Juan 1 - Eibangeilhos en Mirandês

ANTRADA

¹ Al ampeço eisitie la Palabra, la Palabra staba a la par de Dius i la Palabra era Dius.

² Eilha staba, al ampeço, a la par de Dius.

³ Todo fui feito por eilha i, de todo l que fui feito, nada fui feito sien eilha.

⁴ Neilha staba la Bida i la Bida era la Lhuç de ls homes.

⁵ La lhuç relhumbra ne l scuro mas la scuridon nun la quijo.

⁶ Apareciu un home, ambiado por Dius, que le chamában Juan.

⁷ El bieno cumo teçtemunha para que dira teçtemunho de la lhuç para que todos, por el, acraditáran.

⁸ Nun era el la lhuç mas para que teçtemunhara de la lhuç.

⁹ Habie ũa lhuç berdadeira que alhumbra a cada home que ben al mundo.

¹⁰ Eilha staba ne l mundo, l mundo fui criado por eilha, mas l mundo nun la coinciu.

¹¹ Eilha bieno pa l que era sou i ls sous nun la recebírun

¹² Mas a todos aqueilhes que la recebírun, dou-le l poder de se tornáren filhos de Dius: a todos ls que acradítan ne l sou nome,

¹³ ls que nun nacírun de l sangre, nien de buntade de carne, nien de buntade de l home, mas que nacírun de Dius.

¹⁴ I la Palabra ancarnou i bieno a morar cun nós i nós bimos la sue glória, la glória de Filho morgado de l Pai, cheno de grácia i de berdade.

¹⁵ Juan dou teçtemunho del i boziou, dezindo: «Este ye Aquel de quien bos dixe: Aquele que bieno apuis de mi fui criado antes de mi, porque yá eisistie antes de mi.»

¹⁶ I todos nós recebimos de la sue riqueza ũa grácia atrás la outra.

¹⁷ Porque la lei fui-mos dada por Moisés, mas la grácia i la berdade fúrun feitas por Jasus Cristo.

¹⁸ Nunca naide biu a Dius, fui l Filho único que stá an pie l Pai que mos lo amostrou

MENISTÉRIO PÚBLICO DE JASUS Demostra-se que Jasus ye Filho de Dius i l Messias. Juan Batista anúncia a Cristo

¹⁹ I fui este l teçtemunho de Juan quando ls judius le mandórun saçardotes i lhebitas de Jarusalen, para le preguntáren: «Tu quien sós?»

²⁰ El cunfessou i nun negou. El cunfessou: «You nun sou l Messias.»

²¹ Anton preguntórun-le: «Sós tu Eilias?» El respundiu-le: «Nó, nun sou.» «Sós l porfeta?» «Nó», respundiu-le el.

²² Dezírun-le anton: «Diç-mos alhá quien sós para que puodamos dar ũa sastifaçon a aqueilhes que mos mandórun. L quei dizes de ti mesmo?»

²³ Juan respundiu-le: «You sou la boç que bózia ne l zerto: Alisai l camino de l Senhor, cumo dixo l porfeta Eisaías.»

²⁴ Ls que habien sido mandados éran de ls fariseus

²⁵ i anterrogórun-lo assi: «Anton porque ye que batizas se nien sós l Messias nien Eilias nien l porfeta?»

²⁶ Juan respundiu-le, dezindo: «You batizo cun auga, mas antre bós stá quien nun coinceis.

²⁷ Esse ye aquel que bieno apuis de mi, que fui criado antes de mi i you nien sequiera sou merecedor de le zatar las correias de ls çapatos.»

²⁸ Estas cousas dórun-se an Betánia, de l lhado dalhá de l riu Jordan, adonde Juan staba a batizar.

Mirai l Cordeiro de Dius

²⁹ A soutordie, Juan biu que Jasus benie a tener cun el i dixo: «Mirai l Cordeiro de Dius, que tira l pecado de l mundo.

³⁰ Este ye aquel de quien you dixe: Apuis de mi bai a benir un home que me ganhou la delantreira, porque yá eisistie antes de mi.

³¹ You nun l coincie, mas fui para que el se podira apersentar a Eisrael que you bin a batizar an auga.»

³² I Juan dou l sou teçtemunho, dezindo: «You bi l Sprito Santo a abaixar de l cielo, an figura de palomba, i pousou anriba del.

³³ You nun l coincie, mas aquel que m’ambiou a batizar an auga, dixo-me: “Aquel porriba de quien bires abaixar l Sprito i aparar anriba del, ye esse que batiza ne l Sprito Santo.”

³⁴ I you bi i dei teçtemunho de que el ye l Filho de Dius.»

Son chamados ls purmeiros deciplos

³⁵ A soutordie staba outra beç alhá Juan i dous deciplos del.

³⁶ I bolbendo ls uolhos para Jasus, que passaba puli, dixo: «Mirai l cordeiro de Dius.»

³⁷ Mal apenas lo oubírun falar, ls dous deciplos fúrun-se atrás de Jasus.

³⁸ Mas Jasus bolbiu-se i al ber que eilhes íban atrás del, dixo-le: «De que andais a saber?» Eilhes respundírun-Le: «Rabi» – l que quier dezir mestre – «adonde morais?»

³⁹ «Beni i bede», dixo-le el. Anton eilhes fúrun i bírun adonde moraba i quedórun cun el aquel die. Yá éran por ende las quatro de la tarde.

⁴⁰ Andrés, armano de Simon Pedro, era un de ls dous que habien oubido falar a Juan i habien ido atrás de Jasus.

⁴¹ El dou de caras purmeiro cul armano Simon i dixo-le: «Ancuntremos l Messias» – que quier dezir Cristo.

⁴² I lhebou-lo a Jasus. Anton, Jasus mirou-lo bien i dixo-le: «Tu sós Simon, filho de Juan. Bás-te a chamar Cefas» – que quier dezir Piedra.

⁴³ A soutordie treminou a ir pa la Galileia. Ancuntrou a Felipe i dixo-le: «Ben cumigo.»

⁴⁴ Felipe era de Betsaida, la cidade de Andrés i de Pedro.

⁴⁵ Felipe ancarou cun Natanael i dixo-le: «Ancuntremos a Jasus, filho de Jesé de Nazaré, aquel a respeito de quien Moisés screbiu, na Lei, i tamien ls porfetas.»

⁴⁶ I dixo-le Natanael: «Achas que de Nazaré puode salir algo de buono?» Felipe respundiu-le: «Ben i berás.»

⁴⁷ Jasus biu benir a Natanael a tener cun el i dixo a respeito del: «Ende ben un berdadeiro eisraelita, an quien nun hai falsidade.»

⁴⁸ Natanael dixo-Le: «De adonde me conheces?» Jasus respundiu-le, dezindo: «Antes que Felipe te chamara, bi-te you quando stabas ambaixo la figueira.»

⁴⁹ Natanael respundiu-le, dezindo: «Rabi, tu sós l Filho de Dius, tu sós l rei d’Eisrael.»

⁵⁰ Jasus respundiu-le, dezindo: «Porque te dixe que te bi ambaixo la figueira yá acraditas? Berás cousas inda mais grandes.»

⁵¹ I dixo-le inda: «Quedai bien ciertos de l que bos digo: Bereis l cielo abierto i ls anjos de Dius a chubir i a abaixar porriba l Filho de l Home.»