Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Korint 11 - Ekajuk New Testament


Pol, a akimfahnge abatiingetib

1 Kp-m sahb kꞌkor re, wahn taame, eji n yahke bung abon agboolo alum. Limen ano, titi!

2 Tibre ala kpo teel-m tib wahn, ana Esowo, ala kpo teel-e. Tibre wahn ba li ana ngbahme nyi bo kala nꞌnoongo a ne, nyi m bahk-e koko song ka nlum ewe na awohng no li Kraist.

3 N kpꞌfahle re eltim bahk-n bvvrv, ń fere dulu, ń nehm kpe seenge Kraist wo wo, ana Iv ji nnyo nehm-e no go ege awak.

4 Nne nondiki lꞌba, ba bung bada Jisos go mbang nyindiki nyi e ki bung, ń soro taame tvtv. Ń lꞌfere bel etohko jindiki ji ń ki bel wuku wuku, fere wuk nnoobo etib bi ń ki taame tv wuku wuku, ń soro taame na taame tv.

5 Me m bum re, me sang ga se sehnge ajꞌjok abatiingetib ebahne.

6 Jol afi n limm nne no kpo mal elbungu, n kpi elkahne ni ń jo nyehn go egahre elkpin ngare anyehng anyehng go ejum ajehng ajehng.

7 Anv, abiafem nya n limi noa, eji n rede elname re wahn jol wahre wahra? Tibre e jo tiingi nnoobo etib bi Esowo tong-n mbol mbol, ejumjum e joom ko.

8 N v aneb ero bako ejv, eji n taame no, ko akpohko nya bo ka-m no re me n ko ba lok-n.

9 Ngare nyi n jolo a nahne, eji nsol rin-m no, n tokkem nne awohng awohng. Tibre ejum ajehng ajehng ji rin-m no, abonanee ba lohngo go Masedonia ba, bo ba ba ka-m. Eji n ki-n tokko go mbang anyehng anyehng, ano wo n lꞌki-n tiki tokko tete asongo.

10 Eji etingitingi ji Kraist wob-m go egame atahng, nnene limm go Akaya, no bahk-m ma lim, n kꞌkpe geere kak ejum jia.

11 Jen ji wahnge n kehm bꞌbung ana fono? Anv, lohngo re, me ń nehme kora? Esowo kpꞌkahne re ń kp-m koro.

12 M bahke soro asi, jo lim ji n kpꞌlimi anv a, eji n lꞌkpan abatiingetib bao ba kpꞌsebe mbang nyi bo bahke woro anyo re, bo kpꞌlimi eltum go mbang nyi wahr kpꞌlimi.

13 Tibre elkohn ane bao li akimfahnge abatiingetib ba kpo lim eltum ebo go mbang enehm, fere yaange elbo, jol go elfoongo ni abatiingetib ba Kraist.

14 Nkpokosi anyehng anyehng o limm, jol nnehm kpo yꞌyaange elne, fere jol go elfoongo ni enjel nyi ellennge.

15 Etahntahn ejum sang re alokeltum ba nnehm tob yaange elbo, jol go elfoongo ni alokeltum ba Esowo bi li go etingitingi. Go esꞌkohlo, bo bahke bele eltuuru ebo ana bo limi eltum.


Erem bi Pol nyehne no

16 N kpꞌkpeke bung re, nne awohng awohng kꞌtir re, me egboolo nne ji. Ń lꞌfere tir ano, lub ko-m wahn ana egboolo nne, eji n lꞌwor nnyo ntiil.

17 Ji n kpꞌbungu ana egboolo nne, eji n yahke ba nnyo wor.

18 Tibre ane gbalee baa, ba kpo wor nnyo kunu go nsol nyi njini nyia. Owo wahnge m bahke tob wor nnyo fvfo.

19 Eji ḿ ma bel elkahne, ń kpo kpuumu, fere jo taame agboolo ane jol a nahne.

20 Ń kpo kpuumu, nne lꞌko-n, lim re wahn jol aju, afi á fere taare nsol enyahne, afi á fere li-n nsehng, afi á fere limi akuuku, afi á fere ruum-n nkpal.

21 N kpꞌbungu re, a ejum ndon ji. Wo, wahr sahbem lim ano. N kpꞌkpeke bung ana egboolo nne re, Nne awohng awohng lꞌfere sahb wor nnyo kunu ejum ajehng ajehng, me n tob sahb fvfo.

22 Anv, ane bao, aneb Hibru baa? Me n tob li mmon no Israel. Anv, bo lohng go etꞌtohngo ji Ebrahama? Me n tob lohng ona fvfo.

23 Anv, bo alokeltum Kraist baa? N kpꞌkpeke bung ana ngbokesahl. Me wo ga li nlokeltum no nno sehnge bo. Me n lim eltum sehnge bo. Me wo ga woomo ngbekobo sehnge bo. Bo ma-m dv gbalee. Nkpel tvv elkv jo jol a name kpidi kpidi.

24 Nkpel elon nyi Jus ma-m dv eltahl a nti elku a nti eni.

25 Nkpel era nyi anebe Rom dv-m no. Nkpel anyehng nyi bo tuub-m atal. Nkpel era nyi asohkkahng ma seme a name. Nkpel anyehng n fabe go alahb eltahl awa na ani.

26 Go egame eljen tvv ni m ma jen, n jolo go efin efin, efin bio bi aya, a bi awajv, a bi aneb ejahbe ebame, a bi ane baka baka, a efin bi jo jol a name go ajahbe, go elka emahng, go agburu aya, a ellong akimfahnge abonanee.

27 N jo bade, jo lim eltum fere jo nyehn erem. Atv gbalee ma n jo kang mbir, njal jo yam-m, alahb jo kor-m. Nkpel tvv n joom bel nsol alehke. Alohk jo fil-m, ejum ebjing m belem.

28 Gona erem bi n kpo nyehn go egama ngubjing, gana eltiiri ni n kpꞌtiiri aneb ero kpee li ana elsol ni nnen ni kp-m nyede tv ndi efung abehng abehng.

29 Nne lꞌleenge, nobem re me n tob leenga? Bo lꞌlim re á gbo yel abiafem, anv, eltim ki-m raka?

30 Lꞌjol nyi m bahke woro nnyo, m bahke woro nnyo kunu nsol nyi kpo tib ana n kpꞌleenge.

31 Esowo, nde no Jisos Kraist Ntul ewahre, ye ji bo bahk-e tehke go njinanjini, á kpꞌkahne re me n nehme kim efahnge.

32 Eji n jolo go Damaskus, ntubesi ejahbe no woomo go elwo ni ntul Aretas yehke abꞌbaabe kak re bo song baabe ati mbu, eji bo lꞌbob-m.

33 Bo kehm-m kake go ejeere, kanne alehke, yehk-m go ewindu, fere tahr alehke nyao tete n song rehng go ndi go njahm ekahme nyehko ji jolo sennge ejahbe jio kak. N kehm beke for go ege abo.

© 2012, The Nigeria Bible Translation Trust and Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ