Yosua 22 - Eipomek

Keting panalyangan tam ulamik Israel nang ati, “Anggun mutuku tamubuka bilulume,” nyabuk yupu

¹ Kanaan tam noutam bukni, Israel yala nang nirya, sik unamik mutuku ati, amutuku-amutuku nirya, weik tonun akunum bokuka arebukopura, Yosua birye, keting panalyangan tam mutuku, Yordan mek koubuka, otam ulamik yala nang ara, Ruben yala nang ap, Gad yala nang ap, tonda Manasye yala nang arye bokuka, dana tam nang nirya ara, “Wini talak, na damuk yalulume,” nyabuka, yukubuka ati yayik.

² Yukubuka ati, sik ayala nang nirya, yayikopura, Yosua birye sikti, nyabuk. Allah elce anggunti, “Anggunda, aning dem wininamlume. Na si erena ati, apil-apil yala nirya ara, talibuka donamlume,” nyabuka, Allah Yahweh, el pil donananye, Musa dam nyapdeiamukba, anggun dam yanuka lake nyapdeiamsuk ning ara, akunum teleb kibuka doplume. Tonda, na Yosua birye, anggunti, “Aning ara, wininamlulume. Aning ara, pia kum wininamlume,” nyalamsise ning ara, “Anggunce aninguk, moubuka kekelulumce,” akunum pil dolamlume.

³ Atalak nirya ara, anggunce anggun kayapu nang, yuk Israel yala nang nirya ati, kum bataklume. Anggunce, anggun kayapu nang ati, meliamluma deiyok arye, ‘Anggun kayapu ara, yuk nang olyasicakʼ tenen, sik dem arye, kum kalikilanyake. Anggunce anggun kayapu, yuk Israel nang ati, moubuka kalikilamlumce, meliamlume. Ara, nunce el si erenyab Allah, el si Yahweh arye, anggunti, “Winipnamlume,” nyabuka, sekeiamsuk ning ara, dipkoprob, anggunce, anyapdeiamsuk touk ubuka, akunum pil dopnin yangalulume.

⁴ Ara, nunce si erenyab Allah, el si Yahweh arye, anggun kayapu yuk Israel nang nirya ati, “Winira, narye melilamsiseba, anggun mal olan nang, sik Kanaan tam nang nirya, obuka malya kiamluma ara, wini talak ara, anggun nirya teleb asa aryuk, kanye deibuka, upnin banalume,” nyapdeiamsuk. Elce nyapdeiamsuk touk ubuka, anggunce anggun kayapu nang ati, meliamlume. Ara, sik mal olan nang ara, anggunce obuka, malye kina ati meliamlumba, winira akunum telebuk unyake. Sik Kanaan mutuku nang ara, tuba olana uk kum unyaka ati, min talak ara, Musa birye anggun biti, ‘Yordan mek koubuka, otam keting panalyangan tam amutuku arepsinyeba, otamuk unamlume,” nyabuka, anggunti oketeng panalyangan tam mutuku ton bokuka, areamsuk mutuku ara, wini talak arye, anggunda tamubuka, adiparyuk, Allah arye Musa biti, nyapdeiamukba, nyapdeiamsuk touk, Yordan mek koubuka otam, keting panalyangan tam, mutuku uk bimunce, talibuka unamlume.

⁵ Tonda, Allah Yahweh, el pil dolamuknye, Musa birye anggun nirya ati, mambul weik yupu deice arye, “Aning ara, pia luba kum kinalulume. Aning ara wininamlume. Aning ara, pia kum wininamlume,” nyabuka, sekeiamsuk yupu dem, aning nirya moubuka talipmunce, kalikuka unamlume. Allah Yahweh arye, nyabuka sekeiamsuk yupu ara, ani. “Anggun ni koproba Allah, na Yahweh atibuk tuba tenemunce, anggun kanye ap, talima ap nirya ara, dobuka, na Allah deice uk deipnamnulume. Tonda narye, ‘Wininamlume, aning ton, pia kum wininamlume,’ nyapdeiamsise yupu, moubuka talipmunce, unamlume. Na Allah arye, nyapdeiamsise yupu, dem moubuka talipmunce, dukdongobuka unamlume. Tonda, anggun diksukumuk teleb umunce, narye nyapdeiamse ninguk, moubuka talipmunce, tonda natibuk talipmunce, anggun kanye ap, anggun kanye tenen ning ap arye, pia teleb ubuka unamlume. Narye tenenun touk, aninguk moubuka wininamlume.” Allah Yahweh arye, nyapsuke.

⁶ Yosua birye, sik anang ati, teleb yupu nyabuk. Ara, ‘Allah arye anang ati, melipliba sikda, pia telebuk unamakʼ tenen, teleb yupu sik deice nyapdeibuk. Tonda, sik anang ati, “Teleb aryuk, Kanaan mutuku batakuka, tamubuka sik mutuku, Yordan mek koubuka, otam keting panalyangan tam, dabinuka unamlulume,” nyabukopura, sik nirya ara, sik unamik mutuku koproba biyik.

⁷ Ura, sik Manasye yala nang bukni, dana tam bokdomik nang ara, keting panalyangan tam aunamik nang ati, Musa birye, Bashan tam mutuku ton akunum dobuka areamuk. Bukni, sik Manasye yala nang bukni, dana tam bokdomik nang ara, keting kumulban tam mutuku arebukba, amutuku noutam ulamik. Ara, sik kayapu nang, yuk Israel yala nang mutuku dam areamukba, doprobikce, aulamik. Ati, ‘Aninye ton, sikce sik mutuku tamubuka binuyakʼ tenen, Yosua birye, anang ati, teleb yupu nyabuk. Ara, ‘Allah arye anang ati, melipliba, sikda pia telebuk unamakʼ tenen, teleb yupu, sik deice nyapdeibuk.

⁸ Teleb yupu nyabuk ning ara, ayupu ton, sik anang ati nyapdeibuk. “Wini talak, anggun bona weik talin nang akunum upmalum. Ara, tamubuka, anggun mutuku binamlum talak ara, boplum ning ara, pia weik tonun, dopdakuka bobinamlulume. Aning ara, ani. Ninye arye, wein ning ayala-ayala nirya ap, tonda dekna weik ning, el si perak ap, emas ap, tembaga ap, besi ap, tonda ninye ongolamak baju weik tonun, bobinalulume. Anggunce, ninye oplumce, sik talilamik ning nirya, doproplum ning nirya ara, bokukapmunce, anggun yala nang dam ton bimunce, bokuka areplulume,” nyabuk.

⁹ Nyabuk talak ara, sik anang arye, sik kayapu yuk Israel nang melibuka, yangalamik ning ara, batakikce, tamubuka sik mutuku Yordan mek koubuka, otam Keting panalyangan tam, ulamikak uk yayik. Ayayik nang ara, Israel yala nang bukni, sik yala yuk-yuk ulamik touk ara, ani. Ruben yala nang ap, Gad yala nang ap, tonda Manasye yala nang noutam bokukabikce, keting panalyangan tam binuka, unamik nang ap, sik nirya adiparyuk tamubuka, sik mutuku uk yayik. Ara, keting kumulban tam, Kanaan mutuku noutam bukni, Silo asik dam ulamikak arye, tamubuka, sik mutuku Gilead tamubuka binuyik ati, bisik yayik. Allah arye, Musa biti, “Sik ayala nang ara, Gilead mutuku arepnulyame,” nyapdeiamukce, areamok. (Tonda Manasye yala nang arye, bokdomik nang ara, minop arye keting panalyangan tam, Yordan mek koubuka, otam mutuku ara, Musa birye akunum bokuka areamuk. Manasye yala nang bukni, ton bokuka, Yosua birye, sikda Yordan mek koubuka, otam keting kumulban tam uamuk mutuku arebuk. Ara, sik kayapu yuk Israel yala nang, mutuku bokdeibukce, sik ayala nang ton, bokdeibukba, sikce talibuka ulamik.)

Yordan mek koubuka, otam keting panalyangan tam arye, Allah el si erena ap, arena ap ati, mesba dobuka kintinibik yupu

¹⁰ Atalak ara, Ruben yala nang ap, Gad yala nang ap, tonda Manasye yala nang bukni, noutam bokuka, Yordan mekin koubuka, otam keting panalyangan tam unamik nang ap, sik nirya ara, Kanaan mutuku noutam tuba unmek bukni, Yordan mek koubuka, otam keting panalyangan tam, binuyik talak ara, asik si Gelilot mutuku biyik. Amutuku ara, Yordan mekin bukni, keting kumulban tam, uamuk mutuku biyik. Amutuku biyikce, sik ayala nang nirya arye, Allah el si erena ap, el arena ap ati, weik mesba dobik. Ara, Yordan mek dala binukabikce, deibik.

¹¹ Winibuka akunum winibikopura, yuk nang arye eibikce, lake nyalbikopura, sik Israel yala nang kekebik. Ara anang arye, “Kume, sik Ruben yala nang ap, Gad yala nang ap, tonda Manasye yala nang bukni, dana tam nang ap, sik mutuku ara, Yordan mek koubuka, otam keting yangan tam mutuku nang unyak bukni, nun mutuku tuku wililonak, asik si ara Gelilot, Yordan mek duman keting kumulban tam, nun mutuku noutam, weik mesba yanuka dopmake,” nyanmekba, ton tam Israel nang kekebik.

¹² Israel nang, sik keting kumulban tam ulamik nang arye, ayupu kekebikce, anang nirya, sik adiparyuk bulubuka, weik asik si, Silo mutuku wekelyayik. Abulubikce, yanuka wekik nang ara, sik Israel yala ninye bukni, sik kayapu keting panalyangan tam, Yordan mek koubuka, otam mutuku unamik yala nang, sik Gad yala nang ap, Ruben yala nang ap, Manasye yala nang bukni, bokuka dana tam nang ati, ‘Aninye olbinuyapʼ tenen, kitinibik.

¹³ Sik Israel nang kitinibikopura, ananguk, sik Israel yala nang arye, imam Eleasar, elce deiamuk mi, el si Pineas, elce yupu bobuka, sik Ruben yala nang ap, Gad yala nang ap, tonda Manasye yala nang, dan tam nang ati, ‘Pinehas birye, sik dam nyalbinamalʼ tenen, el mapu koproba, sik Israel nang arye, kintinip deibik. Sik ayala nang ara, Yordan mek duman bukni, keting panalyangan tam, ‘Gilead mutuku aunmek sukumak bilirye, lake nyapnamleʼ tenen, wipdeibik.

¹⁴ Pineas ap, el ap neika biyik nang ara, ani. Ara, Israel yala nang yuk-yuk ati, ninye deiyok kibuka, taleamik nang ara, takubarye (10) nang melibikura biyik. Anang ara, sik Israel yala ninye uk, Yordan mekin bukni, Kanaan tam, keting kumulban tam ulamik nang yuk-yuk ati, talibuka ulamik nang ap, neika biyik. Sik anang arye, Israel yala nang, sik deipdanin yanamik nang yuk-yuk, deiyok kibuka taleamikce, ulamik.

¹⁵ Sik anang nirya ara, bisik banmeka ani, Ruben yala nang ap, Gad yala nang ap, tonda Manasye yala nang bukni, dana tam nang ara, sik ulamik sukum, Gilead mutuku biyikce, ayupu nyabik.

¹⁶ “Kume, Allah el mapu, nun Israel yala nang nirya arye, anggunti nyapsiabe. Anggun Ruben yala nang ap, Gad yala nang ap, tonda Manasye yala nang bukni, dana tam nang ap, anggunda yata deiyok ati, nun Israel nang arye, si erenyab Allah, el dam malye pil dopmalum do?” nyabuka asibik. “Ara, anggun kanye aryuk tenebuka, Allah si erena ap, arena ap ati, mesba ton memepdeipmaluma deice arye, Allah el si yanipmalume. Nun Israel yala nang nirya arye, el siuk erenyab Allah Yahweh ara, anggunce akunum batakmalumce, amesba ning deipmalum do? Nun kanye ara, apil dopmaluma deice ara, Allah arye, ‘Aning ara, wininamlume, aning ara, pia kum wininamlume. Aning ara, ur talipmunce, wininamlume,’ nyabuka, sekeiamsuk ning ara, anggunce, el yupu malye kipmalumce, yaniplopmalume, tenepmabe,” nyabik.

¹⁷ Anggun ara, tuba kum bikmalum do? Peor mutuku arye, nun Israel nang malye wamupu ning ara, tuba kum bikmalumce, amesba kintinip deipmalum do? Peor mutuku unmaburye, malye weik winibupu ati, Allah arye nun wenena ati, el mapu koproba bukni, pia weik uk yala arepsukce, ikin nun deice deiamsukba, ninye pia weik dibik. Anyareamsuk ning ara, wini talak babye, tuba ikin ning, nun dam yalyeba dolonyabe. Amalye ning deiyok ara, kum tunim abuke, atuba ulule. Aning tuba dolonyab ning ara, anggunda kum biklum arye, ‘Tonap ikin ninguk dopropnuyapʼ tenen, apil donmalum do?

¹⁸ Ati, anggunce wini talak nirya babye, aning ikin weik usilye ning ara, kum bikmalumce, Allah Yahweh ati, anggun balye tam kibuka, bataknamalum ati, amesba pil dopmalum do? Winipmanto ara, arup anggunce, Allah Yahweh ati, malye kibuka batakmunyeura, olana ara, Allah arye nun Israel nang ap, el mapu nirya ap ati, yu tenepsilirye, weik ikin ning wenebuka arenamsile.

¹⁹ Winipmanto ara, anggunce teneptume, ‘Kume, omutuku noutam bibyeura, malye upnamsile. Amutuku ara, malye mutuku ati, omutuku noutam arye, binuka winibipyopura, Allah dam ton kum yatibye,’ tenepmalumce, atam ara, mesba ton dopmalum do? Tonda, anggunce, ‘Omutuku bibyeura, malye winipdabyake, omutuku noutam arye, Allah el si kum ereptibye,’ tenepmalumce do? Aning teniplum ning ara, anggun nirya omutuku arye batakuka, Allah Yahweh, elcuk kintinip deipsuk mutuku, nun aunyab mutuku yanuka, nun ap neika unmatume. Ara, Allah Yahweh el si eren aik, tenda arye dobupu aik ara, atuba lo aupmale. Allah el arena ati, nun unyap mutuku akunum aulula ati, asukumuk yanuka unamtume. Anyapsiap ning ara, talye kum nyapsiyabe. Allah elce nyabukba, “Mesba ton moubuka deipmunce, na si erenamnulume,” kum nyapdeibuk buk, memepmaluma deice arye, Allah arye yupu nyaipsuk ning ara, akunum yanipmalumce, malye kipmalume. Atonun tonda, anggunce nun yupu yanina meme. Nunce nyapmap yupu nirya ara, anggunce moubuka kekeplulume. Ara, nun ni koproba Allah Yahweh, el si erena ati, arin ning boyamunce, delilbana ati ara, akunum kintinip deibupu ning ara, atuba aubuk. Yuk ning ton, memena, “Pia meme,” nyapsiyabe.

²⁰ Tonda, aning ton akunum luba kiplum do? Minop talak, Zerah el mi Akan, malye weik ubuk ning ara, tuba kum bikilulum do? Ara, Allah arye, “Yuk mutuku nang opmunce, malye kipmunyopura, sikce talinyak bukni, batakmace ning, bona utotoa nirya ara, dolona meme. Aning nirya ara, na ning koproba ati, anggunce dolona pia meme,” nyapdeibuk. Winibuka nyapdeiamuk bukni, Akan birye, abona ton ubula doprobukce, dukunubuka deibuka arye, anye el dam ara, ikin pia weik ning yayukba, doprobuk do, kum do? Tonda, el dem kum dibuk bukni, nun Israel nang nirya, nun nong deice, kanye ikin weik ning yayukba, ikin weik ulamupu. Aning ton biknamlulume. Ara, Akan el tonoknye birye, malye uamuk bukni, el dam ton, ikin ning yayukba doprobuk. Tonda, el anye birye, Allah nyapdeiamuk ning, akunum yanibukopura, Israel yala nang nirya, sik dam ikin ning areamukba, dopropmik. Akan biti ara, yuk Israel nang nirya, ikin ning deiamuk.” Israel yala nang, sik deiyok nang arye, nyabik.

²¹ Sik anang arye nyabikopura, Yordan mek koubuka, otam keting panalyangan tam, unamik nang ara, Ruben yala nang ap, Gad yala nang ap, tonda Manasye yala nang bukni, noutam bokuka, dana tam nang ap, sikce sik Israel yala deiyok-deiyok nang ati, tamubuka nyabik.

²² Kume, nun ni koproba Allah ara, dipkoprob aning-aning nirya erebuka, deice tam mikip weiknye ulule. Allah Yahweh, eluk ulule. Yuk mikip ulul ning nirya ara, el amu tamuk ulule. Yuk ninye arye, talye si erenyak ning nirya ara, talye dem ulul bukni, elda, mikip weiknye erebuka, im deice tam ulirye, aning-aning nirya elcuk talisulule. Elda, aning-aning nirya, kel kilula ati, dipkoprob el kele. Nunda, yata tenebibirye, mesba ara moupdeipmap do? Aning babye, Allah elce akunum bikmasile. Ati ara, nun patapsil ning ara, nun tenepmapce, mesba memepmap ning ara, anggun babye akunum bikmalume. Winipmanto ara, anggunce nunti, ‘Kume, anang ara, amesba dopmaka ara, sik mining kanye aryuk,’ tenebuka memepdeipmake. Deiyok ara, Allah Yahweh, el yupu yanina ati winipmake. Sik Gad yala nang ap, Ruben yala nang ap, Manasye yala nang ap arye, ‘Yuk talye ning si erenamakʼ tenen, ‘Mesbah kintinipnamak,’ tenepmasulume. Bukni, atenepmalum ning ara, dipkoprob winipmatibyopura, wini talak aryuk nun wenena ati, angguncuk oplopsutume. Akumopura, Allah arye nunti, wenebuka oplopsutuura, wini talak babye, nunce, ‘Aning ara, teleb uka,’ teneptibye.

²³ Aning atouk, anggunce nunti, ‘Kume, sik mining kanye aryuk, mesba memepdeipmaka ara, Allah Yahweh ati, malye kibuka bataknamakce, amesba memepmake,’ tenepmasulume. Tonda, sikce, ‘Allah Yahweh, el si erena ati, kambing ato ning ap, gandum ap, tonda, Allah el arena ati, teleb ning ara, ayala-yala nirya ap ara, asukumuk boyakirye, amesba deice dapnamake,’ tenepmalumce, uapmasulum do? Nunda aning kum teninyabe. Aning atouk winipmatibye toura, anggunce, ‘Nun ton opsutuma babye, teleb,’ teneptibye. Tonda, nun dip malye upmatibyopura, nun ni Allah Yahweh, elcuk nun deice, ikin ning deipsuturye. Asum aryuk oplopsutu babye, nunce, ‘Kume, aning ara, dip winibupu ati, merekuka, daopsulule,’ teneptibye. Bukni, anggunce aning nirya tenepmasulumto ara, dipkoprob kume. Amesba memepmaba deiyok ara, aning ati kum memepmabe.

²⁴ Atenipmalum ning ara, kum bukni, amapo, nun tenipmapce, Allah el si erena ati, mesba ato ning memepdeipmap ning deiyok ara ani. Ara, ‘Dolyanamle talak ara, anggunce deipmunyeba, deipdanin banamak nang, sik anang arye, nunce deibibyeba, deipdanin banamak nang ati, malye yupu nyabuka, uapdacakʼ tenena ati winipmabe. Ara, sikce, “Nun Israel nang arye, Allah el si erenyabe. Bukni, sik Gad yala nang ap, Ruben yala nang ap, Manasye yala nang ap ara, Allah el si kum erelulume. Anggunda, nun tam neika kum unamlume. Dipkoprob anggunda, Allah el mapu koprop kum ululume. ‘Yukak bindoplulume,’ nyabuka, yupu sekdacake. ‘Aminyan doyanamle talak ara, ayupu atonun nyapdacakʼ tenen, amesba memepdeipmabe. Amesba memepdeipmap deiyok ara, asukum nunce nyapsipsiyabe,” nyabik.

²⁵ Tonda, Ruben yala nang ap, Gad yala nang ap, tonda Manasye yala nang bukni, Yordan mek koubuka, keting panalyangan tam unamik nang arye, sik kayapu nang, Israel nang, yuk yala nang nirya, sik ninye deiyok nang ati nyabik. “Dipdelulume, Allah Yahweh, elce nun nirya ati, mutuku wilinak ara, Yordan mek noutam balulbuk, anggunda, otam keting panalyangan tam mutuku arepsuke. Anggunda, atam mutuku, keting kumulban tam mutuku ululume. Yordan mek ara, noutam wilipsuka deiyok ara, ‘Sik mining mamun aryuk opdakirye, bokdacakʼ tenen, Yordan mek noutam wilipsuke. Ati, anggun Israel yala nang arye, Israel nang nun Gad yala nang ap, Ruben yala nang ap, Manasye yala nang bukni, dana tam nang ap ati, anggunce kum nyapsutume. ‘Anggunda, dipkoprob Allah ap, neika yupu kum nyalulum nang arye, amesba dopmalume?’ nyabuka, kum wenepsutume. Bukni, aminyan winipnamle ning ara, dipkoprob nun kele. Ara, doyanamle talak ara, anggun mapu arye, nun mapu ati, ‘Anggunda, Allah el si erena kume. Anggunda, dipkoprob nun yala nang koproba kum ululume. Anggunda, Allah Yahweh, el mapu koproba kum ululume,’ nyabuka, yupu seknamake.

²⁶ Ati ara, nunce tenibupurye, mesba memepdeipmabe. Bukni, nunce Allah el si erena ap, arena ap ati, kambing ato ning ap, yuk-yuk teleb arin ning ap, bobuka yabirye, ‘Amesba deice arelyanganmabʼ tenen, amesba kum memepdeipmabe. Amesba memepmap ning ara, nun mapu bikina ati, memepmabe. Kume, deiyok ara, bikilin ning deilin ati, amesba memepdeipmabe.

²⁷ Ara, anggun ap, anggunce deipnalum mapu ap arye, nunce deipnamap mapu ati, “Anggunda, Allah el si erena meme. Anggunda, dipkoprob nun yala nang koproba kum ululume,” nyabuka, ‘Yupu seksumunyakʼ tenena ati, amesba asukumuk deipmabe. Nunce, amesba memedeipmap ning deiyok ara, ‘Nun ap, anggun ap, nun nirya nang arye, nun bikina ap aning ati, winyamikeʼ tenena ap ati, amesba memepdeipmabe. Amesba deipmaba deice arye, nun deipnamap mapu ap, anggun deipnalum mapu ap arye, ‘Aning bikikirye kum uapdanamakʼ tenen, winipmabe. Talye ning ati kum winipmabe. Ara, nun Gad yala nang ap, Ruben yala nang ap, Manasye yala nang bukni, dana tam nang, sik keting panalyangan tam unamik nang ap, dipkoprob nun ni koproba, Allah Yahweh, el si erena ati, teleb arin ning ara, el dam deiliyanga birye, el siuk erenyabe. Nun babye, Allah el si eren asik wekibirye, el si erena ap, el arena ati, teleb ning arin pil donyabe. Tonda, nun malye unyap ning, ‘Biksilirye, aning nirya kum kipdeipturye, nun lyepsutuʼ tenen, kam ning opnarye, mesba deice uku danyabe. Tonda, ‘Allah ap, nun ap, teleb kibuka, neika ubirye, teleb kanye bobuka unamapʼ tenen, teleb ning ton, Allah ati arinyabe. Awininyab ning nirya ara, doyanamle talak ara, anggunce deipnalum mapu arye, nunce deipnamap mapu nirya ati, “Anggunda, Allah Yahweh, el si erena kume. Anggunda, dipkoprob nun yala nang koproba kum ululume,” nyabuka, yupu kum seknamsiyake. Amesba memepmaba deice arye, lake kin ning aupnamla anya arye, ayupu ara, kum nyapnamake.

²⁸ Tonda, nun tenipmap kanye ara, ani. Aminyan doyanamle talak ara, arup lake nyapmap yupu, anggunce deipmunyeba, dadeipdanin, yanganamak ninye arye, atonun yupu nyabica babye, nunce deibibyeba, dadeipdanin, yanganamak ninye arye, tamubuka nyaptinge. “Kume, Allah Yahweh, el si erena ap, el arena ap ati, minop talak nun apu yapu, Israel deiyok nang arye, weik pala keil taplakuka deibikce, mesba memebuka deiamik ning, bikilin ning ati deibik. Adeibik mesba ara, anggun otam ululum nang, anggun kayapu mesba yuk nang deiamik ning ara, urasin neikto ubuk bukni, atam deibik ning ara, talye lakakina ati, asukumuk deibik,” nyabuka, lake nyapnamake. Tonda, amesba eibicopura, bikinamake. Ara, nun Gad yala nang ap, Ruben yala nang ap, Manasye yala nang bukni, dana tam nang ap, nun apu yapu amesba memebik ning deiyok ara, ‘Dipkoprop Allah Yahweh arye, nun malye un ning kilisulul ati, kam ning opnarye, uku dapnamapʼ tenen, kum kintinip deiamik. Tonda, ‘Allah el si eren ati, teleb arin ning amesba deice delinamabʼ tenen, kum kintinip deiamik. Aning kum bukni, amesba el deiyok ara, lakakina ati memebik. Amesba eibicopura, ‘E, dipkoprop, sik Gad yala nang ap, Ruben yala nang ap, Manasye yala nang bukni, dana tam nang ap, sikda Allah el mapu koprop unyake. Nun si erenyab Allah ara, sik awinilye yala nang babye, el siuk erenyake,’ tenebikirye, bikicopura, nyanamnyake. “Kume, nun nirya ara, tonok Allah siuk erenyabe,” nyapnamake. ‘Winibuka, nyanamakʼ tenen, amesba winipmanto ning ati, asukum dopdeipmabe.

²⁹ Dipkoprob, nunce Allah Yahweh elti, malye kina ap, el si ap, el yupu ap yanina ap ati, amesba winipmanto ning kum memepmabe. Aning ara, pia dipkoprob kum winiptibye. Tonda, amesba winipmanto ning moubuka deipmap ning ara, yuk talye si erenyak ning si erena ati, kambing ato ning ap, gandum ap, tonda, ‘Nun malye un ning lyena ap ati, uku dongona ati bobuka arelyanganamabʼ tenen ati, kum dopdeipmabe. Aning pia kum bukni, nun kele, Allah Yahweh, el si erena ati, arin ning boyabirye, el mesba deice delilyanganak ara, nun kele. Nun apu yapu arye, pia teleb, mali kumak aik dam bukni, anyaik urasin tam, akunum dobuka deiamik. Aning ara, Yordan mek duman atam, keting kumulban tam, otam akunum deiamikba, tuba aulule.

³⁰ Yordan mek duman, keting panalyangan tam ulamik Israel yala nang ara, Ruben yala nang ap, Gad yala nang ap, tonda Manasye yala nang bukni, dana tam nang ap, sik nirya arye, ayupu nyabikura, keting kumulban tam ulamik Israel yala nang kekebik. Ara, imam Pineas ap, Israel yala yuk-yuk yupa takubarye ulamik touk, sik deiyok nang yuk-yuk ati, deiyok kibuka, taleamik nang takubarye (10) nang ap, sik nirya ara, ayupu kekebik. Ayupu kekebikura, ‘Yo, aning ara, pia dipkoprob nyabaka ati, aning ara, telebe,’ tenebikce, kanye deibik.

³¹ Kekebikopura, Eleasar el deiamuk mi, imam Pineas birye, Yordan mek koubuka, otam keting panalyangan tam ulamik nang, sik Ruben yala nang ap, Gad yala nang ap, tonda Manasye yala nang bukni, dana tam nang ap ati nyabuk. “Wini talak ara, nunce akunum kel bikupe. Allah ara, nun dam usulule. Nun nirya ara, el ap neika unyaba ati, elce nun mal ton kum pipsutue. Ara, nun kayapu nang, anggunce Allah ap, el yupu ap ati, kum yanipmalumce, malye kum kipmalume. Anggunda, amesba dobuka deipmaluma ara, ‘Allah arye wenebuka opnamasilʼ tenen, ilil upmasu bukni, winira nun bikmabe. Anggunda, nun kayapu nang arye, ayupu laka nyapmasuluma deice arye, nun Israel yala nang nirya ati, lyelon ning atonun akunum winipmasulume,” nyabuk.

³² Ayupu akunum nyabukura, imam Pineas ap, Israel yala nang yuk-yuk deiyok kibuka, taleamikce, ulamik ninye deiyok nang 10 ap, sik nirya ara, adiparyuk Ruben yala nang ap, Gad yala nang ap, tonda Manasye yala nang bukni, keting panalyangan tam, oulamik nang ap, abulubuka wekmekak batakuka, sik mutuku tamubuka biyik. Sikda, Gilead mutuku noutam epdanmeka ara, batakuka, sik adeiyok nang nirya ara, Yordan mek otam, keting kumulban tam, Kanaan mutuku tamubuka biyik. Tamubuka biyikura, sik anang arye, nyapmek yupu nirya ara, sik kayapu ton, Israel nang dam binuka, lake nyabik.

³³ Yanuka nyabikura, sik kayapu nang, sik yuk Israel yala nang nirya, ayupu kekebikce, ‘Aning ara, dipkoprob teleb ning unmak,’ tenebikce, sik nirya arye, Allah el tibuk, si erebikce, “Telebe,” nyabik. Tonda, sik Israel yala nang bukni, Yordan mek obiyuk tam bukni, keting kumulban tam ulamik nang arye, ‘Ruben yala nang ap, Gad yala nang ap, tonda Manasye yala nang ap ati, olbinamabe. Sik unyak mutuku nirya malye kibuka sirya daknamabe,’ tenepmek ning ara, batikik. Ayupu ton ap, kum tenebik.

³⁴ Winibikopura, Ruben yala nang ap, Gad yala nang ap, tonda Manasye yala nang ap, sikce nyabik. “Amesba memebupu ning ara, nun ap, keting kumulban tam unamak nang nun nirya ati, lake kibuka, bikilin ning memepmabe. Aning winipmanto mesba dobuka, deipmab ning ara, ebibya deice arye, ‘Nun ni koproba Yahweh ara, dipkoprob Allah ulule. El tonok ulula ati, nun atam keting panalyangan tam unamap nang ap, nun kayapu nang, keting kumulban tam unamak nang ap, nun ni Allah, el tonoka. ‘Nun nirya ara, tonok yala nang unyabe,’ tenena atia. Ati ara, amesba el si ara, ‘Dipkoprop yupu nyalulnye,’ nyabuka, si nyanamabe. Anggun ap, nun ap ara, atam ap, tonda otam ap kibuka, yuk-yuk unamap bukni, noutam ara, amesba lakakin ning unamsile,” nyabik.