२ पट्रुस 3 - पुर्वीय मगरप्रभु राछ डीन 1 ङौ विश्वासी डाजेभाइको र डै बहीनीको, नाखुरीककी रीक्च इसे ङौ डोस्रो चीठी हो। इसे नीस चीठीयाङ न इसे कुराकुङ बारेयाङ आर्मीटाकार नाखुरीकुङ मीमनाङ शुद्ध बीचार छान्ख्यौ डेयार उट्साह याखीयो लागी हो। 2 वास्टै वर्ष अगाडी पवित्र अगमवक्ताकै ङाक्च कुरा र प्रेरितकै डेच कानुङ प्रभुओ आज्ञा र होसकै मुक्ति याछ कुराकी आर्मीट्न ङुनी डेच मीमन जाट्ले। 3 पट्ट डेनाङ पहीला नाखुरीकै इसे वार्खी पर्ले, की अन्ट्यौ डीनकोवाङ लहो न छाडा चालाङ क्योस्च भर्मीको राल्हे। होखुरीकै नाखुरीककी गील्ला जाट्ले, 4 अनी डेले, “ख्रीष्टै राल्हे डेयार प्रतिज्ञा जाट्च होइन? खोइ कुला नुङा? कानुङ खायाकुङ ख्रीष्टीयन अगुवाको सीयार नुङा, टर संसारौ सृष्टि छान्च लकीङ छान्न राछ कुराको चाहाँसम्म र लेमैले।” 5 होखुरीक वार्न्ह-वार्न्ह र सृष्टियो कुराकी मावार्न्हाङ लेखा जाट्ले। परमेश्वरै लहो बचन लकीङ न स्वर्ग र पृथ्वी खासा। पृथ्वी डी लकीङ छ्युकार डीये न खासा। 6 डी लकीङ न होसे पुरानो संसार डीयो प्रलय छानार नास छाना। 7 टर चाहाँ लेच सर्घा र पृथ्वी र म्हेये भस्म जाट्कीयो लागी परमेश्वरौ बचनै न जोगडीम डामने। अनी परमेश्वरौ आज्ञा मामन्डीच भर्मीकुङ इन्साफ र नास माछान्ठर सम्मौ लागी सर्घा र पृथ्वी ङुम न ङुले। 8 टर ङौ विश्वासी डाजेभाइको र डै बहीनीको, इसे काट कुरा माम्य्हाक्नी। प्रभुओ लागी कायाक हजार वर्ष लेखा र हजार वर्ष कायाक लेखा न हो। 9 कुडीक जना भर्मीकै बीचार जाट्च लेखा प्रभु लहो प्रतिज्ञा पुरा जाट्की ढीलो माजाट्ले। टर होसकै नाखुरीककी लेन्न ङुमने। हीजैडेनाङ परमेश्वरौ इच्छा इसे हो की नाखुरीक मढ्याङ सुर नास माछान्ख्यो, टर पट्ट न भर्मीकै लहो पापको डासार परमेश्वर पट्टी ल्हेस्ख्यो। 10 टर प्रभुये न्याय जाट्च डीन च होसको खुस लेखा न मोसोमायाङ राल्हे। होसनीक सर्घा बाड्को आवाजाङ गर्जडीसार म्हाट्ले र सर्घाङ लेच नाखान, ग्याहोट, टुगाको पट्ट न सीकार भस्म छान्ले। पृथ्वी र पृथ्वीयाङ लेच पट्ट न कुराको नास छान्ले। 11 इटजाट्न पट्ट न कुराको नास छानार नुङ्च बाटै नाखुरीक कुङ्च खालुङ भर्मी छान्की पर्च हो? नाखुरीकुङ जीवन पवित्र र परमेश्वरकी चढडीच छान्की पर्ले। 12 नाखुरीकै परमेश्वरौ न्याय जाट्च डीन लेन्नाङ इसे छीट्टो राखीयो लागी डेयार जाट्की य्होक्ठर कोसीस जाट्नी। होडीक न बेला सर्घाङ लेच पट्ट न ठोक म्हेये सीकार भस्म छान्ले अनी होच्यो खान्छये टुगाको बेलीसार नुङ्ले। 13 टर काल्हौ परमेश्वरै प्रतिज्ञा जाट्च नयाँ स्वर्ग र नयाँ पृथ्वीयो लाम ङोस्ले। होला लेच पट्ट न भर्मीकै ही ठीक हो होसे मट्टै जाट्ले। 14 होटबाटै ङौ विश्वासी डाजेभाइको र डै बहीनीको, नाखुरीक होसे डीनकी लेन्चको लेच बाटै परमेश्वरौ म्याहासाङ शुद्ध र निर्दोष छानार परमेश्वरखाटा शान्तियाङ ङुकी य्होक्ठर कोसीस जाट्नी। 15 इसे कुरा नाखुरीकै माम्य्हाक्नी प्रभु धैर्य जाट्की य्होक्च ले हीजैडेनाङ भर्मीको जीवाख्यो डेच होसकुङ मीमन ले। कानुङ प्यारो भाइ पावलै र परमेश्वरखाटा डुप्च ज्ञान लकीङ इसे न कुरा नाखुरीककी रीक्ङन्या। 16 पावलै रीक्च पट्ट न चीठीयाङ इसे न कुराको रीक्ङने। होचे रीक्च कुडीक कुराको बुझडीस्की गार्हो छान्ले। ठोरै परेस्चको र चन्चले भर्मीकै इसे कुराकी उल्टो अर्थ र लैडीले। होखुरीकै अरु धर्मशास्त्रौ र होटजाट्न न अर्थ लैडीले। इटजाट्न होखुरीकै लाहाकी न नास जाट्ले। 17 ङौ विश्वासी डाजेभाइको र डै बहीनीको, नाखुरीकै इसे पट्ट न कुराको अगाडी न वार्न्ह भ्यामने। होटबाटै दुष्ट भर्मीकै नाखुरीककी अलमलडीकी माय्होक्ख्यो डेयार होसीयार छान्नी अनी लहे टेक्डीच ठाउँ लकीङ नाखुरीक माकुर्हुले। 18 टर कानुङ प्रभु र मुक्ति याछ येशू ख्रीष्टौ अनुग्रह र ज्ञानाङ ल्होङ्चै नुङ्नी। चाहाँ र सधैँभरी होसकुङ न महीमा छान्ख्यौ। आमेन! |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.