Zakaria 8 - Eipomek

Allah Yahweh arye, “Yerusalem mutuku noutam tamubuka lipsisikuka dopnamne,” nyapdeibuk yupu

¹ Allah Yahweh arye, na Zakaria dam, mambul yupu nyapdeipnuke. Allah Yahweh, aning-aning talibuka, weik erebuka ululnye bira, im deice yin talen malaikat nirya, talilula deiyoknye birye, ayupu nyapnuke.

² Nara Allah Yahweh, aning-aning talibuka, weik erebuka ununye birye, im deice yin talen malaikat nirya talinirye, sik weik deiyoknye unune. Narye, ayupu nyapsine. Min talak ara, sik Yerusalem mutuku noutam ulamik nang nirya ara, malye weik ulamika ati, yu weik upnukba, sikti, wenepsirye, imun kanye bon ning weik arelamsise. Bukni, anggunti weik tonun bico tenyamsirye, ‘Sikda ‘Naʼ tenen, nang unyake,’ tenyamsa ati, na kanye ara, ‘Sikce, yuk talye ning si kum erenamake. Na siuk erepnikirye, na yupu uk talibikirye, moubuka unamake,’ tenyamse. Utenyamsa ati ara, wini talak ara, sik unamakak ap, sik ap ati, tuba tamubuka, pia telebuk kipdeipnamsine. Na Allah kanye noutam nirya ara, sik anang ati, ‘Sikda, ‘Naʼ tenen, nanguk unamake,’ tenenuna ati, sik Israel yala nang ati, yu uplyeba yanuka olyanganyak nang nirya ati, na lik weik unilirye, na talima noutam ara, buppu weik unulule.

³ Nara, Allah Yahweh arye nyapsine. Nara, tuba tamubuka, Sion mutuku uk, yanamne. Ara, nara weik asik domikak, Yerusalem mutuku noutamuk unamnarya! Ninye nirya arye, amutuku ati, ‘Se, sik Yerusalem mutuku unyak nang arye, Allah ati, pia diba tenebikirye, el tibuk talibuka ukirye, el siuk erenyake,’ nyanamake. Tonda, na Allah Yahweh, im deice yin talen malaikat nirya ara, sik weik deiyoknye unune. Na mutuku koproba ara, Sion mutuku ati, ninye nirya arye, ‘E, amutuku ara, dipkoprob pia teleb lek mutuku ulule,’ nyanamake. Nara Allah Yahweh, amutuku noutam yanirye, amutuku pia unamne.

⁴ Tonda, na Allah Yahweh, im deice yin talen malaikat nirya ara, sik weik deiyoknye ununa ati, anyapsin yupu ara, dipkoprob nong upnamlarya! Na Yerusalem mutuku noutam unamne talak ara, anggun du yapu wisi nang ap, wisi kilapu nirya ara, amutuku noutam bisik dam ara, kanye deibuka bunamake. Tonda, anggun nin yapu wisi kilapu ap, pia wisi nang ap ara, pia wisi danamaka ati, amutuku noutam tuba kam ukirye, kama deice aryuk banamake.

⁵ Tonda, amutuku noutam banamak talak ara, sik mitik mapu nirya ap, mitik kilmapu nirya ap arye, weik asik Yerusalem mutuku bisik noutam ap, ninye aik dam ap ara, kanye deibuka, arikal dolamikiba, amutuku nirya ara, langdipnamle.

⁶ Tonda, na Allah Yahweh, aning-aning talibuka, Pia Mikip Weik Deiyoknye ununye birye, na kele. Wini talak ara, anggun Yerusalem mutuku tuba kam unamlum nang ara, na nyapmasin yupu ati, ‘Dip do, kum do? Aning nirya ara, dipkoprob winiplyeba eipnamap do? Aning ara, pia kum winipmanto ninguk, nyapmasil do?’ tenen, kanye teniltonauk upsilyeba, ilil unamsile. Bukni, moubuka kekepnululume! Nara Allah Yahweh, im deice yin talen malaikat nirya ara, sik weik deiyoknye ununa ati, na mikip ara, pia weik unulula ati, narye, ‘Wininamne,’ tenenun ning ara, kum winipmanto upnutu do? Kume, na tenyamse ning nirya ara, winipnamnarya! Dipkoprob anyapmasin yupu nirya ara, nong lak upliba, eipnamlumca!

^7-8 Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Na adiparyuk, na mapu koproba, Israel yala nang nirya ara, sikti, lyepnamne. Ara, minop talak yu nang arye, sik yuk-yuk dabinuka deiamikba, wini talak daunyak mutuku noutam nirya ara, tamubuka boyanirye, Yerusalem mutuku noutamuk deipniba, asukumuk unamake. Ara, keting palanyangan tam ap, keting kumulban tam ap arye, tamubuka boyanirye, asukumuk deipnamne. Winipniba, sik Israel yala nang nirya ara, na mapu koproba kibuka unamake. Nara, sik ni koproba, Allah pia ati unamne! Winipniba, nara sik ni koproba Allah unamne. Wininamne talak ara, naryuk na mapu koproba ati, kanye deipnirye, pia kum bataknamsine. Narye, “Winipnamsine,” nyapnye touk, dipkoprob winipnamne! Sik nirya ara, kanye deipdakirye, teleb kibuka diksukumuk unamake.”

⁹ Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Ara, anggun kanye talima noutam nirya ara, mikip kipropnamlume! Wini talak ara, anggun nabi-nabi nang arye, anyapdeipmasin yupu kekebika ati, sikce ayupu laka nyapmasiceura, anggun wini talak unmalum nang arye kekenmalume. Ati, anggun taruk ap, nong ap ara, mikip kipropnamlume! nabi-nabi nang ara, na si eren aik, minop talak ulubuka, atu buklobik ning ara, amutuku nang arye, ‘Lipsisikuka dopnuyabeʼ tenen, pil deiyok kibik talak ara, anyaik ayukumna yo deibik talak arye, anabi nang ton eipmekce, ayupu nyabik. Anyabik touk, wini talak babye, ayupu uk nyapmasinba, anggunce kekepmalume. Ara, na Allah arye anggunti, tuba teleb kipdeipsiniba, amutuku nang arye, na si eren aik tamubuka, lipsisikuka dopnamaka ati, nyapmasine.

¹⁰ Atalak ara, na si eren aik deiyok koubikirye, lipsisikuka dopnamik talak ara, sik amutuku ulamik nang arye, yo bok pia kum talibika ati, ‘Pil dona ati melin nang ap, pil melina ati, kam ning sapi ap arye, pil dobuka melipsitingʼ tenen ati, ‘Tia ati yo bok arebibirye, dopropmasipya ani, aminyan tamubuka aning tamubuka arepnamsiyabe,’ kum nyabik. Aning nirya ara, kum winipmanto ulamik. Tonda, amutuku ulamik nang ara, olana kumce, talye namin arye tunim abuka, teleb kibuka, kum winipmanto ulamik. Ara, sik mal olan nang weik ulamika ati, amutuku ara bai tam kum binmanto ulamik. Tonda, yuk mutuku arye, amutuku yanuka winipmanto kum ulamik. Narye yu kanye tenilana deiyok ning arepsiba, sik ap, sik dana-dana tam ulamik nang ap, yu kanye bobuka, olanauk ulamlume.

¹¹ Bukni, minop talak anggun mal olan nang arye olamsikce, tapu koubuka, yuk pera mutuku bobinamsikba, ikin weik ulamlum talak ap, yuk pera mutuku batakuka, amutuku tamubuka yamunce, na si eren aik lipsisikuka dona ati, ayukumna yo min kum iklum talak ap, narye anggun Israel nang ati winilamsise ning ara, akunum batakse. Wini talak arye dipdongobuka, dounamle talak ara, aning atouk kum winipnamsine. Wini talak, amutuku tuba kam unmalum nang nirya ara, teleb kipdeipnamsinarya. Na Allah Yahweh, im deice yin talen malaikat nirya, sik deiyoknye unirye, mikip weik ununa ati, narye ayupu nyapmasina ara, dipkoprob nong upnamle!

¹² Na Allah arye anggunti, teleb kipdeipsinyopura, winipmanto ara, sik amutuku nang nirya arye ansinibuka, teleb yala ning nemalyap arye, doknin banamlume. Winipmunyeura, anggun anggur tapu duk nirya ara, duk mounauk upnamle. Atonun, amutuku wa tuku noutam ara, anggunce kouamunye ning nirya nonguk unamle. Tonda, winiplyeba amutuku noutam nirya ara, mok weik ceplirye, pia weik tonun saknamle. Ateleb ning nirya ara, narye arepsinya deice arye, anggun tuba amutuku noutam kam unamlum ninye arye, aning-aning nirya ara, arepsinyeba, dobuka talipmunce, kanye deibuka telebuk unamlume.

¹³ Dipkoprob nyapsine. Na Allah arye, anggun Yehuda mutuku ululum nang ap, Israel mutuku noutam ululum nang ap ara, anggun wenena ati, pia kanye imun ning areamsisiba, ikin weik ulamlume. Winibuka ulamluma ati, yuk mutuku nang nirya arye, sik elilamsikce, yuk nang ati, sulana ati nyalalamik. “Se, sik Yehuda nang ap, Israel yala nang ap ati, Allah arye subukba, kanye imun weik ning, yangalamukba, ikin weik ulamik ning ara, anggun deice ton, pia ikin ning yanamsile!” nyabuka, sulanauk ulamik. Bukni, atalak arye dipdongobuka, dounamle talak ara, na Allah arye, anggun amutuku ululum nang ati, pia teleb kibuka lyepnamsine. Winipsiniba, pia telebuk unamluma ati, sik dana-dana tam unyak yuk mutuku ninye asik nang arye, sik kayapu nang ati nyapnamake. Ara, “Se, sik Yehuda tam nang ap, Israel nang ap ati, Allah arye lyebukabukce, tuba pia teleb kipdeibukba, pia teleb wininyak touk, ‘Anggun babye teleb kipdeipsutuba, telebuk wininamlumʼ tenen, Allah moronamsiyabe,” nyabuka, teleb yupu nyapdanamake. Ati ara, na Allah arye, anggun amutuku ululum nang ati, nyapsine. Anggunda, adiparyuk talima mikip kipdopmunce, ilil kum unamlume. Kanye deipmunce, telebuk unamlume, nyapsine.

¹⁴ Diba, na Allah Yahweh, im deice yin talen malaikat nirya, sik deiyoknye unirye, mikip weik ununa ati, narye ayupu nyapmasina ara, dipkoprob nong kunupnamle! Ati, anggunda ilil ton kum unamsile. Deiyok ara ani. Ara, anggun apu yapu nang arye malye weik ulamikba, yu upnuka ati, narye anang ati, ‘Sik wenena ati, imun kanye bon ning arepnamsina deice arye, supnamsine,’ tenyamse touk, dipkoprob batakna kumce, narye aning dobuka, sikti, wenelamse. Bukni, wini talak ara, anggun atalak noutam amutuku ululum nang ati, yuk ning winipnamsine.

¹⁵ Ara, ani. Wini talak ara, narye anggun amutuku kam tuba ululum nang ara, tuba tonap teleb tenepnirye, anggun Yerusalem mutuku noutam ululum nang ap, sik Yehuda yala nang nirya ara, narye anggunti, kanye pia deibuka unamsine. Anggunti, pia teleb kipdeipnamsina ati, anggun ilil una meme.

¹⁶ Tuba tonap telebuk kipdeipnamsina ati ara, wini talak arye dipdongobuka, dounamle talak ara, ‘Anggunce aning ara, wininamlume. Aning ara, pia kum wininamlume,’ nyapdeipsin yupu ani. Ara, anggunce anggun kwitcapu ati, dipkoprob diksukum yupu dem nyalanamlume. Winipmunce, anggunce ninye yupu, bokolin talak ara, anggun weik asik wekna ati, bisik bublan dam bulubuka, wekenamlum talak nirya ara, diksukum yupu dem, nyalanamlume. Aning ara, akunuma,’ nyabuka, yupu sirya nyapnalum ning ara, pia dipkoprob ninguk nyalanamlume. Tonda, ‘Nun ap, nun kayapu nang ap, tonok kanye tenebuka, dukdongobuka, teleb kibuka, neika unamapʼ tenyamupu nyapmunce, ninye yupu bokolinamlume. Talya yupu walana, pia meme.

¹⁷ Tonda, anggun ap, anggun kayapu koproba ap ati, yu kanye bobuka, anggun kanye talima pum tam ara, ‘Anang ati, malye winipnamabe, anang opnamabe,’ pia kum tenenamlume. Aning atouk, anggun kwitcapu ati, talye yupu deice, ‘Dipkoprob wininamne,’ nyabuka, na tenebuka tilila yupu kum nyalinamlume. Anyapmasin ning ara, talye ati kum nyapmasine. Deiyok ara, ani. Na Allah Yahweh arye, anggunce malye tenelana ap, malye ulana ap, anggunce anggun kwitcapu ati, mikip arye nyalalulum ning ap, ura diksukum kum ulamlum ning ap nirya ara, narye pia lik tenenune. Amalye winin ning nirya ara, na lik ati, aning nirya bataknamlume. Allah arye nyabuk.

¹⁸ Ura, Allah Yahweh aning-aning nirya talibuka, deice tam erebuka, Pia Mikip Weik Ululnye birye, im deice yin talen malaikat nirya, sik deiyoknye birye, na nabi Zakaria dam yanuka, ayupu ton nyapnuke.

¹⁹ Ayupu ara ani. Anggun Yehuda tam ululum nang ap, Yerusalem mutuku ululum nang nirya ara, pia bico tenelalulumce, ‘Nun ap, nun kwitcapu ap, olana kumce, kanye deibibirye, namin arye teleb asa neika unamabe,’ tenelanamlume. Tonda, pia bico tenepdamunce, talye yupu walana kumce, diksukum yupu dem, nyalanamlume. Winipnamluma ati ara, na si erena ati, din dina kumce, din si tebuka unamlum talak ara, anggun kanye deipdamunce, pin-pin kanye bobuka unamlume. Ara, wala dumbarye ap, wala pamubarye ap, wala tekbarye ap, wala takubarye ap, asum-asum nirya deice arye, din si tebuka, nati moropnumunce, na siuk erenamnulume. Ati, nati din si tebuka, unamlum talak nirya ara, anggun Yehuda mutuku nang ap, Yerusalem mutuku nang ap, anggun nirya teleb kanye tenipmunce, pin-pin asa uk, unamlume. Ati ara, anggunce dipkoprob nyan yupu ap, pia bico tenepdamunce, namin aryuk, teleb kibuka epdanuka neika unamlume, nyapsine.

²⁰ Allah Yahweh, aning-aning nirya talibuka deice tam erebuka ulirye, im deice malaikat nirya ara, sik weik deiyoknye ulirye ayupu nyabuk, “Ara aminyan talak ara, weik asik domikce yata barye do, amutuku-amutuku noutam arye, daunyak nang ara, yupa pia weik tonun, Yerusalem mutuku noutamuk yanganamake.

²¹ Yerusalem mutuku yanganukce talak ara, tonok mutuku noutam ulamice nang arye, ton yuk mutuku noutam ulamice nang ati, nyapnamake. “Ara anggun nirya yamunyeba, Allah Yahweh aning-aning nirya talibuka, deice tam erebuka, mikip weik ululnye, el siuk neika erelbinuyabe. Na babye binuna ati, anggun ap ansinibirye, neika binamabe,” nyanamake. Tonda, sikce el Allah ati, “Naio, anda im deice yin talen malaikat nirya ara, sik deiyoknye ulyama ati, ancuk nunti melipsilyame!” nyabuka, moronamake.

²² Nyabuka morolamaka atouk, yuk mutuku nang weik tonap, mutuku sirya, im sirya nirya arye, ninye yala-yala yuk-yuk nang ap, pia mikip weik unyak nang ap, weik tonun Yerusalem mutuku uk, yanganamake. Sik anang nirya arye, yanganamaka deiyok ara, ani. Ara, sikce na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, sik im deice tam unyak yin talen malaikat nirya, sik deiyoknye ununa ati, sikce na si erena ati yakirye, “Naio, melipsilyame!” nyabuka, nati moropnikirye, na siuk erenamniake.

²³ Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, im deice tam unyak yin talen malaikat nirya, sik deiyoknye ununa ati, narye nyapsinye yupu ara, dipkoprob nong upnamlarya! Ara, aminyan talak ara, Yahudi yala nang kum bukni, mutuku-mutuku im sirya, mutuku sirya nirya arye, sik yupu koproba yuk-yuk nyanyak nang arye, Yahudi yala nang eibicopura, sik baju talibikirye, moronamake. Ara, “Se, anggun ton melipsululume! Yuk nang arye, ‘Allah ara, dipkoprob sik Yahudi yala nang ap, neika ulirye sikti, pia melilule,’ nyalamikba, kekelamupa ati, anggunda Yerusalem mutuku binumunye talak ara, ‘Nun ap ansinibuka bitibyeʼ tenen, moropsiyabe!” nyabuka moronamake. Atalak ara, winipmanto ning ara, ani. Ara, asum-asum nirya ara, Yahudi yala kum nang arye bulubuka yakirye, Yahudi yalanye tonok, el dam yakirye, ‘Bataksilirye bilyakʼ tenen, el baju talibikirye, ayupu nyanamake. Ara, “Amio, anda Yerusalem mutuku binuka, Allah Yahweh ati, el si erepnuminye talak ara, nun ap ansinibuka neika bitibyeʼ tenen, moropkiyabe. Anggunce Allah Yahweh ati, el si eremunye touk, nun babye atouk ubirye, Allah el si erenamabe,” nyabuka moronamake.