Zakaria 3 - Eipomek

Pia weik imamnye lak kibukba, eibuka ati, nyabuk yupu

¹ Yuk lak kin ning ton, winibukba eipse ning ara, ani. Ara, Allah arye lak kibuka, na Zakaria dam deipnuka ara, imam nang, sik weik deiyoknye, el si Yosua bira, Allah Yahweh el im deice pil donanye malaikat, el urasin tam tikmokbuk, eipse. Tonda, imam deiyoknye, Yosua tikmoka, el sirik tam ara, isa mer, sik deiyoknye Isa Mutuku Dongonye tikmok. Ara, elce imam deiyoknye Yosua biti, ‘El malye uamuk ning ara, ani, ani,’ nyapnirye, ‘Yukunaman’ tenen, el Yosua dam sirik tam, neika tikmarikba, eipse.

² Atalak ara, Allah Yahweh arye, Isa Mutuku Dongonye biti nyabuk. “Se, anda Isa Mutuku Dongonye, nara Allah Yahweh arye, anti wenepkine! Tonda, na Allah Yahweh arye, Yerusalem mutuku ap, anyasik noutam unyak nang ap, pia bico tenepsirye, ‘Na’ tenen nang unamakʼ tenen, akunum wipdeipse. Ati, narye anti, mikip yupu arye wenepkine! Atikmalanye birye, imam Yosua bira, ninye arye, yo uku noutam danmakiba, dinmalya ani, ‘Uku arye diplyeba, kum dalyakʼ tenen, ninye arye ayo minopce dololamak touk, narye Yosua binyak lyepropsiba, tuba aulule.”

³ Ura, imam deiyoknye Yosua bira, amalaikat dam tikmokak ara, pia sung-sunga palyamukce, malye uamuk baju uk ongopmokce, anyaka tikmokak, eipse.

⁴ Ati, Allah Yahweh, el pil dolul malaikat arye, yuk im deice pil melibuka don malaikat nang ati, nyabuk. “Ura, imam Yosua birye, sung-sunga palibuk baju ongopmal ning ara, anggunce kwiribukapmunce, donoklulume,” nyabuk. Tonda, Yosua elti, nyabuk, “Wini talak ara, winipmanto ning ara, sung-sunga palibuk baju ongopmamu ning, kwiripnamakiyaka atonun, narye an malye winiplum ning nirya ara, akunum dobuka donoknirye, kum kipdeipne. Winipkince, wini talak winiryuk baju punubuka arepnukine. Ara, teleb kanye delin sum deice, ninye arye, ‘Weik tonun kwalya kwalipnuyapʼ tenen, pia teleb baju ongolamak ning atonun, akunum arepkiniba, ongopnulame. Deiyok ara, an malye winilalum ning nirya ara, akunum kum kipdeipmakine.” Malaikat arye nyabuk.

⁵ Nyabukba kekepsopura, na Zakaria birye, nyapse. “Naio, tonda imam Yosua bira, imam nang arye ongonamak kisok kalun ning ton, pia teleb ning dobuka, el kisok deice kitibuka kalupdeipting do?” nyabuka moropse. Ayupu nyapse touk kekebikopura, yuk malaikat nang arye, winiryuk baju, pia teleb ning ara, dobuka, sik yuk malaikat nang arye, Yosua el kisok kitibuka ongopdeibikce, pia urasin teleb baju ton dobuka, el nong deice ongopdeibik. Winibik talak ara, Allah Yahweh, el amu tam pil don malaikat arye, el damuk tikmokce, dinmok.

⁶ Aning nirya akunum winibikopura, Allah Yahweh, el amu tam pil dolul malaikat arye, ‘Yosua bira, kanye teniptoplyakʼ tenen, imam Yosua biti, ayupu ton laka nyabuk.

⁷ “Yosuao, nara im deice unyak yin talen malaikat nirya ara, sik deiyoknye ununa ati, narye nyapkine. Ara, narye, ‘Aning ara, wininamlume. Aning ara, pia kum wininamlume,’ nyapdeipse yupu nirya ap, tonda narye, ‘Teleb winin ning ara, ani. Winibuka diksukumuk unamlume,’ nyabuka, laka nyapkise ning nirya ati, ance moubuka diba tenepmince, aninguk talibuka umunyopura, narye teleb kipdeipnamkine. Ara, narye anti, arepkise imam pil yala-yala nirya, na si eren pil nirya ati, narye, ‘Winipnamlyame,’ nyabuka laka nyapkise touk, teleb kibuka dopmunyopura, anyapce ubuka otam nirya ara, ance imam deiyoknye kibuka taliptumce, na si eren aik ap, anyaik dana-dana tam uamuk tuku ap, aning nirya talibuka, pil donamlame. Tonda, anyapce dipdongobuka dounamle talak ara, narye lo arepkinirye, ‘Telebeʼ nyapkinyopura, adeice arye, asukum tikmakce malaikat arye, na dam yakirye, yupu nyanyak touk, an babye, na dam yatumce, yupu nyaptume. Winiptumce, nati moropnamnutum ning nirya ara, kekepnamkine. Winipmanto ara, narye sik malaikat nang ap, na ap, neika ubirye, moronikiba, kekelamne atonun, anti winipnamkine.

⁸ Ati ara, an Yosua ap, an amu tam pil donamak talye imam-imam nang, an kwitcapu imam nang ap, anggun nirya moubuka kekepnululume! Ara, an amu tam pil donamak imam-imam nang, sik nirya ara, aminyan talak winipnamle ning ati, aminyan talak pia teleb ning yanamle ati, sikda bikilin nang unyake. Aning deiyok ara, ani. Ara, aminyan talak ara, narye na amu tam pil donamlanye dobuka, lak deipnamnarya. Winipmanto ara, weik yo deiyok arye, mitik Yo Taruk leklamle atonun, pia mambul pil donamlanye, Mesias dopdeipniba, anggun dam yanuka unamle.

⁹ Ati, anggun nirya moubuka dinamlume! Na Allah arye, el Yosua urasin dam ara, mambul weik keil tonok dobuka, deipman ning, el nong ara, tonok bukni, akeil nong bol deice, tujuh per segi aupmale. Moubuka kekepnululume! Na bidamnye, akeil deice ara, pia teleb-teleb ubukapnirye, mambul yupu sekuka deipnamne. Tonda, aminyan talak ara, tonok sum deice arye, amutuku noutam unamak nang nirya arye, sik malye unamak ning nirya ara, naryuk kum kipdeipnamne. Amutuku nang nirya ati, teleb kipdeipnamsine. Ara, amutuku noutam ululum nang, anggun malye winilulum ning ati, wenebuka opsitinirye, sirya daksitinye bukni, anggun malye winin ning ati, dibina deiyok ning ara, kum deipnamsina ati, nyapsine. Na Allah, im deice unyak yin talen malaikat nirya, sik deiyoknye unirye, ayupu nyapsina ati, aning nirya ara, dipkoprob nong upnamle!

¹⁰ Anggun malye ululum ning nirya, kum kipdeipnirye, teleb kipdeipnamsin talak, akunum yalyopura, anggun amutuku unamlum nang nirya arye, sik dana-dana tam unyak nang, anggun kwitcapu ati, yukupmunyeba, anggun dam yanganamake. Yakirye, kanye deibuka ansinipnamlume. Tonda, pia teleb kibuka, dakeiam asa unamlum talak ara, ‘Pia telebe,’ tenepramunce, amutuku noutam, anggun bidamnye arye, kouamlum anggur tapu duk, wa wiamlumak yakirye, kanye deibuka unamlume. Tonda, anggun bidamnye arye, arah yo wa wibuka kouamunye noutam anyuk, anggun kayapu nang ap, ansinipmunce, kanye deibuka, teleb tenelamunce, telebuk unamlume. Na Allah Yahweh arye, ayupu nyapmasina ati, aning nirya ara, dipkoprob nong upnamlarya!