เปโตร เนอบ่า ต๊าบ่า 2 - Eastern Kayah Shadaw Dialectꤞꤢꤚꤢ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ 1 ꤖꤚꤢꤩ꤬ꤖꤚꤥ꤬ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ ꤥ꤬ꤓꤢꤧ꤬ꤜꤥ꤭ ꤓꤥ꤭ꤟꤣꤧ ꤘꤣ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤢ꤬ꤊꤜꤢꤩ꤭ ꤘꤣ ꤔꤣꤧ꤬ꤋꤢꤩ꤭ ꤟꤣꤧ꤯ ꤞꤢꤧꤟꤢꤨꤔꤣꤧ꤬ꤟꤣꤧ, ꤞꤢꤚꤢ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤟꤢꤧ꤭ ꤥ꤬ꤓꤢꤧ꤬ꤜꤥ꤭ ꤊꤣꤧ꤭ ꤘꤣ ꤞꤤ꤭ꤊꤜꤢꤩ꤭ ꤕꤢ꤭꤯ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤖꤛꤢꤟꤢꤧ꤭ꤟꤥ꤬ꤔ꤫ꤤ꤬ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ꤞꤢꤦ ꤘꤣ ꤢ꤬ ꤗꤢꤩ꤬ꤕꤛꤢꤒꤢꤩ꤬ ꤒꤣꤧ꤬ꤟꤢꤩ꤬ ꤕꤢ꤭꤯ ꤢ꤬ ꤊ꤫ꤢꤦ꤬ ꤓꤢꤩꤏꤢꤦ꤬ꤊꤢꤧ꤭ ꤡꤣꤧ ꤙꤢꤧ꤬ꤡꤢꤩ꤬ ꤘꤣ ꤢ꤬ ꤤ꤬ꤓꤢ꤬ꤊꤢ꤬ ꤓꤥ꤭ꤟꤣꤧ ꤛꤢꤩ꤬ꤞꤤ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤕꤢ꤭꤯ ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤕꤛꤢꤊꤢꤧ꤭ ꤜ꤫ꤢꤩ꤬ꤖꤚꤢꤧ꤭ ꤛꤢꤩ꤬ꤞꤤ꤭ ꤕꤢ꤭꤯ 2 ꤚꤣꤧ꤬ ꤊꤣꤧ꤬ꤛꤢꤧ꤭ ꤊ꤫ꤢꤦ꤬ ꤋꤚꤝꤢ꤭ꤢꤩꤊꤣꤧ꤭ ꤔꤢꤧ꤬ꤡꤣꤧ ꤛꤢꤩ꤬ꤞꤤ꤭ ꤊꤜꤢꤧ ꤘꤣ ꤢ꤬ ꤜꤢꤦ꤬ ꤞꤝꤤ꤬ꤓꤣꤧ꤭ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ꤞꤤꤜꤢꤪ꤭ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤣꤧ꤭ꤔꤣꤧ꤬ ꤒꤣꤧ꤬ꤟꤢꤩ꤬ ꤕꤢ꤭꤯ ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤊꤣꤧ꤬ꤛꤢꤧ꤭ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ ꤟꤢꤩꤙꤢꤩ꤬ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤡꤣꤧ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤢ꤬ꤊꤜꤢꤧ ꤕꤢ꤭꤯ 3 ꤞꤢꤚꤢ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤘꤣ ꤢ꤬ ꤒꤢꤩ꤬ꤗꤢꤧꤕꤢꤨ꤭ ꤊꤢꤨꤠ꤫ꤢ꤬ꤊꤢꤨꤠꤢꤩ꤭ ꤢꤩ꤬ꤚꤣꤧꤘꤢꤦ꤬ ꤢ꤬ꤑꤢꤩ꤭ ꤔꤢꤧ ꤢ꤬ ꤘꤢꤧ ꤜꤣꤧ꤬ꤟꤥ꤭ꤡ꤫ꤢꤧ꤬ ꤕ꤫ꤢꤩ꤬ ꤞꤤ꤭ ꤒꤢꤩ꤬ꤘꤥ꤬ꤔꤢꤧ꤭ ꤘꤣ ꤢꤨ꤭ ꤡ꤫ꤢꤧ꤬ꤘꤢꤧꤊꤢꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤚꤣꤧ꤬ ꤢ꤬ ꤗꤢꤧꤕꤢꤨ꤭ ꤗꤢꤩ꤬ꤢꤩ꤬ꤏꤢꤩ꤬ ꤘꤣ ꤞꤤ꤭ꤋꤢꤨ꤬ ꤕꤢ꤭꤯ ꤖꤚꤢꤩ꤬ ꤘꤣ ꤢ꤬ ꤊ꤫ꤢꤦ꤬ ꤘꤣꤧꤡꤢ꤭ ꤛꤢꤩ꤬ꤞꤤ꤭ ꤔꤣꤧ꤬ ꤢ꤬ ꤥ꤬ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤥ꤬ꤔꤢꤩ꤬ ꤢ꤬ꤔ꤫ꤢꤩ꤬ ꤑꤢ꤭ꤜꤥ꤬ꤟꤣꤧ, ꤓꤥ꤭ꤚꤣꤧ꤬ ꤘꤣ ꤢ꤬ ꤊ꤫ꤢꤦ꤬ ꤗꤢꤩ꤬ꤕꤛꤢꤊꤢꤧ꤭ ꤛꤢꤩ꤬ꤞꤤ꤭ ꤢ꤬ꤑꤢꤩ꤭ꤔꤣꤧ꤬ ꤢ꤬ ꤥ꤬ꤗꤣꤧ꤭ ꤒꤣꤧ꤬ꤕꤢ꤬ ꤒꤥ꤬꤯ 4 ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤘꤣ ꤢ꤬ ꤗꤢꤩ꤬ꤞꤢꤦꤒꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤘꤢꤧ꤬ꤜꤝꤢꤊꤢꤧ꤭ ꤛꤢꤩ꤬ꤞꤤ꤭ ꤒꤥ꤬꤯ ꤢ꤬ ꤠꤤ꤭ꤒꤢ꤭ꤊꤢꤧ꤭ ꤛꤢꤩ꤬ꤞꤤ꤭ ꤘꤣ ꤗꤢꤪꤚꤢ꤬ꤕꤢꤪ꤬ꤒꤢꤧ꤬ꤊꤢꤨ꤭꤯ ꤢ꤬ ꤘꤢꤪꤔꤥ꤭ ꤛꤢꤩ꤬ꤞꤤ꤭ ꤘꤣ ꤟꤢꤩ꤬ꤊꤢꤨ꤭ ꤋꤤꤒꤣꤧ꤬ꤚꤢꤦ꤬ ꤒꤣꤧ꤬ꤟꤢꤩ꤬ ꤢ꤬ꤊꤢꤨ꤭ ꤚꤣꤧ꤬ ꤢ꤬ ꤘꤢꤧ꤬ꤥ꤬ ꤒ꤫ꤥ꤬ ꤛꤢꤩ꤬ꤞꤤ꤭ ꤘꤣ ꤒꤢꤩ꤬ꤘꤣꤧꤡꤢ꤭ ꤢ꤬ꤗ꤫ꤢꤪ꤬ꤔꤣꤧ꤭ ꤔꤣꤧ꤬ꤒꤣ꤬ꤔꤣꤧ꤭ ꤕꤢ꤭꤯ 5 ꤖꤚꤢꤩ꤬ꤜꤢꤨ꤬ ꤟꤢꤩ꤬ꤋꤢꤨ꤬ꤖꤢꤨ ꤘꤣ ꤢ꤬ ꤘꤢꤧ꤬ꤛ꤫ꤢꤦ꤬ꤘꤢꤧ꤬ꤔ꤫ꤢꤧ꤬ ꤊꤣꤧ꤭ ꤡꤢꤪꤗꤣꤧ꤬ꤚꤢꤧ꤬ ꤒꤥ꤬ ꤘꤣꤔꤢꤨ꤬ꤘꤣꤞꤢ꤬ꤋꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤘꤢꤧ꤬ꤜꤝꤢꤊꤢꤧ꤭ ꤛꤢꤩ꤬ꤞꤤ꤭ ꤒꤥ꤬ꤒꤥ꤬, ꤢ꤬ ꤔꤢꤪ꤭ꤘꤢꤨ꤬ꤙꤤ ꤞꤣꤧ꤭ꤊꤢꤧ꤭ ꤜꤢꤪ꤭ ꤛꤢꤩ꤬ꤞꤤ꤭ ꤔꤢꤧ ꤓꤣꤧ꤭꤯ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢꤧ꤭ ꤖꤢꤧꤒꤢꤦ ꤖꤢꤩ꤭ꤔꤥꤢ꤬ ꤘꤣ ꤢ꤬ ꤟꤢꤩꤏꤥ꤬ꤘꤥ꤬ꤔꤢꤧ꤭ ꤕ꤫ꤢꤩ꤬ ꤢꤨ꤭ ꤔꤢꤧ ꤒꤢꤩ꤬ꤡꤢꤪꤒꤢꤩ꤬ꤒꤢꤩ꤬ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤔꤢꤧ ꤘꤣ ꤢ꤬ꤚꤥ꤬ ꤞꤥ꤭ꤞꤝꤢꤒꤣ꤬ꤖꤚꤢꤩ꤬ ꤖꤢꤧ꤯ 6 ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤡꤢ꤭ ꤠꤤ꤭ꤎꤢ꤬ꤘꤥ꤬ ꤔꤢꤧ ꤠꤤ꤭ꤊꤢ꤬ꤗꤥꤚꤢ꤬, ꤚꤣꤧ꤬ ꤢ꤬ ꤔꤢꤪ꤭ꤒꤢ꤭ꤢꤦ꤭ ꤕꤛꤢꤊꤢꤧ꤭ ꤜꤢꤪ꤭ ꤔꤢꤧ ꤗꤤ꤬꤯ ꤢ꤬ ꤗꤢꤩ꤬ꤓꤝꤢ꤭ꤓꤢꤧ꤬ ꤕ꤫ꤢꤩ꤬ ꤊꤣꤧ꤬ꤛꤢꤧ꤭ ꤘꤣ ꤋꤛꤢ꤭ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤘꤢꤧ꤬ꤛ꤫ꤢꤦ꤬ꤘꤢꤧ꤬ꤔ꤫ꤢꤧ꤬ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤒꤥ꤬ ꤒꤣꤧ꤬ꤟꤢꤩ꤬ ꤢ꤬ꤜ꤫ꤢꤩ꤬ꤗꤢꤧꤙꤢꤦ꤭ ꤢ꤬ꤑꤢꤩ꤭ ꤖꤢꤧ꤯ 7 ꤢ꤬ ꤘꤣꤧ ꤜꤣꤧ꤬ꤕꤜꤢꤩꤊꤢꤧ꤭ ꤊꤣꤧ꤬ꤛꤢꤧ꤭ ꤡꤢꤪꤒꤢꤩ꤬ ꤒꤣ꤬ꤖꤚꤢꤩ꤬ ꤘꤣ ꤢ꤬ꤗꤝꤤ꤭ ꤔꤢꤧ ꤖꤢꤩ꤭ꤜꤢꤪꤒꤢ꤯ ꤘꤣ ꤊꤣꤧ꤬ꤛꤢꤧ꤭ꤗꤢꤨꤗ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤜꤢꤦ꤬ ꤢ꤬ꤞꤝꤤ꤬ꤓꤣꤧ꤭ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ꤞꤤꤜꤢꤪ꤭ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤖꤢꤩ꤭ꤜꤢꤪꤒꤢ ꤞꤤꤕꤜꤢꤪ꤬ꤗꤥ꤬ ꤒꤣꤧ꤬ꤊꤤ꤬꤮ ꤒꤥ꤬꤯ 8 ꤊꤣꤧ꤬ꤛꤢꤧ꤭ ꤡꤢꤪꤒꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤥ꤬ꤞꤣꤧ꤭ꤖꤚꤢꤩ꤬ ꤊꤣꤧ꤭ ꤘꤣ ꤛꤢꤩ꤬ꤞꤤ꤭ꤊꤜꤢꤩ꤭ ꤚꤣꤧ꤬ ꤙꤣꤧ ꤢ꤬ ꤗꤢꤧꤓ꤫ꤣꤧ꤬ ꤔ꤫ꤤ꤬ꤟꤥ꤭ꤙꤢꤩ꤬ ꤛꤢꤩ꤬ꤞꤤ꤭ ꤥ꤬ꤞꤣꤧ꤭ꤖꤚꤢꤩ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤣ꤬ꤔꤣꤧ꤭ ꤓꤥ꤭ ꤒꤣ꤬ꤔꤣꤧ꤭ ꤢ꤬ꤋꤢꤩ꤭ꤔꤣꤧ꤬, ꤢ꤬ꤡꤢ꤭ ꤔꤢꤧ꤬ꤡꤣꤧ ꤜꤢꤨ꤭ꤞꤤꤕꤜꤢꤪ꤬ ꤡꤣꤧ꤯ 9 ꤟꤢꤨꤔꤣꤧ꤬ꤚꤣꤧ꤬ ꤙꤢꤧ꤬ꤡꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤒꤥ꤭ ꤜꤢꤨ꤭ꤞꤤꤕꤜꤢꤪ꤬ ꤚꤣꤧ꤬ ꤢ꤬ ꤥ꤬ ꤘꤣ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤢ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤢꤨꤒꤢꤩ꤭ ꤕꤢ꤭ꤔꤣꤧ꤬ ꤢ꤬ ꤞꤤꤑꤢꤩ꤭ ꤖꤢꤧ꤯ ꤓꤥ꤭ꤒꤥ꤬ ꤢ꤬ ꤕ꤫ꤢꤦ꤬ꤥ꤬ꤗꤢ꤬ꤚꤣꤧ ꤊꤣꤧ꤬ꤛꤢꤧ꤭ꤗꤢꤨꤗ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤊ꤫ꤢꤦ꤬ ꤘꤣꤧꤡꤢ꤭ ꤟꤢꤧ꤭ꤑꤢꤩ꤭ ꤒꤣꤧ꤬ꤘꤢꤦ꤬ꤜꤢꤪ꤭ ꤛꤢꤩ꤬ꤞꤤ꤭ ꤒ꤫ꤥ꤬ꤘꤣ ꤒꤢꤩ꤬ꤘꤣꤧꤡꤢ꤭ ꤢ꤬ꤗ꤫ꤢꤪ꤬ꤔꤣꤧ꤭ ꤔꤣꤧ꤬ꤒꤣ꤬ꤔꤣꤧ꤭ ꤕꤢ꤭꤯ 10 ꤜꤢꤪ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤋꤚꤝꤢ꤭ꤗꤢꤩ꤬ꤊꤣꤧ꤭ ꤟꤢꤨ ꤛꤢꤩ꤬ꤞꤤ꤭ ꤞꤤꤕꤜꤢꤪ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤕꤣꤧ꤬ꤒꤢ ꤗꤢꤨꤗ꤫ꤢꤧ꤬ ꤢ꤬ꤋꤛꤢ꤭ ꤚꤣꤧ꤬ ꤢ꤬ ꤗꤢꤩ꤬ ꤒꤣꤧ꤬ꤗꤥ꤭ꤒꤣꤧ꤬ꤊꤢꤩ꤬ꤏꤢꤦ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤘꤣꤧꤡꤢ꤭ ꤡꤢ꤭ꤜꤣ ꤛꤢꤩ꤬ꤞꤤ꤭ ꤕꤢ꤭꤯ ꤊꤣꤧ꤬ꤛꤢꤧ꤭ ꤟꤢꤨꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤊꤣꤧ꤬ꤛꤢꤧ꤭ ꤟꤢ꤭, ꤊꤣꤧ꤬ꤛꤢꤧ꤭ ꤖꤛꤢꤓꤢꤧ꤬ꤗꤢꤪꤓꤢꤧ꤬ꤖꤥ꤬ ꤢ꤬ꤔ꤫ꤢꤩ꤬ ꤒꤣꤧ꤬ꤟꤢꤩ꤬꤯ ꤗꤢꤪꤋꤢꤨ꤬ꤖꤢꤨ ꤘꤣ ꤢꤨ꤭ ꤘꤢꤧ꤬ꤘꤢꤨ꤬ꤘꤢꤧ꤬ꤓꤢꤨ꤭ ꤚꤣꤧꤘꤢꤦ꤬ ꤡꤣꤧ ꤜꤢꤨ꤭ ꤒꤣꤧ꤬ꤟꤢꤩ꤬ꤡꤣꤧꤔꤣꤧ꤬, ꤛꤢꤩ꤬ꤞꤤ꤭ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤜꤢ꤭ꤋꤢꤧ꤭, ꤢ꤬ ꤞꤤꤤ꤬ꤏꤢꤩ꤭ ꤊꤣꤧ꤭ ꤡꤣꤧꤢꤨ꤭ ꤒꤣꤧ꤬ꤊꤤ꤬꤮ ꤒꤥ꤬꤯ 11 ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤘꤣ ꤢ꤬ ꤟꤢꤧ꤭ꤚꤢꤩ꤬ꤏꤝꤢ꤬ꤏꤢꤪ꤭ꤜꤣ ꤚꤣꤧ꤬ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤜꤣ ꤡꤣꤧ ꤔꤢꤧ ꤞꤢꤚꤢ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ ꤚꤣꤧ꤬, ꤢ꤬ ꤘꤢꤧ꤬ ꤒꤢꤩ꤬ꤞꤢꤦ ꤗꤢꤪꤋꤢꤨ꤬ꤖꤢꤨ ꤒꤣꤧ꤬ꤟꤢꤩ꤬ ꤙꤢꤩ꤬ꤙꤢꤩ꤬, ꤢ꤬ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤛꤢꤩ꤬ꤞꤤ꤭ ꤙꤢꤩ꤬ꤙꤢꤩ꤬, ꤢ꤬ ꤗꤢꤩ꤬ꤔꤢꤪ ꤟꤢꤨꤔꤣꤧ꤬ ꤘꤣ ꤙꤢꤧ꤬ꤡꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤒꤣ꤬ꤖꤥ꤮ ꤒꤥ꤬꤯ 12 ꤛꤢꤩ꤬ꤞꤤ꤭ ꤗꤢ꤬ ꤢ꤬ꤞꤢꤧꤔꤢꤧ ꤒꤢꤩ꤬ꤖꤢꤨꤒꤢꤩ꤬ꤜꤣꤧ꤬ ꤘꤣ ꤢ꤬ ꤒꤣꤧ꤬ꤔꤢꤩ꤬ꤡ꤫ꤢꤧ꤬ ꤊꤣꤧ꤭ꤢꤨ꤭ ꤒꤥ꤬ ꤒꤣꤧ꤬ꤟꤢꤩ꤬꤯ ꤓꤥ꤭ꤚꤣꤧ꤬ ꤢ꤬ ꤗꤢꤩ꤬ ꤜꤢ꤭ꤋꤢꤧ꤭ ꤟꤢꤨ ꤢ꤬ꤜ꤫ꤢꤩ꤬ꤊꤜꤥ꤭ ꤞꤤꤛ꤫ꤢꤦ꤬ꤥ꤬ ꤔꤣꤧ꤬ ꤚꤣꤧ꤬ ꤢ꤬ ꤥ꤬ꤖꤢꤨꤡ꤫ꤢꤩ꤬ꤜꤢꤧ꤬ ꤘꤣ ꤢꤨ꤭ ꤜ꤫ꤢꤩ꤬ꤜꤢꤦ꤬ꤕ꤫ꤢꤦ꤬ ꤗꤢꤩ꤬ꤞꤣꤧ꤭ ꤛꤢꤩ꤬ꤞꤤ꤭ ꤢ꤬ꤑꤢꤩ꤭ ꤖꤢꤧ꤯ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ꤓꤢꤩꤢ꤬ꤒꤣꤧ꤬ꤢꤧ꤭ ꤏꤢꤦ꤬, ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤏꤢꤦ꤬ ꤒꤢꤩ꤬ ꤘꤣ ꤢ꤬ ꤞꤤꤑꤢꤩ꤭ ꤒꤢ꤭ꤕꤜꤢꤨꤒꤥ꤬ ꤒꤣꤧ꤬ꤟꤢꤩ꤬꤯ ꤢꤨ꤭ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ꤊꤢꤧ꤭ ꤛꤢꤩ꤬ꤞꤤ꤭ ꤟꤢꤨ ꤢꤨ꤭ ꤗꤢꤩ꤬ꤞꤣꤧ꤭ ꤒꤢꤩ꤬ꤗꤤ꤬ꤒꤢꤩ꤬ꤗ꤫ꤢꤧ꤬ ꤔꤣꤧ꤬ ꤕꤢ꤭꤯ 13 ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤢꤨ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ ꤡꤢꤪꤗꤣꤧ꤬ꤚꤢꤧ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤭ ꤊꤢ꤬ꤋꤛꤢ꤭ ꤏꤢꤦ꤬ꤋꤛꤢ꤭ ꤛꤢꤩ꤬ꤞꤤ꤭ ꤟꤢꤨꤔꤣꤧ꤬ ꤕꤢ꤭꤯ ꤗ꤫ꤢꤪ꤬ꤞꤤ꤭ꤊꤜꤢꤩ꤭ ꤡꤣꤧ ꤙꤢꤩ꤬ꤙꤢꤩ꤬ ꤛꤢꤩ꤬ꤞꤤ꤭ ꤞꤤꤋꤚꤢꤦ꤭ꤞꤤꤜꤢꤪ꤭ ꤜꤢꤦ꤬ꤗꤢꤩ꤬ꤗꤥ꤬ ꤒꤣꤧ꤬ꤕꤢ꤬ ꤡꤣꤧ ꤜꤢ꤭ꤋꤢꤧ꤭ ꤢ꤬ꤞꤝꤤ꤬ꤓꤣꤧ꤭ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤕꤣꤧ꤬ꤒꤢꤗꤢꤨꤗ꤫ꤢꤧ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤡꤣꤧ꤯ ꤙꤣꤧ ꤞꤤ꤭ ꤗꤢꤩ꤬ꤕꤝꤢꤩ꤬ꤗꤢꤩ꤬ꤜꤢꤨ꤭ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤟꤢꤧ꤭ ꤢꤩ꤬ꤒ꤫ꤣ꤬ꤥ꤭ꤒ꤫ꤣ꤬ ꤋꤥ꤬ꤊꤣꤧ꤭ꤙꤛꤢ꤬ ꤔꤢꤧ ꤞꤤ꤭ ꤚꤣꤧ꤬, ꤛꤢꤩ꤬ꤞꤤ꤭ ꤗꤢꤩ꤬ ꤟꤢꤧ꤭ꤑꤢꤩ꤭ ꤒꤣꤧ꤬ꤘꤢꤦ꤬ ꤕꤢ꤬ ꤡꤣꤧ ꤜꤢ꤭ꤋꤢꤧ꤭ ꤒꤢꤩ꤬ꤞꤢꤦ ꤘꤣ ꤢꤨ꤭ ꤞꤤꤛ꤫ꤢꤪ꤬ꤞꤤꤙꤤ꤭ ꤔꤣꤧ꤬ꤒꤣꤧ꤬ꤟꤢꤩ꤬, ꤢ꤬ ꤊꤢꤩ꤬ ꤜꤣꤧ꤬ꤟꤥ꤭ꤚꤣꤧ ꤞꤤ꤭ ꤟꤢꤩꤔꤣꤧ꤬ ꤢ꤬ꤗꤥ꤬ꤒꤣꤧ꤬ꤕꤢ꤬ ꤡꤣꤧ ꤛꤢꤩ꤬ꤞꤤ꤭ ꤡꤣꤧ꤯ ꤟꤢꤨꤔꤣꤧ꤬ꤚꤣꤧ꤬ ꤢ꤬ ꤗꤢꤩ꤬ꤗꤝꤤ꤭ꤕꤤ꤭ ꤓꤣꤧ꤭ꤞꤤꤜꤢꤪ꤭ ꤞꤤ꤭ ꤗꤝꤤ꤭ꤜꤢ꤬ꤚꤢꤧ ꤒꤣꤧ꤬ꤟꤢꤩ꤬, ꤓꤥ꤭ꤒꤥ꤬ ꤢ꤬ ꤗꤢꤩ꤬ꤞꤤꤒꤣꤧ꤬ꤚꤢꤩ꤭ ꤜꤢꤪ꤭ ꤞꤤ꤭꤯ 14 ꤛꤢꤩ꤬ꤞꤤ꤭ ꤘꤢ꤭ꤗꤢꤧ ꤖꤚꤢꤩ꤬ꤗꤢꤪ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤟꤢꤩꤚꤣꤧ꤬ ꤢ꤬ ꤞꤤꤛ꤫ꤢꤦ꤬ ꤥ꤬ꤗꤣꤧ꤭ꤒ꤫ꤣ꤬ ꤏꤥ꤭ꤏꤢꤦ ꤡꤣꤧ꤯ ꤛꤢꤩ꤬ꤞꤤ꤭ ꤗꤢꤩ꤬ꤒꤢꤩ꤬ꤞꤢꤦ ꤔꤣꤧ꤬ ꤢ꤬ ꤥ꤬ꤊꤥ ꤕꤢ꤬ ꤡꤣꤧꤒꤥ꤬ ꤟꤣꤧ꤯ ꤛꤢꤩ꤬ꤞꤤ꤭ ꤢꤩꤜꤢ꤬ ꤕꤛꤢꤡꤝꤢꤚꤣꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ꤒꤢꤩ꤬ꤛ꤫ꤢꤦ꤬ ꤏꤢꤪ꤭ ꤜꤢ꤭ꤟꤤꤒꤥ꤬ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤗꤢꤩ꤬ꤊꤣꤧ꤭ ꤒꤢꤩ꤬ꤞꤢꤦꤒꤢꤩ꤬ꤥ꤬ꤚꤢ꤬ ꤒꤣꤧ꤬ꤟꤢꤩ꤬꤯ ꤚꤣꤧ꤬ ꤛꤢꤩ꤬ꤞꤤ꤭ ꤤ꤬ꤞꤝꤢꤜꤢꤧ꤬ ꤚꤢꤧ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ ꤢ꤬ꤗꤢꤧꤕꤢꤨ꤭ ꤊꤢꤨꤠ꤫ꤢ꤬ꤊꤢꤨꤠꤢꤩ꤭ ꤢꤩ꤬ꤚꤣꤧꤘꤢꤦ꤬ ꤢ꤬ꤑꤢꤩ꤭꤯ ꤛꤢꤩ꤬ꤞꤤ꤭ ꤥ꤬ ꤜꤢ꤭ꤋꤢꤧ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤏꤢꤪ꤭ꤟꤢ꤭ ꤢ꤬ꤜꤢꤩ꤭ ꤟꤣꤧ꤯ 15 ꤛꤢꤩ꤬ꤞꤤ꤭ ꤓꤢꤩ꤬ꤡꤝꤢꤕꤢꤩ꤭ꤊꤢꤧ꤭ ꤔꤢꤧ ꤊꤜꤢꤧꤒꤥ꤭ ꤚꤣꤧ꤬ ꤢ꤬ ꤡꤝꤢ ꤞꤤꤕꤜꤢꤪ꤬ ꤒꤣꤧ꤬ꤕꤢ꤬ꤊꤢꤧ꤭꤯ ꤛꤢꤩ꤬ꤞꤤ꤭ ꤡꤝꤢꤋꤚꤝꤢ꤭ꤊꤣꤧ꤭ ꤊꤜꤢꤧ ꤘꤣ ꤖꤢꤩ꤭ꤙꤢ꤬ꤥ꤬ꤚꤢ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤙꤢꤩꤜꤢ꤬ ꤋꤚꤝꤢ꤭ ꤔꤣꤧ꤬ꤒꤣ꤬ꤙꤥ꤭꤯ ꤊꤜꤢꤧ ꤔꤣꤧ꤬ꤒꤣ꤬ꤙꤥ꤭ ꤗꤢ꤬ ꤊꤜꤢꤧ ꤘꤣ ꤢ꤬ ꤗꤢꤧꤘꤢꤨ꤬ ꤚꤢꤦ꤭ ꤚꤣꤧ꤬ ꤢ꤬ ꤔ꤫ꤤ꤬ꤙꤢꤩ꤬ ꤜꤢ꤭ꤋꤢꤧ꤭ ꤚꤢꤦ꤭ ꤘꤣ ꤒꤢꤩ꤬ꤡꤢꤪꤒꤢꤩ꤬ꤒꤢꤩ꤬ ꤢ꤬ꤊꤢꤨ꤭ ꤗ꤫ꤢ꤬ꤒꤥ꤬꤯ 16 ꤗꤢ꤬ꤔꤢꤧꤚꤣꤧ꤬ ꤒꤣꤧ꤬ꤞꤤ ꤗꤢꤧ꤬ꤢꤪꤜ꤫ꤢꤧ꤬ ꤒꤣ꤬ꤘꤥ꤭ ꤤ꤬ꤞꤝꤢ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧꤘꤢꤦ꤬ ꤖꤚꤢꤩ꤬ꤖꤚꤥ꤬ ꤙꤢꤩꤜꤢ꤬ ꤗꤢꤩ꤬ꤚꤣꤧ ꤒꤢꤩ꤬ꤞꤢꤦ ꤣꤧ꤭ꤔꤣꤧ꤬꤯ ꤗꤢꤧ꤬ꤢꤪꤜ꤫ꤢꤧ꤬ ꤣꤧ꤭ꤒꤣ꤬ꤘꤥ꤭ ꤟꤢꤩꤙꤢꤩ꤬ ꤡ꤫ꤢꤧ꤬ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤟꤢꤩꤙꤢꤩ꤬ꤓꤢꤩ꤬ ꤜꤢꤨ꤭ ꤔꤢꤧ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤍ꤫ꤥ꤬ ꤚꤣꤧ꤬ ꤢ꤬ ꤔꤢꤪ꤭ ꤥ꤬ꤊꤥꤊꤢꤧ꤭ ꤖꤚꤢꤩ꤬ꤖꤚꤥ꤬ ꤘꤣ ꤢ꤬ ꤗꤢꤩ꤬ꤒꤢꤩ꤬ ꤒꤣꤧ꤬ꤗꤝꤤ꤭ꤞꤢꤩ꤭ꤚꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬꤯ 17 ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤗꤢ꤬ ꤢ꤬ꤞꤢꤧꤔꤢꤧ ꤓꤣꤧ꤭ꤓꤢꤩ꤬ꤋꤢꤨ꤬ ꤕꤢ꤬ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬꤯ ꤓꤥ꤭ꤚꤣꤧ꤬ ꤢ꤬ꤞꤢꤧꤔꤢꤧ ꤢꤪꤜ꤫ꤥ꤬ ꤘꤣ ꤊ꤫ꤢꤩ꤬ꤜꤣꤧ꤬ꤞꤢꤩꤘꤢꤨ꤬ ꤓꤢꤪꤡꤝꤢꤊꤢꤧ꤭ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯ ꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤗꤢꤩ꤬ꤥ꤬ꤕ꤫ꤢꤩ꤬ ꤟꤣꤧ ꤛꤢꤩ꤬ꤞꤤ꤭ ꤢ꤬ꤜ꤫ꤢꤩ꤬ꤥ꤬ ꤘꤣ ꤢ꤬ ꤋꤤꤒꤣꤧ꤬ꤚꤢꤦ꤬ ꤒꤣ꤬ꤖꤥ꤬ꤟꤣꤧ꤯ 18 ꤛꤢꤩ꤬ꤞꤤ꤭ ꤟꤢꤩꤙꤢꤩ꤬ ꤓꤢꤧ꤬ꤗꤢꤪꤓꤢꤧ꤬ꤖꤥ꤬ ꤜꤢ꤭ꤋꤢꤧ꤭ ꤢ꤬ꤍ꤫ꤥ꤬ ꤘꤣ ꤢ꤬ꤙꤝꤤꤒꤣꤧ꤬ꤚꤣꤧ꤭ ꤥ꤬ꤒꤥ꤬ ꤒꤣꤧ꤬ꤟꤢꤩ꤬꤯ ꤛꤢꤩ꤬ꤞꤤ꤭ ꤡꤝꤢ ꤤ꤬ꤞꤝꤢ ꤢꤨ꤭ ꤔꤢꤧ ꤢꤨ꤭ ꤊ꤫ꤢꤦ꤬ ꤗꤢꤩ꤬ꤒꤢꤩ꤬ꤞꤤꤒꤣꤧ꤬ꤚꤢꤩ꤭ ꤘꤣ ꤞꤝꤤ꤬ꤓꤣꤧ꤭ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤕꤣꤧ꤬ꤒꤢ ꤒꤣꤧ꤬ꤟꤢꤩ꤬꤯ ꤛꤢꤩ꤬ꤞꤤ꤭ ꤢꤩꤜꤢ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤢꤨ꤭ ꤔꤢꤧ ꤊꤜꤢꤧꤒꤥ꤭ꤊꤜꤢꤧꤙꤢꤩ꤬ ꤒꤣꤧ꤬ꤟꤢꤩ꤬꤯ ꤊꤣꤧ꤬ꤛꤢꤧ꤭ ꤘꤣ ꤛꤢꤩ꤬ꤞꤤ꤭ ꤢꤩꤜꤢ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤥ꤬ꤊꤥꤞꤢꤩ꤭ ꤗꤥꤜꤢꤪ꤭ꤕꤢ꤭ꤖꤢꤧ ꤔꤢꤧ ꤒꤢꤩ꤬ꤞꤢꤦ ꤟꤢꤨ ꤛꤢꤩ꤬ꤞꤤ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢꤩ꤬ꤔꤣꤧ꤬ ꤖꤢꤧ꤯ 19 ꤞꤢꤚꤢ ꤊꤜꤝꤢ꤬ꤜꤣꤧ꤬ꤟꤥ꤭ ꤢ꤬ꤔ꤫ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤢꤪꤜꤢꤧ꤬ ꤛꤢꤩ꤬ꤞꤤ꤭ ꤔꤢꤧ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤒꤢꤩ꤬ꤕꤣꤧ꤬ꤜꤢ꤭ ꤕꤢ꤭, ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤔ꤫ꤢꤩ꤬ꤙꤢꤧ꤬ꤡꤢꤩ꤬ ꤚꤣꤧꤘꤢꤦ꤬ ꤔꤣꤧ꤬, ꤢ꤬ ꤓꤝꤢ꤭ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤢ꤬ ꤜ꤫ꤢꤩ꤬ꤊꤜꤥ꤭ꤜ꤫ꤢꤩ꤬ꤋꤢꤧ꤬ ꤒꤣꤧ꤬ꤟꤢꤩ꤬ ꤢ꤬ꤡ꤫ꤢꤦ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤒꤢꤩ꤬ꤤ꤭ꤒꤢꤩ꤭ꤒꤢꤩ꤭꤮ ꤙꤢꤩ꤬ꤙꤢꤩ꤬, ꤢ꤬ ꤘꤢ꤭ ꤕ꤫ꤢꤩ꤬ꤟꤣꤧ ꤔꤢꤧ꤬ ꤔꤣꤧ꤬ꤗꤢ꤬, ꤢ꤬ ꤓꤝꤢ꤭ꤟꤣꤧ ꤔꤢꤧ꤬ꤙꤢꤧ꤬ꤡꤢꤩ꤬ ꤟꤣꤧ꤯ 20 ꤘꤣ ꤛꤢꤩ꤬ꤞꤤ꤭ ꤞꤤꤑꤢꤩ꤭ ꤕꤢꤩ꤬ ꤙꤢꤧ꤬ꤡꤢꤩ꤬ ꤔꤢꤧ ꤛꤢꤩ꤬ꤏꤛꤢꤨꤋꤚꤤ ꤘꤣ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤕꤢꤩ꤬ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤛꤢꤩ꤬ꤞꤤ꤭ ꤜꤣꤧ꤬ꤕꤜꤢꤩꤓꤢꤩ꤬ꤊꤢꤧ꤭ꤟꤣꤧ ꤔꤢꤧ ꤟꤢꤩ꤬ꤋꤢꤨ꤬ ꤢ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤟꤣꤧ꤯ ꤗꤢ꤬ꤔꤢꤧꤚꤣꤧ꤬ ꤊꤢꤨꤔ꤫ꤢꤧ꤬ꤣꤧ꤭ ꤛꤢꤩ꤬ꤞꤤ꤭ ꤊꤢꤩ꤬ ꤔꤥ꤭ꤗꤢꤩ꤬ ꤒꤣꤧ꤬ꤖꤥ꤬ꤒꤣꤧ꤬ꤒꤢꤪ꤭ ꤒ꤫ꤣ꤬ꤋꤛꤢ꤭ꤞꤢꤧ ꤔꤢꤧ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤟꤢꤩꤚꤣꤧ꤬ ꤒꤢꤩ꤬ꤗꤢꤨꤗ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤓꤝꤢ꤭ꤊꤢꤧ꤭ꤟꤣꤧ ꤜꤢꤨ꤭ꤙꤢꤧ꤬ꤡꤢꤩ꤬ ꤟꤣꤧ꤯ ꤊꤣꤧ꤬ꤛꤢꤧ꤭ ꤟꤢꤨꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤗꤢ꤬, ꤢ꤬ ꤡꤢ꤭ꤜꤣ ꤕꤢ꤬ ꤡꤣꤧ ꤔꤢꤧ ꤢ꤬ ꤜ꤫ꤢꤩ꤬ꤊꤜꤥ꤭ꤜꤣꤧ꤬ ꤔꤣꤧ꤬ ꤡꤣꤧ꤯ 21 ꤘꤣ ꤛꤢꤩ꤬ꤞꤤ꤭ ꤢ꤬ꤑꤢꤩ꤭ꤔꤣꤧ꤬, ꤊꤢꤩ꤬ ꤢ꤬ ꤞꤤꤑꤢꤩ꤭ꤔꤢꤪ ꤒꤢꤩ꤬ꤡꤢꤪꤒꤢꤩ꤬ꤒꤢꤩ꤬ ꤢ꤬ꤊꤜꤢꤧ ꤒꤣ꤬ꤖꤥ꤮ ꤒꤥ꤬ ꤟꤢꤩꤔꤣꤧ꤬ꤗꤢ꤬ ꤢ꤬ꤚꤢꤧꤜꤣ ꤕꤢ꤬ ꤡꤣꤧꤔꤢꤧ ꤢ꤬ ꤞꤤꤑꤢꤩ꤭ ꤓꤥ꤭ꤚꤣꤧ꤬ ꤢ꤬ ꤡꤝꤢ ꤠꤤ꤭ꤊꤢꤧ꤭ ꤚꤣꤧꤘꤢꤦ꤬ ꤋꤛꤢ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤍ꤫ꤥ꤬ꤗ꤫ꤢ꤬ꤊꤢꤧ꤭ ꤘꤣ ꤢꤨ꤭ ꤘꤣꤧꤜꤢꤧ꤬ ꤓꤥ꤭ꤟꤣꤧ ꤛꤢꤩ꤬ꤞꤤ꤭ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬꤯ 22 ꤒꤢꤩ꤬ ꤘꤣ ꤛꤢꤩ꤬ꤞꤤ꤭ ꤗꤢꤩ꤬ꤓꤥ꤭ꤟꤣꤧ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬, ꤢ꤬ꤒꤥ꤭ ꤗ꤫ꤢ꤬ꤔꤤꤔꤢꤧ꤬ ꤟꤢꤨ ꤍ꤫ꤥ꤬ꤋꤢꤋꤥ꤬ ꤟꤢꤩꤥ꤬ ꤒꤣ꤬ꤗꤢꤦ꤭ ꤔꤢꤧ, “ꤓꤝꤤ꤬ ꤒꤣꤧ꤬ꤚꤤ ꤊꤢ꤬ꤋꤛꤢ꤭ꤒꤥ꤭ ꤚꤣꤧꤘꤢꤦ꤬ ꤋꤛꤢ꤭ ꤢ꤬ꤖꤚꤢꤧ,” ꤓꤥ꤭ꤚꤣꤧ꤬ “ꤢꤨ꤭ ꤤ꤬ꤜ꤫ꤥ꤬ꤕꤜꤤ꤭ ꤓꤥ꤭ꤟꤣꤧ ꤓꤢꤧ, ꤚꤣꤧ꤬ ꤢ꤬ ꤋꤚꤢꤪ꤭ꤋꤛꤢ꤭ ꤕꤣꤧ꤬ꤢ” ꤢ꤬ ꤟꤢꤩ ꤟꤢꤨꤔꤣꤧ꤬꤯ |
Wycliffe USA
The Seed Company