Zakaria 5 - Eipomek

Allah arye sekeiamuk ning, pakubuka koupdongamuk ning, erebukabukce, lakuka biyukba eibuk ning ati, nyabuk yupu

¹ Aminyan talak ara, na Zakaria birye, na kisok erebukapsirye, dinmaseba, lengdar deice arye, yupu seken ning, pia moubuka pakabuka koupdongamuk buku ton, erebukabukce, im deice tam lakuka banmokba, eipse.

² Atalak ara, tonok malaikat arye asipdenuk. “Anda yata ning dinmalam do?” nyapnuk. Nyapnukura, narye tamubuka nyapse. “Kume, yupu seken ning, buku pia moubuka pakabuka koupdongamuk buku erebuka, im noutam lakuka banmalba, dinmane. Ara, abuku el cang ara, 9 meter ulule. El aning atouk, el pala ara, 4 setengah meter (1.5) upmalba eipmane,” nyapse.

³ Nyapmasiba, amalaikat elce tamubuka, nati nyapnuke. “Aseken ning ap, koupdongamuk buku noutam sekamuk ning ara, amutuku noutam nirya winipnamle ning ati, sekuk. Ara, amutuku malye unyak nang nirya ati, malye yupu nyabuka, sulongon yupu, Allah elcuk sekuka deiamuk. Ayupu ara, talye ati kum ulule. Tonok kwalin tam yupu ton, sekuka deiamuk ning ara, dan mutuku do nirya, Allah el ‘Naʼ tenen, mutuku noutam unyak nang arye, ubula donyak nang ara, Allah elcuk, anang obuka, kum kipdeipnamle. Amutuku noutam ara, pia kum unamake. Aseken ning sirik tam ara, ayupu sekdeibuk. Aning atouk ara, dan mutuku do nirya, Allah el ‘Naʼ tenen mutuku noutam unyak nang arye, ninye yupu bokolin talak ara, sikce tilila yupu nyanyak nang ara, ‘Allah el si deice arye, dip yupu uk, nyapsine,’ nyanyak bukni, sik tenina deice arye, tilila yupu uk, nyanyake. Allah elcuk, anang obuka, kum kipdeipnamle. Amutuku noutam ara, pia kum unamake. Aning-aning nirya ara, abuku deice sekeiamuk ning aulye touk, dipkoprob winipnamle.

⁴ Allah Yahweh, im deice unyak yin talen malaikat nirya, sik deiyoknye unirye, na nyapdeipse yupu ara, asulongon yupu nirya ara, sik malye wininyak nang, aik wekelbinamle. Ara, sik talye ubula donyak nang, sik aik ap tonda, talye yupu deice arye, ‘Na dipkoprob Allah, el si deice nyapsine,’ nyabuka talye tilila yupu nyanyak nang, sik aik nirya ara, ikin weik ning, dobuka deipnamle. Winipnamle ning nirya ara, amutuku noutam malye wininyak nang arye, dobuka unyak asik nirya ara, ayupu pia sulongon ninguk bol pipnamle. Winipliba, anyasik-anyasik ap, anyasik keil ap, yo ap, anyasik pum tam unyak nang nirya ap ara, Allah arye kum kipdeiplirye, oldiamuk upnamle.” Malaikat arye, na Zakaria biti, laka nyapdeipnukba, kekepse.

Aling atonun ning, el si keranjang pum tam arye, malye un ning deiyok ning nirya upmokba, eibuka ati, nyabuk yupu

⁵ Aminyan talak ara, na ap neika yupu talipmanumu malaikatuk, tuba tamubuka, na dam yayukce, na Zakaria biti, ayupu nyapnuke. “Anda eitamuk dipdelyame! Ara, deice tam arye yanamal ning ara, dinulyame,” nyapnuke.

⁶ Nyapnukura, narye, “Naio, aning ara yatato ning winipnul do?” nyabuka asipdese. Nyapsiba, amalaikat arye nyabuk. “An dinmalam ning ara, tonok kat aling atouk ning, el si ara, keranjang ulule. Aning keranjang pum tam arye yanamal ning ara, malye winina deiyok ning yanamale. Ara, Yehuda mutuku noutam nirya unyak nang arye, malye-malye wininyak deiyok ning nirya ara, bikilin ning ati, yanmala eipmalam atia,” nyapnuke.

⁷ Anyaling atonun ning, el si keranjang ara, lelin ning ara, ikin weik besi ning arye, lelipdongamik. Awinyamuk ning ati, na pia moubuka dinmaseba, atirikdongamik besi ning ara, erepdakuka banmok. Alelipdongamik ning biyukba, akeranjang pum tam ara, kil tonok bukmokba, eipse.

⁸ Amalaikat arye, na Zakaria biti nyapnuke. “Abukmal kil ara, talye kil kuma! Akil ara, pia malye-malye winina deiyok ning, lak kina ati, akil aulule,” nyabuk. Winibuka nyapnukopura, amalaikat arye, ‘Amalye winina deiyok kil bilyakʼ tenen, akil tuba tamubuka, keranjang pum tam darapdongobukce, wekukura, akeranjang deice ara, malaikat arye, ikin besi ning dobuka, adiparyuk akeranjang deice lelibuka tirikdongobuk.

⁹ Winibukopura, na asing erebukapsirye, im noutam bukni, deice tam dinmaseba, kilapu bitinye ton lakdakuka, na damuk yanganmarikba, eipse. Lakdakuka yanganmarika ara, sik maka pol, pia urasin teleb atouk uamuk ning ara, kumanya arye donmok deice arye yanganmarik. Winipmanto ara, nong pia cang weik maka, el si ara Bangau maka, pol cang atonun ulul ning ara, sik pol ton, atonunuk uamuk. Sik akilapu bitinye arye, akeranjang aling ara, lak dakuka boprikopura, sikce adiparyuk lakuka bobirik. Lakuka boprikopura, tukwak mutuku amu tam, im deice mutuku pia eitam uamuk sukum, lakuka boprik.

¹⁰ Lakuka birikopura, narye tamubuka, na ap yupu talipmanumu malaikat ati, asipdese. “Naio, sik akilapu arye, bobirak keranjang aling ara, dan mutuku bobirak do?” nyabuka asipdese.

¹¹ Nyapsiba, amalaikat arye, tamubuka nyapnuke. “Kume, sikda Babel mutuku birake,” nyabuk. “Birikirye, amutuku noutam ara, sik isa el si erena ati binuka, mambul weik aik ton dopnamdake. Ati ara, amalye winina deiyok ning, akil el si erenak ara, dobuka sirya dakdikcopura, akeranjang kat aling ara, dobuka asukumuk deipdikiba, amutuku unyak nang arye, aning si erenamake,” nyapnukba kekepse.