Zakaria 13 - Eipomek

Allah arye, isa si erena ati, winin ning ara, kum kipdeipnamla ati, nyabuk yupu

¹ Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.

² Atalak ara, atam mutuku nirya, na Allah, mikip weik deice arye, isa si erenyak ning nirya ara, kiliplopnamne. Winipnyeura, ninye nirya arye, aisa si nirya, tamubuka tonap, pia kum bikinamake. Lubakinuk unamake. Tonda, yuk nang arye, ‘Na Allah arye nyalul yupu, laka nyana deiyoknye, nabi unune,’ nyabuka nyanyak bukni, sik anang ara, isa siuk erenyake. Anang ap, isa nirya ap ara, amutuku nirya, narye yaknamne.

³ Atilila yupu uk nyanyak nabi nang ara, narye akunum yaknamne bukni, aminyan talak, sikce tamubuka yakirye, tuba talye tilila yupu deice arye, “Nunda Allah arye nyapdeipmal yupu nyanyabe,” nyabikcopura, sik ap, sik nin yapu ap, sik ni yapu ap arye, ayupu nyanamake. “Anggunda, talye yupu nyanmaluma ati, nunce opnusiabe.” Deiyok ara, sik tilila yupu nyanyak nabi nang ara, talye tilila yupu deice arye, “Nunda, Allah Yahweh arye nyasulul yupu kekebuka, ayupu laka nyana deiyok nang, nabi nang unyabe,” nyabuka, tuba nyanamaka ati, sik nin yapu ap, sik ni yapu ap arye, anang sik mapu koproba unyak bukni, topnong dobuka, atilila nabi nang lukikceba, dipnamake.

⁴ Winipnamaka ati, atalak ara, tilila yupu nyanyak nabi-nabi nang, ilil weik upnamle. Ilil uplyeba, nabi nang arye, “Nunda lengdar mapmaba deice arye, mambul ning elinyabe. Ati, aning deice ara, Allah arye nyasulul yupu laka nyanamabe,” nyanyak ning ara, tuba kum nyanamake. Ara, alye dakdakirye, ayupu tuba kum nyanamake. Aning atonun, tonda, ilil uplyeba, atalak ara, sikda, ‘Yuk nang eipsikirye, ‘E, ara dipkoprob nabi unamale,’ tenepnamakʼ tenen ati, dipkoprob nabi nang ongolamice baju, kambing potong arye memenyak baju, tuba kum ongonamake.

⁵ Atalak ara, sik tilila nabi nang arye tamubuka sikce nyapnamake. “Kume, nara dipkoprob nabinye kuma,” nyanamake. Tonda, “Dipkoprop ning ara, nara talye wa winanye unune. Wininirye, na talye kam unye talak ara, talye pil donanye unune,” nyanamake. ‘'Amutuku tuku ara, na mitik mi ulamse talak ara, na ni yapu arye, awa tuku arepnikba, na kam ulamse talak nirya ara, atuku tuba taleamse touk, tuba talinune.

⁶ Tonda, sik talye tilila nabi nang ati, ninye ton yakirye, yanuka asipnamake. Ara, “An taram dam ara, yata ning arye opkukak, dila upkuk do?” Nyabikceba, anye birye tenepce nyapnamle. “Na opnukba suse dila ara, na kwit ap olanmanuma deice arye,” nyabuka, tilila yupu arye nyanamake.

Allah yupu laka nyana ati, Allah arye wibuka dopkwetamuknye ona ati, nyabuk yupu

⁷ Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.

⁸ Atalak ara, Yehuda tam mutuku nirya unyak nang bukni, ninye nirya aupmace touk, nuknirye, kong winilye bokuka, yuk-yuk deipnamne. Yupa bitinye ning bokuka, wenebuka opnirye, kum daneipnamne. Yupu tonok ara, ona kum upnyeura, kam pia unamake.

⁹ Winipnamne talak ara, ayupa winilye ara, tonok bokuka seper tiga, ‘Naʼ tenen deipnamne ning ara, lyebuka deipnamne. Sik alyebuka deipnamne nang ara, pia teleb lek nang kipdeipnamne. Winipnamne bukni, winina ati ara, ‘Teleb unamak do, kum do?’ tenen, ikin ning arye, anang nirya piripdenamne. Winipmanto ara, dekna weik kat ning, el si perak dobuka, ‘Malye ning kum uplyeba, teleb ninguk lak upnamleʼ tenen, uku dongobikceba, uku diplyopura, pia teleb ninguk lak ulule. Aning atonun, dekna weik kat ning emas ati, ‘Malye ning kum uplyeba, teleb ninguk tuba unamleʼ tenen, uku arye pirilelamle touk, sik anang babye, ‘Teleb wininamak do, kum do?’ tenen, piripdenamne. Winipnyeba, sik anang nirya arye, nati “Nun ni Allah melipsilyame,” nyabuka moronamake. Winikceura, narye sikti, tamubuka nyanamne. Narye sikti, tamubuka nyanamne yupu ara, ani. “Anggunda, na mapu koproba ululume,” nyapnamne. Winibuka nyapnyeba, sikce tamubuka nati, nyapnamniake. “An Allah Yahweh ara, nun ni Allah ulyama ati, an siuk erenamkiabe,” nyabuka, natibuk si erebuka kinamniake.