2 Korint 1 - Ekajuk New Testament

¹ Me Pol ji koro Esowo, á lim-m re me n jol ntiingetib no Jisos Kraist, me a Timoti mmonannee ejahre, e kpꞌnyono nwer nyia tv aneb Esowo ba li go Korint, a aneb Esowo kpee ba li go Akaya.

² Nong, Esowo Nso ejahre, a Ntul a Jisos Kraist ka-n nnoobo, a elkoono.

Ana Pol jo kak Esowo saam

³ Nong, wahr kaken Esowo saam, bi li nde no Jisos Kraist Ntul ewahre, Esowo bio bi li nfona ndon, ye ji li nfono ekakeltim.

⁴ Á kpo kak-r eltim go egahre afemfem kpee, eji e lꞌko ekakeltim eje ji á ma-r kak, fere tob jo mal kak ane eltim, ba wob go elkohn nfem anyehng anyehng.

⁵ Ana e kpꞌnyehne erem gbalee ana bi Kraist nyehne no, ano wo fvfo e kpꞌtob bel ekakeltim gbalee, ji kpo sehng go abo nya Jisos Kraist.

⁶ E lꞌyel go afemfem, li eji ń lꞌbel ekakeltim, fere kak-n ebo go egahne eltahre. Esowo lꞌkak-r eltim, li eji ń lꞌbel ekakeltim, tib ń kpo tob kpuumu erem bꞌnehm ana bi e kpꞌnyehne.

⁷ E kpꞌsahb kꞌkunu ekpu re, ḿ bahke tob bel ekakeltim ji Esowo kpo kak-r eltim, tib eji ń kpꞌnyehne erem bꞌnehm bi e kpꞌnyehne.

⁸ Abonanee, e kpꞌsebe re wahn kahn nfem nyi e bele go Esia. Tibre Esowo si-r elsol ni nnen, ni e ki ma sol, owo wahnge e ki kpe kunu ntir re e bahke kpe kpin.

⁹ Jo jol-r ana ane ba bo ma lam elam ebo, kimi re bo bahke bo wul, eji e lꞌkꞌkpe tahm tonngo go egahre ntir atahng, e lꞌtonngo Esowo bi kpo nyahme akvne.

¹⁰ Á ma-r tahre yehke go ebi elkv ni e jol kpoko. Á bahk-r kpe tahre. Ye wo e kp-e kunu ekpu re á bahk-r kpe tahre,

¹¹ eji ń kp-r kake ebo go egahne ero bi ń kpꞌkake tv-r. Owo ane gbalee bahke kehme Esowo saam kak tib go egahre esi, tib eji á ma faange ero ane gbalee, fere ka-r elfuulu.

Ji wahnge Pol ki waka kpe je go Korint

¹² Ejum ji ana, ji e kpꞌgeere kak. Tibre ntir atahng enyahre kp-r yiimi ntianse re, elkpin enahre ni e li a ni go njini nyia, asehngesehnge ngare nyi e jolo a nahne, e jo toono mbang anyehng, a eltim ni li saang. E tonngem go elkahne ni njini nyia, e tonngo go nnoobo nyi Esowo.

¹³ Tibre e nehme nyon na ejum jindiki tv-n, sehngem ji ḿ bahke lungu, fere kahn, ji ji e kpꞌnyono tv-n. Me m bum re, efung abehng ḿ bahke kahne kpee,

¹⁴ ane egom ejahne jindiki ma kahn anv re, ń li ma geere kak-r, ana wahr bahke geere kak-n go efung bi Ntul a Jisos Kraist.

¹⁵ Eji n jo sahb kꞌkahn ano, owo wahnge n jo seb re me n tohko ba go egahne, eji ń lꞌkpe bel elfuulu nehko budu.

¹⁶ N sebe re me m ba sehng egahne o, song rehng go Masedonia, feere kpe ba rehng go egahne, wahn ko-m song tv go Judea.

¹⁷ Anv, eji n jo tir ano, n li nnyaangannyo a nnea? Anv, n kpo toobo ntoobo enyame ana nne a njini no kpo taame, fere ten tvtva?

¹⁸ Ana Esowo li nkakesehk a nne, ano wo fvfo alum enyahre nya e bungu tong-n ki li alum nya e taame no, fere ten.

¹⁹ Tibre Jisos Kraist Mmon Esowo ji e jo bung alum enye tong-n, Silvanus, go Timoti, a mefono, á limm nne no kpo taame, fere ten. Jisos wo li eltaame ni Esowo taame no re “Ee!”

²⁰ Ye wo li eltaame ni Esowo taame no re, “Ee, me n lim anyam enyame kpee.” Ye wo wahnge e kpo bung re “Emen”, fere ka Esowo ellub.

²¹ Esowo bi kpo lim wahr a wahn re wahr yiimi tꞌtahne go mbang nyi Kraist. Á ma-r kak akehng go esi,

²² fere kak-r elliingi ene, eji á bom-r esi, kak-r Etingi etohko go egahra ntim.

²³ N kpꞌlungu Esowo bi kpꞌkahne eltim ename re á yiim-m ntianse. N kpeem ba go Korint, tib eji n lꞌyak-n, ki-n kak erem.

²⁴ E nehme seb re wahr jol atul ebahne, tib eji ń yim tꞌtahne go mbang nyi ń kpꞌtoono Esowo. E kpꞌlimi eltum ano a nahne, eji ń lꞌbel eyebatahng.