Yosua 6 - Eipomek

Allah arye, Yeriko mutuku obuka, malye kibukce, sik asik nirya, uluplobuk yupu

¹ Amutuku ninye ara, Yeriko mutuku noutamak, weik asik domikce, keil poka dobuka, denepdongamikce, wiamik. Winibikce, apoka weik bublan dam ara, ‘Israel ninye talye wekuka opsicak’ tenen, kalikinmek. Winibuka kaliklamika ati, Israel ninye binuka, Yeriko ninye asik domikak ara, wekmanto kum ubik. Tonda, Yeriko mutuku, ninye babye, anyasik domika noutamak arye, bai tam kum biyik. Tonda bai tam arye, anyasik kum weklamik. Israel ninye ati, ilil weik ulamuka anya arye, sik aik noutamakuk ulamik.

² Winilamik talak ara, Allah el si Yahweh arye, Yosua biti nyabuk. “Wini talak, na mikip an deice deipkine. Yeriko mutuku wekuka, malye kibuka ona ati, narye melipsinyeura, anggun Israel ninye arye, Yeriko mutuku ninye ap, sik ninye deiyoknye Raja ap, amutuku sik yin talin nang ap nirya ara, mikip arye yaribuka wekmunce, malye kibuka opyaknamlume,” Allah arye nyabuk.

³ Nyabukce, ayupu ton dukdongobuka nyabuk. Amutuku binuka weknamluma ati, an ap, an yin talin nang ap arye, bulubuka neika tikmunce, amutuku asik ucak, poka bai tam nirya, tonok karin aryuk antanabuka, denepdongopnamlulume. Winipnamluma ara, asum-asum nirya, tabakuka tonap-tonap nukuka, nakub barye (6) talak deice arye, nimalya arye warikil bimunce, antanabuka denenamlulume. Bukni, tonok karin ara, tonok talak aryuk, angnabuka denepdongopnamlulume.

⁴ Tonda winipnamlume. Ance nyapmimba, Allah el nyalin yupu dongamik marikna, Peti Perjanjian dobuka bobaki bukni, sik ap, Allah ap, yupu talilana deiyok nang, sik imam-imam nang ara, tekbarye (7) nukuka, amarikna urasin tam, menekuka banamake. Winibicopura, sik imam tekbarye nang arye, yim domba basam yang dobuka, pong-pong apnin banamake. Asum-asum nirya tonap nukuka, like tekbarye sum nirya ara, winipnamake. Winipnamak bukni, tekbarye sum akunum uplyopura, asum aryuk, Allah el nyalin yupu marikna bobikirye, menekuka bacopura, Yeriko mutuku asik dana-dana dobik keil poka, tuba tamubuka, tonap tekbarye nukuka, angnabuka denepnamlulume. Anggun banamlum talak nirya ara, sik imam nang arye, yim domba basam yang dobuka, pong-pong anamake.

⁵ Sik imam nang, yim domba basam yang, mikip arye pong-pong abikiba, kekepmunyopura, ance nyapmimba, sik Israel nang nirya, adiparyuk yupu weik arye yukupnamake. Yukubicopura, anyasik dana-dana tam dopre welebik keil poka ara, adiparyuk daksaknamle. Daksaklyopura, sik yin talin nang ap, Israel ninye nirya ap, sik atikmacak aryuk, amutuku dobik asik noutamak wekelbinamlume. Allah arye, Yosua biti nyabuk.

⁶ Allah arye nyabukba, Nun el mi Yosua birye, sik Allah ap yupu talana deiyok nang yukubukba, yayikopura, adumbarye nang ati nyabuk. “Allah el si Yahweh arye, el nyalin yupu dongamik marikna, Peti Perjanjian bobuka banamlulume. Aning bobuka bimunce, sik imam nang ton, tekbarye (7) nukuka, yim domba yang arye, pong-pongan ning dobuka, menekuka banamake. Anggun yuk nang ara, aminyan tam yanganamlume,” nyabuk.

⁷ Tonda Yosua birye, aninye nirya ati nyabuk. “Ara, anggun yin talin nang ara tikmunce, menekuka banamlulume. Anggun yin bobuka bamun bukni, yuk nang ara, Allah el si Yahweh arye, el nyalin yupu dongamik marikna, el si Peti Perjanjian bobikirye, aminyan tam banamake. Anggun banmamunye talak ara, Israel ninye nirya ara, anggun aminyan tam banamake. Anggun nirya bimunyopura, Yeriko mutuku asik dana-dana dobik keil poka warikil bimunce, angnabuka denepdongopnamlulume.” Yosua birye, Israel ninye ati nyabuk.

⁸ Yosua birye, ayupu akunum sirya nyabukopura, Allah ap yupu talilana deiyok nang, sik imam nang tekbarye (7) nukuka, menekuka banmekba, Allah el si Yahweh arye eibuk. Menekuka banmekce, sik yim domba basam, yang tekbarye dobuka, pong-pong anmekce banmek. Sik menekuka bayikba, yuk imam nang arye, Allah el si Yahweh, el nyalin yupu marikna, Peti Perjanjian bobuka, aminyan melibuka biyik.

⁹ Winibikce, sik yin talin nang ara, menekuka bayikba, sik imam nang arye, yim domba basam yang talibuka, yupu nyana ati, pong-pongan nang ara, aminyan banmek. Anang banmek bukni, ton imam nang arye, Allah el nyalin yupu dongamik marikna, Peti Perjanjian bobuka banmek. Sik banmek bukni, yuk yin talin nang ton, sik aminyan tam banmek. Sik menekuka banmek bukni, sik aminyan tam ara, Israel ninye nirya banmek. Sik nirya ara, Yeriko mutuku asik dana-dana domik keil poka, warikuka angnalbiyik. Sik nirya banmek talak ara, sik imam nang arye, pong-pongan ning nyanmekce, banmek.

¹⁰ Winibuka banmek bukni, Yosua birye aninye nirya ati, nyabuk. “Wini talak ara, narye anggunti nyapsine. Anggun kanye aryuk, tonok yupu babye nyana kume. Anggunce yupu talye-talye weik arye, si akuka kum nyanamlulume. Aning kum bukni, aminyan talak ara, tonok sum narye, ‘Winira nyaplulume,’ akunum nyapsinyopura, ara telebe, weik arye nyanamlulume. Narye nyapsinye talakuk nyanamlulume,” Yosua birye, Israel ninye sik nirya ati, nyabuk.

¹¹ Ati ara, atalak aryuk, like tonok sum arye, Yosua birye nyabukba, sik Israel ninye arye, Allah el si Yahweh, el nyalin yupu marikna, el si Peti Perjanjian bobikce, amutuku tonok karin aryuk, Yeriko asik kup-kupak, warikuka angnalbiyik. Aning tonok nukuka, akunum winibikopura, sik nirya, sik tenda cang kain aik deipmek sukumuk, tamubuka yayikce, lukunyan tonok mabik.

¹² Winibuka mapmeka berekukopura, Yosua mapmoka, beren tam koprop bukukce, nyabukba, Allah el si Yahweh, el nyalin yupu liamik marikna, Peti Perjanjian boban nang, sik imam nang ara, ambusum winipmeka atonun, binuyika ati, aning bobuka kintinibik.

¹³ Ara, sik like tonok sum winipmeka atonun, like bitinye sum, sik imam nang tekbarye (7) nang arye, domba basam yang tekbarye (7) talibuka, nyanmekce banmek. Sik banmekura, yuk imam nang arye, Allah el si Yahweh, el nyalin yupu liamik marikna, Peti Perjanjian bobuka, banmekbuk, sik urasin tam ara, yin talin nang ton, menekuka banmek. Tonda, sik aminyan tam ara, yuk yin talin nang ton yanganmek. Sik nirya banmekbuk, anyapce, yuk Israel ninye ap, aminyan dukdongobuka biyik. Sik banmek talak ara, imam nang arye, yim domba basam yang pum bisik arye, pia pong-pong anmekce banmek.

¹⁴ Ati ara, like bitinye sum ara, tonok sukumuk, Yeriko mutuku warikil binmeka ani, tamubuka, sik asikuk tuba tamubuka, yana mabik. Aning atouk, like nakub barye (6) sum arye atonun winilbalamek.

¹⁵ Winibuka wininmek bukni, tekbarye sum mapmeka, berekukopura, keting winiryuk panalyangayuk talak arye panabuka, Yeriko mutuku, mince ulamik touk bukni, asum ara, tekbarye (7) sum arye warikikce, angnabuka denebik. Yuk sum nirya ara, tonok talakuk balamik bukni, asum ara, like tekbarye (7) deice arye, warikuka antanapdongopnin banmek.

¹⁶ Aning winibikopura, denaba tekbarye nukuka, biyik talak ara, sik imam nang arye, yim domba yang tekbarye, weik arye pong-pong abik talak ara, Yosua birye nyabuk. “Wini talak ara, weik yupu deice arye nyaplulume! Allah el si Yahweh arye, nun amutuku akunum arepmasile!” nyabuk. Nyabukopura, sik nirya weik arye, kanye deibuka, weik yupu arye yukubik.

¹⁷ Ara, ayupu nyabuk talak ara, ayupu ton dukdongobuka, laka nyabuk. Anggun kekeplulume. Yeriko mutuku ninye nirya opmunce, anyasik dolamik noutamak ulul ning nirya ara, nun ni Allah, el si Yahweh, el kina ati arepnamabe. Ati, aning nirya ulubuka, uku dongonamlulume. Bukni, tonok kil el si ara, Rahab, talye-talye yon kil ulamuk bukni, akil ap, el aik unyak ninye ap, sik tonok ara, bataknamlume. Kum opnamlulume. Deiyok ara, ani. Nunce amutuku nang ati, dilyayupu sum arye, akil arye yukubuka, el aik dongamsukce, dungnyamsuk ati, el ap el aik unyak ninye ap, sik tonok ara, kum opnamlume.

¹⁸ Bataknamlum bukni, amutuku teleb ning nirya ara, Allah ati arenamabe. Ati, ‘Allah arye wenepsilyak’ tenen, amutuku ninye talibik ning ara, tonok babye, ton pia kum dopropnamlulume. Tonok ning babye dobuka, anggun aik delilbimunyopura, Allah arye nun Israel ninye nirya ati, wenebuka opnamsil ati nyapsine. Ati, aning nirya ara, uku dongobuka, sirya daknamlulume.

¹⁹ Winipnamlum bukni, sik Yeriko mutuku ninye dekna weik, kat ning tonok ara, nun ni koprop Allah ati arepnamabe. Ara, sik dekna weik kat ning nirya, emas ap, perak ap, tembaga ap, besi ap, kat-kat ning nirya ara, Allah el si Yahweh ati arelbinamabe. Aning dobuka, Allah el si erena ati, el delin aik delinamlume. Ara, Allah el ning uka. Yosua birye, Israel ninye ati nyabuk.

²⁰ Ara, ayupu nirya akunum nyabukopura, sik imam nang arye, yim domba yang bisik pong-pong abik. Pong abikura, Israel ninye nirya, apong-pong ana kekebikopura, adiparyuk sik yupu weik arye nyabik. Winibuka nyabikopura, atalak aniryuk, Yeriko mutuku asik dana-dana tam, weik keil arye deibuka, poka domik ning dakuka sakuk. Daksakukopura, Israel ninye nirya ap, sik yin talin nang nirya ap, abisikuk welebuka, amutuku wekelbiyikce, Yeriko mutuku nang obuka, sirya dakdongobik.

²¹ Binuka wekikopura, sik parang ya doprobikce, amutuku kam ulamik nang nirya ara, wisi ninye babye, mitik mapu babye, sal babye, kilapu babye, tonda aninye arye weilamik ning, domba basam do, sapi basam do, ayala-yala nirya babye, obuka seklobik. Winibik ning deiyok ara, Yeriko mutuku ap, anyaik-anyaik pum tam ulamuk ning nirya ap, amutuku noutamak uamuk ning nirya ara, ‘Nun ni koprop Allah, el si Yahweh ara, aning nirya ara, el ning uka anya arye, elti, arepnamabe,’ tenena ati winibik.

²² Atalak ara, Yosua birye ninye bitinye, amutuku dilbinamrik nang ati nyabuk. “Anggunce akil Rahab ati, ‘An ap, an aik ninye ap, kum opnamabe,’ nyabuka, minop talak nyapdeiamdum atonun, atalye-talye yonyak kil aik birumunce, akil ap, el ap unyak ninye ap, sik nirya dobuka, Yeriko asik noutamak arye, bai tam boyadurume. ‘Yuk nang arye, mangkau asa obicak’ tenen, winipdurume,” Yosua birye, abitinye nang ati nyabuk.

²³ Nyabukura, abitinye nang, Yeriko mutuku dilbinamdik nang arye, akil aik birikce, Rahab ap, el li ap, el lin ap, el kwit capu ap, el du yapu nang ap, tonda sik neika ulamik nang ap, el pil melin nang ap, bobuka yarikura, Israel ninye, sik doltakna aik bobuka unmek dam bukni, bai tam sik unamikak, deibikba aunmek.

²⁴ Winibik bukni, Israel nang ap, sik yin talin nang ap arye, Yeriko mutuku wekikce, anirya obuka, uku dongobuka, sirya dakdongobik. Amutuku uamuk ning tonok babye, ton kum batakik. Bukni, Yeriko mutuku uamuk kat ning, dekna weik ning, el si emas ap, perak ap, tembaga ap, besi ap ara, aning nirya ara, kwiripdobikce, Allah el si Yahweh, el si erena ati, el delina aik moubuka deibik.

²⁵ Tonda, talye-talye yolamik kil, el si Rahab ap, el ap neika ulamik ninye ap ara, kum obik. Yosua nyapdeibuk touk, batakikura, Israel ninye ap neika ulamik. Ara, Yosua birye, ‘Yeriko mutuku ninye, yata wiribuka unyak do?’ tenen, dilbana ati, sal bitinye dopdeibukba, dilbirik talak ara, akil arye dobuka, el aik dungnyamuk. Ati ara, akil lyebuka batakukba, Israel nang noutamak ulamukce, wini talak tuba el tam ninye ap, Israel ninye ap, neika unyake.

²⁶ Atalak ara, Yosua birye mambul yupu ton nyapdeibuk. “Anggun nirya kekepnululume. Yeriko mutuku noutamak ara, tonap tuba tamubuka, pia kum lipsisikuka dopnamake. Allah el si Yahweh arye, dinmasilak nyapsine. Yata nang do nirya, Yeriko mutuku tamubuka dobikcopura, Allah arye wenebuka opnamle. Anang sik wenena ati, yuk ning arepnamle. Tonda ani. Allah arye, amutuku akunum obukce, uku dongobuka, sirya dakuk ati, yata nang arye, amutuku aik tamubuka aik dona ati, yo arye deibuka, ayukumna ikicopura, sik wenena ati, sik du mapu, sik min yuma deiamik mapu dipnamake. Aning atouk ton, yatanye birye, ‘Yeriko poka bublan tonap tuba dopnamne,’ teneplirye, el yo bublan dam deibuka dona ati, deiyok koubicopura, sik wenena ati, sik aminyan deipnamak mapu dipnamake.” Yosua birye nyabuk.

²⁷ Aning-aning nirya winibuka deice arye, Allah el si Yahweh arye, Yosua biti meliamukba, atalak ninye nirya kekelamikce, Yosua el si weik arye, amutuku nirya kel bikamik.