Yoane 3 - Rusang rusek rapunta

Yes aror Nikodem isina ibots ra roronto

¹ Muot mwetsh awak u nteng bafarisa rukompua rante Nikodem, yante awak kumu basi Yuda.

² Yante kuwiy ngwa Yes i butu kunor yampe : Kumu ? Bitu tshumayeb wene atoa bor a Ntsampe, isina rek a muot uyeb uker bisana nko inker wene mpe Ntsampe rek uwar nto ante.

³ Yes kunsaks yampe : Barabara, barabara, minyi rik irori, mpe muot awar reke botos mpots ntshi mpe, yante yak uyeb utar bukumu bua Ntsampe bo.

⁴ Nikodem kunsaks yampe : Mpueny ake muot iyeb ukabots mpe yante ama nun? Apakayeb unyingin u kat ikuntu rinyante ikabots mpots yekra ?

⁵ Yes kusaks yampe : Barabara, barabara, minyi rik irori, mpe muot awar rek ubotos nto a mas nto ake Puinki a Ntsampe bo, yante yak yeb unyingin u kat bukumu bua Ntsampe bo.

⁶ Isina rine rabota rutoko, rungwak rutoko, rine rabota Puinki a Ntsampe ake rungwak Puinki a Ntsampe.

⁷ Usisu bo isin imairor minyi ampe : Muot bukamot mpotr yekra.

⁸ Puinki angwek mpok ingank yante uwe, wene uok iweyi rante, di wene uyeb bo mpok ingwik yante, nto ake mpok ingwek yante, mungwak kankos mpe Puinki a Ntsampe abot muot.

⁹ Nikodem kunor yampe : Mey mene muyeb uwiy mpuenye ?

¹⁰ Yes kunsaks yampe : Wene u mene basi Israer, wene rek wayeb meye mene ?

¹¹ Barabara, barabara, minyi rik irori, bitu tshuntotok mey mayeb bitu, bitu tshungwak mikentshi mia mey matar bitu, di binu uyes mey mamabisuengs bitu bo.

¹² Mpe imerk binu uyes mey mumak bisuengs minyi ma ruk ra man, di binu buyeb uyes mpueny ake, mpe minyi ribisuengs mey ma ruk?

¹³ Rek a muot atowe ra ruk, ya yante atoa u ruk, yante awar Muan a Muot ntshu ngwa u ruk.

¹⁴ Nko apanya Moise ntshu u nteng busuebe bu ibuings, Muan a Muot ito­kapanam nkos.

¹⁵ Isina keka mpe muot inyes, yante yak kawu bo, di yante imon mony usir bo.

¹⁶ Isin Ntsampe amareb uwont bat, kek awek yante Muan ante mwetsh ntshu nunka, isina keka mpe muot inyes, yante ya kawu bo, di yante imon mony usir bo.

¹⁷ Isin Ntsampe kuatom Muan ante kat a batu isina kuwiy kuaks bat bo, di isina keka bat bubant u kat ante.

¹⁸ Muot ntshu nyes yante, yak kakuak bo, di ntshu uber uyes yante yeikuaka, isina aber yante uyes rukompua ra Muan a Ntsampe mwetsh.

¹⁹ Keka rutents rungwak isin ye : Isin muer muamawiy u kat a batu, bat bareb uwont muimin, muer bo, isin mingun mia banta miawak bube.

²⁰ Isin muot ntshu nkerk bube kuangontok muer bo, ya uwiy ngwa muer bo, isina ampakrk mayemp mante mabe yar masoru.

²¹ Di muot ntshu nkerk mey ma barabara iwiy kat a muer, isina mayemp mante musoru, isin manta mungwak ma Ntsampe.

Yoane Batis akaukusuengs bat mey ma Yes

²² Ampis muna Yes nto baronki bante, kuwe suesa a Yuda, ya kuwar a ba ona, nto ake yante aukuwek batis.

²³ Yoane ake kukawek batis u bora Enon, kora kor a bora Sarim, isina mas mawar ma buiki ona, bat kuwe una isina kuwarab batis.

²⁴ Isina ba uto sik Yoane u burok bo.

²⁵ Baronki ba Yoane nto ake nsi Yuda kuyers isina mey mu batis.

²⁶ Ba kuwiy kora kor a Yoane kunor : Kumu ! muot awak awo irak rumwetsh muin mua Yordani, ntshu aker wene bukentshi buante, yante ikuwek batis, bat ba buiki bumawe ngwa yante.

²⁷ Yoane kubasaks yampe : Rek a muot uyeb u rab iket bo, mpe rek ngwek a rinta u ruk.

²⁸ Bi amet bawar binkongot biami atot mi ampe ; minyi ka ru Kristo bo, di minyi rawiy rutoma buso buante.

²⁹ Muot ntshu ntomp ngat angwa nuem ngat, di mpai a mun ngat mpe anyemt aok yante ruto rante, yante iniang buiki isin rutot runtomp ngat ; nkos minyi ake, nianko muami mumareks.

³⁰ Busek yante inang, minyi rubonom.

³¹ Ntshu atoa u ruk amarek bikima ; ya ntshuatoa u man angwak man, antotok ake mey ma man ; ya ntshu ato u ruk amarek bikima.

³² Yante antotok mey matar yante nto ake mey maok yante, rek a muot uyes mey matot yante.

³³ Muot ntshu yes mey matot yante inyimis Ntsampe angwa a barabara.

³⁴ Isina yante atint Ntsampe, ya antotok mey ma Ntsampe, isina Ntsampe ungwek Puinki a Ntsampe a ruer bo.

³⁵ Tata awont Muan, amangwek biket bikima ubiar biante.

³⁶ Muot ntshu yes Muan a Ntsampe, ya imon mony usir bo, ntshu bera uyes Muan a Ntsampe, yante yak utar mony bo, na kabo sia Ntsampe singwar ruk rante.