प्रेरित 15 - पुर्वीय मगरयरूशलेमुङ सभा 1 अनी कुडीक भर्मीकै यहूदिया लकीङ एन्टीओखीयाङ राहार विश्वासीकोलाक याङ्च शिक्षा पाहाक्की ठाला, “नाखुरीक मोशौ रीटीअनुसार खतना माजाटा डेनाङ च नाखुरीकुङ उद्धार छान्की माय्होक्ले।” 2 टब पावल र बारनाबासौ होखुरीक खाटा बीचारको माखाटा र वाद-विवाद छान्रखीङ होलुङ भाइकै पावल, बारनाबास र अरु कुडीक जनाकी इसे परस्नओ फैसलौ लागी प्रेरितको र अगुवाको लेठाङ यरूशलेम नुङ्की डेम भाका। 3 अनी मण्डलीयुङ सदस्यकै होखुरीककी होटै बिदा याहा। होखुरीक फोनीके र सामरीया छान्चै नुङ्नाङ अन्यजातिकै प्रभुकी ग्रहण जाट्च पट्ट न कुरा होखुरीककी सेटाका। इसे खबर सेरखीङ होलुङ पट्ट विश्वासीको एकदम आनन्दित छाना। 4 जब होखुरीक यरूशलेमाङ टाराहा टब होखुरीककी मण्डलीयुङ विश्वासी, प्रेरित र अगुवाकै स्वागट जाटा। अनी परमेश्वरै होखुरीक लकीङ जाट्च पट्ट न कामकुङ बारेयाङ होखुरीकै होला सेटाक्ङ याहा। 5 टर इसे कुरा सेरखीङ फरीसी दलुङ कुडीक जना विश्वास जाट्चकै टोङ्हार डेया, “अन्यजातिकुङ खतना छान्की र होखुरीककी मोशौ व्यवस्था मन्डीकी पर्ले डेम आज्ञा याखी न पर्ले।” 6 होटै इसे विषयो छलफल जाट्कीयो लागी प्रेरितको र अगुवाको भेला छाना। 7 अनी नीकै बेर सम्म वाद-विवाद छान्रखीङ पत्रुसै सोवार होखुरीककी डेया, “ए डाजे-भाइको, नाखुरीककी थाहा न ले, वास्टै समय अगाडी कुटजाट्न परमेश्वरै ङा लकीङ अन्यजातिकै सेछ समाचारौ बचन सेख्यो र विश्वास जाट्ख्यौ डेम नाखुरीकुङ मीघीङ ङाकी चुन्डीया। 8 र भर्मीकुङ मीमनुङ कुरा वार्छ परमेश्वरै होखुरीककी र काल्हाकी लेखा न पवित्र आत्मा याहार होखुरीककी ग्रहण जाट्च कुरा टान्हाका। 9 अनी होसकै होखुरीक र काल्हौ मीघ्याङ हीर भेदभाव माडा टर होखुरीकुङ मीमन चहीँ विश्वासै शुद्ध खास्न याहा। 10 होटबाटै अब अन्यजाति विश्वासीकुङ काढाङ इसे जुवा डाम याहार नाखुरीकै हीजै परमेश्वरौ परिक्षा जाट्ले? इसे जुवा न काल्हौ बोइ-बाज्युकै न ट काल्है न बुकी य्होक्ले। 11 टर कान विश्वास जाट्ले, की प्रभु येशूओ अनुग्रह लकीङ कानै उद्धार डुप्नने, होटजाट्न न होखुरीकै र डुप्नने।” 12 टब सभाङ ङुचको पट्ट न माच्याक्ङ ङुवा र अन्यजातिकुङ मीघ्याङ परमेश्वरै होखुरीक लकीङ कुङ्च चीन्हको र अचम्मुङ कामको जाटा होच्यौ बारेयाङ बारनाबास र पावलै बयान यान्हाङ पट्टकै ढ्यान याहार सेया। 13 होटै होखुरीक ङाक्ङ भ्यारखीङ याकुबै डेया, “ए डाजे-भाइको, ङौ कुरा सेनी, 14 परमेश्वरै लहो म्यार्मीनौ लागी अन्यजातिको लकीङ काट जाति भाक्च दया जाटा डेच कुरा सीमोनै डेम भ्यामने। 15 इसे न कुराखाटा अगमवक्ताकुङ बचन र खाट्ले, याङ्च रीक्ङने, 16 ‘इसे कुरा न्हुइङ ङा ल्हेस्ले र दाउदौ फुट्च घरानाकी ङा फेरी सोट्ले। र होच्यौ भट्कडीस्चकी ङा फेरी बलीयो खास्न याल्हे, 17 होटबाटै ङै लहो खास्की आर्घाच अरु अन्यजाति भर्मीको ङा लेठाङ राल्हे, 18 इसे कुरा परमप्रभुये डेमने, सुये खायाक लकीङ इसे कुराको जनडीमने।’” 19 याकुबै फेरी डेया, “होटबाटै ङौ बीचार इसे न हो, परमेश्वर पट्टी ल्हेस्च अन्यजातिकोलाक कान डुख माहीङ। 20 बरु होखुरीककी इट डेयार रीक्ङ कइङ की ‘मूर्तिकी चढडीच हीर ठोकको माज्याकी, व्यभिचार माजाट्की, मीघाटी युकार साट्च पसुकुङ स्या माज्याकी र य्हु र माज्याकी।’ 21 हीजैडेनाङ पहीलुङ पुस्ता लकीङ न सहरै पीच्छी मोशौ व्यवस्था पाहाक्ने, यहूदी सभाइमाङ इसे हरेक म्हुङ बाट्च डीनाङ परेस्न न ले।” विश्वास जाट्च अन्यजातिकोलाक रीक्च चीठी 22 प्रेरितको, अगुवाको र मण्डलीयुङ पट्ट न खाटार होखुरीक मढ्य लकीङ भर्मीको भाकार पावल र बारनाबासखाटा एन्टीओखीयाङ बीर्न्हकाकी मीमन जाटा। होखुरीक मढ्याङ नीस जना मुख्य भर्मीको, यहूदा डेच बारसाबास र सीलासकी चुन्डीया। 23 अनी होसे बुली जनौ मीहुटाङ होखुरीकै इट डेच चीठी याम्हका एन्टीओखीया, सीरीया र कीलीकीयाङ लेच अन्यजाति विश्वासी डाजे-भाइकोलाक, प्रेरितको र अगुवाकुङ अभिवादान। 24 कानुङ मीघीङ नुङार सु-सु भर्मीकै कानुङ आदेश बीना न उल्टो शिक्षा पाहाकार नाखुरीकुङ मीमन बीगारीम डुख याम्हने डेच कुरा कानै सेमने। 25 होटबाटै कान पट्टकै सहमटी जाट्च अनुसार कुडीक जना डाजे-भाइकोलाक चुन्डीयार होखुरीककी प्यारो बारनाबास र पावल खाटा नाखुरीक लेठाङ बीर्न्हकाकी कानकी सेम्ह सेया। 26 इसे नीस भर्मीको चहीँ याङ्च हो, होखुरीकै प्रभु येशू मुक्ति याछ ख्रीष्टौ खाटीर लहाकी जोखीमाङ पार्नने। 27 होटबाटै कानै यहूदा र सीलासकी बीर्न्हकामने। होखुरीकै र नाखुरीककी होसे न कुराको डेम याल्हे। 28 हीजैडेनाङ पवित्र आत्मा र कानकी इसे सेम्ह सेया र इसे खाँचो लेच कुराको डेनाङ अरु वास्टै नीयमकुङ भारी नाखुरीककी बुसाक्की माछान्ने। 29 अब नाखुरीकै मूर्तिकी चढडीच ठोकको माज्याकी, य्हु माज्याकी, मीघाटी युकार साट्च पसुकुङ स्या माज्याकी र व्यभिचार माजाट्की। नाखुरीकै इसे कुराको पालना जाटा डेनाङ नाखुरीक पट्ट कोलाक सेम्ह छान्ने। लौ छीनीयो लागी बिदा छानीङ। 30 बिदा यार्हखीङ होखुरीक एन्टीओखीयाङ टाराहा र मण्डलीयुङ पट्ट न भर्मीकोलाक भेला जाटार चीठी याहा। 31 अनी होसे हौसला याछै रीक्च अर्तीयो चीठी परेसार होखुरीक मार्हाङा। 32 यहूदा र सीलास मेखुरीक र अगमवक्ता लेचबाटै डाजे-भाइकोलाक वास्टै कुरा बचन लकीङ पाहाक्चै होखुरीककी विश्वासाङ बलीयो खासा। 33 अनी होखुरीक कालाप डीन होला ङुवा, र होलुङ विश्वासी डाजे-भाइकै आसीस याहार होखुरीककी बीर्न्हकाच डाजे भाइकोलेठाङ न ल्हेसार नुङा। 34 [टर सीलास चहीँ होला न ङुवा।] 35 पावल र बारनाबास एन्टीओखीयाङ न ङुवा। होखुरीक र अरुकै होला ङुठर प्रभुओ शिक्षा पाहाका र सेछ समाचार प्रचार जाटा। पावल र बारनाबास भाच 36 हीर समय न्हुइङ पावलै बारनाबासकी डेया, “अब कान नुइङ, कुसे-कुसे सहराङ कानै प्रभुओ बचन प्रचार जाट्न्या। होसे सहरकोवाङ ल्हेस्न नुङ्ङ विश्वासी डाजे-भाइकोलाक डुपीङ र होखुरीक कोङ्च ले ङोसीङ।” 37 बारनाबासै युहन्ना डेच मर्कूसकी र आल्छ मीमन जाटा। 38 टर पावलै चहीँ होसकी आल्खी मामन्डीया, हीजैडेनाङ होसे पामफीलीया लकीङ काम माभ्यामन न ल्हेस्नन्या। 39 होखुरीक मीघ्याङ काट हीर सल्लाह माखाट्चबाटै होखुरीक भा। बारनाबासै मर्कूसकी लार जहाजाङ काल्हार साइप्रसलाक नुङा। 40 होटै पावलै सीलासकी रोजडीया र विश्वासी डाजे-भाइकै आसीस ङेम्ह यारखीङ होखुरीक बिदा छानार नुङा। 41 कुटजाट्न होखुरीक सीरीया र कीलीकीया छान्चै नुङा होखुरीकै होला लेच मण्डलीयुङ विश्वासीकोलाक प्रभुवाङ बलीयो खासा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.