Zefanya 3 - Eipomek

Allah arye, Yerusalem mutuku nang ati, wenepnamle bukni, aminyan talak tamubuka anang ati, ton ap teleb kipdeipnamla ati, nyabuk yupu

¹ Se, Yerusalem weik asik domik noutam unyak nang ara, mandipna ukirye, sik ni Allah Yahweh ati, ‘Elda mambul kume,’ tenebikce, Allah ati batakamik touk, tuba wininyake. Tonda, Allah arye nyalul yupu ara, pia kum kekenyake. Tonda, sikce pia malye winin ninguk talibuka, unyaka deice arye, malye kililanyaka ati, Allah dam ton kum yatinge. Aninguk kum bukni, sik Yerusalem mutuku unyak nang arye, Allah ati, tuba diba kum tenenyake. Tonda, ‘Allah arye, yata yupu nyapnusil do?’ tenen, el dam yanuka, moubuka kum kekenyake. Sik Yerusalem mutuku talibuka, deiyok kinyak nang arye, sik mutuku nang ati, ikin ning delinyake.

² Aweik asik donyakak unyak nang nirya ara, Allah arye do, ninye arye do, ‘Aning ara, wininamlume Aning ara, pia kum wininamlume,’ nyabuka, wenena yupu nyaptinga babye, amutuku ninye arye, ayupu pia kum kekenyake. Atonun, Allah arye, ‘Aning ara, malye wininmaluma ati, aning ara, pia bataknulume,’ nyaptua babye, mandipna ubikirye, ‘Dauplye,’ tenen, pia kum kekebikirye, kum bikmanto unyake. Tonda, amutuku noutam unyak nang ara, sik kanye nirya dobuka, Allah el deice pia kum delinyake. Tonda, sikce, ‘Allah Yahweh aryuk, melibuka lyepropnamsileʼ tenen, diba kum tenenyaka ati, elti kum moronyake. Tonda, sikce, ‘Nun si erenyap Allah, el dam ton tamubuka yanamabe,’ pia kum tenenyake.

³ Amutuku noutam weik asik talibuka unyak ninye deiyok nang ara, yu singa kus arye, weik yupu weik tonun nyaplirye, yuk kam ning obuka, dilamle touk, sik adeiyok nang arye, weik yupu nyabikirye, ‘Nunda yata ning ton, ubula doproptibye do?’ tenen, malye weik wininyake. Tonda, amutuku unyak nang malye winipdakiba, amutuku deiyok nang arye, ‘Sik malye winipdanmace ning ati, yupu bokeipnamabeʼ tenen, bulubikirye, yupu bokolina ati, deiyok nang ara, winipmanto unyake. Ara, bai tam yu ulamle kam, dina weik tonun pataplirye, aupmalye ning obuka diplirye, sirya daklamle touk, unyake. Tonda, ayu kam winiplirye, ‘Adin ara, kwal deipmanya ani, beren tam talak ton, tamubuka yanirye, dipnamne,’ pia kum tenelamle touk, amutuku yupu bokolina deiyok nang babye, adiparyuk yuk nang talinyak ning, alubuka dolonyake.

⁴ Aning atouk, Yerusalem noutam unyak nabi-nabi nang, pil donyak ning ara, dipkoprob ning ton, kum donyaka ati, ‘Ayupu ara, dipkoprob Allah arye nyasilye touk, aninguk nyanamabeʼ tenen, tenebuka kum unyake. Sik mining kanye aryuk tenenyak ning dem, talye nyaltakanyake. Ati, sikce nyanyak yupu ara, yuk ninye arye, ‘Dipkoprop yupu nyapsiake,’ kum teneptinge. Tonda Allah arye, ‘Aning ara, naʼ tenen, el bidamnye ati, kintinibuk ning ara, sik imam pil dona deiyok nang arye, aning ati malye kilinyake. Ara, ‘Aning doprobibirye, talye luparabuka doptibye,’ tenebikirye, mambul teleb lek ning ati, malye kilinyake. Winibikceura, Allah el si eren pil, aning dobuka, pil kum doptinge. Tonda, amalye wininyak imam nang, sik patan ning atibuk winikirye, Allah arye, ‘Aning ara, wininamlume. Aning ara, pia kum wininamlumeʼ, nyapdeiamsuk yupu nirya ara, yanikirye, tamubuka sik tenibikce ninguk, wininyake.

⁵ Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.

⁶ Nara, Allah Yahweh arye nyapsine. Narye, yata yala nang nirya do, narye sik malye winin ninguk, talinyak nang ton, yupu akunum seksirye, anang akunum kum kipdeipse. Sik ayala nang, amutuku noutam ulamik ninye arye, weik asik dobuka, ulamik mutuku nirya ara, aning nirya narye dakuka, sice buklopseba, oldemuk kibuk. Winipseba, sik anyasik noutam pala bisik yamik ning ara, minop talak ninye weik balamik bukni, narye abisik nirya, dakuka sice buklopseba, wini talak ara, tonoknye babye, abisik kum balule. Tunim abuka oldemuk ulule. Tonda, sik amutuku asik dobuka, ulamikak ara, ‘Yuk tam yu nang arye olyasicakʼ tenen, kalikna ati, dolamik cang keil aik ap, kat keil arye, cang poka domik ning nirya ara, narye akunum dakuka bataksiba, wini talak ara, oldem kibuke. Tonda, amutuku noutam ara, ninye tonok babye ton, amutuku noutam kum unyaka ati, amutuku noutam yamik bisik ara, kum banyaka ati, tunim abuka, oldemuk ulule.

⁷ Wini talak, narye winibuka tenepse. Ara, ‘Kume, na mapu koproba ara, sikce natibuk, ‘Se, nun ni Allah atibuk, mambul weiknye ululeʼ tenen, ilil uplyeba, nati si erenamniake,’ tenepse. Tonda, narye sik malye winin ning ati, ‘Aning ara, bataknamlume. Teleb winin ning ara, ani,’ nyabuka, sik amutuku nang wenepnyopura, adeice arye, ‘Sikce na nyanun yupu moubuka kekenamniakeʼ tenepse. Tonda, na nyanun yupu nirya kekebikceura, nati ilil upnamle. Aning atonun, narye sik wenena ati, arepnamne ning ara, tenebikirye, ‘Se, kume. Ara, nun malye upmaba ati wenepmasile’ tenen, ‘Biknamake,’ tenepse. Winibuka tenyamse bukni, wini talak ara, malye winin ning ara, pia lake upmale. Sik Yerusalem tam unyak nang ara, min talak mitik malye dem winilamik bukni, wini talak ara, pia malye winin ninguk, luparabuka tabakikirye, pia malye weik wininyake.

⁸ Ati ara, anggun amutuku ululum nang ara, narye anggun dam, yanuka nyapnamsin sum ati, moubuka dinamlulume! Deiyok ara, narye anggun malye weik winilulum ning ati, tukwak arye laka nyananye unamsina ati, anggunce, ‘Se, Allah ara, dan talak arye, nun malye wininyap ning ati, yanuka laka nyaplirye, wenepnamsil do?’ tenen, moubuka dinauk unamlume. Aning ara, talye ati kum nyapsine. Deiyok ara, ani. Ara, narye tukwak nang mutuku sirya, im sirya nirya ukirye, ninye ayala-yala nirya ara, sik malye winin ning ati, yu weik arye wenepnamsine. Winapnamne ati, ninye deiyok kibuka, talinyak mutuku nirya ap, weik nang ap, narye akunum bulupdeipsinyopura, anggunti wenepnamsine. Tonda, anggun malye winin ning ati, na yu teninun ning ara, weik uku buk dilamle atonun unulula ati, aning nirya ara, anggun deice deipnyopura, tukwak mutuku im sirya, mutuku sirya nirya, unyak nang ara, uku arye dibuka, sirya daklamle touk, winipsilirye, obuka, sice buklopnamsina atia.

⁹ Bukni, aning nirya wenen ning, akunum areplyopura, narye sik tukwak noutam unyak nang nirya ati, kanye tamubuka deipnyopura, sikce na Allah atibuk, moronamniake. Tonda, sikce malye nyanyak yupu nirya ara, kum kipdeipnamne. Winipnyopura, ninye im sirya, mutuku sirya ati, teleb nyan yupu dem, sik kanye pum tam deipnyopura, teleb yupu uk nyanamake. Winipnamna deiyok ara, sik tonok kanye deice aryuk, na Allah Yahweh ati, na siuk erenamniaka ati, wininamne. Sik nirya arye, nati, ‘Se Allah ancuk melibuka lyepropnamsilame,’ nyabuka, moronamniake. Tonda, sik tonok kanye talima deice arye, ‘Kume, nun ni Allah atibuk, el piluk donamabe,’ nyanamake. Yuk talye isa ati, ton kum si erenamake. Aning kum bukni, tukwak mutuku nang nirya ara, narye nyapnye ninguk, moubuka talibikirye, na siuk erenamniake.

¹⁰ Tonda, minop talak, yu nang arye, na mapu Israel yala nang yanuka obikce, tuba kam unmek nang nirya, tapu koubuka bobinamikce, pia pera sukum Sudan mutuku bukni, otam mutuku noutam, dabinuka tuba unyak nang nirya ara, na dam tamubuka yanganamake. Aninye tamubuka yakirye, sikce na si erena ap, na arena ap ati, teleb arin ning bobuka, arelyanganamniake.

¹¹ Atalak noutam ara, se, na mapu nirya arye, aning akunum winipnamlum talak ara, min talak anggunce, na dam malye winilamnulum ning ati, ton alye kum dakdanamlume. Deiyok ara, aning ati ara, tuba kum wenemnamsina atia. Tonda, anggunce talima erebuka, kwalilamlum talak, narye nyapdeiamsise yupu, yaniplobuka, nati batakamnulumce, malye winin ninguk winilamlum ning ati, alye kum dakalanamlume. Deiyok ara, ani. Ara, anggun unamluma dam arye, anggun talima erepdakirye, pia kwalinauk unyak nang nirya ara, anggun kan-kan arye akunum yaknamne. Winipnyeura, anggun tuba asukumuk unamlum nang ara, na pia teleb lek mutuku dup deice dam ulamluma ara, talima erebuka kum kwalinamlume. Ati, na dam ara, malye winin ning ara, ton ap pia kum wininamluma tia.

¹² Teleb winin ninguk wininamluma deiyok ara, ani. Ara, narye alek mutuku obinuka unamak nang ara, na Allah arye, sikda tonok kanye kipdeipnyeba, talima lamapdongobuka, amutuku noutamuk binuka, telebuk unamake. Amutuku noutam binuka unamak talak ara, sik aninye nirya arye, ‘Se, nun ni Allah Yahweh, elce, melibuka lyepnamsilarya. El si deiceuk, teleb unamabe,’ tenenamniake. Sik atouk nang ara, omutuku binuka unamake.

¹³ Tukwak mutuku sirya, im sirya nirya noutam, malye un ninguk talibuka, wininyak nang ati, yu weik arye wenebuka opnirye, sirya daknamne. Bukni, anggun tuba kam unamlum Israel nang ara, mitik tonun tuba aunmace nang ara, tonap tamubuka, malye un ning, kum wininamlume. Yata nang do, sik aninye arye, tonap tilila yupu nyana kumce, malye kum kilinamake. Tonda, sikce talye yupu nyana ap, tenepce nyan yupu ap, kwinisa don yupu ap ara, sikce pia kum nyanamake. Sik teleb unamak Israel nang ara, yuk nang ap kanye deibuka, neika teleb aryuk, tunim abuka unamake. Wini talak arye dipdongobuka, doyanamle talak nirya ara, sikda yuk nang ati ton, ilil pia kum unamle.

Aminyan talak Yerusalem tam unamak nang, kanye kil-kil mot nyapnamaka ati, nyabuk yupu

¹⁴ Se anggun Israel yala nang bukni, Yerusalem mutuku noutam unamlum nirya ara, anggun kanye nirya deipmunce, weik yupu deice, kanye lon mot nyanamlume! Ara, anggun weik asik Yerusalem tam, (Sion tam) noutam ululum nango. Pin-pin kanye deipmunce, mot nyanamlume. Ara, mitika arye kume. Anggun Yerusalem tam nang, Allah, el mapu koproba ululuma ati, anggun kanye talima nirya arye, weik yupu deice arye, kanye lon mot nyanamlume!

¹⁵ Aning ara, talye ati kum bukni, deiyok ara, ani. Ara, Allah Yahweh arye, anggun malye winin ning nirya ati, anggun wenena ning ap, anggun malye winin ning ati, menenga ning arena ap ara, tonap kum arenamsile. Aning kum bukni, Allah arye namin kilinauk, wininamsila atia. Tonda, Allah elce anggunti, yu upliba, osenyak nang nirya ati, ‘Kume, daupmalye! Israel yala nang ton, kum olbinamlume,’ nyabuka, anggun mal olan nang ara, yaknamle atia. Wini talak ara, anggun weik deiyoknye, Allah Yahweh ara, anggun Israel yala nang nirya ati, pia kaliknauk unamsile. Ara, nara Allah ap, anggun unamlum noutamuk, pia neika unamabe. Ati ara, Allah Yahweh elcuk anggunti, pia kalikinamsile. Ati, wini talak arye, dipdongobuka, dounamlum talak nirya ara, anggunce, ‘Se, yata kanye mun ning nun dam yasiliba, ikin weik unamsil do?’ tenen, anggun ilil winin ning ton, kum unamsile.

¹⁶ Na tenepse talak akunum uplyopura, anggun dana-dana tam nang nirya arye, anggunti, nyanamsiake. “Se, anggun Yerusalem weik asik noutam ululum nango, anggun kanye nirya ara, bokoltosiliba, ilil pia kum unamsile. Tonda, anggun Sion mutuku noutam ululum nang, anggun taruk ara, pia mitanguk, kum unamsile. Na Allah aryuk anggunti, melibuka kalikinamsile,” nyapsine.

¹⁷ Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.

¹⁸ Ati ara, na Allah arye, kanye deipsinirye, anggun kanye ikin ning ap, yu nang arye, opsikce, sice bukuka bataklamsik ning ap, kum dasuk ning nirya ara, aikin usilye ning nirya, yangalamsuk ning ara, narye kum kipdeipnamsine. Winipmanto ara, weik kwalya kwalibuka dinmakirye, kanye deibikirye, pia kanye kil-kil mot nyalamak touk, anggunti lyepropsinirye, teleb kipdeipsinyopura, anggun nirya arye, kanye deipnamlume. Deiyok ara, ani. Ara, minop talak, ikin weik ning, anggun deice uamuk talak ara, yuk tam ninye arye anggunti, malye nyabuka, akutulamsik bukni, aning ara, tuba kum wininamake. Naryuk aning nirya kiliplopniba, pia telebuk kipdeipnamsine.

¹⁹ Tonda, moubuka dilinamlulume! Doyanamle talak ara, yu nang arye, anggun Israel yala nang ati, ikin ning, anggun nong deice delilamsik ning ap, ikin pil aruk lamsik ning ap ara, anggunti olyangalamsik nang ap, naryuk amalye nang ati, obuka kum kipdeipnirye, malye kibuka bataknamne. Tonda, winipmanto yupu deice arye, nyapnusine. Ara, domba basam wein nang arye, yan bir yok cepmalye domba basam ara, bisik binmanto kum upliba, adeiyoknye birye, adomba basam iribuka bobalamak touk, anggun babye, winipnamsene. Ara, anggun Israel nang babye, nong mitang upsilye talak ara, anggunce, ‘Se, yata wiriptibye do? Yata ubuka bitibye do?’ tenen, walwal kipdanin balamluma nang nirya babye, na Allah aryuk lyepropsinirye, teleb kipdeipnamsine. Tonda, yuk pera mutuku nang arye anggunti, obuka malye kipsikirye, si mutuku bobinamsiakopura, narye anggunti, lopdeipsinirye, dobuka tuba tamubuka, anggun mutuku koproba boyanamsene. Tonda, malye nang arye, anggun mutuku noutam arye yaksikcopura, narye anggun dam yanuka, kaliksinirye, anggun bulubuka, anggun mutuku koproba tamubuka boyasinirye, teleb kilinamsine. Winipnamne deice arye, anggun Israel nang ati, malye yupu nyapnarye, nalibuka akutulamsikba, alye weik ulamsuk ning ara, kum daneipnamne. Narye anggunti, tamubuka teleb kipdeipsiniba, yuk tam nang eipsikirye, ‘Se, wini talak ara, sik Israel nang ara, pia telebuk unyake,’ tenepsikirye, anggunti si erenamsiake. Tonda, sik yuk-yuk mutuku daunyak nang arye, anggun Israel nang ati, ‘Se, sik aninye nirya ara, dipkoproba mambul weik nang unyake,’ nyabuka, kanye pia deipsikirye, si erebuka kinamsiake. Anggun ti, pia teleb yupu nyabicopura, mutuku sirya, im sirya unyak nang nirya, ayupu kekebikirye, anggun si bikinamsiake.

²⁰ Aning-aning nirya winipnirye, anggun Israel yala nang nirya, tuba tamubuka teleb kilinamsin talak ara, anggun yuk-yuk mutuku noutam dabinuka, talye unamlum nang nirya ara, kalikuka bopsinirye, bulubuka anggun mutuku koproba, tamubuka boyanamsine. Aning akunum winipnyopura, adeice arye, tukwak mutuku sirya, im sirya unyak nang nirya arye, anggun Israel yala nang ati eibikirye, ‘Se, sik Israel yala nang nirya ara, dipkoprob mambul nang unyake. Sikda pia telebe,’ nyabuka, anggun si erena ati, kanye pia deipsikirye, si erebuka kinamsiake. Winibikcopura, tukwak nang nirya arye, kekebikirye, anggun Israel nang si biknamake. Narye anggunti, melipsinirye, minop talak anggun taleamlum ning, kum dayuk ning nirya ara, tamubuka pia teleb kipdeipnyopura, anggunti arepsiniba, anggun asing arye eipnamlume. Nara, anggun ni Allah Yahweh, pia mikip weiknye birye, nyapsina ati, aning nirya dipkoprob nong upnamle, nyapsine. Na Allah Yahweh arye, akunum nyapdeipsine. Allah arye nyabuk.