मन्डीम राछ आर्तेमिस डेबी लहो इजटलकीङ झाल्ले।” 28 होटै इसे कुरा सेयार होखुरीक मीरीसै चुर छानार “एफीसीकुङ आर्तेमिस डेबी महान हो!” डेयार च्याक्की ठाला। 29 इटजाट्न पट्ट न सहराङ हल्ल-खल्ल मचडीसा र होखुरीक काट छानार पावलौ लाफा माकेडोनीया लकीङ राछ गायस र अरिस्तार्खसकी घोवार रङ्गसाला भीत्री आर्ढुस्चै आल्हा। 30 अनी पावल भर्मीकुङ भीडौ अगाडी नुङ्की मीमन जाटा, टर विश्वासीकै होसकी नुङ्की माय्हा। 31 एसीयुङ कुडीक जना हाकीमको र पावलौ लाफाको लेया। होखुरीकै र होसकी रङ्गसाला भीत्री मानुङ्की डेम बिन्ती जाटा। 32 टब होखुरीक भीन्डा-भीन्डै कुरा जाट्चै च्याक्की ठाला। होसे भीडाङ हल्ल-खल्ल छानन्या र वास्टै जसो भर्मीकै च होखुरीक हीजै भेला छान्च हो, होसे र थाहा मालेया। 33 होटै भीडुङ कुडीक जना यहूदीकै अलेक्जेन्डर डेच काट जना भर्मीकी अगाडी सारीया र होला ही छान्च हो डेम डेकी लैडीया। अनी होचे मीहुटै इसारा जाटार पट्टकी च्याक्की माय्हा र होखुरीकुङ म्याहासाङ हीर कुरा ङाक्की पा। 34 टर होखुरीकै होसकी यहूदी लेसा डेम थाहा छान्रखीङ होखुरीक पट्टको काट सोरै ओलमाओल नीस घन्ट टडीक “एफीसीकुङ आरटेमीस डेबी महान हो!” डेचै च्याका। 35 होसे सहरुङ हाकीमै भर्मीकोलाक च्याक्की माय्हा र सान्ट पार्यार डेया, “ए एफीससुङ भर्मीको, एफीसीकुङ सहर चहीँ महान आर्तेमिस डेबटौ मन्दिर र स्वर्ग लकीङ झाल्च होच्यौ मूर्तियो रक्षक हो डेच कुरा सुकी थाहा माले र? 36 इसे कुरा नाखुरीककी थाहा ले सुयेर होइन डेकी माय्होक्ले। होटबाटै नाखुरीक माच्याक्ङ ङुनी र मुर्ख छानार काम माजाट्नी। 37 हीजैडेनाङ नाखुरीकै घोम राक्च इसे भर्मीकै मन्दिरुङ हीर माखुस्ने र कानुङ डेबीयो अपमान र माजाट्नने। 38 इडीक डेमेटीरीयस र होच्यौ कारीगरको खाटा होखुरीकुङ विरुद्धाङ हीर कुराको ले डेनाङ अदालताङ नुङार उजुर जाट्की य्होक्ले। 39 टर इसे डेनाङ अरु न विषय ले डेनाङ होच्यौ फैसला चहीँ सधैँ ङुच सभाङ छान्ले। 40 हीजैडेनाङ छीनीयुङ इसे हुलडुङ्गौ दोष कानमीटाक पर्च खटरा ले। इसे हीर कारन बीनुङ हुलडुङ्गौ कान हीर जबाफ याखी माय्होक्ले।” 41 इट डेम भ्यारखीङ होसे हाकीमै भीड्की बिदा याहा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.