Yunus 3 - Eipomek

Yunusda, Niniwe mutuku biyuk yupu

¹ Weik mekwen, laut pum ikan arye, Yunus mekwen kup-kup binuka duklobukopura, Allah el si Yahweh arye, like bitinye sum, Yunus biti nyabuk.

² “Weik asik Niniwe mutuku bimince, narye an dam nyapse yupu bobuka, Niniwe ninye, sik dam adiparyuk nyalbinamlyame,” nyabuk.

³ Nyabukopura, Yunus ayupu kekebukce, weik asik Niniwe mutuku bana ati, bisik banmoka ani, Niniwe mutuku biyuk. Niniwe mutuku ara, pia weik kota anya arye, atam arye otam bana ati ara, like winilye deice mapbalamik. Akota ara, weik mambul kota anya arye, akota noutamak ara, ninye pia weik ulamik. Amutuku ara, pala weik mutuku.

⁴ Inina winilye, mapna arye balamik mutuku bukni, Yunus bira, lik tonok sum aniryuk, Niniwe mutuku atam arye otam bana ati, tonok sum aniryuk biyuk. Niniwe mutuku noutamak banmok talak ara, ayupu nyanmok. “Allah arye nyapsile. Yupa tonok kepdopnye, koklom dikin empat puluh (40) sum akunum uplyopura, Allah arye, Niniwe mutuku kili sal wenena ati, amutuku ninye nirya oplirye, kum kipdeipnamle,” nyanmok.

⁵ Nyanmokba, amutuku ninye nirya kekebikce, ‘Allah arye winipnamsile,’ nyapdeiamsuk ning ara, ‘Dipkoprob winipnamsile,’ tenebikce, dib tenebik. Winibikopura, aulamik ninye nirya arye, “Nun nirya wininamabe,” nyapdeibik. Ara, sik nirya arye, ‘Allah ati tenebibirye, el si erena ati, winipnuyabe’ tenen, ‘Weik nang babye, mitik nang babye, mapu kil, mapu nirya babye, nun malye winilamupu,’ teninmeka ati, malye baju ongobuka, din dina kumce, talye urdemuk unmek.

⁶ Niniwe mutuku, sik ninye deiyoknye, sik Raja babye, awininmek ning kekebuka, kel kibukce, el pil donak, weik bun ning deice batakuka koulukukce, ninye deiyok nang ongolamik baju kwiribuka, deibukopura, el babye, malye baju ongobuka, tuku butbuta pakdanuka, yanuka bukuk. Awinibuk ning deiyok ara, ‘Se, nun malye winilamupu’ tenen, ikin kanye bobuka winibuk.

⁷ Winibukce, ‘Nun Niniwe mutuku ninye nirya ara, wininamabe, wininamabe,’ nyabuka yupu talibik. Elce nyabuk yupu ara, ani. “Nara anggun deiyoknye ap, na amu tam pil dona deiyok nang ap arye, nyapsiyabe. Sal do, kilapu do, mapu do, kilmapu do, ninye arye weilamak ning nirya, domba basam do, sapi basam do, maka do, aning-aning nirya wininamabe. Ara, wini talak arye deiyok koubuka, dounamap talak noutamak ara, din ap, mek ap, kum dinamabe.

⁸ Ninye ap, domba basam ap, sapi basam ap, tonda yuk kam ulamle ning nirya ara, ‘Nun malye winilamupu,’ tenebibirye, malye kanye bobibirye, malye baju uk, ongonamabe. Tonda, nun weinyap ning, aning-aning nirya babye, malye baju dobuka, sik nong deice ongopdeipnamabe. Tonda, ‘Allah arye, nun malye winilamupu ning, namin kibuka lyepnamsil’ tenen, Allah moronamabe. Tonda, nun yu kanye bobuka, derelalamuburye, malye-malye weik winililalamupu ning ap nirya ara, bataknamabe.

⁹ Winipnamap ning ara, nun walwal bukni, Allah arye, ‘Opnamne,’ nyapdeiamsuk ning ara, ‘El kanye tamupliba, el yu, nun nong deice deipnamsil do, kum do?’ tenenmabe. ‘Bico tenepsuturye, yu kanye weik bosilye ning ara, batakturye, lyepsetue’ tenen, nyanmabe. Namin kipsuturye, lyepsilyopura, nun kum dipnamabe,” nyabuk. Niniwe mutuku weik deiyoknye birye, ayupu nyabuka dopdeibukba, el taleamuk nang nirya kekebik.

¹⁰ Sik Niniwe mutuku ninye nirya, aninye nyanmik ning nirya ara, Allah eibuk. Tonda, sik malye winilamik ning nirya batakikba, aning ton eibuk. Winibikba eibuka ati ara, ‘Niniwe mutuku ninye nirya opnamne,’ tenebuka, nyalamuk ning ara, akunum batakuke. Bicoe tenebuka, kum oplobukce, Niniwe mutuku ninye nirya ara, tonoknye babye ton, obuka sirya kum dakuk.