१ टीमोठी 1 - पुर्वीय मगर1 कानकी मुक्ति याछ परमेश्वर र आशा याछ ख्रीष्ट येशूओ आज्ञा अनुसार ख्रीष्ट येशूओ प्रेरित छान्च ङा पावलै, 2 विश्वासाङ ङाल्हौ न लेन्जा मीजा लेखा न तिमोथीकी इसे चीठी रीक्ङन ले। परमेश्वर बोइ र कानुङ प्रभु ख्रीष्ट येशूये नाकोकी अनुग्रह, कृपा र शान्ति याख्यौ। झुटो शिक्षा लकीङ होसीयार 3 ङा माकेडोनीया नुङ्नाङ नाकोकी एफीससाङ ङुनी डेयार ङै कर लैडीमन्या, होला कुडीक जनै झुटो शिक्षा पाहाक्ङन ले, होखुरीककी मापाहाक्की डेयार रोकडीकी नाको होला न ङुनी। 4 नाकै होखुरीककी दन्त्य कठाको र माटुङ्गडीस्च बङ्सवलीको पट्टी अल्मडीस्की माय्हानी, हीजैडेनाङ इसे कुराकै च व्यार्थौ वाद विवाद छ्युक्ले र विश्वासलकीङ छान्च परमेश्वरौ कामाङ सङ्खा मट्टै बड्डीले। 5 कानै याछ इसे शिक्षौ उदेश्य प्रेम हो, होसे चोखो मीमन, सेछ बीबेक र साँचो विश्वासलकीङ राल्हे। 6 अनी कुडीक भर्मीको चहीँ इसे कुराकोलकीङ बरालीसार व्यार्थौ छलफलाङ अल्मडीस्न ङुमने। 7 होखुरीक व्यवस्था पाहाक्च गुरु हो डेम चीन्डीयाक्च मीमन च जाट्ले, टर लहे ङाक्च कुरा अठबा लहे टोक्डीयार डेच कुरा लेनाङ र होसे होखुरीक लहे न माबुझडीस्ले। 8 कानकी ठाहा ले इडीक सेम्हखाटा क्योटा डेनाङ व्यवस्था सेछ हो। 9 होटबाटै कानकी ठाहा ले, व्यवस्था सेछ भर्मीयो लागी खास्च होइन। टर व्यवस्था उलङ्घन जाट्च, अपराधि, परमेश्वरकी मामन्डीच, पापी, अपवित्र र दुष्ट भर्मीको, मोइ-बोइकी साट्च अठबा भर्मी साट्चकुङ लागी, 10 व्यभिचारीको, समलीङ्गी सम्बन्ध डाचको, दास खास्की भर्मीकी अपहरन जाट्चको, झुटो ङाक्च, झुटो गबाही याछको र सत्य शिक्षौ विरुधाङ काम जाट्चकुङ लागी खास्च हो। 11 इसे काल्हौ शिक्षा चहीँ प्रचार जाट्की डेम परमधन्य परमेश्वरै ङाकी याछ महीमीत सेछ समाचार अनुसार ले। पावलकी परमेश्वरौ कृपा 12 होसकुङ काम जाट्कीयो लागी ङाकी शक्ति याछ कानुङ प्रभु ख्रीष्ट येशूकी ङा धन्यवाद याल्हे। हीजैडेनाङ होसकै ङाकी विश्वासयोग्य ठान्डीयार लहो सेवाङ लैडीया। 13 छान्कीयो लागी च ङै पहीला होसकुङ निन्दा जाटा, होसकोकी विश्वास जाट्च भर्मीकोलाक खेडो जाटा र अपमान जाटा। टर होडीक बेला ङौ विश्वास मालेया, र इसे कुराको ङै माव्हार्न न जाट्च बाटै ङाकी ख्रीष्टै कृपा जाटा। 14 अनी कानुङ प्रभु येशूओ अनुग्रह ङा मीटाक प्रशस्तखाटा राहा, र ख्रीष्ट येशूवाङ डुप्च विश्वास र प्रेम ङौ जीवनाङ परमेश्वरै न ङाकी याहा। 15 ख्रीष्ट येशू पापीकोलाक जीवाक्की संसाराङ राछ हो, इसे कुरा पट्टये मन्डीकी पर्च सत्य कुरा हो। अनी पापीको मढ्याङ ङा चहीँ पट्ट डेनाङ पापी हो। 16 टर येशू ख्रीष्टै ङा मीटाक सेन्र माभ्याच कृपा टान्हाकार ङा ल्याक्च पट्ट डेनाङ पापीकी लोहो धैर्य टान्हाक्की होसकै ङाकी काट नमुना खासा। अनी इसे नमुना चहीँ ङा डेनाङ न्हुइङ ख्रीष्टकी विश्वास जाट्च र सेन्र मासीच जीवन डुप्च भर्मीकुङ लागी हो। 17 अब सधैँभरीयुङ राजा, सधैँभरी जीवाम ङुच अनी जुन की कानै डाङ्की माय्होक्ले होसकोकी न आदर र महीमा सधैँभरी छान्ख्यो। होसको काट मट्टै परमेश्वर हो! आमेन। 18 ए मीजा तिमोथी, पहीलालकीङ न नुओ बारेयाङ अगमवाणीको लकीङ ङाक्च बचन अनुसार ङा नाङ्की इसे आज्ञा याम्ह न ले। नाकुङ बारेयाङ ङाक्च बचन आर्मीटार असल लडाइँ जाटो। 19 नाकै लहो विश्वास र सेछ बीबेककी माडास्की। हीजैडेनाङ बीबेकै डेच कुरा मागन्डीनाङ कुडीक जनौ विश्वास न नस्ट छानार नुङा। 20 होखुरीक मढ्याङ हुमेनीयस र अलेक्जेन्डर हो। परमेश्वरौ विरोधाङ ङाक्की माछान्च लेसा डेच कुरा अटपहे डेयार ङै होखुरीक नीसकी शैतानौ मीहुटाङ जीम्मा याम्हने। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.