Zakaria 2 - Eipomek

‘Aning el cang ara, yata barye do?’ tenen, kiklilen tapu eibuk ning ati, sekuk yupu

¹ Aminyan talak winibukba, eipse ning ara, ani. Ara, ninye tonoknye ton, ‘Aning el cang ara, yata barye ulul do?’ tenen, el taruk deice ara, kiklilena ati, tapu bopmukbuk eipse.

² Winipmokba eipsopura, na Zakaria birye, “Anda dan mutuku binamalam do?” nyabuka asipdese. Nyapsiba, el anye birye, tamubuka laka nyapnuke. “Kume, nara weik asik domikak, Yerusalem mutuku kiklilbinamane. Ara, na ton, akota ara, el cang ap, el bumang ap, el pala ap ara, yata barye meter kibuk do?’ tenen, bikinamne ati, banmane,” nyabuk.

³ Aning nirya akunum eipsirye, biksopura, na ap, nun neika yupu talipmanumu malaikat ara, dinmasebuk, na tikmase tam yanganmoka ani, na dam koprop yayuk. Winibukopura, yuk malaikat tonok ton, na dam yayukopura, na ap, nun neika yupu talipmanumu malaikat ap, el dam yayukce, sik bitinye ansiniprik.

⁴ Yayukopura, min yuma talak yanmok malaikat arye, aminyan yanmok malaikat ati, nyabuk. “An adiparyuk, kiklilen tapu bopmal welnye dam bimince, nyapnulyame. Ara ani, “Kota Yerusalem mutuku noutam nirya ap, akota dana-dana tam ap ara, ninye pia weik tonun langdipnamle. Tonda, sik amutuku unamak nang arye, talibuka weinamak kam ulamle ning nirya arye, amutuku noutam upnamle tuku nirya ara, langdiplirye lipnamle. Ati, amutuku noutam upnamle tuku ara, keil poka antanap dongobuka, weik keil tembok pia kum doptinge. Pala weik mutuku kipmnamla ati, nyapne.

⁵ Bukni, keil poka antanap dongopnamak ning ara, kum patapnamle. Deiyok ara, na Allah Yahweh arye, naryuk amutuku noutam ara, talibuka unirye, weik keil poka tembok antanap dongolamak touk ubuka, uku buk dilirye, antanap dongobuka ulamle touk winipnamne. Ara naryuk, amutuku ap, amutuku unamak nang nirya ap ati, melibuka kalikinamne. Tonda, amutuku noutam ara, na mikip weik ap, na teleb weik unilye ning ap, na weik dirina ap, deice aryuk, pia mambul mutuku unamle. Allah arye nyapnuke.

“Yuk mutuku noutam, dabinuka donokamik nang, tamubuka yukupliba, yanamake,” nyabuk yupu

^6-7 Allah Yahweh arye nyapnukopura, ayupu ton dukdongobuka nyabuk. Ara, el mapu koproba, sik Israel nang nirya ati, nyabuk. “Ara narye anggun Israel yala nang nirya, malye-malye winilamluma ati, yakdonokamsisiba, Babel mutuku nang arye, yanuka obuka bobinamsikba, pera mutuku, Babel mutuku noutam ulamlum nang ara, wini talak ara, buklulume! Wini talak ara, anggun yuk mutuku dabinuka ulamlum nango, Babel mutuku arye tamupmunce, adiparyuk bikbik abuka, Yerusalem mutuku tamubuka yalulume,” nyabuk.

⁸ Allah arye, na nabi Zakaria biti, nyapnuka deiyok ara, ani. Ara, yata mutuku nang arye do, anggun Israel yala nang ati, yanuka olyangalamsikce, anggun ning yala-yala nirya, alubuka dololamik ning ati nyapkine. Anggun moubuka tenipdelulume! Dipkoprob nyapne. Na pia talima nang, Israel nang ati, ikin ning sik nong deice delinyak nang do, olyanganyak nang do, anggunti ara, weik tonun wenepnamsine. Deiyok ara, Israel nang ara, na pia talima nang unyaka ati, Israel nang ati, malye umunce, ikin ning deipmunyopura, ara nati malye ulin ning winipmanuluma ati, nyapsine. Nara Allah Yahweh, im deice unyak yin talen malaikat nirya ara, sik deiyoknye ununa ati, naryuk ayupu nyapmasine.

⁹ Ati ara, anggun nirya kekeplulume! Wini talak ara, na Allah arye, sik yuk mutuku-mutuku nang arye, na mapu koproba ati, ikin ning delilamik nang ati, opnirye wenepnamnarya! Amutuku-amutuku nang nirya, akunum opnirye, sirya daknyopura, sikce minop talak obukabikce, tapu koupdongobuka bobinamikce, pia ikin pil dilamik nang, anang arye tamubuka, sik Babel mutuku nang ap, yuk mutuku yu nang ap, obuka sirya daknamake. Sik minop talak arye, ikin ning boyanuka delilamikba, kanye imun ulamuk nang arye, tamubikirye, sik bobinamik mutuku deiyok nang ap, sik tam nang ap obikirye, sik amu tam deipnamake. Allah arye nyabuk. Tonda, Allah arye laka nyapdeipnukba, narye anggun kekena ati, laka nyapmasinanye, nabi Zakaria, nati ton moubuka biknamnulume. Ara, Allah arye, ‘Winipnamne,’ nyabuka, laka nyapnuk yupu nirya, akunum nong uplyopura, anggun aululum nang nirya arye, na Zakaria biti biknamlume. Ara, anggunce, ‘Se, dipkoprob, im deice unyak yin talen malaikat nirya talibuka, ulula deiyoknye birye, nabi Zakaria dobuka, nun dam dopdeipsukba, elce laka nyapsuk yupu nirya ara, akunum nong upliba eipmap atia,’ tenemunce, nati, ‘Yo, elda dipkoprob Allah aryuk, dopdeibukba, nun dam yanuka, laka nyapsuke,’ tenepmunce, diba tenepnamlume. Nabi Zakaria birye nyabuk.

¹⁰ Nyabukura, ayupu ton Allah Yahweh arye, nyabuk. “Se anggun Yerusalem mutuku noutam ululum nang nirya ara, pia weik tonun kanye deipmunce, kanye lon mot nyanamlume! Deiyok ara, ani. Anggun nirya ara, moubuka dinauk unamlume. Nara dipkoprob yanirye, anggun Israel yala nang noutamuk, neika unamabe. Na Allah Yahweh arye nyapmasina ati, aning ara, dipkoprob nong upnamle! Winipmunyopura, na anggun ni bira, anggun umunyak noutam anyuk unamne!”

¹¹ Atalak ara, yuk-yuk mutuku, im sirya, mutuku sirya unyak nang nirya arye, Allah Yahweh damuk, bulubuka yanganamake. Ara, ‘Nun ap neika unamabeʼ tenen, atia. Sik anang babye, nara Allah, na mapu koproba kinamake. Wininamak talak ara, na Allah ap, sik nirya ap, amutuku noutamuk neika unamabe. Allah arye nyabuk. Nyabukba, nabi Zakaria birye, nyabuk. “Anggun nirya kekeplulume! Allah arye, ‘Aning-aning winipname,’ nyapdeipmasil yupu, nong akunum uplyopura, anggun nirya arye nati, biknamnulume. Ara, ‘Yo, elda dipkoprob Allah aryuk dopdeibukba, nun dam yanuka, laka nyapsuk touk, akunum unmal atiaʼ tenen, diba tenenamnulume. Nabi Zakaria birye, sik Israel tam nang ati, nyabuk.

¹² Tonda, anggun Yehuda tam ululum nang ati, Allah Yahweh arye, el mapu koproba kina ati, tamubuka dopropnamsile. El ap, anggun ap, neika unamlume. Winiplirye, anggun mutuku tuku ara, pia teleb lek tuku kipdeipnamle. Tonda, min yuma talak ulamuk touk, tuba tonap, Allah Yahweh arye, weik asik, kota Yerusalem ati, weik tonun kanye deiplirye, bico tenebuka, ‘Amutuku ara, ‘Naʼ tenen, mutuku ukaʼ tenen, wiplirye, dobuka yana deipnamle.

¹³ Aning nirya ara, anggun tukwak mutuku, im sirya, mutuku sirya, noutam ululum nang nirya ara, pia dakeiam asa arye, tunim abuka, Allah el dam tamupmunce, yanuka unamlume. Yupu nyana ara, kume. Deiyok ara, Allah Yahweh el dam ara, wininamlume! Allah Yahweh, el pia teleb, lek diamuk ulamukak, im deice akunum buklirye, yanuka lyepropnamsila ati, anggun nirya ara, yupu nyana kumce, tunim abuka unamlume! Na Zakaria birye nyapsine.