Yosua 5 - Eipomek

Gilgal mutuku noutamak arye, “Ninye den bol mouse ning sekenamlume,” nyabuk yupu

¹ Ura, Yordan mek duman, keting kumulban tam ulamik ninye ara, Amori yala deiyok nang, Raja nang ap, tonda, Kanaan tam bukni, weik laut mekwen kup-kup, pantai dam ulamik ninye deiyok nang ap arye kekebik. “Allah el si Yahweh arye, Israel ninye amutuku yanamaka ati, Yordan mek cepromalaba, koubuka yanganmake,” nyabikura, kekebikopura, pia ilil weik ubuk. Ara, sik Israel ninye ati, sik yuk yala ninye pia ilil ubukce, sirim talibuk. Sik kanye talima daksakukba, ‘Israel ninye obuka sirya daknamap,’ tenelamik ning ara, batakik. Sik ilil weik ubuk atia.

² Atalak ara, Allah arye, Yosua biti nyabuk. “Anggun Israel nang ara, den bol mouse ning, kum sekik nang nirya ara, sekenamlume. Ara, kat keil dobuka, topnong kintinipmunce, atopnong dopropmunce, anggun den bol mouse ning sekenamlume,” Allah arye, Yosua biti nyabuk.

³ Nyabuka ati ara, Yosua birye, Allah nyabuk touk, keil kapu doprobukce, Israel nang, sik den bol mouse ning sekuk. Awinibuk ning ara, mutuku si Gilbeat Haralot mutuku arye winibuk. Sik yupu deice ara, amutuku si deiyok ara, den bol mouse ning weik uamuk mutuku, nyalamik (Bukit Penyunatan). Ara, den bol mouse ning sekne mutuku ati, nyalamik.

⁴ Ara, Yosua birye, apil dobuk ning deiyok ara, ani. Ara, sik Israel ninye, Mesir mutuku arye batakuka, banuyik talak ara, mitik mapu kum bukni, ninye nirya sik den bol mouse ning nirya sekamik. Sekamik bukni, anang ara, keting tamun yupa dumbarye, (selama 40 tahun) deice arye, mek ap, ninye ap, kum ulamik mutuku bisik balamikce, yin talin nang nirya ara, pata mutuku balamik talak arye, diplamik. Ati, sik den bol mouse ning sekamik nang nirya, akunum diplamik.

⁵ Bukni, sik mitik mapu ara, Mesir mutuku batakuka, apata mutuku noutamak balamikce, delilamik mapu ara, sik den bol mouse ning, min kum sekamik. Ara, Mesir mutuku arye, batakuka banuyik talak arye, Israel nang, sik den bol mouse ning akunum sekamik bukni, pata mutuku pera bisik balamik talak arye delilamik mapu, moum din mapu ap, nepnin balamik mapu ap nirya ara, akunum nepnin balamik bukni, sik den bol mouse ning, min kum sekamik.

⁶ Sik Israel ninye, Mesir mutuku arye batakuka, banuyik talak arye, mitik mapu kum bukni, du nang nirya ara, den bol mouse ning sekamik. Sekamik bukni, Mesir mutuku arye batakuka, keting tamun yupa dumbarye, (40 tahun) dikin deice, mok ap, mek ap kum ati, buppu weik arye, ninye kum ulamik mutuku noutam, bisik balamik talak ara, anang ara, akunum nemik nang, du nang ara, sik yin talepmanto nang nirya ara, diplamik. Ati, sik den bol mouse ning sekamik nang nirya, akunum diplamik. Deiyok ara, sik du nang, yin talin nang nirya, Allah el si Yahweh arye nyamuk yupu, yanibika atia. Allah tenelamuk touk, sik nirya balamikce diplamik. Dibika ati, Allah el si Yahweh arye, nun apu yapu ati, ‘Dipkoprop nyapsine. Anggun binamlum mutuku ara, aning-aning, ayala-yala nirya weik aupmale. Ateleb mutuku arepnamsine,’ nyalilamuk mutuku, Mesir mutuku arye yangalamik wisi nang nirya ara, diamika anya arye, amutuku kum eiyamike. Tonok ton kum wekike.

⁷ Sik akunum diplamik ati, sik apu yapu pununa ati, abisik yangalamik talak noutamak, sikce winiryuk delilamik mapu ara, Yosua birye atalak punubuka, sik den bol mouse ning sekuk. Den bol mouse ning, min kum sekamik nang ara, bisik noutam yangalamik talak arye, den bol mouse ning, kum sekamika atia.

⁸ Israel ninye sik du nang ap, du mapu ap, sik den bol mouse ning akunum sekopura, dila mirina ati, sik ulamik tenda cang kain aik, asukumuk yuk-yuk daulamik.

⁹ Atalak ara, Allah el si Yahweh arye, Yosua biti nyabuk. “Mesir mutuku noutamak arye diprongobuka, malye winipnin yangalamlum ning nirya ara, arup arye akunum kiliplopsine. Ati ara, aunmek mutuku si ara, Gilgal mutuku nyabuka, si dobikce, wini talak babye, tuba nyanyake.” (Sik yupu deice ara, Gilgal yupu lelim kekebikcopura, yuk yupu ton, kilina nyanyak yupu ton tenenyaka ati, asi Gilgal nyabuka, si dobik.)

¹⁰ Tia talak ati, Israel ninye, Yeriko mutuku noutam bukni, weik lu mutuku si ara, Gilgal mutuku, Kaplina Kwalina yunmek. Ara, awala noutam bukni, tanggal 14 odeikin deice arye, weik sum ubukba, asum sintam talak arye, weik Kaplina Kwalina yunmek. (Ara, Mesir mutuku banuyik talak arye, Allah pil donanye, Allah malaikat arye, Israel ninye sik winiryuk mapu ona kumce, sik dam bisibuka biyuk ati, akwalina si ara, Kaplina ati Kwalina nyalamik.)

¹¹ Weik kwalina dibuka mapmeka berekukopura, Kanaan mutuku noutam uamuk ning ap, roti kwaning nena kum ning ap, yakong atonun ning, el si ara gandum ap, kalum deice dabuka, atalakuk dibik.

¹² Ara, Kanaan mutuku moulamuk ning dibikura, asum aryuk Israel ninye ati, Allah arye manna kwaning, im deice arye, dopdeiamuk ning ara, kum dayuk. Atalak arye, Kanaan mutuku wekelbiyik talak arye, deiyok koubuka, minop talak dilamik manna kwaning ara, tonap kum dibik. Kanaan mutuku moulamuk ninguk, libuka dilamik.

Israel ninye arye, yuk nang weik asik domik mutuku, Yeriko mutuku malya kibikce, obika sirya dakik yupu

¹³ Ara Yosua ap, Israel nang ap, Yeriko mutuku dam binuka unmek talak ara, tonok sum Yosua birye, Yeriko mutuku tam binuka dinmokba, ninye tonok, el urasin tam tikmokce, ninye on ning parang ya talipmokba, Yosua birye eibuk. Eibukce, anye dam biyukce, asipdeyuk. “Anda nun melina ati yalam do, nun ona ati, nun oldan nangak, melipnamsilamnye do?” nyabuka asibuk.

¹⁴ Nyabuka asibukura, anye birye tamubuka nyabuk. “Kume, ance nyapnilam ning ara, kum wininune. Nara, an kwit kume. Tonda, nara an oldananye kum bukni, nara Allah el si Yahweh, el im deice mal olan ninye, el yin talin nang, sik deiyoknye yanmane,” nyabuk. Nyabukopura, Yosua kekebukce, minopce anye dam biyukce, ‘Anye bira weik mambulnye’ tenen, kanupdongobukce kibuk. Winibukopura, Yosua birye, anye biti asipdeyuk. “Nara, Allah el pil donanye unirye. El yupu kekebuka dobolbanune. Ati, na ni Allah arye, yata yupu nyapdeipkuk ati, yanuka nyapnamanilam do?” Yosua birye nyabuk.

¹⁵ Nyabukba, Allah el im deice yin talin nang, sik deiyoknye birye, Yosua biti nyabuk. “An yan ongon ning, sepatu kwiriplopmince, yalyame. An tikmalamak ara, pia sung-sunga kumak, pia telebak ulula atia,” nyabuk. Nyabukba, Yosua birye, el nyabuk touk, winibuk.