Zefanya 2 - Eipomek

Allah arye, Israel nang nirya ati, “Anggunce malye winilulum ning nirya ara, adiparyuk bataklulume,” nyabuk yupu

¹ Allah Yahweh arye, nabi Sefanya dam yanuka nyabukba, nabi Sefanya birye nyabuk yupu ara, ani. Se, anggun amutuku noutam ululum nang nirya ara, anggun malye winimunye ning ati, alye dakalana ap, ilil tenen ning ap ara, pia kum usulul nang ululume. Anggun nirya ara, neika bulupmunce, ayupu kekebuka nimalyap arye, moubuka biknamlume!

² Ara talye ati, kum nyapsine. Deiyok ara, ani. Allah Yahweh arye, tukwak mutuku, im sirya, mutuku sirya nirya, sik malye wininyak ning ati, wenebuka opnamle sum, dipkoprob yanamal ati, anggunce moubuka kekeplulume! Allah el yu uplyeba, weik tonun wenepnamsil sum, min kum yanmalye talak aryuk, anggun malye winilulum ning, adiparyuk batakuka, Allah el dam tamubuka yalulume. Aning kum winipmunyeura, gandum duk teikikceba, el bama tukwak sakuka, kouluplyeba, kum arye pubuka bobalamle touk, Allah el yu weik, anggun dam yanuka deipnamsiliba, yuk mutuku yu nang arye, anggun obuka, tapu koubikirye, anggun mutuku noutam arye, yuk pera mutuku bobinamsiake. Atalak ara, Allah el yu ara, uku buk dilamla atonun ubuka, malye kanye bobuka, weik tonun wenebuka, opnamsila ati nyapne.

³ Se, anggun amutuku noutam ululum nang kan-kan arye, anggun kanye amu tam kibuka ululum nango, anggun adiparyuk, Allah Yahweh el dam tamubuka yalulume. Tonda Allah arye, ‘Aning ara, wininamlume, bukni aning ara, pia kum wininamlume,’ nyabuk ning, talibuka winilulum nang ara, tamubuka Allah dam yamunce, Allah elce tenelul touk, winipnamlume. Tonda, ‘Atalak ara, nun ni Allah arye, yata nyapnamsil do?’ tenen, Allah dam tamubuka yamumce, moubuka kekedenamlume. Ara, kanye lamapdongobuka, Allah dam yamunce, kanye erelana kum aryuk, namin kanye bonamlume. Tonda, Allah arye, ‘Wininamlume, wininamlume. Diksukum winin ning ara, ani, aninguk talibuka, telebuk wininamlume,’ nyabuka laka nyapdeiamsuk yupu kekebuka, aninguk talibuka, telebuk wininamlume. Winipmunyopura, Allah Yahweh el yu, ‘Anggun Israel nang deice deipnamsin,’ tenebuk sum ara, anggun telebuk winilulum nang deice, ‘Bico tenepsuturye, wenen ning kum arepnamsil do? Arepnamsil do?’ tenena atia. Bukni, el kanye ara, nun walwale.

Israel nang bukni, sik mutuku noutam dana-dana unyak yala yuk-yuk nang ara, wibuka malye kipnamuk ning ati, nyabuk yupu

⁴ Gasa mutuku, weik asik dobuka unyak nang ara, yu arye oblyeura, tonoknye babye, ton kum lyepdanamake. Sik nirya ara, obuka sirya daklyeura, amutuku ara, asik oldemuk upnamle. Tonda, aning atonun, Askelon mutuku asik dobuka unyak nang, nirya oplirye, sirya daklyeura, aminyan talak ton, ninye ton amutuku pia kum unamake. Asik oldiamuk uplirye, tunim abuka kum danamle. Tonda, Asdod mutuku unyak nang ara, beren tam talak yakirye, sik mal oldan nang ara, mangkau kanye bobuka, didik senmaca ati, kum bikmace bukni, sik mal olan nang arye yanuka, olanmaca ani, keting duk-duk an akunum winiplyopura, anang nirya, obuka yakdonoknamake. Tonda, sik mal olan nang yakirye, ‘Ekron mutuku ululum nang ara, anggun umunye mutuku noutam batakuka, bindoplulume!’ nyabikcopura, anang nirya, obuka yakikiba, amutuku nang babye, adiparyuk binamake.

⁵ Se, anggun Pilistin yala nang ara, bicoe! Anggunda, Kereti yala nang ululume. Anggunda, weik Laut Tengah mekwen kup-kup tam ululum nang ara, anggun nirya ati nyapsine. Allah Yahweh arye anggunti, ‘Winibuka-winibuka opnamne,’ akunum tenebuka ati, elce anggunti, malye yupu nyabuka, anggun deice wenena ning deipsilirye, supnamsile. Se, anggun Kanaan tam ululum Pilistin nang nirya ara, bicoe. Allah Yahweh arye, anggun wenena ati akunum kintinibuka deibuka ati, dipkoprob anggun nong deice ikin deipnamsile. Allah arye, anggun amutuku noutam ululum nang nirya opsilirye, kum kipdeipnamsile. Ati, anggun umunya mutuku arye, tonoknye babye, ton kam kum upnamle. Anggun mutuku nirya ara, asik oldemuk upnamle.

⁶ Aning atonun, weik laut mekwen deibukba, kup-kup tam umunye, Pilistin nang nirya ara, Allah arye, obuka sirya daksilyeba, anggun asik domumnyak ara, anggun asik nirya dakuka, sikce buklopbikiba, mutmuta dem papnamsile. Asik oldem upsilyeba, anggun mutuku noutam, minop talak asik uamuk bukni, aminyan talak ara, domba basam wein nang, sik barasik dobuka asukumuk deipnamsiake. Sik domba basam ara, amutmuta uk dinamake. Winibikirye, domba basam poka babye, amutuku noutamuk dopnamake. Ninye ton, aik dobuka, amutuku noutam kum unamake.

⁷ Yehuda yala nang, mitik tonun tuba kam unamak nang ara, na Allah arye lyepropnirye, teleb kipdeipnamne nang ara, sik Pilistin nang minop talak ulamik mutuku, weik laut mekwen kup-kup dam uamuk mutuku nirya ara, sik Yehuda nang dopropsikirye, sikda amutuku noutamuk, yanuka unamake. Tonda, Yehuda yala nang aryuk, sik Pilistin nang taleamik mutuku noutam, mutmuta papnamlak ara, sik domba basam weinamake. Lukunyan kiplyeba, sik domba basam weina deiyok nang mana ati ara, Askelon nang, sik domik aik batakamice, aik wekuka manamake. Aning nirya ara, dipkoprob nong upnamla deiyok ara, ani. Ara, Yehuda yala nang nirya ara, anggun ni Allah Yahweh arye anggunti, ‘Anang melipnirye, tamubuka teleb kipdeipnamsinʼ tenen, erepdeiplyopura, sikda minop talak telebuk ulamik touk, tuba tamubuka, telebuk unamake,” Allah arye, ayupu nyapdeibukba, nabi Sefanya birye, lak nyabuk.

⁸ Allah elce, ayupu ton nyabuk. “Moab mutuku nang ap, Amon mutuku nang ap arye, na mapu koproba, Israel nang nirya ati, malye-malye yupu deice arye, nalibuka akutulamek ning ara, na akunum kekelamsirye, tuba kekenune. Tonda, sik Israel yala nang arye, talinyak mutuku ati, malye yupu nyalamlume. Tonda, anggun amutuku ululum nang ara, tilila yupu deice arye, “Allah el mapu, sikce talibuka unyak mutuku ara, nunce dalubuka dopropnamabe,’ nyabuka, maknya kintinibuka erelanyake. Anyalulum yupu nirya ara, narye kekenune.

⁹ Na Allah Yahweh, aning-aning talibuka, deice tam erebuka, Pia Mikip Weik Deiyoknye ununye birye, im deice yin talin malaikat nirya ara, sik deiyoknye unune. Narye dipkoprob nyapsine. Nara Allah, anggun Israel nang yala-yala nirya talinirye, anggun deiyoknye unune. Narye anggunti, melibuka kalikisiniba, anggunce, nati si erenululume. Nara dipkoprob kam pia ununye. Na si deice arye dipkoprob nyapsine. Moab mutuku unyak nang ap, Amon mutuku unyak nang ap, narye obuka, pia kum kipdeipnamne. Ara, minop talak, Sodom mutuku ap, Gomora mutuku ap, amutuku pia malye weik ulamik nang, sik wenena ati, obuka kum kipdeiamse touk, winipnamne. Sik mutuku noutam unyak nang nirya ap, aik ap, akunum wenebuka kum kipdeipnyeura, oldemuk upnamle. Aminyan talak ara, talye garam ulamla atonun upnamle. Tonda, bai tam talye palamle taice palamle atonun kibuka upnamle. Amutuku nirya ara, dakuka bataknyeba, pia malye mutuku upnamle. Winiplyopura, na mapu koproba, sik Israel nang ara, mitik tonun tuba kam aunamak nang ara, sik Pilistin nang taleamik mutuku nirya, alubuka doprobikirye, asukum unamake.

¹⁰ Moab mutuku unyak nang ap, Amon mutuku unyak nang nirya ara, winibuka wenepnamna deiyok ara, sik kanye erelalamik deice arye, maknya kintilamikce, na Allah arye taleamse nang, sik Israel yala nang nirya ati, malye kibuka nalilamikce, akutulamek. Tonda, sikce, ‘Kume, sik Israel nang talinyak tam nirya ara, nuncuk alubuka dopropnamabe,’ nyabuka, malye yupu nyalamik. Bukni, nara Allah Yahweh, mikip weik ununye birye, sik im deice yin talin malaikat nirya talinirye, sik deiyoknye unune. Israel nang ara, ‘Naʼ tenen, nang unyakak ati, sik Pilistin nang arye, ‘Naʼ tenen, nang ati, malye yupu nyabuka akutunyaka ati, narye sikti, wenebuka opnirye, sice buklopnamne.

¹¹ Ati ara, na Allah Yahweh arye, sik Pilistin mutuku unyak nang ati, yu arye wenepnyopura, sikda ilil pia weik unamle. Tukwak mutuku, im sirya, mutuku sirya nirya, noutam unyak nang arye, talye isa ati, ‘Nun ni koproba,’ nyabuka, si erenyak talye ning ap, isa-isa nirya ara, na Allah arye obuka, sirya daknirye, malye kiplopnamne. Winipnyopura, tukwak mutuku sirya, im sirya nirya, weik laut kup-kup unyak nang ap, laut mekwen noutam arye, antanap dongobuk mitik mutuku, pulau-pulau deice unyak nang nirya ara, Allah Yahweh dam ngangkanudongobikirye, kutam tuku dipdongobuka, na Allah ati, si erenamniake. Ara, sik nirya, mutuku yuk-yuk daunyak touk, sik talibuka unyak mutuku noutam aryuk, na Allah siuk, erenamniake.

¹² Tonda, Sudan mutuku noutam ululum nang ara, na Allah Yahweh arye, lo arepnirye, yuk mutuku yu nang dobuka deipyeura, sik ayu nang arye, parang ya dobuka, anggun Sudan mutuku nang weika arye opnamsiake.

¹³ Aninguk kum bukni, aning nirya akunum winiplyeura, na Allah arye, na mikip weik deice arye, lo ton arepneba, narye dopdeipnamne yu nang arye, dabu tam (arah utara) unyak nang, Asyur mutuku unyak nang babye, sik dam binuka obikirye, malye kibuka, sice buklobuka bataknamake. Bukni, aning nirya ara, narye. Ati, winipnyopura, ayu nang deice arye, Niniwe mutuku unyak nang babye, weik asik domik bukni, amutuku unyak nang babye, obuka sirya daknirye, sik mutuku asik oldemuk uplirye, amutuku nirya bipla papnamle. Tonda, sik mutuku nirya ara, tuku oldem upnamle. Ninye ap, mek pia kum sukum, padan gurun atonun mutuku upnamle. Ati ara, ninye upmanto kum mutuku upnamle.

¹⁴ Ninye ara, amutuku ton ap, kum unamak bukni, asik oldemuk upnamla ati, talye bai tam kam unyak ning yala-yala nirya ap, tonda amutuku noutamuk, ninye unyak sukum kum yanganyak maka, kout maka ap, pia pata mutuku noutam ulye kout maka ap, yanuka asukumuk dikdik sebikirye, unamake. Ninye asik ara, ninye una kumce, oldemuk upnamla ati, minop talak weik asik domikce noutam ara, ninye una kum ati, kout maka, el si burung undan ap, bangau ap ara, asukum yanuka mapnamake. Tonda, kout maka arye, jendela bisik buklirye, el yupu nyanamle. Tonda, sik batakamik asik dam, wekelban bisik bublan dam ara, mirin weik maka, el si ara Gagak maka, el yupu weik tonun nyanamle. Amutuku teleb asik domik talak ara, urasin pia teleb yo, el si ara cemara yo arye, sik aik amsuna ap, abilinga ap, domik bukni, atalak ara, anyaik lokuka, tuku deice pouplirye, ayo lyupnamle.

¹⁵ Minop talak, Niniwe mutuku noutam ara, ninye weik bulubikce, weik asik dobuka ulamikce, maknya kintinipdanuka ulamik. Sikce nyalalamik, “Kume, nunda, pia teleb aryuk unyabe. Nunda, pia dakeiam asa unyabe. Yuk mutuku nang nirya ara, kum olyanganamsiaka ati, nunda amutuku nun yuk unyabe. Nunda pia weik asik dobupa atonun, yuk mutuku nang nirya ara, nun teleb weik asik atonun ton, kum doptinge,” nyabuka nyalalamik. Winibuka nyalalamik bukni, amutuku pia teleb asik weik awamuk ning ara, wini talak ara, dan sukum ton ulul do? Niniwe mutuku weik asik domika ara, wini talak akunum kum dayuke. Talya bai tam kam ulamle ning, yala-yala nirya, ilil tenena kumce, talye mangkau arye, amutuku bulubuka wekelbikirye, dikdik senyake. Yata nang do nirya, amutuku bisik banamak nang ara, asik oldem ubuka ati, amutuku eibikirye, ‘Se, amutuku ulamik nang, yata deiyok ati, Allah arye, obuka sirya dakuk do?’ tenen, ilil upnamle. Allah arye, ayupu nirya nyabuk.