Zakaria 9 - Eipomek

Israel ninye unyakak arye, yuk pera mutuku dana-dana ninye ati, ‘Allah arye wenepnamle’ tenen, nyabuk yupu

¹ Allah Yahweh arye nyapdeibuk yupu ara ani. “Narye tukwak mutuku noutamak unyak ninye sik wininyak ning nirya ati elinunce, Hadrak mutuku ap, Damsyik mutuku ap, unyak ninye malye wininyak ning ati wenepnamne,” nyapdeibuk. Ara, sik Israel yala ninye unyak mutuku noutam atibuk kume. Ayupu ara talye ati kum nyapsine. “Deiyok ara, pia weik mutuku noutam el si ara, Siriya mutuku noutam ninye deiyok nang unyak mutuku babye, na Allah Yahweh elinunce talinune,” nyapdeibuk.

² Allah Yahweh arye, Hamat mutuku babye, talilule. Ara, Hadrak mutuku ap, wilibuka dana-dana bokolanak unyak ninye nirya babye, Allah arye, talilul ninye unyake. Aning atonun, amutuku nang arye, weik kel kina deiyok ning nirya, kel bikamik nang unyak mutuku, Tirus mutuku ap, Sidon mutuku ap nirya ara, Allah arye talilule.

³ Tirus mutuku unyak ninye ara, ‘Ninye yuk nang arye, yanuka wekuka opsicak’ tenen, cang keil poka dobuka, antanapdongamikce, dekna weik ning, el si perak ap, emas ap, nirya ara, yanuka libuka delilamikba, pia weik nukmanto kum ubuk. Winilamika ati, winipmanto ara, talye mek wenenga atonun ap, talye tuku palibikiba, balamak bisik dam yanuka delilamikiba, weik arye welelamle touk ubuk. Ara, sik emas ap, perak ap, delilamikca ara, nukmanto kum ati nyapne.

⁴ Wini talak ara, sikda bona weik talin nang unyake. Bukni, wini talak ara, Allah Yahweh arye, sik aninye talinyak ning nirya, dalubuka doproplirye, sik amutuku unyak ninye ati, bona utotoa talina kum ninye atonun kipdeipnamle. Ara, amutuku nang arye, sik dekna weik ning dobuka, weik mek liya yo deice deibikirye, laut mekwen deice balamle ning, el si ara, kapal laut nirya, Allah arye nyapliba, amek liya yo nirya mekwen dipnamle. Winipnamle touk, amutuku weik asik domik ning nirya, Allah arye nyapdeipliba, uku dibuka sirya daknamle. Winibika deice arye, amutuku nang nirya ara, Allah arye, aninye nirya bona utotoa talina kum nanguk, kipdeipnamle.

⁵ Winipliba, weik aik domik mutuku si, Askelon mutuku ap, Gasa mutuku ap, Ekron mutuku ap, awiniplye ning eibikirye, lukdanuka ilil weik upnamle. Winipliba, Ekron mutuku nang arye, ‘Se, aning winiptibye’ tenen, pia patalamukba, tenilamik ning nirya ara, Allah arye kum kipdeipnamle. Tonda, Gasa mutuku ninye deiyok kibuka ululnye bira, dipliba kum danamle. Tonda Allah arye, Askelon mutuku unyak ninye nirya ati, kum kipdeiplirye, Askelon mutuku ara, bipla pabuka, tuniplirye asik oldemuk upnamle.

⁶ Asdod mutuku ninye koproba, nirya kum kipdeiplyopura, ninye pera mutuku dana-dana nirya yanuka, bulubuka unamake. Ara, ninye asik nang atonun ninye arye, Asdod mutuku ulul ning nirya dopdobikirye, amutuku unamake. Wininamaka ati, Allah Yahweh arye nyalule. “Sik Pilistin nang arye, kanye talima erelamik mutuku ara, na Allah arye, yanibuka mitik kipdeipnamne. Winipnyopura, sik Pilistin ninye ara, alye dakdanamake,” nyapdeibuk.

⁷ Allah arye sik amutuku ninye ati nyabuk. “Sik Pilistin ninye ara, minop talak ara, ining tuba upmalye ning, tup ning aning-aning nirya ara, talye lukparabuka dilamik bukni, wini talak ara, tuba kum dinamake. Tonda, yuk din yala yuk ning nirya babye anggunti, ‘Aning kum dinamlulume,’ nyapdeiamsise ning nirya ara, amutuku nang arye, kum dinamake. Ara, na Allah arye, sik amutuku koproba nang nirya obuka, sirya daknirye, yuk nang ara batakniba, tuba kam unamak ninye ara, ‘Naʼ tenen, ninye uk unamake. Winbicopura, yuk nang nirya arye anang ati, ‘Sik anang ara, Yehuda yala ninye atonun unyake,’ nyabuka nyanamake. Aning atonun, Ekron mutuku tuba kam unamak ninye nirya ara, na amu tam unamake. Ara, minop talak Yebus mutuku ulamik ninye ap, na mapu koproba, ‘Naʼ tenen, ninye, Israel ninye ap, tabakuka ulamik touk, Yebus mutuku ninye ap, ‘Naʼ tenen, ninye, Israel yala ninye ap, neika unamake. Winibicopura, sik Yebus mutuku ninye ara, na tam ninye atonun kibuka unamake,” Allah arye nyabuk.

⁸ “Na Allah arye talinye mutuku ati, kalikuka dinamne. Winipniba, yuk pera mutuku yin talibuka unyak nang nirya arye, ‘Amutuku yanuka dalubuka dopropnamabe,’ tenenyak ning ara, narye yupu sekelongonamne. Wininamna ati, yuk pera mutuku yin talin nang arye, ‘Allah el ‘Naʼ tenen, ninye ati, yanuka obuka, sirya dakikirye, sik mutuku talipnamabe,’ tenenyak nang ati, na Allah arye, lo kum arenamne. Lo kum arenamna deiyok ara, ‘Naʼ tenen, ninye ikin kanye bobuka unyak ning ara, narye akunum elinune ati nyapsine,” Allah arye nyabuk.

“Ninye deiyoknye, Raja aminyan talak yalirye, Israel ninye nirya talinamle,” nyabuk yupu

⁹ Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.

¹⁰ Allah arye nyabuk, “Epraim yala yin talin nang arye, ninye olanmace talak bukikirye, balamle kuda basam arye, libuka tuku deice balamak ning, mal olalbalamak kereta ap, kuda basam ap nirya ara, na Allah arye kum kipdeipnamne. Tonda, Yerusalem mutuku nang balye deice bukuka, banyak kuda basam nirya babye, kum kipdeipnamne. Tonda, ninye olana ati, bolamak yin nirya ara, yuk ninye on ning, ayala-ayala nirya ap, cebuka atu atonun kiplopnirye, kum kipdeipnamne. Aning ara talye ati kum nyapsine. Ara, Israel ninye anggun ninye deiyoknye, na Allah arye, anggun nirya ati, talye kanye bobuka, teleb unamlum talak arepnamsina ati, nyapsine. Ara, ‘Anggun ap, mutuku-mutuku nirya daunyak ninye ap, tonok kanye bobuka, dukdongobuka unamlum’ tenen, ayupu nyanamsine. Otam deibuk laut mekwen ap, atam deibuk laut mekwen ap, anoutam dipdongobuka unyak ninye nirya ara, na Allah aryuk talinamne. Tonda, Efrat mek dam arye dipdongobuka, mutuku sirya, dana-dana nirya, naryuk talinamne.”

Pera mutuku nang arye, Israel ninye tapu koubuka, bobinamik ning ati, Allah arye, ‘Lobuka lyepnamne’ tenen, nyabuk yupu

¹¹ Allah el si Yahweh arye, el wipdeiamuk ninye ati nyabuk. “Na Allah arye anggunti, ‘Teleb kilinamsine,’ nyabuka, nyalin yupu deice arye nyalilamsise ning ara, dipkoprob nong upnamle. Ara, anggun malye ulamlum ning nirya, namin kina ati, kam ning obuka arelyanganumunya deice arye, ‘Akunum winipsuke,’ tenenamlume. Ayupu nyalilamsise ning ara, dipkoprob nong upnamle. Ayupu ara, min kum winiptue. Ati, narye, ‘Wininamsine,’ nyabuka, nukamsise ning ara, dipkoprob nong upnamle. Pera mutuku nang arye anggunti, tapu koubuka mek dina ati, lukamik pum bisik mek cemuk pum tam, dolkwetelamsikba, imun kanye bobuka, ulamluma noutamak arye, lobuka lyepdopnamsine.”

¹² “Se, anggunda yuk pera mutuku bobinamsikba, wenen aik pum tam tuba ululum ninye ara, ‘Dipkoprop Allah arye, lobuka lyepnamsil’ tenen, kintinibuka dinauk unamnulume. Asum ara, narye anggunti, ‘Tuba tonap teleb kipdeipnamsine,’ nyabuka, nyalin yupu deice arye nyapsine. Winipnamna ati, tamubuka anggun minop talak, cang keil poka dobuka, antanapdongamlum mutuku yanuka unamlume. Narye anggunti, melipsiniba, pia telebuk unamlume. Ati kekeplulume, na weik tonun langdibuka arenamsine. Ara, anggun imun kanye bobuka, winilamlum ning pununa ati, like bitinye deice arye, arelbalamak touk kibuka, arenamsine. Imun kanye bobuka ulamlum ning ara, mitik weik ulamuk bukni, pia kanye delin ning arenamsina ara, kum nukmanto, like bitinye deice arye, arelbalamak touk, kibuka arenamsine.

¹³ Na Allah arye, anggun Yehuda yala ninye nirya ati, na ninye on yin atonun kipdeipnamsine. Anggun Israel ninye ara, na ninye on mal atonun kipdeipnamsine. Tonda, anggun Sion mutuku ululum ninye ara, na ninye on parang ya atonun kipdeipnamsine. Winipsinyopura, anggun nirya arye, sik Yahudi yala kum ninye, Yunani yala ninye unyak mutuku olbinamlulume. Minop talak obuka, sirya daksik ninye ara, anggunce obuka malye kipnamlulume. Na Allah arye, Israel yala ninye ap, Yehuda yala ninye ap nirya ati, nyapsine,” Allah arye nyabuk.

Allah Yahweh arye, “Na tenen ninye, Israel ninye ati lyepnamne,” nyabuk yupu

¹⁴ Allah el si Yahweh ara, el mapu koproba, sik Israel ninye ara, sik deice weik dua tiklamle touk, yanuka unamle. Winipmanto ara, minopce bebeya laklamle touk, upnamle. Tonda, mal dobikiba, minopce balamle atonun, Allah el mikip ara, winipnamle. El ‘Naʼ tenen, ninye, mal olan nang ati, el mal dopkweteplirye, minopce oplopnamle. Aning-aning nirya talibuka, Weik Erena Deiyoknye birye, ‘Wininamne’ tenelye touk ninye winipmanto kum pil dolulnye, Allah el si Yahweh arye, bilkong el si terompet arye, pong-pong apliba, weik lelim lepnamle. Ati, ‘Ninye olbinamap’ tenen, kintinipnamaka ati, bikilina ati, pong apnamle. Atalak ara, weik kumanya mikip eitam arye doplibuk, bubatek-bubatek abuka, kolukuka yangalamle touk winibuka, yalirye, el mal olan ninye ati, yanuka onamle.

¹⁵ Winipnamle talak ara, dipkoprob aning-aning nirya deice tam talibuka, mikip weik talibuka ululnye Allah Yahweh, im deice unyak malaikat nirya, sik weik deiyoknye ulula anya arye, el wibuka deiamuk ninye ara, el mikipnye amu tam ulamikiba, el nong arye lelildongonamle. Adeice arye, sikce sik mal olan nang nirya obuka, sirya daknamake. Ara, ‘Ninye opnun,’ tenepne talak ara, tapu arye keil kirikdongobuka, bobanmana ani, akeil mikip upnopura, ninye nong deice dobuka opdandenamak bukni, Allah el ‘Naʼ tenen, ninye ara, melipliba, amal olan ninye malye kibikirye, obuka sirya daknamake. Winipmanto ara, ninye arye yu lelamle mek dibikiba kanye teleb ning wangabikiba, malye kibuka, lukparabuka ninye talye olamak touk upnamake. Winipmaka deice arye, obice nang, sik ining ara, pia weik binamle. Winipmanto ara, Allah arena ati, kam ning obikirye, Allah si eren aik pum tam deiamice, marikna deice ining likililamak atonun, ining weik binamle. Tonda, yangalin makau pum tam, ining dikdongobikiba, langdilamle touk, sik mal olan nang arye, omice nang ining ara, weika arye binamle.

¹⁶ Allah Yahweh, elce tenelamuk talak akunum uplyopura, elce, ‘Na ninye’ tenen, wipdeiamuk nang, Israel ninye lyepnamle. Ara, talye ati kume. Deiyok ara, Israel ninye ara, Allah el ‘Naʼ tenen, ninye unyaka atia. Winipmanto ara, domba weina deiyoknye birye, el domba basam, ‘Kot saknilyak’ tenen, turya kirikilongolamak basam atonun, Allah arye Israel ninye ati, kalikuka melinamle. Winipliba sik anang ara, Allah el ulula dam unamake. Winipmanto ning ara, ninye deiyok nang, sik kalulamak ning, kat topi el si ara, mahkota deice, dekna weik keil dongobikiba, mila daklamle touk, sik Israel yala ninye ara, Allah arye arepnamsil mutuku noutam ara, pia telebuk kibuka unamake.

¹⁷ Doyanamle talak ara, Allah arye anang ati, arepnamle mutuku noutam ara, ninye arye, wa wibuka koulamak ning, el si gandum, nong weik upliba libuka, dilamica deice arye, sik awel nang ap, wel kilapu ap, sik nong teleb kibuka nenamake. Aning atonun, anggur mek winiryuk purubikiba, pia telebuk uplye ning, sikce kwebuka dinamaka deice arye, telebuk unamake. Winibicopura, akilisal sik nong urasin nirya, pia teleb asa arye unamake. Aninye nirya ara, Allah arye, pia moubuka talipliba, unamake.