Yosua 24 - Eipomek

Sikem mutuku unmek talak, Yosua birye Israel ninye ati, nyabuk yupu

¹ Ura, aminyan talak ara, Yosua birye nyapdeibukba, sik Israel ninye, ayala-yala nirya, Sikem mutuku bulubuka yayik. Sikem mutuku unmek talak ara, Yosua birye, Israel ninye ayala-yala nirya bulupdeibuk. Tonda, elce yukubukba, sik yayik nang ara, sikce, ‘Winipnuyabe’ nyana ati wisi nang ap, Israel ninye sik ninye deiyok nang ap, sik yupu bokolin nang ap, sik weik nang, mambul pil dolamik nang ap, nirya yukubukba yayik. Yayikopura, sik nirya bulubikce, ‘Nun ni Allah, el si Yahweh arye, yupu nyapnusil’ tenen, el dam yanuka tikik.

² Tikikopura, Yosua birye, sik Israel ninye nirya ati nyabuk. “Israel ninye kalikuka melilsulul Allah ara, el si Yahweh arye ayupu nyapmasile.” Minop talak ara, anggun apu yapu nirya, weik mek el si, Efrat mek otam mutuku noutamak ulamik. Ara, anggun apu koprop Abraham ap, el weit Nahor ap, anggun apu Terah ap, otam ulamikce, mem aik dobuka, isa si erelamik. Aning ara, anggun walwal talak arye winilamike.

³ Terah ulamuk bukni, anoutam narye anggun apu koprop Abraham, Efrat mek otam ulamuk bukni, eibuka yukupsirye dopromse. Winipsirye, Efrat mek atam arye dipdongobuka, Kanaan mutuku noutamak nirya, narye elti, ‘Winipnamlyame,’ nyabuka meilyamsiba, amutuku noutamak balamuk. Kanaan mutuku balamuk talak ara, narye areamsibuk, Abraham birye mapu deibukba, el mapu arye deibuka, dadeipdanin, balamika ani, Israel ninye weik dayuk. Minop talak ara, na mikip deice arye, Abraham melibuka arepsiba, Isak deibuk.

⁴ Narye Isak melipsiba, elce Yakub ap, Esau ap deibuk. Winipseba, nepdikopura, narye Esau biti ara, mutuku dup uamuk tam, Seir mutuku arepsiba, talibuka ulamuk. Bukni, anggun apu koprop Yakub ap, el mapu ap ara, amutuku noutamak, din ning kum dayukopura, amutuku batakuka, Mesir mutuku kouluku binuka ulamik.

⁵ Binuka ulamika ani, sik noutam arye, narye Musa ap, Harun ap, wepdeipse talak ara, narye Mesir ninye ulamikak, sik nong deice weik pirilen ning delilamsa ani, Israel ninye nirya bobuka, amutuku boyase.

⁶ Tonda, narye anggun apu yapu, Mesir mutuku arye dalubuka, boyangalamsa ani, sik weik Laut mekwen, el si Teberau dam, yayik talak ara, Mesir mutuku yin talin nang arye, ‘Israel ninye olbinamap’ tenen, sik kuda basam libuka, tuku deice ban ning ap, yin talin nang kuda basam deice bukuka, balamik nang ap, aning-aning deice bukuka, dopkirikdanin, yanganmeka ani, weik Teberau laut mekwen dam yayik.

⁷ Laut mekwen dam yayik talak ara, anggun apu yapu nirya arye, Allah el si Yahweh ati, ‘Se, nun ni Allah melipsilyame,’ nyabuka, weik arye malye nyabuka, ngalukunmekce, moronmek. Wininmekbuk, Israel nang atam, Mesir mutuku yin talin nang otam, anoutam ara, narye kunukne ning arepsiba, inibukopura, Mesir ninye arye, sik Israel ninye ara, kum eipdanmanto kibik. Atalak aniryuk, narye arepsiba, laut mekwen dana-dana kipdobukba, Mesir ninye anoutam bayikba, mekwen arye, Mesir ninye mek ansinipdongobukce, obuka sirya dakuk. Awinyamuk ning ara, anggun bidamang asing arye, aning nirya elilamluma anya arye, akunum kel bikamlume. Winipsukbuk, anggunda mek ap, ninye ap kum mutuku, yini mutuku noutamak bisik, keting tamun yupa weik balamlume. Allah arye nyabuk.

⁸ Nyabukce, ayupu ton nyabuk. Mok ap, mek ap kum ati, buppu weik arye, ninye kum ulamik mutuku dabalamlum bukni, narye Israel ninye nirya bobuka, Yordan mek koubuka otam, keting panalyangan tam boyase. Sik Amori mutuku tam taleamik nang ara, amutuku noutam ulamikce, ‘Israel ninye opnamap’ tenen, pirilamik bukni, narye meilyamsisiba, anggunce, Amori mutuku tam ninye, sirya obuka daklumce, sik mutuku nirya akunum doproplume. Anggun amutuku weknamluma ati, na meliamsisa deice arye, sik Amori tam ninye obuka sirya daklumce, sirya dakuka kum danaiplumce, wini talak anggun mutuku koprop, kibuka ululume. Anirya ara, na melipsisa deice aryuka. Allah arye nyabuk.

⁹ Nyabukce, ayupu ton nyabuk. Aning atonun, Moab mutuku ninye deiyoknye Zipor, el mi Balak birye, ‘Israel ninye opnune,’ tenebukce, Beor el mi Bileam biti yukubuk. Yukubuka deiyok ara, ‘Bileam birye, Israel ninye ati, malye kilin yupu nyapturye, sik nong deice supdongoptuba, ikin uptopura, narye malye winipdeiptinye’ tenen, winibuk.

¹⁰ Winibuk bukni, narye Bileam el yupu kum kekepse. Aning kum bukni, narye arepsiba, Bileam birye, anggunti, teleb yupu uk nyabuka, anggun deice delilamuk. Tonda atalak-atalak arye, tuba tonap, teleb yupu uk nyapdeiamsuke. Elce ateleb yupu nyapdeiamuk ning ap, Balak birye kum opsuk ning ara, na deice aryuka. Na aryuk lopdeipsise.” Allah arye nyabuk.

¹¹ Nyabuka, Allah arye ayupu ton nyabuk. “Winipseba anggunda, Yordan mek koubuka, Yeriko mutuku dam wekelbilume. Atalak ara, Yeriko mutuku weik asik noutamak ulamik ninye nirya arye, anggunti opsike. Tonda atonun, sik Amori tam nang ap, Feris tam nang ap, Kanaan tam nang ap, Het tam nang ap, Girgasi tam nang ap, Hewi tam nang ap, Yebus tam nang ap nirya arye, anggunti olyangalamsik bukni, na mikip anggun nong deice deipsisopura, amutuku ninye nirya akunum obuka sirya daklume. Anirya ara, na melipsisa deice aniryuk winilulume.

¹² Tonda anggunce Raja bitinye, ninye deiyok nang olbilum sum ara, narye amutuku ninye ati, kanye walwalan kin ning ap, ilil una ap arepsiba, sik Amori ninye deiyok nang bitinye, ilil weik ubukba, sik bikbik abuka bindoprik. Birikba, anggunce obuka sirya daklume. Anggun Israel ninye arye, anggun bidamnye parang ya ap, anggun bidamnye mal ap arye, obuka sirya kum dakamlume. Anirya ara, mong arye, ninye si topliba, bikbik abuka balamak touk, na melipsisa deice arye, aninye nirya bai tam sakuka bindobikba, anggun bisiplume. Aning nirya ara, na uka. Allah arye nyabuk.

¹³ Nyabukce, ayupu ton nyabuk. “Ati ara, narye aning nirya winipsa deice arye, amutuku nirya akunum arepsise. Amutuku ara, anggunce ikin pil deice arye, wa kum wiamlum bukni, teleb wa akunum arepsine. Tonda, anggun bidamang arye, aik ton kum domlum bukni, teleb asik akunum arepsine. Anggunce, talye kanye lamapdongobuka, kanye deibuka, amutuku unamlume. Tonda, anggun ululum asik ara, anggunce kum doplume. Tonda, anggunce dilulum anggur tapu duk ap, zaitun yo duk ap ara, anggunce wa wibuka, kum kouwamlum bukni, talye mangkau arye, dakuka dilulume. Aning-aning nirya, anggunce talye dobuka, dinauk unamlume. Aning nirya ara, na meliamsisa deice aryuk.” Allah arye nyabuk. Allah arye nyamuk yupu nirya, Yosua kekebukce, sik Israel ninye ati, laka nyabuk.

¹⁴ Nyabukopura, Yosua birye ayupu nyabuk. “Ati ara, nun ni koprop Allah, el si Yahweh ati, ilil tenebuka unamlume. Allah arye nyasilye yupu nirya, moubuka kekepmunce, aninguk talibuka unamlume. Tonok ning babye batakana kume. Minop talak arye, anggun ni yapu, pia pera mutuku Efrat mek koubuka, otam ulamik talak ara, talye ning Isa Mutuku Dongonye el siuk erelamik ning nirya ara, bataknamlume. Tonda, anggun ni yapu arye, Mesir mutuku noutamak ulamik talak arye, Isa Mutuku Dongonye si erelamik ning nirya ara, bataknamlume. Yata yuk ning do nirya ati, ‘Nun ni koprop,’ nyabuka, yuk talye ning si, pia kum erenamlume. Allah el si Yahweh, el tonok ati, el talibuka, el amu tam ulamunce, el siuk erenamlume. El tonoka.

¹⁵ Aning akunum nyapmasin bukni, yata ninye do nirya, ‘Allah el si Yahweh, el si erena ap, el amu tam una ap ara, nun like,’ tenebuka, ‘Lik,’ teneplum ninye ati ara, ayupu nyapsine. Atalak aryuk, ‘Anye binyuk, el si erebuka talinamabe,’ tenepmunce, wipnululume. Ton ning ara, minop talak nun apu yapu arye, Efrat mek koubuka, otam ulamikce, Isa Mutuku Dongonye si erelamik touk wininamlum do? Akumopura, sik Amori yala ninye taleamik mutuku wini talak ulaluma ati, Amori ninye arye, Isa Mutuku Dongonye si erebuka ulamik touk unamlum do? Anggun nirya tenipmunce, wipnamlulume. Bukni, na ap, na aik unyak nang ap, nun nirya arye dorunamap talak nirya ara, Allah el si Yahweh, el yupu kekebuka, el amu tam ubirye, el siuk pia erenamabe,” Yosua birye, Israel deiyok nang ap, Israel ninye nirya ati nyabuk.

¹⁶ Nyabukopura, aninye nirya arye, tamubuka nyabik. “Kume, nunda, Allah el si Yahweh batakuka bibirye, Isa Mutuku Dongonye el si eren asik binuka, pia kum unamabe. Aning ara, pia kum wininamabe.

¹⁷ Yatanye birye do, kume. Nun ni koproba Allah, el si Yahweh arye, nun apu yapu ap, nun ap, Mesir mutuku arye lobuka boyanamsuke. Mesir mutuku ulamupu talak ara, Mesir mutuku nang arye, weik ikin pil, nun nong deice delilamsikba, kanye imun weik ulamupu. Ninye asik nang atonun ulamupu. Atalak ara, Allah arye, ninye kum winipmanto ning weik arye, winilamukba elilamupu. Tonda Allah arye, yuk-yuk mutuku weik, yu nang ulamik mutuku noutamak arye boyasuke. Ara, yuk-yuk mutuku ninye dam balamupu talak nirya ara, Allah arye, ‘Na ninye obicak’ tenen, yu nang ati, kalikuka meliamsuka arye, cang bisik bobuka yanamsukba, nun kum elilamupu mutuku noutam yanuka unmabe.

¹⁸ Tonda, nun amutuku yapu talak ara, nun ni koproba, Allah el si Yahweh arye, amutuku ulamik ninye, sik Amori yala ninye nirya obuka oplobukce, nunda amutuku arepsukba, wini talak ara, Amori ninye talibuka ulamik mutuku ara, nunce talibuka unyabe. Ati ara, nun babye atonun, Allah el si Yahweh, el amu tam ubirye, el siuk erenamabe. Nun ni koproba Allah ara, Yahweh el uka,” sik Israel deiyok nang ap, talye ninye nirya ap arye, Yosua biti nyabik.

¹⁹ Israel ninye arye nyabik bukni, Yosua birye tamubuka aninye ati nyabuk. “Kume, angguncuk, ‘Allah el amu tam ubirye, el siuk erenamabe,’ tenepmalum bukni, aning ara minopce, talye kanye bobuka, kum nyaptume. Deiyok ara, Allah el si Yahweh, elda pia diksukum, kurun kopropuk ululnye. Elce el talilul ninye ati, ‘Na ninye, sikce yuk ning ati, si pia kum ereptinge’ tenen, aning nirya dilulnye binya arye, yuk ning ati talibikirye, si erebikcopura, el yu weik ulule. Tonda, anggunce, Allah el nyalye yupu yaniplopmunce, malye winin ning winimunyopura, amalye winipmunya ati, namin kum kipnamsile.

²⁰ Ati ara, moubuka tenipdenamlulume. Minop talak arye diprongobuka, wini talak babye, Allah arye anggunti, akunum teleb ubuka meilyamsuk bukni, anggunce Allah el si Yahweh ati, batakdongobuka, yuk mutuku nang arye, Isa Mutuku Dongonye si erenyak ning, anggun babye, aning talibuka, si erepmunyopura, elce anggun malye winipmunyopura, aning ara, ‘Dauplye’ tenen, kum namin kipnamsile. Elce tamubuka, pia kanye imun ning, anggun nong deice deipsilirye, wenebuka opsilirye, sirya daknamsile,” Yosua birye, aninye ati nyabuk.

²¹ Nyabuk bukni, sik Israel ninye nirya arye, Yosua biti tamubuka nyabik. “Kume, nunda yuk ning ton, si kum erenamabe. Allah el si Yahweh, el amu tam ubirye, el siuk erenamabe,” nyabik.

²² Nyabikba, Yosua birye tamubuka, sikti, nyabuk. “Anggun bidamang aryuk, akunum laka nyapmalumce, wipmalume. Tonda, anggun nirya arye, akunum kekepmalume. Anggunce, ‘Nunda Allah el si Yahweh, el siuk akunum erenamabe,’ nyapmalumba, elce kekebuka dinmasila ati, anggunce Allah el siuk erenamlume,” nyabuk. Nyabukopura, aninye arye, “Diba nun bidamang, ‘Wininamabe,’ akunum nyapmap deice arye nyapdeipmap ara, Allah akunum kekepmasile,” nyabik.

²³ Nyabikopura, Yosua birye tamubuka nyabuk. “Ati ara, yuk mutuku ninye, sik isa si erena ati, anggun dam ulul ning nirya ara, batakuka donoknamlume. Winipmunyopura, anggun ni koprop Allah Yahweh ati, anggun kanye talima nirya ara, adiparyuk el tibuk arenamlume. Anggun kanye talima, el deiceuk delinamlume. Anggun Israel ninye talibsukce, melibuka usilinye Allah ara, el Yahweh uka. Ati ara, el siuk erenamlume,” Yosua birye nyabuk.

²⁴ Nyabukba, aninye arye, Yosua biti nyabik. “Akunuma, Allah el amu tam ubirye, el siuk erenamabe. Nunce, Allah el yupu uk talibuka, nimalye arye ubirye, el yupu kekebuka dobolbanamabe. El siuk erenamabe,” nyabik.

²⁵ Atalak noutam ara, Yosua birye Sikem mutuku unmek talak, Allah arye Israel ninye ati, ‘Wininamlum, wininamlum,’ nyapdeiamuk yupu ton, sekuka arebuk. Ayupu deiyok ara, ‘Sik ap, Allah ap, pia teleb kibuka niktoto unamak’ tenen, ayupu sekdeibuk. Ara, ‘Allah el yupu nirya nimalye arye, kekebuka unamak’ tenen, winibuk.

²⁶ Yosua bira, Allah arye, ‘Wininamlume, aning ara, kum wininamlume,’ nyapdeiamuk yupu ara, Mem Yupu Buku noutamak sekdeibuk. Ara, ayupu nirya sekuka, Allah nyalin yupu buku noutamak dongobuk. Winibukopura, Yosua pia weik keil pala dobukabukce, asukumuk ikuka erepdeibuk. Ara, ‘Allah el si Yahweh, elda pia diksukum ubuka, telebuk ululnye birye, asukum yupu nyapsukak ati, amutuku ara, weik mambul ak,’ tenebuka, amutuku weik yo tikamukak binuka, ayo deiyok dam weik keil ikdeibuk.

²⁷ Akeil ikdeibukopura, Yosua birye aninye nirya ati, ayupu ton nyabuk. “Dipkoprop nyapsine. Akeil pala ikeipmana ara, yuk talak ton eipmunyopura, asum nyalinmalum yupu tuba tamubuka, tonap teninamlume. Ara, Allah arye, ‘Wininamlume, aning ara, ton kum wininamlume,’ nyasilye yupu ap, anggunce Allah el si Yahweh ati, ‘Wininamap,’ nyalinmalum yupu ap, akeil atikamlye sukum arye nyapmalume. Allah ati nyaplum yupu ara, akeil deice lak lelinamsil ning atonun unamsile. Aunamle talak ara, anggunce Allah nyalisilye yupu yaniplopmunyopura, adeipman keil ton eipmunce, ‘Se, nunce Allah ati nyapdeiamupu ning ara, kum winipmapa anya arye, malye winipmabe,’ tenenamlume,” Yosua birye nyabuk.

²⁸ Yosua birye, ayupu sirya akunum nyabukce, elce, ‘Dabilulume,’ nyabukopura, Israel ninye asukumuk batakikce, sik mutuku yuk-yuk tamubuka binukabikce, talibuka ulamik. Ara, Allah arye areamukba, dopromik mutuku binuka ulamik.

Yosua ap, Eleasar ap, dipdikba weibik yupu

²⁹ Aning-aning nirya akunum winibukopura, Allah el si Yahweh, el yupu kekebuka, el amu tam ulamukce, el pil dona ati wipdeiamuknye, Yosua daulamuka ani, aminyan talak ara, dibuk. Yosua el li koproba ara, el si Nun ulamuk. Nun el mi Yosua bira, el kam ulamuk talak ara, umur yupa weik, 110 keting tamun ulamuka ani, dibuk.

³⁰ Yosua akunum dibukopura, el nong dobukabukce, weibik. Ara, Allah arye areamukba, Yosua el babye binuka doprobukce, ulamuk mutuku si, Timnat-Serah nyalamik mutuku, weibik. El nong dobuka, amutuku noutamak binuka weibik. Amutuku ara, Efraim yala nang talibuka, ulamik sukum aubuk. Tonda amutuku eitam bukni, outam bukamuk mutuku si ara, Gaas mutuku nyalamik.

³¹ Ara, atalak noutam nirya ara, Israel ninye arye, Yosua kam tuba ulamuk talak, Allah el si Yahweh, el amu tam ulamikce, el yupu kekebuka dobolbalamik. Tonda, Israel ninye, sik yupu bokolina deiyok nang, wisi nang ara, Yosua ap niktoto ulamik talak, Allah el si Yahweh arye, Israel ninye ati meliamuk ning nirya, sik asing arye, neika elilamik. Winilamik bukni, Yosua dibuk talak babye, awisi nang, sik kam tuba ulamik talak ara, Israel ninye Allah el yupu kekebuka, el siuk erelamik.

³² Ara, yuk yupu ara ani. Minop talak ulamuknye, sik apu koproba Yusup, Mesir mutuku noutamak dibukopura, Israel ninye arye, el yok bobuka, Mesir mutuku noutam boyangalamika ani, Kanaan tam noutam boyanamik bukni, mutuku si Sikem mutuku tuku yanuka palibuka lukik. Yusup el yok palibuka lukika ara, ninye si Hemor, el mapu taleamik bukni, minop talak Yakub birye dekamuke. Atuku dekna ara, Yakub el dekna weik ning, perak yupa weik, seratus deice arye dekamuk. Yakub birye, el mi Yusup deibukopura, elce ton mapu deibukopura, dadeipdanin yangalamik nang, Yusup el yala nang arye, atuku dopdobikce, talibuka ulamik. Ati, Israel nang sik apu koproba, minopnye Yusup el yok ara, atuku noutamak asukumuk yanuka tuku palibuka lukik.

³³ Tonda, Harun el mi Eliazar dibukopura, mutuku si Gibea mutuku binuka weibik. Minop talak, Kanaan mutuku, bokuka delilamik talak ara, ‘Efraim yala nang ara, amutuku dup noutamak unamak’ tenen, Pineas biti arebik. Pineas bira, Eliazar el mi ulamuk.