Yosua 4 - Eipomek

‘Israel ninye tuba teninamak’ tenen, keil 12 dobuka deiamik yupu

¹ Israel ninye nirya, Yordan mek akunum koubuka, otam biyik talak ara, Allah el si Yahweh arye, Yosua biti nyabuk.

² “Israel ninye ayala-ayala nirya noutam arye wibuka, obarye ninye (12) wipdeipnamlame. Ara, Israel yala ninye, 12 nang aunyak touk, ayala nang ara, tonok-tonok yuk-yuk wibuka, 12 nang wipdeipnalyame,” nyabuk.

³ “Akunum wipmince, anang 12 nang ati, nyapnamalyame. ‘Anggunda, Yordan mek balamuk bisik noutamak, mek cepdobukce, mikdobukak, Allah el aik pil don nang tikmekak, adiparyuk anggun obarye nang, mek pum keil duk dobuka, anggun mapnamalumakuk bobimunce, asukumuk deipnamalume.’ Anang 12 nang ati, nyapnulyame,” Allah arye, Yosua biti nyabuk.

⁴ Nyabukopura, Yosua birye, sik 12 nang, Israel yala nang noutam bukni, tonok-tonok obarye wipdeipmok nang ati, yukubukba, yayikopura, Yosua birye nyabuk.

⁵ “Yordan mek balamuk bisik noutam, Allah el si eren aik pum pil don nang, Allah el si Yahweh arye, nyapdeiamuk yupu liamik marikna, Peti Perjanjian botikmaka dam bimunce, Israel yala nang obarye sekdongobuka, utam (12) ulula ati, aning atonun, anggunce, keil obarye tomobuka bopmunce, takunya deice takupdaka banamlume,” nyabuk.

⁶ “Akeil ara, anggun noutam lak nyan ning ati, deipnamlume. Winilamunya ani, aminyan talak ara, anggun deipmunye mapu arye, ‘Nun ni yapu, adeiamlum keil ara, yata ati winilamlum do?’ nyabuka asipsicopura, nyapnamlulume.

⁷ ‘Allah el si Yahweh arye, nyamuk yupu libupu marikna, Peti Perjanjian boyangalamik nang arye, Yordan mek duk-duk noutamak yanuka tikikba, Yordan mek nirya sekukabukce, mikdobukba, eitam kin, outam kin kibukba, anoutam arye dopromubu keil ara, atia,’ nyabuka, laka nyanamlulume. Akeil ara, asukumuk pia aupnamle. Doyanamle talak noutam nirya ara, Israel ninye, akeil eibikirye, atalak narye melipsiba, winibuk ning ati, tuba tenenamake,” Allah arye nyabuk.

⁸ Allah, el si ara Yahweh arye, Yosua biti nyabukba, Yosua kekebukce, Israel ninye laka nyabukopura, Israel ninye arye, Yosua nyapdeibuk touk winibik. Ara, Israel yala nang obarye aunyak touk, sikce Yordan mek noutamak binuka, keil obarye uk binuka dobukabikce, Yordan mek otam, sik doltakne tenda aik dam bobiyikce, tonok sukumuk, akeil 12 deibik. Akeil deibikak si ara, Gilgal mutuku.

⁹ Deibikba, Yosua birye, ton akeiluk dobukabukce, tabuka bulupdeibuk. Ara, Allah el si eren aik pum tam pil don nang, Allah nyamuk yupu liamik marikna bobuka, Yordan mek duk-duk noutamak tikmekak anyuk, Israel ninye arye, mek pum bisik obarye (12) keil dobukabikce, sik doltakna aik dam, bobinuka deibik ning ara, Yosua birye, akeil obarye nirya dobuka, tonok sukumuk tabuka bulupdeibuk. Akeil nirya ara, ayupu sekuk talak babye, tuba aubuke.

¹⁰ Israel ninye, Yordan mek koubuka, otam banmek talak ara, Allah el aik pum tam pil don nang arye, Allah nyapdeiamuk yupu, liamik marikna, Peti Perjanjian bobuka, Yordan mek duk-duk noutamak tuba tikmek. Atalak ara, Allah el si Yahweh arye, Yosua biti, ‘Winipnamlum,’ nyamuk yupu nirya, Israel ninye arye, aning atonun winipmek. Tonda, Musa birye Yosua biti, ‘Winipnamlyame,’ nyapdeiamuk touk, Yosua birye wininmokba, Israel nang nirya ara, minopce Yordan mek koubuka, otam bindobik.

¹¹ Sik Israel nang nirya, Yordan mek koubuka, otam akunum bindobikce, otam tikuka dinmekopura, Allah el si eren aik pum tam pil don nang arye, Allah el si Yahweh arye nyamuk yupu, liamik marikna, Peti Perjanjian bobuka tikmek nang, Yordan mek koubuka, aminyan biyikba, aninye nirya eibik.

¹² Ura atalak ara, Musa birye nyapdeiamuk touk, Ruben yala nang ap, Gad yala nang ap, tonda Manasye yala nang bukni, noutamak nang ap, anang nirya wilibuka yin bobuka, Yordan mek koubukabikce, menekuka otam biyikba, yuk Israel ninye, anang-anang nirya, aminyan biyik.

¹³ Winibik talak ara, ninye yupa pia wiek, odeikin empat puluh ribu (40.000) nang kintinibik nang ara, Allah melibukba, Yordan mek koubuka, Yeriko mutuku nang olana ati, Yeriko mutuku dam bukni, weik lu mutuku biyikba, Allah el si Yahweh arye eibuk.

¹⁴ Asum ara, Allah arye Musa biti, meliyangalamuka atonun, Allah el si Yahweh arye, Yosua biti melibuk deice arye, Israel nang nirya ara, Yosua biti, ‘Se, elda pia weik mambulnye,’ tenelamikce, Yosua kam ulamuk talak nirya ara, anyuk tenelamik. Sikce, ‘Musa bira, pia weik mambulnye,’ tenelamika atonun, ‘Yosua babye, elda pia weik mambulnye,’ tenelamikce, Yosua eililamikce, sik ilil ulamuk.

¹⁵ Ara, Israel nang nirya, Yordan mek akunum koubuka biyik talak ara, Allah el si Yahweh arye, Yosua biti nyabuk.

¹⁶ “Ance nyapminba, na si eren aik pum tam pil don nang, na nyapdeamse yupu, liamik marikna bopmek nang ara, wini talak Yordan mekinak ara, batakuka tuku kata sukum binunyake,” nyabuk.

¹⁷ Nyabukopura, Yosua birye, Allah nyapdeipmok touk, winibuk. Sik Allah, el aik pum tam pil don nang ati, “Yordan mek duk-duk noutam arye batakuka, atam tuku kata sukum yalulume,” nyabuk.

¹⁸ Nyabukopura, sik anang ara, Yordan mek duk-duk noutam tikmeka koubuka, Allah el si Yahweh arye, nyamuk yupu liamik Peti Perjanjian bopmekce, tuku kata tam biyikce yanibikopura, adiparyuk Yordan mek ara, minop arye balamuk touk, winibukabukice, biyuk.

¹⁹ Israel nang, Yordan mek koubuka biyik talak ara, sik wala nukamik touk, tonok wala bukni, like tagu barye deice ubukopura, Gilgal mutuku binuka, sik doltakna aik binuka dobik. Gilgal mutuku ara, Yeriko mutuku dam bukni, keting panalyangan tam, sirya tam mutuku.

²⁰ Gilgal mutuku biyik talak ara, Yosua birye Yordan mek noutamak arye domik keil, 12 keil nirya ara, Gilgal mutuku doltakna aik domikak anyuk, binuka ikuka lelepdeibuk.

²¹ Lelepdeibukce, nyabuk. “Winipnamlume. Aminyan talak ara, anggun deipnamlum mapu arye, ‘Naio, akeil deiamluma ara, yata deiyok ati deiamlum do?’ nyabuka asipdesikcopura, nyanamlulume.

²² ‘Kume, nun wisi nang ara, ninye kumak arye, amutuku bisik yangalamupu talak ara, Yordan mek weik balamuk bukni, cebukce, tuku kata atonun ubukba, abisik aryuk, Yordan mek koubuka, otam binamupu. Amek balamuk bisik noutam ara, ceprobuk talak arye, akeil dopdobuburye anyaka deibupe,’ nyanamlulume,” Yosua birye nyabuk.

²³ “Ara talye ati kume. Anggun ni Allah, el si Yahweh arye nunti, Yordan mek cepdeibukba, otam arye, amek balamuk bisik koubuka, atam yapu. Tonda, nun ni Yahweh arye nyapdeibukba, weik Bi Laut mekwen ton ceprobukba, abisik noutamuk binamupu atonun, Yordan mek babye, onmok bukni, Allah arye nyabukba, cepdobukura, tuku kata bisikuk, atam koubuka yanamupe. Ayupu nyanamlulume,” Yosua birye, sik Israel ninye ati nyabuk.

²⁴ Nyabukopura, Yosua birye, ayupu ton dukdongobuka nyabuk. “Allah arye, aning-aning nirya winibuka deiyok ara, nyapnusine. Ara, tukwak ninye mutuku sirya, im sirya nirya unyak ninye ara, ‘Se, Allah el si Yahweh, elda pia mikipnye’ tenen, kel biknamake. Tonda, Israel ninye nirya ara, sik ni Yahweh ati, ‘Se, elda pia weik mambule’ tenen, ‘El si erebikirye, ilil kanye tuba upnamle’ tenen, amambul pil dopsuke,” Yosua birye, Israel ninye ati nyabuk.