Zakaria 1 - Eipomek

Allah Yahweh arye, el mapu koproba ati, “Anggun malye winin ning nirya batakmunce, na dam tamubuka yalulume,” nyabuka, yukubuk yupu

¹ Persia mutuku talibuka ulamuk ninye deiyoknye Raja Darius, atam mutuku taleamuk talak bukni, keting tamun bitinye, wala ara, pinbarye (8) deice ara, Allah Yahweh arye, na Zakaria dam yanuka, ayupu nyapnuke. Ara, na apu Ido, elce deiamuknye, Berekhya, elda na ni koproba arye deipnuknye, nabi Zakaria, Allah arye, nati nyapnuke.

² Anggun apu yapu nang, na mapu koproba, sik Israel nang ati, ‘Nyanamlyame,” nyapdeipnuke. Ara, nara Allah Yahweh ara, anggun apu yapu arye, malye weik winilamika ati, yu weik upnukba, anang ati, pia weik tonun wenelamse.

³ Ati ara, ance sik Israel yala nang ati, nyapnalyame. Nara, im deice unyak yin talen malaikat, sik deiyoknye unirye, anggunti nyapsine. Anggunda, malye weik winilulum bukni, wini talak ara, narye anggunti nyapsine. Ara, anggun adiparyuk tamubuka, im deice unyak yin talen malaikat, sik weik deiyoknye, na Allah dam yanamlume. Winipmunyopura, na babye, im deice unyak yin talen malaikat, sik deiyoknye unirye, na babye, sik dam tamubuka binirye unamne.

⁴ Anggun wini talak ululum Israel nang ara, anggun apu yapu minop talak ulamik touk, kum unamlume. Minop talak ara, narye nabi-nabi nang dopdeipsiba, sikda, narye, ‘Winipnamlume,’ nyapdeipse yupu ara, anabi nang, sik apu yapu dam binuka laka nyalamik. Ara, ‘Narye im deice unyak yin talen malaikat, sik weik deiyoknye kibuka ununye birye, na Allah arye nyapsine. Wini talak ara, anggunce pia malye weik winilulum bukni, aning nirya batakmunce, na Allah dam tamubuka yamunce, diksukumuk wininamlume,’ Nyapdeipse bukni, sikce ayupu nyapdeiamse ning ati, ‘Nun like,’ tenelamikce, dipkoprob kum winilamik. Ati ara, na Allah Yahweh arye nyapsine.

⁵ Bukni, asipdesine. Anggun moubuka tenipdelulume! Anggun apu yapu nang ap, sik minop talak ulamik nabi nang ap ara, wini talak ara, dan mutuku unyak do? Ati, sik anang nirya ara, pia tuba-tuba kam kum unyake. Anang nirya ara, akunum dibikba, kum dayike.

⁶ Sik nabi nang deice ap, na yupu peteren nang deice ap ara, narye, ‘Aning ara, wininamlume. Aning ara, pia kum wininamlume,’ nyapsise ning ap, ‘Teleb una ara, ani. Malye una ara, ani. Aning ara, pia mem nyan yupu ap, tonda narye, ‘Pia moubuka tenepnirye wininamak,’ tenyamse ning nirya ara, na amu tam pil don nang yupu nyapdeiamika deice arye, anggun apu yapu nang dam nyapdeiamse. Ayupu nirya nyapdeiamse bukni, sikce ayupu ara, diba kum tenyamika deice arye, ikin ning dopromike. Narye, ‘Winipnamsile,’ nyapdeiamse touk, aminyan talak dipkoprob winibuke. Winyamuka ati, sikce, ‘Seʼ tenen, sikce tenipdeyikce, sik malye ning batakikce, nyabik. Ara, ‘Se, im deice unyak yin talen malaikat, sik weik deiyok ululnye birye, ‘Winipnamne,’ nyapdeiamsuk touk, akunum winipmasila atia,’ nyalamik. Allah Yahweh aning-aning nirya talibuka, deice tam erebuka mikip weik ululnye birye, ‘Winipnamne,’ tenyamuk touk, nunti akunum winipmasile. Ara, nunda malye winilamupu touk, elce atonunuk, kanye imun weik ning, dekna arenmasil deice arye, wenesulule. Ara elce akunum, ‘Winipnamsine,’ nyapdeipsuk touk, winipmasila ati, merekuka wininmale!

Nabi Zakaria dam, kuda basam ton lake kibukba, eibuk ning ati, laka nyabuk yupu

⁷ Ara, wala koklombarye (11) ara, wala si Syebat deice, tanggal dua puluh empat (24), Babel mutuku ninye deiyoknye, Raja Darius birye taleamuk. Ataleamuk talak ara, Allah Yahweh arye, na Zakaria dam, ayupu yanuka laka nyapdeipnuke. Ara, lukunyan noutam arye, lengdar mana atonun ning, yanuka lak kipdeipnukce, nyapnuke. Ara, Allah Yahweh arye, na apu Ido, elce deiamuknye, Berekhya, elda na ni koproba arye deipnuknye, na Zakaria, dam yanuka, lake nyapnuke.

⁸ Ara, Allah Yahweh, el im deice pil donanye, tonok malaikat arye, ining bi kuda basam deice bukmokce yanmokba, narye eipse. Ara, yo si, murad yo, tikamuk mutuku, atam binuka, tunim abuka tikukba, eipse. Binuka tunim abuka tikmoka ani, el balye tam ara, yuk kuda basam yata barye ton, yuk ning neika tikmek. Atikmek ning, sik bol nirya ara, ining bi ning ap, tonda ining bi ning bukni, mitik yala yuk ning ap, kurun ning ap, yanuka neika tikmek.

⁹ Akuda basam yanuka tikmekba, narye amalaikat ati asipdese. Ara, ‘Naio, anda na deiyoknye, ayanuka tikmak kuda basam yala nirya ara, yata deiyok ati aunmak do?” nyabuka asipdese. Nyapsiba, elce tamubuka laka nyapnuke. “Aminyan talak winipnamle ning nirya ati, lak sukum arye, laka nyapdeipnamakine,” nyapnuke.

¹⁰ Nyapnukura, murad yo tikamuk mutuku, binuka tunim abuka tikmokba, eipsinye birye nyabuk. “Akuda basam nirya ara, winipmanto ati unyake. Sikda, anggun ni koproba Allah Yahweh arye, ‘Tukwak mutuku noutam nirya, dipnin bana ati, pia banamaka ati, akuda basam dobuka deipmale,” nyabukba, kekepse.

¹¹ Nyabukba, akuda basam nirya ara, Allah Yahweh arye, dopdeipmok malaikat, asukum tikmoknye biti, laka nyabik yupu ara, ani. Ara, “Nun atikmap kuda basam nirya ara, tukwak mutuku im sirya, mutuku sirya, dana-dana tam nirya ara, akunum dipnin balamupu bukni, mutuku sirya, im sirya nirya, aunyak nang ara, mal olana kumce, pia teleb dakeiam asa unyake,” nyabik.

¹² Nyabikba, Allah Yahweh arye, dopdeibuk malaikat arye nyabuk. “Se, Allah Yahweh aning-aning nirya talibuka, deice tam erebuka, Pia Mikip Weik Deiyoknye ulyamnye birye, keting tamun tujuh puluh (70) tahun deice arye, weik asik domikak, Yerusalem mutuku ap, Yehuda tam mutuku noutam asik domikak ap nirya ara, yu weik deipkiniba, an mikip deice arye wenelamlume. Winilamluma ani, aninye nirya ati, lo talak ton akunum uplyopura, aninye nirya ati, bico teneplumce, an kanye tenepmunce, kanye deipminya ak arye, sikti melipnamlam do? Sik malye winin ning ati, bita adiparyuk optum bukni, bico tenepminya deice arye, yata talak ton sikti, bico tenebuka melipnamlam do?” amalaikat arye nyabuk.

¹³ Amalaikat arye nyabukba, Allah Yahweh arye, tamubuka amalaikat ati, pia darapdongobuka, teleb nyan yupu, ‘Kanye deibuka, bico tenepnamleʼ tenen, yupu deice arye nyabuk.

¹⁴ Nyabukopura, nati nyapmanue malaikat arye, nyapnuke. Ara, “Allah Yahweh arye, nyapdeipmasil yupu dobuka, laka nyalbinamlume. Ara, im deice yin talen malaikat nirya talibuka, sik deiyok kibuka ululnye birye, nyapsil yupu kekepmince, nyalbinamlame. Ara, ‘Yerusalem mutuku noutam unyak nang ap, na pia teleb lek mutuku, Sion mutuku noutam nirya ap ara, pia bico tenena ap, ‘Seʼ tenena ap, sik dam ati, yata ning yanuka upnamle do?’ tenen, pia unune,’ nyabuk.

¹⁵ Tonda, nara sik yuk-yuk mutuku nang, pia dakeiam asa arye, nimalyap asa mutuku-mutuku nirya unyak nang nirya ara, ‘Nunda pia telebe,’ tenen, maknya kintinibuka, kwalinyaka ati, narye sikti, pia lik ubuka, malye kanye bopse. Deiyok ara, mince na mapu koproba, sik Israel nang arye malye winilamik ning ati, na mitik tonun talima noutam yu upnukba, ‘Anang wenepnamne,’ tenepse bukni, nati diba kum teneninyak nang, yuk-yuk mutuku unyak nang arye, na mapu koproba Israel nang ati, pia weik tonun yu ubukba, ikin ning pia weik tonun dobuka, sik nong deice delilamik. Na mapu koproba deice arye, kanye imun weik ning, pia weik tonun boyanuka delilamika ati, narye sikti, malye kanye bonune. Ati, anang wenepnamnarya!

¹⁶ Ati ara, na Allah Yahweh arye nyapsine. Wini talak ara, na adiparyuk tamubuka, Yerusalem mutuku binuka unamne. Sik amutuku unyak nang ati, bico tenepnirye, pia melinamne. Winipnyopura, narye lo arepnyeba, na si erena ati ara, sik mutuku, Yerusalem mutuku noutamuk boyanuka deipnamake. Winipnamak talak ara, sik aik dona kel weik nang arye, anyasik-anyasik lipsisikuka dona ati, ‘Amutuku pala ara, yata wiribuka ulul do? El cang ara, yata barye ubuk do?’ tenen, cang tapu arye, kiklipdenamake. Winipnamne talak ara, Yerusalem mutuku nirya ara, tamubuka tuba teleb kipdeipnamne.” Allah arye nyabuk.

¹⁷ Nyabukopura, Allah Yahweh arye, ayupu ton dukdongobuka nyabuk. “Ayupu ton, kekepmunce, laka nyapnamlume. Na im deice unyak yin talin malaikat nirya talepsirye, sik deiyoknye unirye nyapsine. Narye talibuka unye mutuku ara, tamubuka pia teleb kipdeipnyopura, amutuku noutam ara, aning yala-yala nirya ap, sik bona ap, sikce talinamak ning ara, weik tonun teleb upnamle. Winipnamna deice arye, sik Yerusalem mutuku noutam unyak nang nirya ara, sik talima kwa dibuka melipnirye, pia teleb kipdeipnamne. Min arye, Sion mutuku wibuka deiamse touk, tuba tonap, ‘Asukumuk kipdopnamne. Amutuku noutam pia unamne,’ nyabuka, nyalin yupu arye nyapdeipnamne.” Allah arye nyabuk.

“Sapi basam kisok deice tiklamle ning, el si yang, lak kibukba eipse,” nyabuk yupu

¹⁸ Atalak ara, eitam dinmasiba, yuk ning ton yanuka, lak kipdeibuk ning ara, eipse. Ara, sapi basam kisok deice ara, taice ning, el si yang dumbarye belepmok ning ton eipse.

¹⁹ Ati, narye ayupu nyapmanuk malaikat ati asipdese. Ara, sapi basam kisok deice tiklamle yang urasin atonun ning ara, deiyok yata ati do?” nyabuka asipdesiba, elce tamubuka laka nyabuk. “Aning sapi basam yang urasin atonun ning ara, winipmanto ning ulule. Aning deiyok ara, yuk-yuk mutuku ninye deiyok kiamik nang ap, sik tam nang ap arye, Yehuda tam ulamik nang ap, Israel tam ulamik nang ap, weik asik, kota Yerusalem ulamik nang nirya ara, omikba, kam tuba ulamik nang, bai sakuka biyikce, dabinuka ulamik. Ayang ara, amutuku-amutuku deiyok nang ati ulule,” nyabuk.

²⁰ Nyabukba, aminyan ara, Allah Yahweh arye, kat ning, el si besi boyanuka, puturubuka delina kel nang, dumbarye nang, lak kibukba eipse.

²¹ Adumbarye nang eipsirye, asipdese. “Sik adumbarye nang, besi memen nang ara, deiyok yata ning ati yanmak do?” nyabuka asipdese. Asipdesiba, Allah Yahweh arye, tamubuka laka nyabuk. “Ayang eipmoma deiyok ara, yuk-yuk mutuku ninye deiyok kiamik nang ap, sik tam nang ap arye, Yehuda tam ulamik nang dam, yanuka obikce, yakuka dopkwetebikba, sik kam tuba ulamik nang ara, bikbik abuka binamikce, dana-dana tam mutuku ulamik. Atalak ara, imun kanye bomikce, alye weik daklamika ati, tonoknye babye, kanye deibuka kum ulamik. Sik nirya ara, ikin weik ulamik. Ati, abesi ning pil donyaka deiyok nang ara, anggunce arup eipmalum yang, dumbarye ninye deiyok nang ati, yanuka opnamake. Ara, sik yuk-yuk mutuku deiyok nang arye, Israel tam nang obuka, sirya dakik bukni, aminyan talak ara, adumbarye nang arye, sik yuk mutuku deiyok nang ati, opnamaka deice arye, ilil weik upliba, adeiyok nang ara, amu tamuk deibikirye, obuka sirya daknamake. Winibikiba kum danamake.