१ टीमोठी 2 - पुर्वीय मगरमण्डलीयो प्रार्थना 1 अब पट्ट डेनाङ पहीला ङा नाकोकी निवेदन जाट्ले, पट्ट न भर्मीकुङ लागी प्रार्थना, अन्टरबीन्टी र धन्यवाद याछ जाट्नी। 2 राजाको र पट्ट न बाड्को पडाङ लेच सरकारी अधिकारीकुङ लागी र प्रार्थना जाट्च जाट्नी। होट जाट्नाङ कानै सुख शान्तिखाटा पट्ट समय परमेश्वरौ न भक्ति र ढ्यानाङ लग्डीसार आदरौ जीवन जीवाकी य्होक्ले। 3 इटजाट्न प्रार्थना जाट्नाङ चहीँ कानकी मुक्ति याछ कानुङ परमेश्वरकी जाक्ङ सेले। 4 पट्ट न भर्मीको जीवाख्यौ र सत्यकी चीन्डीख्यौ डेच होसकुङ इच्छा हो। 5 हीजैडेनाङ परमेश्वर काट मट्टै ले। अनी परमेश्वर र भर्मीयो मीघ्युङ सम्बन्ध खाटाक्च र काट मट्टै ले। इसे खाटाक्च भर्मी चहीँ ख्रीष्ट येशू हो। 6 पट्ट न भर्मीकुङ लागी छुटकारा याछ डामौ रुपाङ होसकै लाहाकी बली याहा। पट्ट न भर्मीको जीवाख्यौ डेच परमेश्वरौ मीमन हो, र इसे कुरौ प्रमाण ठीक समयाङ याहा। 7 इच्यो लागी न प्रभुये ङाकी प्रचारक र प्रेरित खासार, परमेश्वरौ विश्वास र सत्यौ बारेयाङ अन्यजाति भर्मीकोलाक पाहाक्की र सेछ समाचार सेटाक्की डेम बीर्न्हकाच हो। ङै साँच्ची न डेच हो, ङा माढाट्डीले। 8 होटबाटै पट्ट न ठावाङ लेन्जा भर्मीकै मीरीस माख्योम्ह र वाद विवाद माजाट्न निर्दोष मीहुट सोटार प्रार्थना जाट्ख्यौ डेच ङौ मीमन ले। 9 होटजाट्न न मास्टो भर्मीकै र लाहाकी ज्योस्च बढीनको बील्ख्यौ। मीछामकी साप्फी सीङ्गारीयार, सुन, मोटी र डामी बढीनको बील्हार चहीँ होइन, 10 टर परमेश्वरौ भक्ति जाट्च मास्टो भर्मीकै चहीँ लाहाकी ज्योस्च र सेछ कामको जाट्ख्यौ। 11 मास्टो भर्मीको अगुवाकुङ अढीनाङ माच्याक्ङ ङुवार अटपहे। 12 मास्टो भर्मीये लेन्जा भर्मीकी शिक्षा याखी र होखुरीक मीटाक अधिकार क्योट्की चहीँ ङा अनुमटी माय्हाले। होसे माच्याक्ङ न ङुख्यौ। 13 हीजैडेनाङ परमेश्वरै आदमकी पहीला खास्च हो, होटै न्हुइङ मट्टै हब्बाकी खास्च हो। 14 ढाट्डीस्च आदम होइन, टर हब्बाकी चहीँ शैतानै ढाट्डीच हो, होटबाटै होचे परमेश्वरौ आज्ञाकी भङ्ग जाटार पापाङ पर्च हो। 15 टर मास्टो भर्मीको इडीक नम्र छानार, विश्वास, प्रेमाङ र पवित्र छानार ङुवा डेनाङ मीजा डीन्छ अवस्ठा छानार नुङ्नाङ परमेश्वरै होसकी जीवाटाक्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.