Marcos 3 - Eibangeilhos en Mirandês

Mano seca que fui sana al sábado

¹ Tornou a antrar na sinagoga i staba alhá un home que tenie la mano seca.

² Mirában para el a ber se sanaba al sábado i assi tenéren modo de lo acusar.

³ Jasus dixo-le al home que tenie la mano seca: «Ben pa l meio.»

⁴ Diç-le, anton, a eilhes: «Al sábado, debe de se fazer bien ou mal? Debe de se salbar ũa bida ou perdé-la?» Mas eilhes quedában calhados.

⁵ Anton, Jasus, botando-le uns uolhos anrabiados i triste por ber ls coraçones deilhes tan ancalhados, dixo-le al home: «Stica la mano.» El sticou-la i la mano del quedou sana.

⁶ Ls fariseus salírun deilhi mui debrebe, ajuntórun-se culs partidários de Harodes i fazírun un cunceilho contra el, para achar modo de dáren cuonta del.

Ls juntouros de giente ban a tener cun Jasus

⁷ Jasus fui-se, culs sous deciplos, para an pie de l mar cun un grande juntouro de giente que benie atrás del zde la Judeia,

⁸ de Jarusalen i de la Eidumeia i tamien de l lhado d’alhá de l Jordan i de ls alredores de Sídon i Tiro, muita giente bieno a tener cun el pa lo oubir i ber l que fazie.

⁹ Abisou ls sous deciplos pa que le tubíran ũa barca purparada para que aqueilha giente toda nun l ambarrasse.

¹⁰ Cumo sanou a muita giente, ls que tenien algue malina atirában-se acontra el para le topáren.

¹¹ I ls spritos malos, quando l bien, botában-se-le als pies i boziában, dezindo: «Tu sós l filho de Dius!»

¹² Mas el ourdenaba-le cun to la fuorça para nun lo apersentáren.

Ls nomes de ls apóstelos

¹³ Apuis, chubiu-se a un cabeço, chamou cun el ls que el quijo i eilhes fúrun-se a tener cun el.

¹⁴ Scolhiu doze para stáren cun el i para ls mandar a pregar,

¹⁵ tenendo l poder de botar ls demonhos pa la rue.

¹⁶ Scolhiu a Simon, que le chamou Pedro;

¹⁷ a Tiago, filho de Zebedeu, i a Juan, armano de Tiago, i dou-le l nome de Boanerges, l que quier dezir, «filhos de l truono»;

¹⁸ a Andrés, a Felipe, a Burtelameu, a Mateus, a Tomé, a Tiago, filho de Alfeu, a Tadeu, a Simon, l cananeu,

¹⁹ i a Judas Scariotes, que fui quien lo atraiçonou.

Ls miedos de la família de Jasus

²⁰ Apuis tornou para casa. Ende, bieno outra beç tanta giente a tener cun el que nien l deixában quemer un cachico de pan.

²¹ Quando ls sous soubírun l que se passaba, salírun a ber se fazien bida del, puis dezien: «El puso-se boubo.»

Defénsia de Jasus

²² I ls scribas, que habien benido de Jarusalen, dezien: «Ten l diabro andrento» i inda: «Ye cul poder de l xefe de ls demonhos que el bota ls demonhos pa la rue.»

²³ El chamou-los i dixo-le por meio de parábolas: «Cumo puode Satanás spulsar a Satanás?

²⁴ Se un reino se debide contra el mesmo, esse reino nun se puode aguantar.

²⁵ Se ũa casa se debide contra eilha mesma, essa casa nun ye capaç de s’aguantar.

²⁶ I se Satanás s’alhebantou contra el mesmo i stá debedido, nun se puode aguantar, mas stá a chegar a las últimas.

²⁷ La berdade ye que naide puode antrar an casa dũa pessona mui fuorte i roubá-le l que ten sien purmeiro la prender i solo apuis le roubará la casa.

²⁸ Quedai bien ciertos de l que bos digo: Als filhos de ls homes seran-le perdonados todos ls pecados i las malas palabras que dezíren;

²⁹ mas quien falar contra l Sprito Santo nunca tenerá perdon, mas l crime del será eiterno.»

³⁰ Dixo estas cousas porque dezien: «Ten l diabro andrento del.»

La berdadeira família de Jasus

³¹ Anton, la mai i ls armanos del, que quedórun na rue, mandórun-lo chamar.

³² Staba muita giente sentada alredror del, que le dezie: «Mira, tue mai i tous armanos i tues armanas stan na rue a spera de ti.»

³³ El respundiu-le, dezindo: «Quien ye mie mai i quien son mius armanos?»

³⁴ I mirando bien para todos ls que stában sentados alredror del, dixo-le: «Eiqui stá mie mai i mius armanos.

³⁵ L que fazir l que miu pai quier, esse ye miu armano, mie armana i mie mai.»