Yudas 1 - Eipomek

Yudas arye, “Telebe,” nyana ati, nyabuk yupu

¹ Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.

² ‘Allah arye wininamsil’ tenen, morosunun ning ara, laka anye nyapnusine. Ara, Allah bico tenepsilirye, yu ubuka wenena kum arye, ‘El kanye aniryuk melisilyeba, teleb kanyeuk bobuka telebuk unamlulum’ tenen, Allah morosunune. Tonda, ‘Anggun kanye, Allah el nong deiceuk deipmunce, yuk nang nirya ati bico tenebuka, melilanauk wininamlulum’ tenen, Allah morosunune. Allah wenena kum arye, talye melisilye ning ap, kanye deibuka unamlulum ap, bico tenebuka melilanauk wininamlulum ap, Allah deice anggun kanye deipnalum ning ap, ‘Anirya ara, weik upnin banamsil’ tenen, Allah morosunune.

Sik malye winin nang arye, malye winilamak ning ap, Allah arye aninye opnamle ning ap ati, nyabuk yupu

³ Na kayapum, anggunti, bico tenesunune. Otalak arye, ‘Anang ati surat seknamne,’ tenyamsise. Asurat noutamak ara, Allah lyepsukce, el ap, kanye talima dukdongobuka neika unyap ning ati, ‘Laka nyabuka seknamne,’ tenyamsise bukni, yuk nang arye, “Tilila yupu peterena nang anggun kan-kan noutamak yanmake,” nyapmekbuk, kekepsirye, ‘Aning ara, weik mambul anya arye,’ winira utenepne. Ara, ‘Aminyan talak kume, tilila yupu peterena ati, ayupu ara, adiparyuk yupu seknune’ tenen, asurat sekeipmasine. Wini talak sekmasin yupu deiyok ara, ani. Ara, tilila nang yupu peteresiceura, malye ning yuk tenena deice arye, Allah yupu akunum diba tenemunye ning batakmunyeura, malye upsilyake. Malye upsilyak anya arye, ‘Allah arepsuk yupu uk, pia moubuka talibuka unamlulum’ tenen, ayupu sekeipmasine. Allah yupu diba tenebupu ning ara, tonok talak aniryuk Allah arye nun diba tenenyap ninye ati akunum arepsuka ati, yuk talak arye, yuk yupu tonap, kum tabakalinamsile. Akunum arepsuk ninguk diba tenebuka talinamlulume. Yuk yupu tabakuka diba tenena meme.

⁴ Anyapmasin ning ara, talye ati kume. Deiyok nyapnusine ara, tilila yupu nyabuka pia malye winin nang duknubuka, anggun kan-kan yanuka unyakce, pia malye winilisinyake. Allah yupu laka nyalamik nang, nabi nang arye, amalye winilamice nang atonun nang ara, “Allah arye wenebuka opnamle,” nyabuka nyalilamik. Atilila yupu peteren nang arye tenenyaka ara, ‘Allah elda talinye. Elda mambul kume,’ tenenyake. Winibuka tenebikirye, Allah yaniplobikirye, pia malye wininyake. Sikce peterenyak ning ara ani. Ara, ‘Nun malye ulamibye bukni, Allah talye urdem aryuk namin kipsilirye, lyesululnye anya arye, nun talye tenepce pia malye wininamabe. Ara, telebuka. Allah arye kum wenepnamsile,’ tenenyake. Tonda, nun du Yesus Kristus elcuk talisilirye, nun Weik Deiyoknye usulul bukni, siktilila nang wininyak ning ap, nyanyak yupu ap, deice arye, “Yesus elda talinye,” nyanyake.

⁵ Ura, anyapnusin yupu nirya ara, akunum kekemunce, akunum kel kiplum bukni, tonap tuba, tenepnamluluma ati laka nyapnusine. Allah arye, ‘Na’ tenen, el mapu kiyamuk ninye, Mesir mutuku noutamak ikin kanye bobuka ulamikbuk, lyebuka dopromuk bukni, aminyan dib kum tenebik ninye ati oltakalamuk.

⁶ Tonda, el im deice pil don nang, malaikat ulamikbuk, Allah arye sikti, pil deiyok aribuk ning ara, ‘Nun like’ tenen, sikce yaniplobuka yukak binuka ulamikce, pia malye-malye winilamikba, Allah arye amalaikat nirya wenebuk. Amalaikat ara, Allah arye dopdakuka, pia kat tapu, kum bulupmanto tapu arye koubuka, pia kuna pum bisik dongobuk. Dongobuk anya arye, amalaikat daulamica ani, sirya talak ninye mutuku-mutuku nirya ati, yupu bokeiplirye, wenepnamle talak ara, amalaikat babye, wenebuka oplopnamle. Oplirye, uku dil ban donoklyopura, uku pia dilibuk, dapia uk tuba dilirye, malyeuk unamake.

⁷ Im deice ulamik pil don nang, amalaikat malye-malye winibik touk, Sodom mutuku ap, Gomora mutuku ap, amutuku dana-dana ulamik mutuku ninye ap, aninye nirya arye, pia malye winilamik. Sik malye winilamik ara, ani. Sik kanye nong nirya, aninguk tenyamikce, Allah arye, ‘Sal arye kilapu uk, dobuka neika unamake,’ tenyamsuk ning atonun kum bukni, aning batakuka, sal arye sal mamun dolalamikce, yolalamik. Amalye winin ning atonun ning, weik ton winilamika ati, Allah im deice arye, uku buk dopkwetebukura, aninye nirya uku dibuka, sirya dakuk atonun, aminyan ara, malye winilamice ninye nirya, uku dil ban dopkweteplibuk, uku arye diplyopura, pia dipnamake. ‘Allah arye Sodom mutuku ap, Gomora mutuku ap, winibuka atonun winipnamle ati, biknamap’ tenen, nyapne.

⁸ Ara, anyapmasin ninye, sikce sik bidamnang ati malye winilalamik atonun, tilila nang anggun kan-kan yayik nang ara, sik malye wininyak ning deice arye, sik nong ati malye kilildanyake. Anang ara, dipkoprop kum elilamik bukni, ‘Yuk nang arye weik nang tenepnamsiyak’ tenen, “Nun eibupu ning, weik mambul ning ani, ani,” nyabuka, ati malye nyabuka nong kum upnamle yupu, talye yupu nyaltakanyake. Winibikirye, ‘Allah ara, nun deiyoknye kum upnamsil’ tenen, elti, yaniltanauk unyakce, im deice pia teleb ning ati malye nyanyake. Tonda, anang aryuk im deice Allah arye nyapdeiplibuk pil don nang, malaikat nirya ati, malye yupu nyanyake.

⁹ Anang arye, ‘Aning mambul,’ tenena kum arye, talye tenepce arye malye yupu nyaltakanauk unyake bukni, malaikat sik weik deiyoknye Mikael arye aning atonun kum winibuk. Mikael ap, Isa Mutuk Domonye ap, Musa dibukak yarikce, Musa nong ati, lildanmarikce, “An dopropnulam do, na dopropnun do?” nyabuka, yu deice arye nyalanmarika ani, sirya talak ara, Mikael babye, kum erepdayukce malye yupu nyabuka, Isa Mutuku Dongonye ati, “Anda malinye,” kum nyabuka, kum derebuke. Elce, “Nun Deiyoknye Allah elcuk wenepnamkilarya,” nyabuk.

¹⁰ Mikael babye, kum erepdayukce malye yupu kum nyabuk bukni, atilila nang ara, sik moubuka kum tenenyak ning, kum kel bikik ning nirya ati, malye yupu nyalinyakce, talya malye yupu nyabuka akutunyake. Ninye ara, Allah arye kanye arepsukbuk, ‘Aning ara, malye, aning ara, telebe,’ tenebuka kanye bobuka unyap bukni, basam ap, kam ap ara, sik nong noutamak pataplye ninguk talye mankau arye wininyake. Atilila nyanyak nang babye, sik nong pataplye ninguk tenebuka, malye wininyake. Sik kanye bona kum arye, amalye winilamica deice arye sik bidamang ati, malye winililanyake. Winibikceopura, Allah arye aninye ati, wenebuka oplirye, uku dilamle mutuku dopkweteplyeura, apia unamake.

¹¹ Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.

¹² Sikti lila nang wininyak ning ati, mambul yupu nyapnusine. Anggun dib tenen nang arye, ‘Bico tenebuka melilanauk unamabe’ tenen, din yubuka neika dilulum talak nirya ara, sik atilila yupu nyan nang ap, ansinibuka bukuka dimunyopura, ara, pia malye winilulume. Winipmanto ning ara, kurun baju bukni, sung-sunga paliplibuk sukulamle touk, anang arye anggun yuna ara, malye winilisinyake. Aning ara, winipmanto ning ara, nyapnusine. Dipkoprop domba wein nang ara, sik domba dina merekuka arinyake. Sik dina atibuk tenelakirye dinyake. Aning atouk, siktilila yupu nyanyak nang arye, sik yupu kekenyak nang ati, ‘Aminyan tam yata wiripnamak do?’ tenena kumce, sik bidamnye atibuk tenepdanuka, talye yupu peterenyake. Tonda, yeinya um mikip arye bopkikuka balamle bukni, mok kum lyilamle atonun, atilila yupu peterena nang ara, sik, nyanyak yupu ara, nong kum upnamle yupu nyanyake. Aning atonunuk yo duk moun li yangalul bukni, ton yo ara duk kum moulule atonun, atilila yupu nyanyak nang babye talye yupu nyanyake. Sik anang ara, yo kwinipnamice talak ara, yating ap, nirya kwiniprobikiba kolulolamle atonun, siktilila yupu nyanyak nang ara, sik nyanyak yupu ara, teleb yupu nyanyak bukni, nong kum ulule. Bukni sik domba malye ubuka weinyak nang ara, sik domba ati kum tenenyake. Ara, ‘Malye winipnuyap do?’ tenen, teniltona kum arye, talye tenepce arye neika bukuka dinyaka arye, anggun yuna malye winilisinyake.

¹³ Ton atilila nang ara, mokceplirye, mek delilyalye talak ara, mek mikip arye lonting-lonting nyalirye, mek wiya ap, yo linglinga ap, lyabuka erepdoplirye, lakak elelamle touk, amalye winin nang sik malye winilamica deice arye, sik pia malye winin ning lakak kililule. Ara sik alye ati laka kum nyapmanto ning unyake. Tonda, anang ara, lukunyan noutamak im deice arye talye-talye balye kurya atonun unyake. Anang wininyak ning deice arye, ‘Dipkoprop teleb bisik ani’ tenen, kum kel biktibye. Allah arye minop talak tenyamuk touk, anang dobuka weneplirye, pia kuna bisik kintinipdeibukak dopkwetepnamle. Winiplibuk dapia upnamake.

¹⁴ Henok elda, minop talak ulamuk. Adam arye deibukura, dadeipdanin, balamika ani, tekbarinye Henok deibik. Allah arye atilila yupu nyanyak nang wenepnamla ati, Henok arye nyalilamuk yupu ani. “Adilulume, nun ni Allah ap, Allah arye nyapdeiplibuk el pil im deice donyak nang malaikat ap, yupa pia weik beribu-ribu yanamake.

¹⁵ Ara, ninye tukwak ninye nirya ati, ‘Yupu bokeipnamne’ tenen, yanamake. Yupu bokeipnamle talak ara, ‘Allah elda talinye’ tenen, yaniltalamak ninye nirya ara, wenebuka opnamle. Oplirye, uku din mutuku dopkweteplibuk, dapia unamake. Ara sik pia malye-malye wininyak nang, Allah tenelye ning pia kum tenenyak nang arye, malye winilamice ning nirya ap, malye yupu nyabuka, Allah el nong deice deililamice yupu nirya ap, ati, anang wenebuka oplopnamle,” nabi Henok arye nyabuk. (Kejadian 5:4-20; 1 Tawarikh 1:1-3)

¹⁶ Sik anang ara, lik kanye bobikirye, epra bakirye malye nyabuka yaniltan ninye unyake. Ton anang ara, yuk nang ati dipnilibuka tuba-tuba tilila ati talya kisilinyake. Anang ara, sik kanye talima noutam malye ning patalamlye ninguk tenebuka unyake. ‘Yuk nang arye, sikda teleb nang, tenepnamsiyak’ tenen, sikce, sik badamnye ati erelanyakce kwalin yupu nyalilanyake. Anang ara, dipkoprop yuk nang ati bico tenena kum bukni, ‘Nun patapsilye ning arepnamsiak’ tenen, “Na ka, na ka, anda pia telebnye,” nyabuka talye pil ilitakanyake.

“Anggunce Allah ati, anggun talima ap, nong ap, arepmunce, el yupu talibuka dobolbanlulume,” nyabuk yupu

¹⁷ Na kayapu, sik anang arye winilamak bukni, nun Deiyoknye Yesus Kristus arye, ‘Na yupu dobuka mutuku-mutuku nirya peterelbinamak’ tenen, wipdeibuk Rasul nang arye nyalilamik yupu tonap tuba nyapsinyopura, tenipdelulume.

¹⁸ Sik anang arye nyabik yupu ara, ani. “Aminyan sirya talak ara, ngalukuka nalisice nang ara, sik kanye talima noutamak, malye ning pataplye ninguk tenebikirye, ‘Allah elda talinye’ tenen, yaniltanamake. Malyeuk wininamake,” nyabuka, sik Rasul nang arye nyalilamsike.

¹⁹ Sik anang ara, Allah El Dib Kanye sik kanye talima pum tam kum ulula anya arye, sik tenebice touk, malye ning wininyake. Awininyak deice arye, nun diba tenenyap nang noutamak, kanye talima yuk-yuk bokolisinyak arye, nun mamun babye, neika kum unyabe.

²⁰ Bukni, na kayapu, anggunce Allah el pia diksukum yupu diba tenepmunce, Allah yupu kekena ap, peterena ap deice arye, anggun talima kwa dipdanuka melilanamlulume. Tonda, diba tenemumnya deice arye, melilanamlulume. Tonda, Allah El Dib Kanye mikip deice arye, Allah moronauk unamlulume.

²¹ Allah arye anggunti, bico tenesulula anya arye anggunce, ‘Allah arye, tuba kanye delinamsil’ tenen, elti anggun talima ap, nong ap, arepmunce, el ap, el yupu ap demuk talibuka dobolbanamlulume. Tonda, ‘Dan talak dolyanamsil do?’ tenen, talima kintinibuka dinamlulume. Yesus arye min kum dolyanmasilye talak ara, Allah ati diba tenebuka talipmunce, dobolbanamlulume. Nun malye wininyaba ati, nun deiyoknye Yesus Kristus arye, ‘Bita merekik’ tenen, talye lubaparabuka weneplopbataksutu bukni, bico tenepsukce, nun ap, el ap, neika pia kam unamaba ati, diba dolyanamsile.

²² Sik kanye bokoltolibuk, teniltonauk unyak ninye ati, bico tenebuka, sik talima ati, melibuka nimalye arye peterenamlyame. Adip aryuk wenebuka batakna kume.

²³ Tonda, yuk nang ara, malye-malye weik winiyak deice arye, uku dilamle mutuku binmanto ubicopura, lyebuka dopropmince, tonap tamubuka, Allah el diksukum bisikuk delilyangnamlulume. Winipmanto ning ara, ‘Barye suse talyamlye ninye ongamikce baju nun kip ninye ongobibyopura, barye suse dakdongopsilyak’ tenen, kum ongonyabe. Kum ongonyap touk, ton ninye ara, sik malye winin ning pia malye ning anya arye, anang ati bico tenebuka melipnamlulume bukni, ‘Na babye, aning malye winipnilyak’ tenen, ilil-ilil asa arye, anang melibuka unamlulume.

Ayupu sirya dakana ati, Allah si erena ati, nyabuk yupu

²⁴ Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.

²⁵ Nun ni Allah arye nyapdeibukura, Yesus Kristus pil dopsuka deice arye, nun Lyena Deiyoknye Allah el tonokuk ulule. Allah yuknye ton kum ulule. El tonokuk ulule. Aning ati ara, el si weik arye erenamabe. Allah elda mikip pia weik ulirye, aning-aning nirya, Talena Deiyoknye ulule. Elda, pia teleb, dirina weik Sisinanye, Raja atonun ulule. Aning-aning nirya min kweipdeibuk talak arye, aning nirya, Talena Deiyoknye ulamuka ani, wini talak tuba ulirye, aminyan yanamle talak nirya babye, pia unamle. Ati, dipkoprop el siuk erebuka unamabe. ‘Aning nirya winipnamle’ tenen, “Amin” nyapne. Telebe, na Yudas arye, asukumuk deipne.