Zakaria 6 - Eipomek

Ninye olban ning dumbarye, kereta perang lake kibukba eibuk ning ati, nyabuk yupu

¹ Na Zakaria birye, yuk ning ton, lengdar man deice arye lake kibukba, eipse ning ati, nyapnune. Ara, na wi mapsa talak arye dinmaseba, dumbarye kuda basam arye libuka, tuku deice ban ning eipse. Ara, ninye buknarye, ninye olban ning, el si ara, kereta perang, mutuku kon bitinye noutam arye, yanganmokbuk, eipse. Amutuku kon bukuka ara, el teleb kat ning, el si perunggu uamuk. Amutuku bitinye dana-dana tam bukukba, anoutam arye, kereta perang dumbarye kutukuka yanganmek.

² Akereta perang ara, kuda basam yuk-yuk tapu arye kirikuka lilonmekbuk, yanganmekba, eipse. Min yuma talak, menekuka yanganmok kereta perang ara, el kuda basam ara, el bol ining bi ning yanganmok. Aning atouk kereta perang bitinye ning ara, el kuda basam bol mirin ning yanganmok.

³ Tonda, kereta perang winilye ning ara, el kuda basam bol, kurun ning yanganmok touk, kereta perang dumu ning ara, el kuda basam bol ara, mirin ap, kurun ap, ansinibuka upmok ning ara, yanganmokak eipse.

⁴ Awininmekba, na nabi Zakaria birye, malaikat arye yupu nyanmoknye biti, asipdese. Ara, “Na deiyoknye, ayanganmal kereta-kereta perang ara, deiyok yata ati yanganmak do? El nong noutam deiyok ara, yata ati do?” nyabuka asipdese.

⁵ Nyabuka asipdesiba, amalaikat arye tamubuka nyapnuk. “Akereta perang dumbarye balamuk ning, el nong noutam deiyok ara, ani. Ara, sik adumbarye kereta perang nong noutam ara, mutuku sirya, im sirya balamle kumanya yuk-yuk dabinamake. Ara, sikce, Allah aning-aning nirya talibuka, deice tam erebuka, Pia Mikip Weik Deiyoknye ululnye, el dam binmangu bukni, wini talak ara, tamubuka yamakce, yuk-yuk mutuku ton binamake.

⁶ Ninye olbana ati, kereta perang deice tiknirye, binamne ning, el kuda basam mirin ning ara, tapu linmalba, Babel mutuku tam bukni, dabu tam (arah utara) binule. Kereta perang kurun kuda basam tapu linmal ning ara, keting wekelban tamuk banmale. Aning atouk, kereta perang kurun ap, mirin ap, ansinibuka ulul kuda basam linmal ning ara, iknapye tam (arah selatan) bukni, Mesir tam banmale,” nyabukce, laka nyapnuke.

⁷ Ura, akuda basam dumbarye, kereta perang tapu libuka banmek ning nirya ara, ‘Nun adiparyuk kutuksakuka, minopce binuyabe. Tukwak mutuku im sirya, mutuku sirya nirya eibibirye, pia moubuka kalikinamabe,’ tenebik. Bukni, sik tenen ning ara, moubuka kum tenebikce, ‘Adibaryuk minop binuyabe,’ tenenauk, unmeke. Winipmek bukni, amalaikat arye nyabuk. Nyabukura, “Wini talak ara, anggun nirya, tukwak mutuku, im sirya, mutuku sirya nirya bimunce, moubuka kalikuka, elbinamlume,” nyabuk. Nyabukura, sik kuda dumbarye ara, adiparyuk biyik.

⁸ Winibuka bindobik talak ara, el amalaikat arye, na Zakaria biti, tamubuka nyapnuke. Ara, “Mirin kuda basam, Babel mutuku noutam binmala deice arye, Allah Yahweh el yu uamuk ning nirya ara, adiparyuk kanye namin kipdeipnamale,” nyapnukba, kekepse.

Yosua el kisok deice, ninye deiyok nang ongon ning, kalupdeipnamuk ning ati, nyabuk yupu

⁹ Allah Yahweh arye, na nabi Zakaria biti, na dam yanuka, “Ayupu nyapnulyame,” nyapdeipnuke.

¹⁰ Malaikat arye nyapnuk yupu ara, ani, “Anda Zakaria, arup aryuk, ninye si Zefanya birye, deiamuknye Yosia, el aik dam binulyame. Yosia aik akunum biminyopura, winilye nang ap, epdanamlume. Ara, Babel mutuku bobinamik bukni, tuba tamubuka, wini talak yanmak nang, sik si ara, Heldai ap, Tobia ap, tonda Yedaya ap, epdanamalume. Sik awinilye nang ara, Babel mutuku noutam dabinuka donokamikba, daulamika ani, tamubuka yanmak nang arye, sik Allah si erena ati, arepnamkiak dekna weik kat ning nirya ara dopropnamlyame. Dopropminyopura, aning deice arye, narye nyapnukin ning, kintinip deipnalame.

¹¹ Ara ani. Sik awinilye nang arye, boyanuka arepnamakiak ning, emas ap, perak nirya ara, dopropminyak arye, ninye deiyok nang arye, sik kisok deice kalubuka ongonamak ning ton, el si mahkota, memepdeipnulyame. Ninye deiyoknye mahkota akunum memepminyeura, aning dobuka, ninye si Yosadak birye deiamuknye, el si Yosua, el kisok deice, amahkota kalupdeipnulyame. Yosua bira, imam nang, sik weik deiyoknye ulule.

¹² Imam-imam nang, sik deiyoknye Yosua, el kisok deice amahkota kalupdeipnalam talak ara, elti, ayupu nyapnulyame. Ara, ani. “Allah Yahweh, aning-aning nirya talibuka, deice tam erebuka, im deice malaikat nirya, sik deiyoknye ulule. Elce ayupu nyapkile. “Anggun nirya, moubuka kekeplulume! Winipmanto ara, anye elda, yo taruk atonunye unamle. Anye nepnin balamlya ani, aminyan talak ara, na Allah Yahweh ati, na si eren aik dopnamnile. Ati ara, elda mambul weiknye ulule,” nyapsile.

¹³ Wininamle talak ara, el anye biryuk, na Allah, si eren aik ara, dopnamnile. Tonda, ninye arye elti, ninye deiyok nang ati, si erelamak touk, sikce anye biti, si erenamake. Anye bira, ninye deiyok nang bun ning, el si ara, ‘tahkta kursiʼ, adeice buklirye, amutuku talibuka, yupu nyanamle. Wininamle talak ara, imamnye ton, el tahkta kursi damuk tiknamle. Winiplyopura, imam ap, aninye deiyoknye ap, tonok kanye bopdikirye, ‘Telebuk neika unamnameʼ tenen, kanye delilanauk unamdake. Wininamle talak ara, elcuk amutuku noutam unamak nang nirya ati, taliplirye, yupu nyalamliba, telebuk unamake.

¹⁴ Aninye deiyoknye, el kisok deice kaluna ati, kalupdeipnamlum ning, el si mahkotaʼ ara, na Allah, si eren aik pum tamuk, pia ati deipnamake. Aning anyaik pum tam deiamikiba, ninye nirya eibicopura, adiparyuk, sik Heldai ap, Tobia ap, Yedaya ap, adekna weik ning areamik nang ati, tuba teninauk unamake. Aning atouk, ninye deiyoknye Yosia birye, talima namin una deice arye, teleb unamle ning ati, tuba bikinamake.

¹⁵ Ura, aminyan talak ara, sik yuk pera mutuku noutam arye unyak nang ara, teleb arin ning arenamaka deice arye, na Allah, si eren aik dona ati, melinamake. Ton nang arye, asukumuk yanuka, anyaik melibuka donamake. Winilamikca ani, anyaik akunum dobuka sirya dakikcopura, sik Israel nang nirya arye, na Allah Yahweh arye, winipnamne ning deice arye, moubuka biknamlume. Ara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, na nabi Zakaria dam yanuka, yupu nyapdeipnukba, anggun dam yanuka laka nyapsise ning ara, bikmunce, diba tenenamlume. Narye, ‘Aning-aning ara, Allah arye winipnamsile,’ nyabuka, laka nyapsise ning nirya ara, dipkoprob nong upnamlarya! Ara, anggun si erelulum Allah Yahweh arye, aning-aning nirya talibuka, deice tam erebuka, Pia Mikip Weik Deiyoknye ululnye birye, nyapsilye yupu nirya, moubuka kekepmunce, batakna kumce, aninguk dipkoprob talibuka winipmunyopura, elce, ‘Winipnamsine,’ nyabuka, nyalin yupu deice nyapdeiamsuk ning nirya ara, dipkoprob nong upnamle. Aning nirya ara, na nabi Zakaria birye, dipkoprob nyapsine.