Yosua 23 - Eipomek

Yosua wisi akunum dayukce, Israel nang, Sikhem mutuku wekuka kekenmekbuk, yupu sirya nyabuk yupu.

¹ Keting tamun weik mapnin yangalamika ani, aminyan talak ara, Allah Yahweh arye, sik Israel nang ati, el mikip weik arye, pia taleamukba, sik Israel nang, dana-dana tam ulamik nang nirya ara, namin asa telebuk ulamik. Winibuka ulamik talak ara, Israel nang, sik mal olan nang arye, sikti, yanuka, ton kum nyelamik. Winipnin yangalamik deice aryuk, Yosua akunum wisi dayuk.

² Wisi dayuk talak ara, elce Israel yala nang dana-dana tam, aulamik nang nirya ap, Israel nang, sik deiyok nang ap, sik yupu bokolina deiyok nang ap, yin talena deiyok nang ap, sik nirya ati, “Wini talak ara, anggun nirya bulubuka yalulume,” nyapdeibukba, sik nirya el dam yayikopura, nyabuk.

³ Amapo, wini talak ara, na akunum wisi dane. Anggun Israel nango, anggun ni koprop Allah Yahweh arye, anggun ap neika ulamuburye, Allah elce ninye winipmanto kum pil yala nirya ara, aunmalum mutuku Kanaan noutam, atam ulamik nang nirya ara, sik dam ulamupuba eililamlume. Ara, el mikip areamsukba, anggunce sik dana-dana tam ulamik nang ati, obuka yaklumce, akunum sirya yakamlume. Aning nirya ara, anggun asing arye akunum eililamlume. Allah Yahweh el mikip deice arye, pia melibuka pil dolamsuke. Allah elcuk anggun melina ati, el mikip weik arye, anggun deice deiamsuka arye, pia pi dobuka, anggun mal olan nang ati, obuka sirya dakamlume.

⁴ Na Yosua birye, Kanaan mutuku noutam ulamik ninye nirya, obuka sirya dakeipsirye, sik talibuka ulamik mutuku noutam nirya ara, anggun Israel yala nang ati, amutuku nirya ara, dopropserye, anggunti akunum bokuka areamsise. Anggun ti areamsise mutuku ara, Yordan mek koubuka, otam keting panalyangan tam arye, dipdongobuka binamuka ani, keting kumulban tam, weik laut mekwen dam arye binuka sekdobuk. Tonda, na Yosua birye, Kanaan mutuku noutam tuba aunamak nang, sik unyak mutuku babye, akunum dopropsirye bokuka, anggun Israel nang ati areamsise. Adeice arye, amutuku noutam nirya ara, anggun Israel nang arye, talibuka ululume.

⁵ Israel ninye, anggun ni koproba, Allah Yahweh, elce melisilirye, Kanaan mutuku tuba aunyak nang nirya ara, obukapmunce yakmunyopura, bindopnamake. Ara, winipmanto, sik Israel nang arye, Kanaan mutuku noutam unyak nang ati, mal opdanin bamunye talak ara, sik Kanaan mutuku nang nirya ara, anggun dam arye, bai saka bindopnamake. Bicopura, Allah Yahweh arye, anggunti nyalin yupu deice arye, “Amutuku arepnamsine,” nyabuka, sekeiamsuk mutuku ara, anyapdeiamsuk touk, amutuku nirya ara, arepsiliba, Israel nang anggunce, talibuka unamlume.

⁶ Ati, anggun Israel nang nirya ara, Allah arye Musa biti, “Israel nang ara, aning wininamake, aning ara, pia kum wininamake,” nyabuka, Musa deice nyabukba, Musa birye sekdeipsuk yupu ara, ‘Malye kibuka batakipyakʼ tenen, kaleklamunce, moubuka talipmunyeura, pia unamlume. “Aning ara, wininamlume, aning ara, pia kum wininamlume,” nyabuka, sekeipsuk yupu ara, anggunce tonok ning babye, kum yaninamlulume. Tonda, yuk kwalin bisik kum banamlulum bukni, Allah el bisikuk banamlulume.

⁷ Pia dipkoprob wininamluma deiyok ara, ani. Ara, anggun Israel yala nang ara, ayupu talibuka unamlume. Kanaan mutuku tuba unyak nang babye, sik unamakak ara, anggun Israel nang ap, ansinibuka una meme. Tonda, sikce wininyak ning ara, anggun Israel nang ap, neika una kume. Amutuku nang, sik si erenyak isa si ara, ‘E, isa arye ton melipsitingeʼ tenen, sik si erebuka, pia kina meme. Tonda, anggun Israel ninye arye, Kanaan tam nang melibuka, sik si erenyak ning ati, ‘Melipsitingʼ tenen, sikti, si kum erenamlulume. Tonda, isa sik si erena ati, kutam tuku dipdongobuka, si erebuka, sik pil kum donamlume.

⁸ Aning malye un ning nirya ara, kum winipnamlum bukni, anggun Israel nang ara, min arye, anggun ni koproba Allah, el siuk erepnin yangalamlumce, el yupu dem, dopnin yangalalum touk, akaren babye, doyanamle talak babye, tuba Allah el uk talibuka, el siuk erenamlulume.

⁹ Aning wininamluma ara, talye ati kume. Deiyok ara, Kanaan tam ulamik nang ara, yupa pia weik ulamike. Tonda, sikda mikip weik nang aulamik nang nirya ara, Allah Yahweh arye, Israel nang anggun melina ati, anggun amutuku nang ara, akunum yakdonokuke. Kanaan mutuku ulamik nang ara, tonoknye babye, mikip arye yayukce, anggun Israel nang ati, yanuka obuka dakmanto kum winyamsuke.

¹⁰ Anggun Israel yala nang ara, tonoknye unmatuba, anggun mal olan nang, yupa weik 1.000 yin talin nang yantinga babye, anggun kan-kan arye, tonoknye, elcuk ayupa weik yanmating nang obuka, sirya daktue. Anggun ni koproba Allah Yahweh arye, melipsuturye, anang nirya ara, obisiptue. Ara, anggun ni koproba Allah elce, “Winipnamsine,” nyabuka, nyalina yupu deice arye, akunum nyapdeiamsuk touk, winipsiliba unamlume.

¹¹ Ati ara, anggunce pia moubuka unamlume. Anggun ni koproba, Allah Yahweh ati, tuba-tuba tenenauk umunce, anggun kanye ap, anggun kanye tenen ning ap nirya ara, el deiceuk delinamlulume.

¹² Aning ara, talye ati kum nyapsine. Winipmanto ara, anggun Israel nang arye, Allah nyapdeiamsuk yupu yanipmunyak arye, ‘Kanaan mutuku tuba unamak nang ap, neika kum unamlume,’ nyabuk ning ara, anggunce diba kum teneplum arye, amutuku nang ap, neika umunce, sik kilapu ton dopropmunyeura, aning ara, pia malye ning nyapsine. Aning atouk, sik Kanaan mutuku tuba unamak nang, sik sal arye, anggun Israel nang arye, deipnalum kilmapu dobikirye, neika ukceura, aning babye, pia malye ning nyapsine. Anggun ap, neika ansinibuka umunye ning ara, Anggunce, Kanaan mutuku kilapu ninye ap, dobuka unamabeʼ tenen ning ati, nyapsine.

¹³ Moubuka tenipnamlulume. Kanaan tam nang ap, neika umunce, anggunce Kanaan kilapu ap, dopdanuka umunyopura, dipkoprop, anggun ni koproba, Allah Yahweh arye, ‘Nun Israel nang ati ulirye, Kanaan mutuku nang dungnupdopnamle,’ tenelulum ning ara, kum dungnupdopnamle. Bukni, sik anang nirya arye tamubuka, ‘Israel nang dam ara, yata wiriptibye arye, ikin ning, sik nong deice deiptibye do?’ tenen, kalikinamsiake. Adeice arye, mana wena wepmakiba youlamle ning atonun kibuka, youpnamsiyake. Tonda, anggun Israel nang deice ara, amutuku nang arye, ikin ning deipsikceura, kanye ikin deiceuk unamlume. Ara, Kanaan mutuku nang, sikce Israel nang, anggun deice ara, takce ning arye, deiyok deice olamak touk unamsiyake. Tonda, taica ning arye, asing tulukulamak touk, unamsiyake. Winipsikiba, Allah Yahweh arye anggunti, teleb mutuku arepsuk mutuku noutam ara, tonoknye babye, ton teleb kum unamlume. Ikin ninguk, anggun dam tuba-tuba yangalamliba, ikin kanye uk bobuka, ulamunya ani, sirya ara, dipnamlume. Ara, anggun si erelulum Allah Yahweh arye, pia teleb mutuku areamsuk noutam ulamunya ani, ikin kanye bobuka, dadipnamlume.

¹⁴ Wini talak, na Yosua bira, tukwak nang nirya ara, daulamikca ani, wisi danuka, sirya talak dibilamak touk, na babye dibina dam akunum kipnile. Bukni, anggun Israel nang nirya ara, yuk-yuk bukni, anggun nirya ara, anggun kanye ap, anggun kanye tenen ning ap, akunum bikilulume. Ara, anggun ni koprop, Allah Yahweh, elce anggunti, “Pia teleb-teleb ning nirya ara, dobuka arenamsine,” nyabuka, minop talak arye nyapdeiamsuk ning nirya ara, akunum arepsukba, biklume. Allah arye anggunti, “Teleb ning arenamsine,” nyapdeiamsuk ning ara, tonok yupu babye ton, kum bataksuke. Aning nirya akunum arisiliba, anggun yuk-yuk akunum bikilulume.

¹⁵ Bukni, lubakina meme. Anggun si erelulum Allah Yahweh, elce nyalin yupu deice arye anggunti, “Teleb-teleb ning nirya arenamsine,” nyapdeiamuk touk, akunum winipdeipsuke. Aning atouk, Allah Yahweh elcuk anggunti, “Na yupu yanipnumunce, malye weik umumyopura, narye weik ikin ning, anggun deice deipnamsine,” nyapsuk touk, winipnamsile. Winipsiliba, ikin ninguk, anggun dam tuba-tuba yangalamliba, ikin kanye uk bobuka, ulamunya ani, sirya ara dipnamlume. Ara, anggun si erelulum Allah Yahweh arye, pia teleb mutuku areamsuk noutam ara, ikin kanye bobuka, dipnamlume. Ara, elcuk opsilirye, sirya daknamsile.

¹⁶ Winipmanto ara, Israel nang anggunce, Allah Yahweh arye nyapdeipsuk yupu moubuka kum talipmunce, ayupu batakuka, yuk talye isa si erepmunce, yuk yala nang arye, talye si erenyak ning do, yuk mikip ning do, anggunce, ‘Aning ara, melipsitingeʼ tenen, sik dam binuka, sik si erena ati, kutam tuku dinik dongobuka, kipmunyopura, nun ni Allah Yahweh arye, anggunti yu upleba wenepsilirye, ikin ning anggun nong deice deipnamsile. Ara, akaren aryuk, Allah arye anggunti, “Teleb mutuku unamlume,” nyapdeiamsuk mutuku, akunum arepsuk bukni, aululum mutuku noutamuk, Allah Yahweh aryuk, wenebuka opsilirye, kum kipdeipnamsile. Yosua birye, sik Israel nang, yala-yala nirya ati, ayupu nyabuk.