Yosua 7 - Eipomek

Akan birye malye winibukba Allah arye wenen ning, arebuk yupu

¹ Allah Yahweh elce, sik el mapu koproba, Israel nang ati, akunum nyapdeiamuk ning ara, “Yeriko mutuku noutam winibuk ning nirya ara, adiparyuk obuka, sirya daknamlume. Winipmunce, aning nirya ara, tonok ning babye, pia ton kum dopropnamlulume. Aning nirya ara, na ning koproba unamle,” nyapdeibuk. Bukni, sik Israel ninye arye, anyapdeipmok ning ara, batakikce, moubuka kum kekebuka talibik. Ati, ninye tonoknye, el si Akan birye, anyabuk ning moubuka kum kekebukce, ayupu yanibuk. Winibukba, Allah Yahweh arye, el mapu koproba, sik Israel nang ati, pia weika arye wenebuk. Akan el li si ara, Karmi nyalamik. Tonda, el apu si ara, Zabdi nyalamik. Zabdi el li bira, Zerah. Sikda, Zerah yala nang nirya ara, Yehuda elce deibukba, dadeipdanin yangalamik nang ulamik. Ayalanye, el si Akan, Yahweh arye, “Aning ara, na ning koproba ati, aning dolona ara pia meme,” nyapdeiamuk ning bukni, Akan birye ton ning ara, upula doprobuk. Winibukopura, Allah Yahweh arye, sik Israel nang yala nirya ati, pia weika arye wabukce, yu kanye bobuk.

² Daulamuka ani, aminyan talak aryuk, ninye si Yosua bira, Yeriko mutuku arye, Ai mutuku dilbana ati, ninye ton nukukabukce, wipdeibuk. Ai mutuku dilbana ati ara, tonok mutuku keting yangan tam, Betel mutuku dam, otam mutuku si Bet-Awen mutuku dilbiyik. Ara, Yosua birye, anang wipdeibukce, nyabuk. “'Ai mutuku unyak nang, obuka sirya daknamapʼ tenen, Ai mutuku ulul ning nirya, dilbimunce biknululume,” nyabukopura, anang wibuka deibukce, apil arukukba, biyik. Sik Ai mutuku dilbiyik nang ara, amutuku noutam ulamik nang ap, wilamik ning nirya ap ati, dilbiyikce bikik. Sik anang arye, pil arukamuk ning, akunum dobuka sirya dakikce, tamubuka, Yosua dam yayik.

³ Sik aninye tamubuka yayikopura, Yosua dam binuka laka nyabik. “Kume na nio, ‘Nun nirya bulubibirye, Ai mutuku nang olbenamabe,’ tenena kume. Ai mutuku unyak ninye ara, sik weik kum ati, nun ninye weika arye olbana ara, kum tenebabe. Yata deiyok ati, nun nirya ikin upmasil diparyuk omutuku binamap do? Aning ara, bataknyape. Nun nirya kum olbinuyabe. Winipmanto ara, teleb ning ton, yin talena nang, ninye yupa weik, dua ribu do, tiga ribu do, nukuka wipdeipsimince, dopdeipsilyame. Ai mutuku ninye olbana ati, yin talena nang weika arye dolina kume. Ara atonun ati, amutuku noutam ara, pia mitik mutukue. Sikda, ninye pia weik kum unyake,” nyabik. Nyabikopura, Yosua bira, sik yupu kekebukce, ‘Ayupu ara, dip nyapmaniake,’ tenebuk.

⁴ Kekebukce, yupu nyapdeibukba, Ai mutuku ninye olbana ati, nukuka dopdeibik nang ara, ninye yupa weik, nukuka (3.000) tiga ribu nang dem, Ai mutuku ninye olbana ati, dopdeibikura olbiyik. Bukni, sik Ai mutuku yin talen nang arye, Yosua tam nang ati, obisibikce, sik Israel nang nirya ara, ilil weik ubukba, ‘Opsikirye, sirya daksicakʼ tenen, ikin kanye bobuka, bai sakukabikce, bikbik abuka, tamubuka sik asik yayik.

⁵ Bikbik abuka yanmek bukni, sik Ai mutuku yin talena nang arye, sik Israel nang nirya ati, dobuka opnin yanganmekce, Ai mutuku weik bisik bublan dam arye kupsakuka, kat ning, logam ena ati ulamik mutuku, Syebarim mutuku dam yayik. Yayikopura, amutuku taram anyapce, kiklina ara, ninye tiga puluh enam (36) nang ara, sik Israel tam nang, amutuku taramak arye oplobik. Winibikba, sik Israel nang nirya, ‘Seʼ tenen, ilil pia weik ubukba, ‘Nunda dipkoprob kum winiptibyeʼ tenen, malye nyanmekce, engebuka batakik.

⁶ Ilil ati batakikura, Yosua ap, el kanye delin nang ap, sik Israel mutuku noutam talibuka ulamik ninye deiyok nang ap, sikda ikin kanye bobuka, “Se, yata winiptibye do?’ tenen, sik mining ongopmek baju, kwilik-kwilika batakik. Tonda, asum keting noutam arye diprongobuka, alukunyan nirya ara, sik ni koproba, Allah Yahweh ati moronmek. Ara, Yahweh elce, “Aning ara, wininamlume, aning ara, pia kum wininamlume,” nyapdeibukba, sekdeiamik marikna yo, el si ara, Allah arye nyapdeiamuk yupu marikna pum bisik deiamik ning dam, sik nong tuku deice mapmekce, kisok ara, tuku dipdongobuka moronmek. Tonda, sik anang kisok deice nirya, tuku butbuta dobuka, likilanmekce, engenmek. Ara, yuk nang nirya arye, ‘Sikda, ikin kanye weik bobuka unmake, tenepnamsiyakʼ tenen, tuku butbuta dobuka, sik kisok deice deibuka unmek.

⁷ Atalak aryuk, Yosua birye, Allah Yahweh ati nyabuk. “Se Allaho, anda na ni koproba, Allah Yahweh ulyame! Yata deiyok ati, ance nun bobuka, otam arye, Yordan mek koubuka, atam boyanamsulum do? Yata ati, nun boyanuka, Amorit mutuku nang, sik dam arelyanamsulum do? Winipsulumba, Amori ninye arye, nun nirya opsikiba, dibuka sirya daknamap do? Talya ati boyanamsulum do? Pia teleb ning ara, Israel nang nun mutuku dolona ati ara, Yordan mekin otam mutuku uk ulamubu toura, pia telebe. Ara, Yordan mek koubuka, otam atia!

⁸ Se, Allah Yahweh! Na mal olan nang, sik Israel ninye ara, Ai mutuku nang ati, akunum ilil ubukba, batakuka tamubuka yanmek. Ati, wini talak ara, narye yata yupu ton nyaptinye do?

⁹ Tonda, atam nang arye, laka nyabiceura, sik Kanaan mutuku tam unyak nang ap, tonda yuk nang amutuku noutam yanuka unyak nang nirya ara, anyapnamak yupu ati, kekebikirye, sikce biknamake. Bikikirye, sik Kanaan ninye arye yanuka wariksikirye, nun nirya obuka, sirya daknamsiyake! Amutuku noutam nirya ara, nun si kum danamsile. Ati ara, Allah Yahweh, amutuku nang nirya arye, an mambul weik si ati, ‘Dauplye, elda talinye tenepkicakʼ tenen, anti weik arye si erena ati, yata wiripnalam do?” Yosua birye nyabuk.

¹⁰ Nyabukba, Allah Yahweh arye, Yosua biti nyabuk. “Anda wini pola tiklyame! An ap, sik Israel deiyok nang, ninye talibuka unyak nang ap, anggun nirya urasin tuku deice, yata ati deibuka mapmalum do? Winina meme! Anggun nirya tiklulume!

¹¹ Sik Israel nang nirya ara, akunum malye ubike. Na Allah Yahweh arye sikti, na ap, anggun ap, elana ati, moubuka teninamlume. “Yeriko mutuku obisipmalumce, anang sik batakmek bona yala-yala nirya ara, anggunce dolona meme!” nyapsise. “Aning ara, na ning koproba ati, aning ton kum dopronamlume,” akunum nyapsise. Bukni, sikce ayupu nirya yanibikce, malye weik ubik! “Aning-aning nirya obuka, sirya dakmunce, kum kipdeipnalume,” nyamse ning ara, kum winibikce, dolona uk ubike. Sik Israel ninye arye aning-aning nirya upula dorobikce, dobuka dungnubik ning nirya ati, ‘Kume, ninye arye ton kum biknamsiyake,’ tenebikce, sik tenen ning nirya dukunubuka deipdomike.

¹² Ati ara, Israel nang, sik mal olan nang dam ati, ilil kum asa pia kum tiktinge. Sik Ai mutuku nang dam bangnaldal biyikba, Ai mutuku nang arye obikura, sik ilil weik ubuk ati, tamubuka bindobike. Winibika deice arye, sik babye, ikin weik ning dobuka, sik deice akunum deipdanmake. Narye, ‘Aning nirya obuka, sirya daknamne,’ tenepse ning atouk, akunum winipdanmaka ati, anggun babye ton, oplopnamsine. Ati, narye tonap, sik Israel ninye ara, anggunti, pia kum melipnamsine. Ara, “Aning ara, na tenena kum ning winiplum ati, aning-aning nirya kum doproptume,” nyapdeiamsise. Anyapdeiamsise ning bukni, anggunce ubula dopropmalum ning ara, anggunce aning nirya obuka, sirya kum dakamlum ati, na ap, anggun ap, neiktoto kum unamabe. Ati, sik Israel ninye arye, ubula dopromik ning anyak, obuka sirya, kum dakamikce, malye kibuka yanibikceura, nara anggun ap ton, neika kum banamabe. Batakanamsine. Ayupu nirya ara, Allah arye sik Israel nang biti nyabuk.

¹³ Nyabukce, ton dukdongobuka nyabuk. “Wini talak ara, Yosua, an adiparyuk bukminyakarye, ‘Naʼ tenen, nang Israel nang ara, na ap teleb kibuka, neika unamap ati, malye una kum kipdeipminyak arye, kanye arye pia teleb kipdeipnilyame. Tonda, sik aninye ati nyapminyeura, adiparyuk kintinibikirye, na dam yakceura, epdanamaba ati, sik damnye, teleb kilana ati, kintipnamake. Sik aninye ati nyapminyeura, teleb kibuka kintipmakirye, ambusum ara epdanamabe. Ati, Israel nang, sik deiyoknye, na Allah Yahweh arye, anggunti melibuka kalikisununye birye nyapsine. Se, nun tenen nang anggun Israel mutuku noutam ululum nang nirya ati, narye, ‘Aning-aning nirya ara, anggun ton kum dopropnamlume,’ nyabuka, nyapdeiamse ning buk, akunum upula dopromlumce, anggun tenen ning kibuka dungnubuka deiprolume. Ati, aning-aning nirya ara, anggunce obuka, sirya daknamlume. Amem ning, min kum dopropmamuncuk, obuka sirya kum dakmamunyeura, anggun mal olan nang ati, pia oplopmunyakarye, kum talinamlume. Anggun mal olan nang ara, sik nong obuka, pia yanilongona uk unamsiake.

¹⁴ Ati ara, anggun Israel nang nirya, alukunyan mapmamunya ani, ambusum beren tam arye, na dam yanamalume. Ambusum beren tam ara, ‘Ayala nang ani, ayala nang aniʼ tenen, na dam yamunyeura, tonok yala dem wipnamne. Aning wipnamnanye bira, sik yala noutam arye, ‘Amutukunye ani, omutukunye bira aniʼ tenen, wipnamne. Wipnyeura, sik noutam arye, ‘Anye el ap, el mapu silip nirya ap ani. Anye el ap, el mapu silip nirya ap aniʼ tenen, na dam yamunyeura, tonok yalanye dem wipnamne. Winipnamana ati, anggun Israel nang yuk-yuk bukni, na dam yamunyeba, wipnamsine. Aning atonun, narye ninye yuk-yuk umunye touk, ‘Anye bira ani, anye bira aniʼ tenen, na dam yamunyeura, tonoknye dem wipnamne. Na Yahweh arye, ‘Anye bira, an do?’ nyapnamane. Ati, amutuku noutam ulamlum yala nang nirya ara, ayala-ayala nang, adiparyuk nirya yuk-yuk yamunyeura, narye wipnamsine. Tonda, narye tonok yala dem lake nyapnyeura, ‘El akunuma,’ tenepnamabe.

¹⁵ Ara talye kum nyapne. Na Yahweh arye, wipnamnanye bira, dipkoprob mem ning dopropmoknye, ulul tenepnamne. Ara, narye, ‘Aning ara mem ning ati, pia kum dopropnamlume,’ nyamsise bukni, elce ubula dopropmokce, dukunubuka, el ning koproba kan-kan deipmoknye, wibuka dopropnamne. Anye bira dobuka, uku dongopnalyame. Uku dongopminba, uku buk arye, el nong nirya diplirye, sirya daknamle. Atonun, anye el bona nirya babye, uku dapmunba dibuka, sice kiplopnamle. Deiyok ara, na Yahweh arye, ‘Aning dolona pia meme,’ nyapsise bona ton, ubula doprobukce, moubuka deipmuka ati nyapne. Dobuka dungnupmok deice arye, na mambul yupu yanibuke. Na anggun ni Allah Yahweh arye, nyapdeipmase yupu ara, moubuka kekena kumce, yaninanye ulule. Winilirye, ‘Naʼ tenen nang, sik Israel nang unyakak noutam ulirye, weik arye malye-malye weik winilulnye ulule. Allah Yahweh arye, Yosua biti nyabuk

¹⁶ Nyapmoka ati, sik nirya damapmika ani, akunum berekukopura, pia beren tam koprop ara, Yosua birye nyapdeiamukba, sik Israel nang nirya, Allah el tenen nang Israel nang, sikti, yuk-yuk mutuku nirya, “Tonok-tonok wibuka binamalume. Anggun aululum touk, yala yuk-yuk wibuka, Allah el dam bilulume,” nyabuk. Nyabuk touk, sik Israel nang nirya, yala yuk-yuk ulamik touk, Allah dam binuka wekikura, Allah arye, tonok yala nang, sik Yehuda yala ninye uk, wipdeibuk.

¹⁷ Allah arye, Yehuda yala nang wibuka ati, Yosua birye, Yehuda yala nang ati nyapdeibukba, sik minopce wibuka yayik. Ara, sik yala-yala yuk-yuk wibuka yayik. Tonda winibikba, Allah arye Zerah yala nang dem wipdeibukba, ikin ning ara, Zerah yala nang, sik deice ubuk. Winibikopura, Yosua birye, sik Zerah yala ninye arye deiamik nang, sik mapu silip nirya ati, nyapdeiamukba, ananguk Allah dam yanganmekba, Allah arye ninye si Zabdi, el mapu silip wipdeibukce, ikin ning ara, Zabdi yala nang, sik deice uk deibuk.

¹⁸ Winibuka ura, Zabdi el mapu silip yuk-yuk bukni, minopce wibuka yayikopura, ninye tonok-tonok menekuka, yuk-yuk Allah dam yayikura, Allah arye, ninye si ton Karmi, el mi Akan wipdeibukce, ikin ning el nong deice deibuk. Ara, Yehuda yala nang kan-kan arye, tonoknye wipdeibuk. Elce deibuknye bira ani. Ara, Zerah arye deibuknye Zabdi, tonda Zabdi elce deibuknye Karmi bukni, Karmi birye deibuk mi, el si Akan wipdeibuk, ikin ning ara, el nong deice deibuk. Sik yala ara, Yehuda yala nang ulamik.

¹⁹ Winibuk ati, Yosua birye Akan binyak yabuk, “Se, na mi anda, moubuka tenipdeminyak arye, Allah Yahweh nun dam ulirye, kekenmasila ati, asukum arye adiparyuk, laka nyapnunilyame. Ara, anggun ni Allah si Yahweh, Israel nang ati, pia moubuka kalikisulule Allah ati, el si erepnulyame. Tonda, ance malye kiyamlum ning nirya, asukum arye laka nyapnunilyame. Nati, nyapdeipnunilyame. Tonda, aning ara, ‘Naʼ tenen pia dungnulongona kume. Asukum aryuk laka nyapnunilyame,” Yosua birye, Akan biti nyabuk.

²⁰ Nyabukopura, Akan birye tamubuka nyabuk. Se na nie, diba. Nun Israel nang ati, pia melibuka kalikisululnye, nun ni Allah Yahweh, narye elti, akunum pia malye kipdeipse. Na malye winipse ning ara, ani.

²¹ Nunce nun mal olan nang akunum olanmabu talak ara, sikce batakmek bona, aning-aning nirya ara, ninye deiyok nang nong deice ongolamak cang jaket ap, tonda kain sarong cang ning atouk, urasin teleb ning tonok eipse. Aning ara, mutuku si Babilon, tonda Sinear nyanyak mutukunye birye, wiamuk ning ara, ubula dopropse. Tonda, aning ara dekna weik ning, perak ton, nukuka ikin ara, bitinye kilo gram eipsirye, dopropse. Tonda, dekna weik ning, emas ton, el ikin ara, tonok kilo gram bukni, noutamuk wilibuka deiamik ning, aning ton aupmokba, eipsirye, ubula dopropse. Aeipse ning nirya ati, na patapnukura, na ton dopropse. Aning nirya ara, dopropsirye, na cang baju arye pakubuka deipse ara, na tenda aik pum tam bukni, tuku palibukapsirye, atuku pum tam dongopse. Ara, na tenda aik pum tam tuku pum tam uk dungnubuka deipsirye, siknipdongopse. Akunuma kat weik ning emas ara, alip tam deipse bukni, perak ap, emas ap ara amu tamak moubuka deipseba, atuba ubuke. Akan birye, Yosua biti laka nyabuk.

²² Winibuka laka nyabukopura, Yosua adiparyuk minopce ninye dopdeibukba, Akan el tenda aik dam dilbiyik. Nyabuk ati, dilbalamikak aning nirya ara, Akan laka nyapmok touk, tuba aupmok. Ara, Allah arye, “Aning ara, ‘Naʼ tenen ning ati, mem ning ulula ati, aning nirya ara, pia kum dopropnamlulume,” nyapdeiamuk ning bukni, Akan birye ubula dobukabukce, dungyamuk ning nirya aupmok. Ara, adekna weik ning emas ap, tonda emas amu tam duknubuka deiamuk perak ap ara, tuku pum tam deiamuk touk, tuba awamukak eibik.

²³ Aning sik nirya arye, adungnubuka, deiamuk bona, perak ap, emas ap, cang sarung teleb ning ap, aning yala-yala nirya bobuka, Yosua dam boyayik. Tonda Israel nang dinmek damak deibikba, sik nirya eibik. Aning nirya boyayikopura, Allah Yahweh, el damuk yanuka deibikba, eibuk.

²⁴ Akunum winibikopura, Yosua ap, sik Israel nang nirya ap arye, Zerah birye deiamuk mi Akan tongobik. Akan tongobikopura, elce ubula dopromuk dekna weik kat ning emas ap, perak ap, tonda weik nang arye nong deice ongolamik cang baju, el si juba ap, Sinear mutuku nang arye wilamik ning ara, Akan elce deiamuk mapu nirya ap, kilmapu nirya ap, tonda elce talibuka weilamuk kam ning nirya, sapi basam ap, keledai basam ap, domba basam ap, tonda sikce domik aik tenda aik ap, tonda aning yala-yala nirya, sikce talilamik ning nirya ap, Israel nang dobuka talibikce, tonok lu mutuku si, Akhor mutuku delilbiyik (Amutuku si nyalamika deiyok ara, Asukum ara ikin kanye bon ning ulul mutuku ati, mutuku si nyalamik.) Anyaka uk, Akan el ning nirya bobuka delilbiyik.

²⁵ Aning nirya delilbiyikura, Yosua birye Akan biti nyabuk, “Anda yata deiyok ati, kanye ikin ning nun Israel nang, dam boyanmaselam do? Winipmalama ati, wini talak Allah Yahweh arye ikin weik ning dobuka, an nong deice deipkile!” nyabuk. Winibuka nyabukura, adiparyuk Akan ap, el mapu silip nirya ap ati, Israel ninye arye keil donokuka, mikip arye sik nong deice onmekba sik nirya dibik.

²⁶ Aning nirya akunum winibikura, sik Israel nang nirya arye, weik keil dopdakuka, anang nong deice asukumuk deibuka, tuku deice siknipdongobik. Winibik ning ara, asum arye dipdongobuka, auamuk talak noutam ap, atalak nirya ara, apia aubuke. Akeil nirya ara, tuba tukwak aulula ati, amutuku noutam si ara, “Lembaga Akhor,” nyabuka, tuba nyanyak. Ayupu deiyok ara, ‘Ikin kanye bon ning usulul mutuku,’ tenena ati, asi nyanyak. Allah Yahweh elce, sik Israel nang ati, “Akan wibuka doprobukce, wenebuka oplopnamne,” nyamuk touk, akunum winibik ati, atalak arye dipdongobuka, oyanamuk talak ara, Allah si Yahweh arye, sikti, weik arye wenebuk ning ara, batakuk. Akan birye malye winibuk ning ati, tonap kum wenebuk.