Yunus 4 - Eipomek

Allah arye, Niniwe mutuku ninye ati, bico tenebuka anya arye, Yunus birye, ‘Aninye ara, merekuka opmatue,’ tenebukce, Allah ati, yu kanye bobuk yupu

¹ Allah arye, Niniwe mutuku ninye ati, bico tenebukce, kum obuka ati ara, Yunus birye, ‘Aning ara, na like,’ tenebukce, Allah ati derebuk.

² Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.

³ Nyabukce, ayupu ton dukdongobuka nyabuk. “Na ni Allah, Niniwe mutuku ninye kum opmalama ati, teleb ning ara, wini talak ara, na tonok ara, daopniminba dipnune. Na kanye ara, weik teleb ning ara, dipna teleb bukni, kam una ara, na like. Ati, an Yahweh arye daopnutume,” Yunus birye nyabuk.

⁴ Nyabukba, Allah el si Yahweh arye, tamubuka nyabuk. “Anda deiyoknye kum anya arye, narye nyapkine. Deiyok kum upmalibuk, winibuka talye lukparabuka, kum derepnutume,” nyabuk.

⁵ Nyabukopura, Yunus, Niniwe mutuku arye batakuka, keting yangan tam biyukce, barasik dobukce, anyaik pum bukuka, amutuku pia ulamukce, ‘Niniwe mutuku ara, yata ning ton winipnamle do?’ tenen, kalikuka dilamuk.

⁶ Ulamukbuk, Allah el si Yahweh arye, Yunus ulamukak ara, weik talye lyaklamle yo tonok, ‘Yunus unamlak ara, keting tin weik anya arye, ayo arye, Yunus lelipnamle. Lelipliba, el keting tin arye, ‘Buppu unmal ning ara, kum winipnamle’ tenen, ayo tikeibukura, minopce bongobuka pabukba, Yunus lelipdobuk. Ayo ara, pabukba, ayo ati Yunus birye, weik kanye deibuk.

⁷ Kanye deibuk buk, mapmoka ani, auku sum beren tam dinmokba, ayo koulupropmok. Ara, Allah arye, ‘Ayo yating ara, koluptue,’ tenebukce, kuluma arebukba, akuluma arye, ayo yating mutubuka dilamikba, ayo kolubuk.

⁸ Keting akunum panalyayukura, Allah arye kumanya weik, buppu ning dopkwetebukba, keting panalyangan tam arye, weik kumanya welebukce, kumanya dobuka yayuk. Akumanya dobukce, keting tin weik deibuk deice arye, Yunus kisok buppu arye, biribiri abuka, dipmanto ubuk. Awininmok deice arye, el dipmanto ubukce, tonda el kisok nirya, uku dipmanto ubuk. Winibukba, ‘Na kam unye ning ara, kume, dipnune,’ tenebukce, nyabuk. “Weik teleb ning ara, dipnune. Kam una ara, na like,” nyabuk.

⁹ Nyabukba, Allah arye tamubuka nyabuk. “Anda deiyoknye kume ati ara, akolupmal yo ati, talye kum derepnutume,” nyabuk. Nyabukura, Yunus birye, tamubuka nyabuk. “Na yu upnil ning ara, teleb uka. Aning ara, kum bataknamne. Pia derelamkinya deice arye, dipnamnarya,” nyabuk.

¹⁰ Nyabukopura, Allah el si Yahweh arye, Yunus biti, nyabuk. “Akoulupmal yo ara, lukunyan tonok arye, pabuka tikmoka, ton sum ara koluprobuke. Tonda, ayo ara, ance kum kouamlumce, ayo ati, ance moubuka kum kaliklamlume. Bukni, ance ayo mikuka kolupmal ning ati, malye kanye bobuka, ‘Se,’ tenebuka, bico tenenmalam bukni, Niniwe mutuku ninye weik daunyak bukni, anang nirya ati ara, bico kum tenelyame.

¹¹ Nara, Niniwe mutuku ninye ati, bico tenenune. Amutuku ara, ninye kum nukmanto, sik yupa ara, 120.000 ribu nang aunyak bukni, ‘Teleb ning ara, ani. Malye ning ara, ani’ tenen, kel kum bikinyake. Tonda, sik weinyak ning domba basam ap, kambing ap, maka ap ara, kum nukmanto unyake. Amutuku ninye ap, sik weinyak ning ap, talye lukparabuka, oplopnaman do? Kume, aninye ati ara, bico tenenune.” Allah el si Yahweh arye, Yunus biti nyabuk.