Yosua 3 - Eipomek

Israel nang Yordan mek koubuka, otam biyik yupu

¹ Sik nirya damapmeka, berekukopura, Yosua deiyok kibukce, Israel nang nirya, beren tam koprop, maka yupu talamle talak arye, Sitim mutuku doltakna cang kain aik dam arye batakuka, Yordan mekin tam binuka, mek koubuka, otam kum binmek talak ara, asukumuk doltakna aik binuka dobuka, like winilye mabikce, kentininmek.

² Like winilye sum akunum ubukopura, Israel nang, sik deiyok-deiyok nang arye, doltakna aik dam nirya wekuka, antanap dongobikce, yupu arebik.

³ Sikce Israel ninye nirya ati nyabik. Allah el si Yahweh arye, ‘Narye winipnamsine, anggunce ton wininamlulume,’ nyapdeipsuk yupu dobuka, deibupu kwemdina ara, ‘Aning, el si Peti Perjanjian’ bobuka bobanmak do, kum do?’ tenen, moubuka dilinamlulume. Allah el aik pil don nang, sik Lewi yala nang arye, akwemdina bobikirye, menekuka bakibuk, eipmunyopura, anggun babye, adiparyuk doltakna aik dam arye batakuka, anggun babye melipmunyopura, neika binamlulume. Lewi yala nang bukni, Allah ap, ninye ap, ansinilina deiyok nang arye, menekuka bakibuk, anggun aminyan binamlulume.

⁴ Anggun nirya ara, abisik min kum binamluma anya arye, Lewi yala nang arye, menekuka bakibuk, anggun aminyan tam yamunyeura, ‘Winibuka banamabe’ tenen, binamlulume. Adeice arye, aminyan talak ara, anggun binamlum bisik, kel biknamlume. Bukni, Allah arye, el yupu nyapdeibukba, dopdeibik kwemdina bopmace nang dam, bana kume. Lo karen akuk, 900 meter atonun menekuka bakibuk, anggun aminyan tamuk banamlulume. Sik bobanamak kwemdina yo dam ara, bana meme. Israel ninye, sik deiyok-deiyok nang arye, aninye nirya ati nyabuka, yupu moupdeibik.

⁵ Yosua birye, Israel nang ati nyabuk. “Anggun malye ning nirya, lobuka batakmunce, anggun kanye talima ap, nong ap nirya, anggun ni Allah ati, arepnamlume. Deiyok ara, ambusum, Allah el si Yahweh arye, ninye winipman kum ning, mikip weik ning, nun dam winipnamala atia,” nyabuk.

⁶ Nyabukura, mapmeka berekukopura, Yosua birye, Allah el si eren aik pil don nang, Allah ap, ninye ap, ansinilina deiyok nang ati, “Anggun menekuka, otam binamlume,” nyapdeibukba kekebikce, Allah arye, ‘Wininamlume. Aning winipmunyopura, narye winibuka melinamsine,’ nyabuka, el yupu nyapdeiamukba, liamik marikna, el si ara, Peti Perjanjian dobuka minopce biyik. Sik yuk Israel nang kum binmek talak arye, bobuka banmekba, sik aminyan tam Israel ninye nirya melibuka biyik. Aning ara, Yosua birye nyapmok touk winibik.

⁷ Asum ara, Allah el si Yahweh arye, Yosua biti nyabuk. “Minop talak, narye Musa meilyamsiba, pil mikip arye dolamuk touk, an babye, narye melipnamkine. Aning ara, ‘Israel ninye nirya, kel biknamak’ tenen, arup arye deiyok koubuka, narye an weiknye kipdeipnamkine. Winipkiniba, Israel nang nirya arye anti, ‘Se, Yosua bira mambule, Yahweh arye melilule,’ tenebikirye, an yupu kekenamkiyake,” Allah arye, Yosua biti nyabuk.

⁸ Nyabukce, ayupu ton dukdongobuka nyabuk. “Wini talak ara, Allah el si eren aik pil don nang ati, nyapdeipnulyame. Sikce, el Allah arye nyamuk yupu, liyamik marikna, Peti Perjanjian dobuka, bobinamak ati ara, nyapnulyame, ‘Aning bobanmamunya ani, Yordan mekin dam bimunyopura, amek noutamak, anyuk binuka tiknamalulume,’ nyapdeipnamalyame,” Allah arye, Yosua biti nyabuk.

⁹ Nyabukba, Yosua birye, Israel nang ati nyabuk. “Anggun nirya, na dam bulubuka yamunce, kekepnululume. Anggun ni Allah, el si Yahweh arye nyapsuk yupu nyapnusin ati, kekeplulume.”

¹⁰ “Anggun nirya ara, ‘E, nun ni Allah, kam ululnye bira, dipkoprob nun noutamak tiklirye, bobinamsil’ tenen, kel biknamalume. Tonda, ‘Nun omutuku bibyopura, Allah elce melisilya deice aniryuk, amutuku unyak ninye obuka, sirya daknamabe’ tenen, ‘Kel biknalum’ tenen, nyapne. Ara, sik Kanaan mutuku tam unyak ninye, Het nang ap, Hewi nang ap, Feris nang ap, Girgasi nang ap, Amori nang ap, Yebus nang ap nirya ara, Allah melipsilya deice arye, obuka sirya daknamabe. Tonda, Allah melipsilya deice arye, sik ilil weik upliba, bikbik abuka bindopnamake. ‘Aning biknamlum’ tenen, lak nyalin ning laka nyapnusine,” Yosua birye nyabuk.

¹¹ “Anggun nirya eiplulume. Anggun ni Allah, el si Yahweh ara, mutuku-mutuku nirya, talibuka kwelina deiyoknye, elce nyamuk yupu liamik marikna ara, Lewi yala nang arye bobikirye, menekuka, Yordan mek noutam binuka tiknamake. Anggun nirya ara, aminyan tamuk binamalume. Anggun kele, nun ni Allah, aning-aning nirya, tukwak ning nirya ara, elcuk talilula anya arye, elce nun dam neika babirye, melinamsile.

¹² Wini talak ara, Israel yala obarye, sekdongobuka, utam nirya aunyak touk, anggunce 12 nang ara, ton wibuka deipnamlume. Sik yala yuk-yuk aunyak touk, ayala nang arye ton, yuk yala nang ton, anggun noutamak arye, ninye tonok-tonok wipnamlume.” Yosua birye nyabuk.

¹³ Nyabukce, ayupu ton nyabuk. “Mutuku-mutuku nirya talilul Allah, el si Yahweh, el si eren aik pum tam pil donyak nang, Yahweh el yupu liyamik marikna bopmace nang arye, sik yan Yordan mek yanibicopura, atalak aniryuk, mek noutamak sekuka, eitam kilon, outam kilon kipnamle,” Yosua birye nyabuk.

¹⁴ Nyabuka ati, Israel nang, sik doltakne tenda aik dam ara biyikce, Yordan mek koupnamek talak ara, Allah el si eren aik pum tam pil don nang arye, Allah el nyamuk yupu liamik marikna bobukabikce, menekuka banmek bukni, sik Israel nang nirya, sik aminyan tam melibuka biyik.

¹⁵ Atalak ara, ninye koun ning li talak anya arye, Yordan mek ara, pia weik onmokce banmok. Pia weik onmokce banmok bukni, Allah el aik pum pil don nang, el yupu liamik marikna bobanmek nang, Yordan mekin biyikce, mek yoka diamuk yanibik talak ara, adiparyuk Yordan mek noutam sekdakuka, itam kilon, utam kilon kibukba, anoutam ara, tuku mikuka bisik laka kibuk.

¹⁶ Winibukopura, mek deice yaribuka balamuk ning ara, baprongobukba, itam arye yangalamuk mek ara, eitam mutuku kilbiyuk. Mutuku si Adam bukni, ton mutuku si ara, Sartan mutuku dam ara, pia cang weik tonun tikukabukce, asukumuk tunim abuk. Winibukura, ton ning ara, utam mek ara, mekwen si ara, Garam Laut mekwen dam balamuk mek ara, bokukabukce, outam kilon, eitam kilon kibuk. Amek nirya ceprobukba, Israel nang nirya, amek balamuk bisik bukni, mikdopmok deice uk, keting yangan tam arye, Yordan mek koubuka, otam keting wekelbalamle tam, Yeriko mutuku tam biyik.

¹⁷ Israel ninye nirya arye, Yordan mek koubuka banmek talak ara, Allah el si Yahweh, el si eren aik pum pil don nang, el nyapdeiamuk yupu, liyamik marikna bopmek nang ara, Yordan mek nirya cepdopmokba, amek balamuk bisik noutamuk, tuba tikmek. Winibuka tikmek talak ara, Israel nang nirya ara, mek cepdopmok deice arye, koubuka banmeka ani, sirya dakdobik. Sik nirya, Yeriko tam biyik.