Zakaria 7 - Eipomek

Allah Yahweh arye, “Na si erena ati, din si tebuka un ning ara, teleb ubuka unamlume,” nyabuk yupu

¹ Ibrani yupu deice wala si Kislew, dumu sum, tanggal empat ara, wala tupne barye (9) deice ubuk. Asum deice babye, Babel mutuku ninye deiyoknye Raja Darius birye, amutuku taleamukce, ulamuka ani, keting tamun dumbarye ubuk. Asum noutam arye, Allah Yahweh arye, na nabi Zakaria dam yanuka, yupu nyapdeipnuke.

² Ura atalak ara, Betel mutuku noutam ulamik nang ara, ninye bitinye wipdeibik nang, sik si ara ani, Sarezer ap, Regem-Melek ap, tonda sik pil melin nang ap, wipdeibik. Deiyok ara, ‘Anang arye, Allah Yahweh el si eren aik dam binuka, Allah morobikiba, Allah arye melipnamsilʼ tenen ati, sik anang nirya ara, wipdeibikba, biyik.

³ Sik anang nirya ara, ‘Allah Yahweh, im deice malaikat yin talen nang nirya talilula deiyoknye, elti morobibirye, asipdenamabʼ tenen, biyik. Tonda, Allah el si eren aik pum tam, pil dona deiyok nang, sik imam-iman nang ap, Allah el yupu laka nyana deiyok nang, sik nabi-nabi nang ap ati, ‘Asipdenamabʼ tenen, anyaik dam biyik. Sikce asipdeyik ning ara, ani. Ara, “Nun Israel yala unyap nang ara, minop talak, Allah el si eren aik ulubuka, atu buklomik ning ati, wini talak babye, nunce tuba engena ap, ikin kanye bonauk ulamibirye, din dina kumce, pia din si tebuka una deiceuk, wala pamubarye noutam arye, aninguk talibuka unamap do, kum do? Aning ara, aketing tamun, aketing tamun nirya ara, aunyab touk ubuka, pia tuba wininamap do, kum do?” nyabuka asipdeyik.

⁴ Nyabuka asipdesikba, aminyan talak ara, Allah Yahweh, im deice yin talen malaikat nirya talilul deiyoknye birye, na Zakaria dam yanuka yupu nyapdeipnukba, kekepse ning ara, atia.

⁵ Allah Yahweh arye, nyapnuk yupu ara, atia. Ati ara, ayupu nirya ara, amutuku noutam unyak Israel nang dam, laka nyapdeipnulyame. Tonda, na si eren aik pum tam, pil dona deiyok nang, sik imam-imam nang dam babye, ayupu laka nyapdeipnulyame. “Anggun Israel yala nang ara, ilil kanye bobuka, din dina kumce, din si tebuka, morona ap, engena ap, ulamlum ning ara, dipkoprob na tenina atibuk ulamlum do? Ara, keting tamun tujuhpuluh (70) deice arye, wala pamubarye noutam winilamlum atonun ara, dipkoprob na Allah si erebuka kina ati, winilamlum do, kum do? Na kanye ara, natibuk kum wininmanulume.

⁶ Aning atouk, na kele, yuk talak nirya ara, anggunce teleb kanye deibuka, din dina ap, mek ap, dilulum talak nirya ara, anggun patana atibuk, ‘Din ning dibibirye, pia bounamsile,’ tenen ninguk ulamlume. Aning nirya ara, natibuk, tenena kume. Allah Yahweh arye nyabuk.

⁷ Zakaria birye nyabuk. Aning ara, Allah Yahweh arye, minop talak Yerusalem mutuku namin arye, tunim abuka winilamlumba, aning-aning nirya, telebuk winilamsuk talak ara, ayupu ara, nyapdeiamukba, anggun nabi-nabi nang arye, nyapdeiamsise yupu ara, atia. Tonda, anggunda telebuk ulamlum touk, anggun dam arye, dana-dana mutuku noutam domik mitik asik ulamik nang babye, telebuk ulamik. Atalak noutam babye, anggun dam anyuk kum ulamik bukni, ton tam ara, iknapye tam, (arah selatan) Negeb tam ap, keting kumulban tam, (arah barat) mutuku kon bukamukak, Shepela mutuku babye, sik atam ulamik nang babye, teleb ton ulamik. Atalak ara, Allah arye, ayupu atonun ton, nyapdeiamsuke.

Israel nang arye, Allah nyapdeiamuk yupu yaniptamika ati, yuk mutuku yu nang arye, yanuka obikce, ninye weik ton tapu koubukabikce, pera mutuku bobinamika ati, nyabuk yupu

⁸ Allah Yahweh aning-aning nirya talibuka, deice tam erebuka, Pia Mikip Weik ululnye birye, na nabi Zakaria dam yanuka, ayupu nyapdeipnuke.

⁹ Na Allah Yahweh ara, im deice yin talen malaikat nirya sik talepsirye, sik deiyoknye unune. Minop talak ara, narye ayupu akunum nyapdeiamsise. Ara, “Anggun nirya arye, anggun tam nang nirya ati, dipkoprob diksukum kibuka yupu bokdeipdanamlume. Tonda, anggunce anggun kayapu nang ap, anggun tam unyak nang ap ati, pia namin arye bico tenelamunce, kanye delilanamlulume. Adiparyuk yu ubuka wenelana kume,” nyapdeiamsise.

¹⁰ “Tonda, anggunce, sik yuwak kilapu ap, kwaknamne mapu ap, tonda ninye asik nang, yuk mutuku nang bukni, anggun dam yanuka ulamice nang ap, tonda, anggun kwitcapu aning-aning nirya kum daliba, imun kanye bobuka, ‘Seʼ tenen, unmalinye ap, anang nirya ati ara, ikin ning dobuka, sik nong deice pia kum delinamlume. Anang nirya ati, bico tenebuka, teleb kibuka melinamlume. Tonda, anggun ap, neika ululum nang nirya ara, yu kanye tenibuka, anggun kanye talima noutam arye, ‘Sikti malye ning winipnamabe,’ tenebuka, pia kum wininamlume,” nyapdeiamsise. Allah arye nyabuk. Allah arye, nun Israel yala nang nirya ati, nyapdeiamsuke.

¹¹ Allah arye, nun apu yapu ati nyapdeiamsuk bukni, sik atalak ulamik nang ara, sik kanye tenina nirya ara, kisok kat kanye bobuka ulamikce, dipkoprob pia kum kekepmanto nanguk ulamik. Sik anang ara, ‘Allah arye nyapsilye yupu, kum kekepnamapʼ tenen, sik balye tamubuka, sik amul ara, kunukdongobikba, nabi nang arye, nyalamik yupu ap, Allah elce nyalamuk yupu ap ara, pia kum kekelamik.

¹² Atalak ulamik nang ara, sik talima noutam nirya ara, mandipna kanye bobuka ulamikce, ‘Allah arye nyapsilye yupu, pia kum kekenamabe,’ tenelamikce, el yupu yaniltaknauk ulamik. Winilamika ati, sik talima noutam ara, keil kat atonun ulamik. Minop talak Allah arye, ‘Aninguk talibuka wininamlume. Aning ara, pia kum wininamlume,’ nyapdeiamsuk yupu ara, kum kekepmanto ulamik. Sik kum kekelamik yupu ara, talye yupu dem kume. Ara, Allah Yahweh arye, im deice yin talen malaikat nirya talibuka, Pia Mikip Weik Deiyoknye ulirye, el Pia Teleb, Lek Dip Kanye arebukba, elce, sik nabi-nabi nang, sik kanye talima noutam yanuka, yupu nyapdeiamukba, sikce, “Allah arye, ‘Aning ara, wininamlume. Aning ara, pia kum wininamlume,’ nyapdeipsil yupu atia,” nyabuka laka nyalamik bukni, sik atalak ulamik Israel nang arye, ayupu pia kum kekelamik. Ayupu nirya ara, kekena kumce, pia moubuka kum talibuka ulamikba, Allah Yahweh arye sikti, pia yu kanye deibuka, wenelamuk. Ara, Allah Yahweh, im deice yin talen malaikat nirya talibuka, sik Pia Mikip Weik Deiyoknye ululnye birye, Israel nang ati, yu weik ubukba, wenelamsuke. Zakaria birye nyabuk.

¹³ Nyabukba, Allah Yahweh arye, ayupu ton dukdongobuka nyabuk. Israel nang nirya ara, na yupu pia kum kekelamikce, aninguk talibuka, kum ulamika ati ara, na Allah arye, ‘Anggunda, na yupu kekepnululume!’ nyapdeiamsise talak ara, sikce na yupu kum kekelamnik touk, sikce nati, ‘Se, nun ni Allah melibuka lyepsilyame!’ nyabuka, morolamnik talak babye, narye anggun yupu pia kum kekelamsise. Na, Allah Yahweh, im deice yin talen malaikat nirya talibuka, sik weik deiyoknye ununye birye, nyapsine.

¹⁴ Ura, sikce na yupu nyapdeiamse ning nirya ati, kum kekelamnika ati, sik dekna wenena ati winipse. Winipmanto ara, weik kumanya mikip yalirye, pu aplyeba, aning-aning bobuka, yuk mutuku dana-dana tam bobalamle touk, na mikip weik arye, sik Israel nang nirya ara, dobuka, yuk pera mutuku dopkwetepsiba, yu nang yanuka obikce, tapu koubukabikce, yuk pera mutuku noutam dabinuka deiamikba, ikinuk daulamike. Sikda, ninye asik nang atonun ulamika ati, sik mince kum bikamik mutuku nang kan-kan noutamuk, ikin kibuka daulamike. Narye winilamsa deice arye, anggun mutuku ara, min talak, pia telebuk ulamuk bukni, atalak noutam ara, yuk amutuku tuku noutam, pia teleb sukum tuku uamuk bukni, narye aning nirya ara, kum kipdeipsiba, anggun mutuku ara oldiamuk uamukba, amutuku noutam ara, ninye ton kum ulamikce, abinuka, oyanuka kum winilamikba, amutuku noutam nirya ara, pia malye dem upnin balamuk. Aning nirya ara, na Allah deice uka! Allah arye nyabuk. Allah arye nyabukba, nabi Zakaria kekebukce, sekdeibuk