Zakaria 4 - Eipomek

Lampu weisa tekbarye eibuk ning, el deiyok ning, lak kibuka ati, nyabuk yupu

¹ Asum na ap neika yupu talipmanumu malaikat ara, tuba tamubuka, na dam yayuk. Yayukopura, winipmanto ninye mapmakiba, yakirye bulilamaka atonun, yanuka bukeipnukce, nyapnuke.

² “Wini talak ara, anda yata ning ton eipmamu do?” nyabuka, asipdenuk. Nyapnukura, narye dipdesirye tamubuka nyapse. “Ara, weisa delina deiyok ning ara, dekna weik kat ning, el si emas arye deibuka domik ning eipmane. Tonda, aning eipman ara, el mouse deice tam ara, minyak mek kwebuka delinak upmalba eipmane. Tonda, aweisa delina deiyok ning ara, winipmalce, antanap dongamukak ara, tekbarye kwa lekdeiamikce, adeice weisa tekbarye upmale. Tonda, aminyak mek delin ning deice ara, el uku buk dinamle ning ara, kwa yuk-yuk unmalce, tekbarye weisa uku dinamlak eipmane,” nyapse.

³ Nyapsopura, ayupu ton laka nyapse. “Alampu weisa, el yan dam bukni, otam el kwanim tam ap, sirik tam ap ara, Zaitun yo bitinye tikmarakbuk, eipmane,” nyapse.

⁴ Nyapsopura, narye adiparyuk, atikmok malaikat ati, asipdese. “Naio, awinipmal ning nirya eipman bukni, narye aning eipmana nirya ara, el deiyok ara, yata laka kin ning ati, upmal do?” nyabuka asipdese.

⁵ Asipdesiba, na ap neika yupu talipmanumu malaikat arye, nati nyapnuk. “Aupmal ning ara, anda min kum bikmamu do?” nyabuka, nati asipdenukba, narye tamubuka, “Kume na nio, nara min kum biksa ati, na walwale,” nyapse.

Allah Yahweh arye, ninye deiyoknye, el si Zerubabel biti, ‘Winipnamkine,’ nyapdeibuk yupu

⁶ Amalaikat arye, na Zakaria biti, nyapnuke. “Anda, ninye si Zerubabel dam binuka, elti, Allah Yahweh arye, nyapdeibuk yupu ara laka nyapnulyame,” nyapnuke. Ara, ance elti, nyapnalam yupu ara, ani. “Zerubabel an teleb winipnamlam ning ara, an mutuku yin talen nang, sik mikip weik deice arye, mambul pil kum dopnamlame. Aning atonun, ancuk mikip deice arye, kum winipnamlame. Aning kum bukni, na Allah Yahweh arye, na mikip weik ulul Pia Teleb, Lek Dip Kanye, el mikip weik, an deice deipkiniba, aning aryuk, narye, ‘Anye apil dopnamnile,’ tenepkise mambul ning ara, winipnamlame. Nara, Allah Yahweh, im deice unyak yin talen malaikat nirya, sik deiyoknye ununa ati, anyapmakin yupu ara, dipkoprob nong upnamlarya!

⁷ Ninye deiyoknye, Gubenur Zerubabel, dipkoprob an dam ara, pia kanye imun weik ning aupmaliba, ance, ‘Se yatato ning winiptinyeba, aning nirya, malye kiptinye do? Winipmanto ara, cang weik mutuku, welepman kumto bulamle touk, an dam arye kanye imun weik ning tuba aupnamle. Bukni, winipmanto ara, cang weik mutuku luluklamliba, tokna paksakuka poulbalamlirye, amutuku nirya lu uk kilamle touk, akanye imun weik ning nirya ara, malye kipminyeba, narye, aning nirya kum kipdeipnamne. Winipnyopura, na si eren aik uluplopmik ning ara, lipsisikuka dopnamnilame. Tonda, anyaik dona sirya dakna ara, ance tonok keil min yuma dobuka deipnalam talak ara, atalak unamak nang arye, ‘Se, akeil ara, pia teleb keil ulule. Tonda, anyaik ara, Allah arye el si eren aik ulula ati, elcuk anyaik pia teleb kipdeipnamle,’ tenebikirye, anang nirya arye, kanye pia deibuka, kanye lon yupu nyanamake!”

⁸ Winibukopura, Allah Yahweh arye nyapdeiamuk yupu, yuk ning ton, na Zakaria dam, yanuka nyapnuke. Aning ara, ani.

⁹ Ninye deiyoknye Zerubabel birye, na si eren aik dona ati, keil min yuma dobuka, na aik ayukumna ati ikamuk keil ara, el taruk mikip arye deiamuk. Winibukopura, adiparyuk dopnin balamika ani, sirya ara, na si eren aik nong nirya dobuka, sirya daknamnile. Aning akunum winipnilyopura, na mapu koproba, sik Israel nang nirya arye, moubuka bikinamake. Ara, ‘Se, nabi Zakaria bira, dipkoprob Allah arye, anye wibuka dopdeiamukba, nun dam yanuka, Allah arye nyapdeiamuk yupu, laka nyapsuk touk, akunum winipmala atia,’ tenebikirye, bikinamake. Ara, Allah Yahweh, im deice unyak yin talen malaikat nirya, sik deiyoknye ulula ati, elce, ‘Winipnamne,’ tenyamuk touk, akunum winipmale!’ tenen, bikinamake.

¹⁰ Ura, yata nang do nirya, anyaik don pil ati, deiyok kouamik talak ara, pil sikcuk dolamikba, mitik tonunuk, pil dopnin balamikba, sik anang arye, ‘Se, pil mitik tonunuk donyaka ati, nun like,’ tenenamake. “Anyaik dona ara, dauplye,” nyabuka, ‘Nun likeʼ tenen, malye yupu nyanyak nang nirya arye, sik kayapu nang arye, anyaik don pil tuba donmakca ani, sirya dakmanto talak eibikcopura, sikce, ‘Se, aning ara, pia telebe,’ tenebikirye, teleb kanye deipnamake. Tonda, sik anang nirya arye, aminyan talak Zerubabel birye, ‘Kume, anyaik donauk unamabeʼ tenen, ‘Aik abilinga ara, moubuka dopmap do, kwalipmal do?’ tenen, kiklilen tapu doplirye, balyopura, sik anang nirya, anye eibikirye, kanye pia deipnamake. Zerubabel birye nyabuk. Aminyan talak, na ap, yupu talipmanumu malaikat arye, nati tamubuka nyapnuke. “Atekbarye lampu weisa ara, bikilina ati, asing tekbarye atonun ulule. Aweisa tekbarye ara, winipmanto ninguk ulul bukni, el nong, ara Allah Yahweh el asing arye, tukwak mutuku, im sirya, mutuku sirya nirya, uamlye ning dilamlirye, ‘Yata wirinyak do? Yata wiripnamak do?’ tenen, dipnilibuka kalikilula ati, aweisa memebuka deiamik,” nyapne.

¹¹ Nyapnukura, narye tamubuka, amalaikat ati, tuba tonap asipdese. Ara, narye, “Alampu deibika deiyok dam sirik tam ap, kwanim tam ap, zaitun yo bitinye tikamdika deiyok ara, yata ning ati do?” nyabuka, asipdese.

¹² Nyapsopura, adiparyuk yuk ning ton asipdese. “Naio, azaitun yo bitinye tikamdika irikna tam ara, yo taruk bitinye leknamle ning ara, aning deice dekna weik ning, el si emas arye, pinibuka bitinye deiamik ning ara, zaitun mek dikuka, deibikba bana ati, kintinip deiamika deiyok ara, yata ati do?” nyabuka asipdese.

¹³ Asipdesiba, na ap neika yupu talipmanumu malaikat arye, nati nyapnuke. “Aning abitinye aupmal ning ara, anda bita moubuka kum bikmamu do?” nyabuka, nati asipdenukba, narye tamubuka, “Kume na nio, nara min kum biksa ati, na walwale,” nyapse.

¹⁴ Nyapsiba, amalaikat arye nyapnuke. “Aning bitinye ara, Allah arye, aning-aning nirya talibuka, deice tam erebuka, Pia Mikip Weik Deiyoknye ululnye, tukwak mutuku im sirya, mutuku sirya talilirye, weik deiyoknye ulule. Elce, ‘Abitinye nang, na pil melibuka dopnamnirakʼ tenen, minyak mek kwebuka, sik kisok deice dikdeibukce, sik akunum wipdeiamukba, Allah el dam tuba-tuba tikidurake.” Malaikat arye, na Zekaria biti, laka nyapnukba, kekepse.