Zakaria 14 - Eipomek

Yerusalem mutuku ap, yuk mutuku nirya ap ati, nyabuk yupu

¹ Allah Yahweh, elce tukwak nang, im sirya mutuku nirya, anggun wenen sum akunum dam uple. Ati ara, minop talak, sik mal olan nang arye, anggun Yerusalem mutuku ululum nang obikce, anggun talilamlum bona nirya alubuka dopromik ning ara, narye dopropnirye, anggun Yerusalem mutuku nang ati, ila tamubuka arepnamsine. Aning-aning nirya ara, narye anggun nirya ati, bokuka yuk-yuk arepnamsine. Aning nirya ara, anggun asing arye eipnamlume. Bukni, doupnamle talak arye winipnamne.

² Aning nirya min kum winipmanye talak ara, minopce na Allah Yahweh arye, mutuku sirya, im sirya nirya unyak nang kan-kan arye, ‘Israel yala nang optibye,’ tenenyak yala nang nirya bulubuka deipyeba, Yerusalem mutuku yanuka olyanamake. Yerusalem weik asik domik mutuku noutam nirya ara, amutuku aik nirya wekikcak arye, anyaik pum tam wamlye ning nirya, alubuka dopropnamake. Aning winipnamak touk, sik amutuku kilapu nirya babye, ubula doprobikirye, yonmaca ani, ubula alubuka dopropnamake. Amutuku unamak nang arye bokukabikirye, yupa bitinye kibuka deipnamake. Tonok tam yupa ara, tapu koubuka, yuk pera mutuku ton delilbinamake. Bukni, ton tam yupa ara, amutuku noutamuk batakikceba, daunamake.

³ Aning nirya akunum winibikcopura, daulamikca ani, aminyan talak ara, Allah Yahweh yanuka, ‘Yerusalem mutuku nang, opnamapʼ tenenamak nang yala nirya, mutuku sirya, im sirya nirya unamak nang ati, elcuk olbinamle. Aning ara, minop talak Israel mutuku noutam ulamik nang ap, Allah ap, sik yuk mutuku nang ati, neika olbinamik touk, Allah arye upnamle.

⁴ Atalak ara, Allah Yahweh Zaitun mutuku kon deice yanuka tiknamle. Zaitun mutuku kon ara, Yerusalem weik asik dam bukni, otam keting panalyangan tam ulule. Asukum ara, Allah yalirye, Zaitun mutuku kon deice yanuka tiknamle. Winiplyeura, Zaitun mutuku kon arye sakukaplirye, pala weik tam ara, keting panalyangan tam arye, deiyok koubuka binamlya ani, keting kumulban tam binamle. ‘'Amutuku toplirye, ton tam ara, outam dabu tam kisikuka binamle. Ton tam toplirye, iknapye tam ton kisikuka binamle. Ara, Zaitun mutuku kon nirya ara, dana-dana tam kipdoplyeba, danoutam ara, weik lu upnamle.

⁵ Ati ara, Zaitun mutuku nirya adiparyuk toplirye, keting panalyangan tam arye, otam keting kumulban tam lipdopnamle. Liplyeura, amutuku noutam ara, weik lu ara, lak kipnamla ati, anggunce adiparyuk alu mutuku noutam bikbik abuka binamlume. Bikbik abuka binamlumak ara, Asal mutuku dam binamlume. Ura, minop talak, ninye deiyoknye Raja Usia birye Yehuda mutuku talibuka ulamuk talak, sik mutuku noutam ara, weik mutuku lulukna lulukukba, anggun apu yapu nang arye minopce, bibik abuka binamik touk, Zaitun mutuku topnamle talak ara, anggun amutuku unamlum nang babye, atonun bibik abuka binamlume. Ati ara, na Zakaria birye si erenun Allah, na ni koproba Allah Yahweh ap, el im deice pil don nang, sik pia teleb lek malaikat nirya ap, sik neika yanamake.

⁶ Allah ap, malaikat ap, neika yanamak talak ara, akunum dam uplyeba yakcopura, pia mok denena kum li do, mok denen li buk, es mok do, aning nirya ara, pia kum upnamle.

⁷ Aning atonun, atalak nirya babye, wininyak ning ton, pia kum kipnamle. Atalak nirya ara, weik dirina uk upnamle ati, lukunyan talak kuna ap, keting noutam dirina ap, yuk-yuk kum danamle. Dirina uk unamle. Ara, lukunyan babye, dirina uk upnamle. Aning ara, nun walwal bukni, Allah Yahweh eluk aning akunum bikilule. Elda dirinak uk ulule.

⁸ Atalak ara, pia teleb mek, Yerusalem mutuku noutam arye, kam una deiyok ning arelul mek pu doplirye, Yerusalem mutuku noutam ara weik banamle. Amek bukni, noutam arye bokuka kwaleknamle. Tonok tam mek ara, balamlirye, otam, keting kumul balamle tam mekwen, el si Laut Mati tam kibuka binamle. Ton tam mek ara, wilibuka, otam keting panalyangan tam deibuk laut mekwen noutam, el si Laut Tengah tam kibuka binamle. Amek ara, keting tamun nirya ara, bana uk unamle. Ara mok denelamle talak babye, dou malamle talak babye, pia bana uk upnamle. Amek ara, pia kum cenamle.

⁹ Aning nirya akunum winiplyeura, atalak ara, Allah Yahweh arye, mutuku sirya, im sirya unyak nang ati, ninye deiyok kibuka, Raja ulirye, tukwak nang nirya talenamle. Atalak ara, tukwak mutuku nang nirya arye, biknamake. Ara, ‘Se, diba, nun ni koproba Allah ara, el tonok ulule. Allah el si Yahweh ara, eluk ululeʼ tenen, moubuka tenebikirye, el siuk erenamake.

¹⁰ Wini talak ara, amutuku noutam arye, mutuku kon ap, lu mutuku ap ansinibuka aubuk bukni, aminyan talak ara, amutuku nirya weik lu kipdeipnamle. Ara Geba mutuku noutam bukni, dabu tam, utara mutuku asukum dipdongobuka, Rimon mutuku iknapye dam, eitam mutuku nirya ara, weik pala lu mutuku uk kipdeipnamle. Winibuka deipnamle bukni, Yerusalem weik asik upnamlak ara, mutuku kon deice uk pia aupnamle. Ara, Allah arye amutuku weik erebuka deiplyeba, tonok mutuku kon deice uk tuba aupnamle. Amutuku noutam el pala ara, ani. Ara, Yerusalem weik asik dana-dana antanap dongobuka, domik keil poka noutam bukni, wekelyangan bisik botopdeiamik bublan, el si ara, Benyamin yala nang wekelban ati bublan bisik, weik pala bisik bublan dam arye dipdongobuka binamlya ani, minop talak botopdeiamik weik pala bisik bublan, asukum dipdongobuka binamlya ani, akeil poka domikak ara, el si ‘Minop Wekelban Bisik Bublanʼ, asukum dipdongobuka binamlya ani, minop talak domik cang keil aik el si ara, Menara Hananel, anoutam arye dipdongobuka binamlya ani, Israel nang taleamuknye, ninye deiyoknye Raja arye, el anggur duk mek kintinip deiamukce, anggur duk purulamukak binuka dipnamle. Ati, weik pala lu mutuku kwepdeipnamle ning ara, pala weik upnamle.

¹¹ Minop talak ara, Yerusalem asik domik ning obuka, sice buklobik bukni, Allah Yahweh tamubuka yanamle talak ara, Israel nang arye tamubuka amutuku yanuka unamake. Amutuku noutam unamak nang nirya ara, pia namin asa arye yanuka unamake. Ara, atalak arye dipdongobuka, doupnamle talak nirya ara, ninye arye amutuku yanuka, kum kilina ati nirya babye, sik anang dam ton pia kum unamake. Atalak arye dipdongobuka dounamle talak nirya, Yerusalem mutuku ara, pia telebuk unamle.

¹² Yata yu mutuku nang do nirya, sikce, ‘Yerusalem mutuku noutam unyak nang optinyeʼ tenen, pataplye nang yala-yala nirya ati ara, Allah Yahweh arye, weik imun kanye bobuka, ilil unamle nakina arenamle. Aweik imun nakina yala ning ara, ani. Sik anang ati areplyeba, anang sik asing ap, sitang ap, tonda sik nong bol nirya ap ara, sik kam tuba unamak talak babye, adiparyuk lyupnamle.

¹³ Atalak noutam nirya ara, Allah Yahweh arye, amutuku sirya im sirya nirya unyak nang arye, ‘Yerusalem mutuku nang optinye,’ tenenyak nang nirya ati, ilil una ap, kanye deibuka deilin ning ap nirya ara, areplyeba, sik anang nirya ara, sik kanye tenen ning ap, kanye walwal abuka unauk unamake. Tonda, sik nirya arye, weik ilil uplyeba, sik kayapu nang koproba ati bukni, taruk talipdakirye, mal olana uk unamake. Otam nang ap, atam unamak nang ap atibuk, tomobikirye mal olana uk unamake.

¹⁴ Tonda, Yehuda mutuku, yuk-yukak unyak nang babye, ‘Yerusalem mutuku unyak nang ati, melibuka kaliknamapʼ tenen, yuk-yuk mutuku nang ati olbinamake. Winipnamak talak ara, Yerusalem mutuku dana-dana tam unyak nang, yuk nang yala-yala nirya ara, sik mutuku noutam unyak nang nirya arye, tanlinyak bona yala-yala nirya ara, Israel yala nang arye, aning nirya alubuka dolonamake. Ara, sikce talilamik dekna weik ning, emas ap, perak ap, tonda baju bol pia teleb ning nirya ap ara, weik arye tapakuka dolonamake. Sikce alubuka dopropnamaka ning ara, pia kum nukmanto upnamle.

¹⁵ Tonda, atalak babye, sik yuk mutuku nang, ‘Yerusalem mutuku unyak nang optinyeʼ tenen, unyak nang ati, Allah arye weik nakina arenamle ning ara, aning atonun, sik kuda basam ap, sik unta basam ap, sik keledai basam ap, ura sik anang arye weinyak ning nirya ati, weik nakina yala ning arepnamle.

¹⁶ Areplyeura, ‘Yerusalem mutuku unyak nang optinye,’ tenelamik nang ara, ninye pia weik dipnamake. Bukni, mutuku sirya im sirya nirya noutam tuba kam unamak nang ara, sik kanye yuk bopnamake. Sik amutuku-amutuku nang akunum bikikceura, atalak arye dipdongobuka, dounamle talak nirya ara, Yerusalem mutuku yanganamake. Ara talye ati kum bukni, ‘Se, nunce Allah Yahweh, mikip weik Raja ulula ati, im deice yin talin malaikat nirya ara, elcuk talilula ati, el siuk erenamabeʼ tenen, pataplyeura, Yerusalem mutuku yanganamake. Anang ati yanuka olyangalamik. Tonda, Israel yala nang arye, weik kwalya, el si ara ‘Mitik Bai Aik Kwalyaʼ, kwalibuka dinamak talak babye, sik yuk mutuku nang arye, ‘Nun ap neika akwalya kwalibuka dipnamabʼ tenen, Yerusalem mutuku yanganamake. Allah Yahweh, el siuk erenamake.

¹⁷ Winipnamak bukni, na Allah arye nyapsine. Wini talak arye dipdongobuka, doupnamle talak nirya ara, ton tam mutuku nang, sikce, ‘Nun ni koproba Allah Yahweh, mikip weik Raja ulula ati, im deice yin talin malaikat nirya ara, elcuk talilula ati, el siuk erenamabeʼ tenen, Yerusalem mutuku noutam ton kum yakcopura, na Allah arye, aning ati arepneba, sik mutuku noutam nirya ara, mok ton pia kum cenamle.

¹⁸ Aning atonun tonda, atalak ara, sik Mesir mutuku nang arye, na Allah Yahweh dam kum yakirye, na si kum erepnikceura, aning winilamaka ara, anggun dam weik imun nakina yala arepnyeba, sik dam yanamle. Ara, sik yuk mutuku nang babye, weik kwalin talak, el si ‘Mitik Bai Aik Kwalyaʼ, na Allah Yahweh, na si eren ati, kum yanganamak nang, sik wenena ati, weik nakina yala arenamne ning ara, sik deice poupnamle. Mutuku sirya, im sirya nirya yanuka, na si kum erenamniak mutuku nang nirya ara, sik deice anakina yala arepnamne.

¹⁹ Awinipnamle ning ara, sik Mesir mutuku noutam unyak nang ap, tonda, sik yuk mutuku, im sirya, mutuku sirya nirya unyak nang ap, weik kwalin talak, el si ara, ‘Mitik Bai Aik Kalya sum ara, na dam kum yakcopura, sik wenena ati, weik nakina talin ning sik deice deipnamne.

²⁰ Atalak aryuk, sik kuda basam deice, lelim nyan ning el si ara, lonceng-lonceng nirya babye, urasin teleb kibuka deibikirye, alonceng nong deice ara, puturubuka sekeipnamake. Sikce, ‘Aning ara, Allah Yahweh el tonok, aning wibuka deibupu,’ nyabuka, sekuka delinamake. Tonda, Allah Yahweh, el si eren aik pum tam delinyak yun makau ara, el si panci-panci, nirya ara, Allah el tenen ning ulula ati, ‘Aning nirya ara pia teleb lek ning,’ tenenamake. Aning atonun, yuk mek din makau, el si mangkok-mangkok nirya ara, na aren sukum, el si mesba dam delinyak mek makau babye, sikce, ‘Aning ara, Allah Yahweh el tonok, aning wibuka deibupu,’ tenenamake. ‘Aning ara, el ‘Naʼ tenen, ning,’ tenenamake. Amek makau ara, ‘Kam ning opnarye, Allah ati arenamabʼ tenen, mesba domik dam delinyak mek makau ati, aning tenenamake. ‘Aning-aning nirya ara, Allah el ninguk ulule,’ tenenamake.

²¹ Aninguk kum bukni, atalak ara, talye din ning yuna ati makau, el si panci makau ara, Yerusalem mutuku noutam aupnamle ning nirya ap, Yehuda tam aupnamle ning nirya ap ara, sik Israel nang arye, ‘Kume, aning yala nirya ara, Allah el ninguk ulula ati, aning ara pia teleb, lek ning ulule,’ tenenamake. Ara, Allah Yahweh mikip weik ulirye, im deice yin talin malaikat nirya, sik deiyoknye ulule. El tonok, aning nirya wibuka delinamake. Awininamak ning deiyok ara ani. Ara, yata nang do nirya, amutuku noutam unamak nang nirya arye, kam ning obikirye, ‘Nun ni Allah ati arepnuyabeʼ tenen, aning boyanuka arebikirye, na Allah ati, na si erenamniake. ‘Naʼ tenen ati, delinamniak mek makau ara, ayanuka talibuka arenamniak basam tup yuna ati, amakau kintinibuka deipnamake. Tonda, aunamle talak akunum uplyeura, na Allah Yahweh, na si eren aik pum tam ap, anyaik lilun ap, ninye arye aning-aning nirya, talye dekna ati ara, na aik dam pia kum yanuka delinamake. Na Allah Yahweh, Pia Mikip Weiknye Unirye, im deice yin talin malaikat, sik deiyoknye ununa ati, na aik ara, pia teleb, lek aik ulula ati nyapsine. Ati, anyaik dam ara, talye nang arye, talye winin ning pia kum wininamake.