Yunus 2 - Eipomek

Yunus birye Allah ati, morobuk yupu

¹ Yunus laut mek pum bal, weik ikan el mun pum tam unmokce, Allah el si Yahweh ati, “Melipnilyame,” nyabuka, Allah morobuk. Yunus birye morobuk yupu, ani.

² Na ni Allah, an si Yahweh, na imun upmanila ati, anti moropmakinaba, ance akunum kekepmanilame. Diplamik nang unyakak atonun unmana ati, “Nai Allah ance melipnilyame,” nyabuka moropmakinaba, kekebuka melipmanilame.

³ Na ni Allah ance, laut mekwen pum tam dongopnulumba, mekwen amu koproba, danyuk unmanue. Winipnulumba, mek mikip arye, ‘Yanuka, bobitinye’ tenen, pirinulule. Tonda, ance nyaplumba, mek mikip lontik-lontik abuka, singnipmanuke.

⁴ Winipmanukba, na kanye pum tam arye nyapse. Na ni Allah arye, “Na dam arye, bilyame, an ton kum elinamkine,” nyapnuka deice arye, ‘Amek pum ikan amkorokmanilaba, aunmane,’ tenebuka nyapse. Utenepsirye, nyapse bukni, ‘An si eren aik wipdeipluma aik, pia teleb aik ara, ila tuba tonap tamubuka, anyaik lilun tam dinamne,’ tenepse.

⁵ Wini talak ara, mekwen dana-dana lelipnukba, ‘Mekwen arye obuka dipnunil do?’ tenen, ilil upnuke. Winipnukce, amekwen ara, karu weik ati ara, mek dana-dana nirya singnipnuke. Singnipnukba, mekwen amu tam ulul ning, mek mulonga na kisok deice kwatipnukba, ilil weik upnuke.

⁶ Nara, pia mekwen karu noutamak weksiba, laut mekwen pum tam bukni, weik mutuku amu tam dam, laut pum wekse. Laut mekwen karu koproba dopkotepnulumce, bublan tirikdongopnulum touk, unya ati, kum yanmanto upse. ‘Pia daunamne,’ tenepse. Utenepsebuk, na ni Allah, an si Yahweh arye, mekwen karu koproba arye dopropnulume. Ara, na dipmanto upmasi bukni, kam bukeipnulumba, laut mekwen pum ikan arye, mekwen kup-kup duklopnuke. Allah an si Yahweh ati, an si erekunune.

⁷ Na nong mitang upnukce, dipmanto upse talak ara, na ni Allah, an si Yahweh ati tenepkisirye, “Melipnilyame,” nyabuka moropkise. Moropkiseba, kekepnulume. Na moropkise yupu ara, an si erena ati, wipdeipluma aik, an si eremna teleb aik dam yayuke.

⁸ Allah arye ninye ati, el kanye aryuk, ‘Bico tenebuka melipnamsine’ tenen, tenesulul ning nirya ara, ton nang ara, batakanyake. Ara, kat ning dobuka, puturubuka deibikirye, atalye ning ati, “Nun ni koproba Allah,” nyabuka, si erenyak nang ara, Allah arye anang ati, kintinibuka arelye ning ara, anang arye batakanyake.

⁹ Wininyak bukni, na Yunus bira, mot weibuka sena deice arye, “Nai Allah ance melipnulum ning ati, telebe nyapkine,” nyabuka, mot sena deice arye, si erenamkine. Tonda, an si erena ati, kam ning obuka arenamkine. Narye anti, “Wininamkine,” nyapse ning nirya ara, dipkoprob wininamne. Ninye lyen ning nirya ara, Allah an si Yahweh deice aryuk lyesilyame. Yunus birye nyabuk. Ayupu nirya ara, Yunus mek pum ikan mun pum tam ulamukce, morobukba nyabuk.

¹⁰ Nyabuka morobukopura, Allah el si Yahweh arye nyapdeibukba, aweik mek pum ikan, mekwen kup-kup binuka, el mun pum bisik arye Yunus duklobukba, mekwen katum kutukuka poulyayuk.