2 Korint 3 - Ekajuk New Testament

Atahm kpo wul na, etohko ji kpo ka elkpin

¹ Anv, jia lohngo re, wahr ebkehme elnahre tehka? Anv, lꞌli nyi ane bahke jo nyon awer, jo lenng-r ka-n, ana fuumu a ane bandika? Afi lꞌli nyi ḿ bahke jo nyon awer nya bahke jo lenng-r ka ane bako?

² Wahn ba li nwer enyahre nyi bo ma nyon go egahna ntim, nyi ane kpee kpꞌkahne, fere kpꞌlꞌlung.

³ Eblohko tib re, wahn ba li nwer nyi Kraist ko-r nyon. Á nyonem go alahb nwer, á nyono go etohko ji Esowo bi li go elkpin. Á fikem go atal, á nyono kak go ntim ane.

⁴ Ana wo e kpo bum Esowo go etingitingi tib Kraist,

⁵ tibre nsahm enyahre kpo lohng goji Esowo. E kpimm nsahm antahng nyi bahke wahnge e tir re, e bahke ma lim ejum go egahra ngang antahng.

⁶ Esowo bi ma-r ka nsahm re wahr jol alokeltum ba egbanngalung ji nfenfe ji ki li go atahm abumu, ji li egbanngalung ji etohko. Tibre atahm kpo wul na, etohko ji kpo ka elkpin.

⁷ Ngare nyi egbanngalung ji Esowo ka atahm enye nya kpo ko elkv ba a ni, nya á fiki go atal, á tibi egburu ellub ene ni wahnge abone Israel ki jo ma seenge esamahr Moses tib go elnyane ni jo nyane. Elnyane nio jo remme na asongo.

⁸ Ellub ni egbanngalung ji etohko bahke gbale sehng.

⁹ Egbanngalung ji kpo ka ane ebi lꞌbel ellub ana nio, egbanngalung ji kpo lim nne, á li eno, ellub ene ni bahke ga gbal.

¹⁰ Etingitingi, ejum ji jo bel ellub, anv, ellub kpeem kpi, tib eji ellub ni ga gbal ma ba.

¹¹ Eji ejum ji remme no ba a ellub, ejum ji lꞌkꞌmal, bahke bele ellub ni ga gbal.

Mbomo mi Moses bulu go ege esamahr

¹² Tib eji e kpi elkohn ekunukpu ana jia, wahr ebbel esahb.

¹³ Wahr limm ana Moses ji bulu mbomo go ege esamahr, eji abon Israel lꞌkꞌnyehn ejum ji toono ejum ji remme no.

¹⁴ Asi ebo tꞌtahne. Tibre bo lꞌlung awer nya nkꞌkulu egbanngalung, mbomo mꞌnehm mi ma tob bulu amahr ebo tete ba rehng anv. Bo lꞌsi tꞌtaame tv Kraist, owo bahke lennge bo.

¹⁵ Tete ba rehng anv, ngare anyehng anyehng nyi bo lꞌlung awer nya Moses, mbomo mio kpo konngo bo go bo esamahr.

¹⁶ Bo lꞌfeere ba goji Ntul Esowo, á bahke lennge bo mbomo mio.

¹⁷ Ntul Esowo, Etingi Etohko ji. Edi jio ji etohko ji Esowo li no, ane ebfor.

¹⁸ Wahr ane kpee ba abomo ma-r laade go esamahr, e kpꞌseenge ellub ni Esowo. Esowo kpo yaang-r, bomo go ellub nehko, song rehng a ni ga gbal, ano ano tete e jol go ege elfoongo. Jia kpo lohng goji Ntul Esowo bi li Etingi Etohko.