Zakaria 12 - Eipomek

Allah arye, “Yerusalem mutuku nang lyepnirye, teleb kipdeipnamne,” nyabuk yupu

¹ Sik Israel nang ati, Allah Yahweh arye “Winipnamsine,” nyapdeibuk yupu ara ani. Allah Yahweh elcuk im ap, tuku ap kwepdeibuknye biryuk, aning-aning nirya taleamukce, ninye ap kwepdeibuka ati, sik talima pum tam ulamle kanye ton dongopdeibuk. Allah arye nyabuk yupu ara, ani.

² Anggun nirya moubuka dipdelulume! Dipkoprop na Allah arye, Yerusalem mutuku noutam nirya ara, weik kanye imun ning areplyeura, sik dana-dana tam unyak nang yala-yala nirya, aning eibikirye, ‘Se, yata wiripmasil do?’ tenen, kanye teniltonauk ukirye, ilil weik unamle. Winipmanto ara, ninye arye, yu anggur mek weika tonun dibikceba, sik kanye wangabikceba, kisok birbir aplirye, poulbalamak touk, Yerusalem mutuku dam unyak nang nirya babye, narye deipnamne ikin ning eibikceura, aning atonun winipnamake. Tonda, narye lo arepnyeba, yuk mutuku yu nang arye yanuka, ‘Yerusalem mutuku nang nirya ara, opnamapʼ tenen, warikuka antanap dongopnamake. Winipnamak talak ara, sik Yehuda yala nang, tuba aunmace nang nirya babye, dana-dana antanap dongobikirye, warikuka winibikceba, sik babye ikin weik upnamle

³ Bukni, atalak akunum dam uplyopura, Yerusalem mutuku nang ara, ‘Yuk mutuku nang arye amutuku nang obuka sice buklobikcakʼ tenen, narye kalikinamne. Winipyeura, yuk mutuku nang arye, ‘Yerusalem mutuku nang opnuyab,’ tenepnamaka babye, kum winipmanto upnamake. Winipmanto ara, ninye arye, weik ikin keil awamlye buk, sikce, ‘Akeil nun babye mikip aryuk erebuka yukak bobinamap,’ tenebikirye, tomoptinga babye, akeil kum tomopmanto unyake. Aning atonun, narye Yerusalem mutuku kaliklyeura, yuk mutuku nang arye, anang obuka kum sice bukloptinge. ‘Opnuyab,’ teneptinga babye, sikda olana uk upnamake. Bukni, ‘Yerusalem mutuku nirya, sice buklopnamabʼ tenen, mutuku sirya, im nirya daunyak nang nirya arye, Yerusalem mutuku dam yakirye, warikilyanamake.

⁴ Winipnamak bukni, atalak noutam ara, sik yin talin nang arye, bukuka bana ati, sik kuda basam ap, tonda, sik kuda basam balye deice bunyak nang ap nirya ara, narye kanye talibuka deipnirye, sik tenen ning nirya ara, walwalabuka kipdeipnamne. Tonda, sik akuda basam deice bukuka banyak yin nang nirya ara, motona talin nang atonun kipdeipnamne. Winipnirye, sik Yehuda yala nang, amutuku noutam unamak nang nirya ara, ‘Yu nang arye obikcakʼ tenen, kalikinamne. Bukni, sikce nati mal pin nang, sik kuda basam nirya ara, asing kun ning arepnyeba, sik asing nirya kupnamle.

⁵ Ura, aning nirya akunum winipyeura, sik Yehuda mutuku noutam unyak nang arye, sik talima noutam aryuk tenebikirye, nyapnamake. “Kume, nun mining mikip arye, aning nirya dipkoprob kum winiptibye. Ati, nun akunum kele. Nun ni Allah Yahweh mikip weik ululnye birye, im deice unyak yin talin malaikat nirya, sik deiyoknye ulula ati, el mikip deice aryuk akunum kalikinmasile! Ara, Allah arye el mapu sik Israel nang Yerusalem mutuku unyap nang ati, el mikip weik deiyok ning akunum arepmasil deice arye, sik yuk mutuku yu nang arye, kum opmasiake.

⁶ Yuk mutuku yu nang arye, ‘Yerusalem mutuku yanuka olbinuyap,’ tenepnamak talak ara, sik Yehuda noutam unyak yala nang nirya ara, mikip weik arepnamne. Ara, winipmanto ning ara, uku sekna ati, asing tilibikceura, ‘Uku seknamakʼ tenen, yo bobuka, uku sekikceba, uku minopce dilamle atonun, sik Yehuda tam nang babye, sik dam winibuka deipnamne. Winipmanto ning ton, ninye arye upna ubikirye, gandum kouamikca eipnukca ati, uku minopce balamak touk, Yudea tam nang ati, winipdeipnamne. Winipnamne talak ara, sik Yudea tam nang nirya arye, sik dana-dana mutuku sirya, im sirya nirya daunyak nang ara, ‘Opnamabʼ tenen, yakceura, Yudea tam nang arye anang nirya obuka, kum kipdeipnamake. Ara, sirik tam bisik yanamak nang babye, kwanim tam bisik yanamak nang babye, sik nirya obuka, sirya daknamake. Bukni, sik Yerusalem mutuku arye weik asik domika nirya, yu nang arye obikceba, asik oldem upnamle bukni, atalak ara, sik Yehuda yala nang ara, tamubuka tonap, amutuku noutamuk unamake. Asukumuk sikda namin arye dakeiam asa, teleb deice aryuk unamake.

⁷ Atalak ara, na Allah Yahweh arye, sik Yehuda tam nang, sik yin talin nang ati, ninye ona ati, mikip deiyok ning dobuka, sikti, arepnye ning ara, sik ona ati, yanganamak nang nirya ara, minopce obuka bataknamake. Winipnyeura, yuk mutuku nang arye sikti, ‘Se, Sikda pia telebuk unyake tenebikirye, sikti, weik arye, si erebuka kinamake. Aminyan talak ara, Daud birye deibukba, dadeipdanin yangalamik nang ap, sik Yerusalem mutuku noutam unyak nang ap ati, yuk nang arye sik nirya ati, mitik arye si erebuka kinamake. Bukni, minop talak ara, Yehuda tam nang ati, weik arye si erebuka kinamake.

⁸ Atalak ara, ‘Yuk mutuku nang arye, na mapu Yerusalem mutuku unyak nang obikcakʼ tenen, narye Yerusalem mutuku unyak nang ati, melibuka kalikinamne. Tonda, sik nirya ati, na mikip arepnyeura, sik amutuku noutam arye mitang kibuka unyak nang nirya babye, melinya deice arye, mikip weik nang unamake. Ara, minop talak Raja Daud el mikip weik ulamuk touk unamake. Atalak ara, sik Yehuda tam unyak nang nirya ati, Daud elce deibukba, deipdanin yangalamik nang kan-kan noutam, el tam nang arye, ninye deiyok kibuka, anang nirya pia teleb kibuka talipnamake. Winipmanto ara, na Yahweh arye, na im deice pil don nang malaikat dopkwtepnyeba, amalaikat arye, anang melibuka kaliklamak touk, Daud tam nang arye, pia teleb kibuka anang talipnamake. Tonda, winipmanto, naryuk anang sik Raja uptinirye, anang pia teleb kibuka taliptinye touk, Daud tam nang arye, pia teleb kibuka, anang talinamake.

⁹ Atalak ara, yata mutuku nang do nirya, sikce, ‘Yerusalem mutuku noutam unyak nang ati, olyanganamapʼ tenen, mutuku sirya, im sirya nirya arye tenenyak mutuku nang ara, na Allah arye, sik nirya obuka, kum kipdeipnamne.

¹⁰ Ura, Daud birye deibukba, deipdanin yanganyak nang nirya ap, Yerusalem mutuku weik asik noutam unyak nang nirya ap ara, narye sikti, kanye talima namin una deiyok ning arepnamne. Ara, aning arepnyeura, sikce, ‘Seʼ tenen, bico tenebuka, talima lamapdongobuka unamake. Tonda, sikda talima erelana kum aryuk, nemalyap aryuk, na Allah ati, moronuk unamake. Winipnamsina deiyok ara ani. Ara, aminyan talak ara, sik tam nang arye, nati lukuka opnamniake. Aminyan talak ara, sikce lukuka opnikirye, anang nirya arye eipnamniake. Tonda, eipnikirye, ‘Se, bicoeʼ tenen, engepnamake. Nati, engenamniaka ara, sik mi tonok deiamikcak, ami diplyeba, ami ati weik arye engelamak touk, unamake. Tonda, sik anang nirya arye, engenamniaka ara, sik min yuma deiamikce mi tonok, diplyopura, atonok mi ati, engelamak touk, na eipnikirye, atonun weik arye engenamake.

¹¹ Winipnamak talak ara, Yerusalem mutuku noutam unyak nang nirya arye, pia weik imun kanye bobuka engena weik arye engenamake. Winipmanto ara, sikda weik arye engenamniaka ara, ninye deiyoknye Raja Yosia bira, mutuku si Hadad-Rimon mutuku tam bukni, Megido mutuku noutam weik pala lu mutuku noutam deibinuka olamikak, Raja Yosia obikba dibukak, engelamik touk unamake.

^12-14 Yehuda tam unyak nang arye, na lukuka opniknye eipnikceura, amutuku noutam unamak nang nirya arye, sik yuk-yuk weik arye engenamake. Ara, Daud birye deibukba, dadeipdanin yangalamik nang arye, anggun tam ninye aryuk sik yuk engenamake. Aning atonun, sikce domik kilapu babye, sik yuk bulubuka wekikirye engenamake. Wininyak atonun, Natan birye deibukba, dadeipdanin yanganyak nang ap, sik yuk bulubuka engenamake. Aning atonun, sikce domik kilapu babye, sik yuk bulubuka wekikirye engenamake. Aning atonun, Lewi yala nang nirya ap, Simei yala nang ap, yuk-yuk bulubuka, sik yuk-yuk engenamake. Aning atonun, ayala nang arye domik kilapu babye, sik yuk-yuk bulubuka wekikirye engenamake. Aning atonun, sik Yehuda tam unyak yala nang nirya ara, asukum laka nyapman touk, sik yuk-yuk bulubuka, wekikirye, weik arye engana uk unamake. Allah Yahweh arye, na Zakaria biti, nyapnuk ati, asukum lak nyabuka sekeipse.