Yosua 21 - Eipomek

Lewi yala nang, sik unamika ati, tuku bokuka arebik yupu

¹ Tonok sum ton, sik Lewi yala nang, sik duweit yuk-yuk ati, deiyok kibuka ulamik nang nirya ara, Kanaan mutuku tam bukni, Silo mutuku biyik. Ara, Imam Eleasar ap, ninye si ara, Nun, elce deiamuk mi Yosua ap, tonda yuk Israel yala nang sik duweit nirya ati, yuk-yuk deiyok kibuka ulamik nang ap, sik dam biyik.

² Biyikura, nyabik. “Nun Lewi yala nang ati, Allah Yahweh arye, Musa dam akunum nyabuk. Nyabukura, Musa birye, ayupu nyapdeiamsuke. Ara, ‘Anggun unamlum asik ton, anggun kayapu nang, yuk Israel yala ninye arye bokuka arepsice talak ara, akaren aryuk, anggun amutuku noutam talipmunce, amutuku ara, anggun domba basam weinamlume,’ nyapdeiamsuke. Ati ara, amutuku tuku ap, anyasik ap, arepnusulume,” nyabuka, Lewi yala nang arye, adeiyok nang dam lake nyabikce morobik.

³ Nyabuka morobikura, sik kayapu yuk Israel yala nang nirya ap, kekebikura, “Yo ura, telebe, nun ni koproba Allah Yahweh, elce, ‘Winipnamlume,’ akunum nyadeiamuk ati, Anyapdeiamuk touk winipnuyape,” nyabik. Ara, sik Israel yala nang ati, Allah arye areamukba, sik talibuka ulamik mutuku, ton bokuka, sik kayapu, Lewi yala nang sik bona talibuka unamika ati arebik. Amutuku ara, asik pia weik dobuka ulamik mutuku ap, tonda amutuku noutam ara, domba basam ap, tonda sapi basam wein sukum ap ati, amutuku tuku bokuka arebik. Arebikura, amutuku talibuka weilamikce ulamik.

⁴ Ati, Yosua birye, ‘Dan yala nang arye, minop tuku dopropnamaka doʼ tenen, bikilin ning, el si ara undi, aning dobukopura, minop si lake kibuk yala nang ara, Kehat yala nang, sik yala si lake kibuk. Ara, Lewi yala nang bukni, imam Harun birye deiamuknye, el si Kehat, el tam mapu arye minop deiyok kibuka, sik talibuka unamik mutuku dolamik. Ara, asik tiga belas (13) dobuka ulamik mutuku. Amutuku ara, sik Yehuda yala nang ap, Simeon yala nang ap, tonda Benyamin yala nang ap, sikce talibuka ulamik tuku, bokuka arebikura, dolamik. Amutuku sik talibuka una deiyok nang ulamik.

⁵ Aning atouk, Kehat birye deibukba, deipdanin yangalamik nang bukni, tuku kum dopromik nang nirya ara, asik sepuluh (10) dolamik mutuku ton doprobik. Adoprobik mutuku ara, Efraim yala nang ap, tonda, Dan yala nang ap, tonda Manasye yala nang bukni, noutam bokuka dana tam nanguk, sik awinilye yala nang arye, talibuka ulamik. Amutuku noutam ara, tuku wilibuka arebikura, Lewi yala nang bukni, Kehat yala nang arye dolamik. Ara, keting kumulban tam, Yordan mek koubuka, otam mutuku dorobikce, ulamik.

⁶ Aning atouk, Lewi yala nang bukni, Gerson birye deiamukba, deipdanin yangalamik nang, el tam nang sik duweit, anyasik tiga belas (13) dobuka ulamik. Adoprobik mutuku ara, Isakar yala nang ap, Asyer yala nang ap, Naftali yala nang ap, tonda Manasye yala nang bukni, otam nang ap, sik nirya arye, talibuka ulamik mutuku noutam arye, bokuka arebikba, sik Lewi yala nang bukni, Gerson birye deiamuk mapu nirya ara, dolamik. Sik ulamik mutuku ara, Yordan mek koubuka, otam keting panalyangan tam, mutuku arebikura doprobik.

⁷ Aning atouk, Lewi yala nang bukni, Merari birye deiamukba, deipdanin yangalamik nang, el tam nang, sik duweit ara, asik dua belas (12) dobuka, ulamik mutuku noutam doprobik. Adoprobik tuku ara, Ruben yala nang ap, Gad yala nang ap, tonda Zebulon yala nang ap, sikce talibuka ulamik. Amutuku noutam arye, bokuka arebikba ulamik. Merari el tam nang, sik duweit dem, amutuku doprobik.

⁸ Ura, adeice tam sekmap mutuku ap, asik ap ara, sik Israel yala nang arye, sik asik dobuka ulamik mutuku ap, tonda sapi basam ap, domba basam ap ati, weilamik mutuku ap nirya ara, wilipdobikce, bokuka arebikba, sik Lewi yala nang arye doprobik. Amutuku tuku dolona ati ara, Yosua birye, bikilin ning, el si undi dobuka, deice arye, sik Lewi yala nang, sik duweit arye, amutuku tuku ap, anyasik ap, dobuka ulamik. Aning nirya ara, minop talak Allah Yahweh arye, “Aning ara, winibuka pil dopmunce, amutuku noutam ara, dopropnamlulume,” nyapdeiamuk touk, bokuka arebikba, sik Lewi yala nang arye doprobik.

Harun birye deiamuknye, Kehat el yala nang, sik talibuka unamik mutuku ati, bokuka arebik yupu

⁹ Ura, Lewi yala nang, sik duweit ati dolona ati ara, sik Yehuda yala nang ap, Simeon yala nang ap, sikce asik dobuka, ulamik mutuku noutam ara, asik tiga belas (13) wilibikce dobuka, sik Lewi yala nang unamikak ati arebik. Amutuku asik si ara, aseknamabe.

¹⁰ Amutuku asik ara, imam Harun birye deibukba, dadeipdanin yangalamik nang ati arebik. Sik mining nang, Lewi yala nang bukni, ninye si Kehat birye deibukba, deipdanin yangalamikce, ulamik nang, sik duweit nirya ati, arebik. Ara, Yosua birye, lake bikilin ning, el si undi dobukba, minopce sik si lake kibuk ati, sik unamik mutuku nirya ara, doprobik.

¹¹ Kehat el tam nang, sik duweit ati arebik mutuku ara, ani. Ara, Kiryat-Arba asik dobuka arebik. Ura, anyasik si ara, Hebron ton nyalamik. Amutuku ara, Yehuda tam bukni, iknapye noutam uamuk. Ninye si Arba nyalamik ara, anye elce deiamuk mi, el si ara, Enak ulamuk. Enak, el li koprop ara, Arba ulamuk. Tonda, amutuku si Kiryat-Arba, dana-dana tam uamuk cang mutuku ara, sik Yehuda yala nang ap, Simeon yala nang ap arye, sik sapi basam ap, domba basam ap, wein mutuku ara, lo weik uamuk mutuku ton bokuka, sik Lewi yala nang bukni, Kehat yala nang ati arebik.

¹² Bukni, anyasik Kiryat-Arba nang ara, mining dam uamuk lo, weik tuku ap, tonda, anyasik dolamika dana-dana tam mitik asik dolamik ning ap ara, minop talak, Kalep biti, akunum areamik. Amutuku ara, Kalep el ning koproba ulamuka ati ara, Kehat el tam nang arye, amutuku noutam ton kum doprobik.

^13-16 Tonda, imam Harun birye deiamuknye, Kehat, elce deiamukba, dadeipdanin yangalamik nang, el tam nang ati, ton ap tabakuka, arebik mutuku si ara, ani. Ara, Libna mutuku ap, Yatir mutuku ap, Estemoa mutuku ap, Holon mutuku ap, Debir mutuku ap, Ain mutuku ap, Yuta mutuku ap, Bet-Semes mutuku ap, tonda Arba mutuku ap arebik. Tonda, wini talak babye, amutuku si ati, Hebron mutuku nyanyake. Tonda, amutuku-amutuku dana-dana uamuk sapi basam ap, domba basam ap weina ati, pala mutuku ton arebik. Ura, Hebron mutuku ara, ‘Ninye mangkau arye, yuknye opmakce nang bikirye, ‘Teleb kibuka unamakʼ tenen, amutuku noutam, tonok asik kintinip deiamik ning ton uamuk. Amutuku noutam ara, opmalinye, el tam nang arye, ninye mangkau arye, kwang dakalana ati, kum opmanto mutuku ulamuk. Amutuku tam nirya ara, Yehuda yala nang ap, Simeon yala nang ap, sikce amutuku talibuka ulamik bukni, ton tam nang bokuka arebikba, Lewi yala nang kan-kan bukni, Kehat el tam nang arye doprobik.

^17-18 Aning atouk, Benyamin yala nang arye, talibuka ulamik mutuku noutam arye, dumbarye mutuku taleamik ning dobuka, sik Lewi yala nang bukni, Kehat el tam nang ati, wilibuka arebik. Atalibuka ulamik mutuku si ara ani. Ara, Gibeon mutuku ap, Geba mutuku ap, tonda Almon mutuku ap, Ananot amutuku ap nirya ara, bokuka sik kayapu nang ati arebik. Anoutam domba basam ap, sapi basam ap weilamik mutuku ton arebik.

¹⁹ Amutuku ap, anyasik-anyasik ap, bokuka arebikba, imam Harun, elce deiamukba, dadeipdanin yangalamik ninye arye, doprobik ning ara, asik tiga belas (13) doprobik. Tonda, anyasik dana-dana uamuk cang mutuku ton doprobik. Ara, sik weilamik ning, domba basam ap, sapi basam ap, sik din arena ati, amutuku tuku ton bokuka arebikura, doprobik.

²⁰ Ura, Kehat birye deiamukba, sik yuk deipdanin yangalamik nang bukni, sik nirya ara, Lewi yala nang, sik duweit ulamik. Aninye ara, tuku ton kum dopromik nang ati, Efraim yala nang arye, doprobik tuku noutam arye bokuka, Lewi yala nang ati arebik.

²¹ Aninye sik duweit ati arebik mutuku noutam ara, Sikem asik ton bokuka arebik. Ura, Sikem mutuku ara, ninye mangkau arye, yuknye opman nang biknarye, teleb kibuka ulamik mutuku kintinip deiamik ning ton uamuk. Amutuku noutam ara, opman nang, el tam nang arye kwang dakalana ati, ninye mangkau arye opnanye, duknubuka un asik ton awamuk. Tonda, amutuku dam ara, sik sapi basam ap, domba basam ap, weina ati ara, tuku lo weik awamuk mutuku bokuka arebik. Amutuku tuku nirya ara, Gezer mutuku dam uamuk. Tonda, aning nirya ara, Efraim yala nang ulamik tam, iknapye mutuku dam uamuk.

²² Aning atouk, Efraim yala nang, sikce talibuka ulamik mutuku noutam arye, amutuku ara, mutuku bitinye arebik. Anyaribik mutuku si ara, ani. Bet-Horon mutuku ap, Kibzaim mutuku ap, tonda amutuku dam uamuk cang mutuku, sik weilamik ning maningtoto dina ati, arebikba dobuka talilamik. Anyansik dolamikak arebik ning nirya ara, asik dumbarye.

^23-24 Tonda aning atouk, Dan yala nang arye, talibuka ulamik mutuku dobuka arebik. Dan yala nang ara, sikcuk tuku talibuka ulamikce, asik dolamik mutuku arebik ning si ara, ani. Ara, Elteke mutuku ap, Gibeton mutuku ap, Ayalon mutuku ap, tonda Gat-Rimon mutuku ap, asik dumbarye (4) dolamik ara, Gad yala ninye arye, talibuka ulamik mutuku dobuka arebikba, sik Lewi yala nang arye doprobik.

²⁵ Tonda, asik bitinye dolamik ning ara, keting kumulban tam, dobuka ulamik mutuku, asik si ara, ani. Taanak mutuku ap, tonda Gad-Rimon mutuku ap, anyasik dobuka ulamik mutuku, talibuka ulamik ning ara, anyasik arebika ati, doprobik. Ara, Manasye yala nang bukni, dana tam kup-kup ara, sikce talibuka, ulamik mutuku bokuka, sik kayapu Lewi yala nang ati, arebik.

²⁶ Ati ara, sik Lewi yala nang bukni, Kehat birye deiamukba, dadeipdanin, yangalamik nang doprobik asik ara, takubarye ap, amutuku dana-dana tam uamuk mutuku ap, sik domba basam ap, sapi basam ap, weinamik mutuku ati, aning ton bokuka arebikba, doprobik.

Gerson yala nang ap, Isakar yala nang ap, nirya arye, talibuka unamik mutuku ati, bokuka arebik yupu

²⁷ Lewi yala nang bukni, ton nang ara, Gerson birye deiamukba, dadeipdanin yangalamik nang, sik duweit ara, asik dobuka, ulamik mutuku ara, amutuku bitinye bokuka arebik. Ara, Manasye yala nang bukni, noutam bokuka, anang ara sikce talibuka ulamik mutuku ara, asik bitinye ton ulamikce, taleamik bukni, amutuku ara bokuka, Gerson yala nang, sik duweit unamika ati arebik. Amutuku asik dobuka, ulamik mutuku dam ara, sik domba basam weina ap, sapi basam weina ap ara, lo weik uamuk mutuku ton arebik. Amutuku si ara, Bashan noutam uamuk bukni, asik si ara, Golan mutuku ap, tonda Beestera mutuku ap arebik. Ura, Golan mutuku dam ara, Ninye mangkau arye, yuknye opman nang bikirye, ‘Teleb kibuka unamakʼ tenen, kintinip deiamik mutuku ton uamuk. Amutuku noutam ara, opmalinye, ‘El tam nang arye, kwang dakicakʼ tenen, ninye mangkau arye oplinye babye, kum opmanto mutuku awamuk sukum babye, sik Gerson yala nang arye doprobik.

^28-29 Tonda, Isakar yala nang arye, talibuka ulamik mutuku ton bokuka, Gerson yala nang ati arebik. Anyaribik mutuku si ara, ani. Kisyon mutuku ap, Dobrat mutuku ap, tonda Yarmut mutuku ap, En-Ganim mutuku ap, bokuka arebik. Amutuku asik dobuka, ulamik mutuku noutam ara, sik domba basam weina ap, sapi basam weina ap ara, lo weik uamuk mutuku ton arebikba doprobik.

^30-31 Tonda, Asyer yala nang arye, talibuka ulamik mutuku ara, asik dumbarye dolamik mutuku ton bokuka, sik kayapu nang, Gerson yala nang ati arebik. Adumbarye mutuku si ara, ani. Misal mutuku ap, Abdon mutuku ap, tonda Helkat mutuku ap, Rehob mutuku ap, aning nirya arebik. Amutuku asik dobuka, ulamik mutuku noutam ara, sik domba basam weina ap, sapi basam weina ap ara, lo weik uamuk mutuku ton, arebika ati doprobik.

³² Tonda, Naftali yala nang, sikce talibuka ulamik mutuku ara, asik winilye dolamik mutuku, talibuka ulamik bukni, sik kayapu nang, Gerson yala nang ati, bokuka arebik. Anyaribik mutuku si ara, ani. Ara, Hamat-Dor mutuku ap, Kartan mutuku ap, tonda, Galilea mutuku noutam bukni, asik si ara, Kedes mutuku ap, dobuka arebik. Amutuku ara, Galilea mutuku noutam ara, Israel nang mangkau arye wininak, sik kayapu opne nang bobuka, ‘Opmalinye el tam nang arye minopce, kwang dakuka obicakʼ tenen, ati min opmanto kum sukum dungnul balamikak, kintinip deiamik mutuku dam tam, uamuk mutuku dobuka arebik.

³³ Ati ara, sik Lewi yala nang bukni, Gerson deiamukba, dadeipdanin yangalamik nang ap, sikce deiamik mapu silip arye, doprobik asik ara, weik asik ara, tiga belas (13) asik dolamik ning ap, amutuku dana-dana tam uamuk cang mutuku ap, sik domba basam ap, sapi basam ap, weinamik mutuku ati, aning ton bokuka arebikba, doprobik.

^34-35 Lewi yala nang tuba batakmek nang ara, Merari birye deiamukba, deipdanin yangalamikce, ulamik nang, sik duweit ati ara, Israel yala nang bukni, Zebulon yala nang arye, sik asik ara, dua belas (12) ulamik mutuku noutam bukni, bokuka arebikba, Merari yala nang arye doprobik. Adumbarye weik asik si ara, ani. Yokneam mutuku ap, Karta mutuku ap, tonda Dimna mutuku ap, Nahalal mutuku ap bokuka arebik. Ara, Zebulon yala nang, sikda asik dumbarye, dobuka ulamik mutuku ara, bokuka sik kayapu Merari yala nang, sik duweit ati arebik.

^36-37 Aning atouk, Israel yala nang bukni, Ruben elce deiamukba, dadeipdanin, yangalamik nang arye, sikce deiamik yala arye, ulamik mutuku noutam ara, asik dumbarye (4) doprobikce, sik Gerson yala nang ati, sik mutuku bokuka arebikba, doprobik. Amutuku asik dobuka ulamik mutuku noutam ara, sik domba basam weina ap, sapi basam weina mutuku ara, lo pia weik uamuk mutuku ton, arebikba doprobik.

^38-39 Atonun, sik Israel nang bukni, Gad yala nang arye, talibuka ulamik mutuku, asik dumbarye (4) dolamik mutuku, talibuka ulamika ani, bokuka sik kayapu nang, sik Merari nang ati arebik mutuku si ara, ani. Mahanaim mutuku ap, Hesyebon mutuku ap, tonda Yaezer mutuku ap, Ramot mutuku ap arebik. Ramot mutuku ara, Gilead noutam uamuk. Tonda, Mahanaim mutuku ara, Israel nang mangkau arye, wininak sik kayapu opne nang bobuka, ninye opmananye, el tam nang arye, yu uplyeba, ‘Anye biti kwang daknarye, pia kum opnamakʼ tenen, anye dobuka delilbana ati, kintinip deiamik mutuku ton uamuk. Amutuku dolamik asik ara, ton bokuka, sik kayapu nang ati arebik. Ati ara, Gad yala nang sikda, sik asik dumbarye (4), dobuka ulamik mutuku ara, bokuka sik kayapu nang, Merari yala nang sik duweit ati arebik.

⁴⁰ Ati ara, sik Merari yala nang arye, doprobik asik ara, mutuku dua belas (12) doprobik. Sik Merari yala nang ara, Lewi yala nang, sik deiamikba, dadeipdanin yangalamik nang ulamik ati, sik babye Lewi yala nang ulamik ati, sik kayapu nang arye, arebik mutuku ton doprobik.

^41-42 Ati, sik Israel yala nang nirya arye, talibuka dolamik asik ap, mutuku ap, ara empat puluh delapan (48), mutuku dobuka ulamik bukni, anyasik-anyasik nirya ara, dobuka arebikba, sik Lewi yala nang aryuk doprobikce, talibuka ulamik. Adobuka ulamik mutuku ara, bokuka, sik kayapu Lewi birye deiamukba, deipdanin yangalamik nang, sik duweit dem talibuka unamika ati, bokuka arebik. Amutuku noutam nirya ara, domba basam ap, sapi basam ap, wein mutuku ara, lo weik mutuku uamukba, sik kayapu nang arye, dobuka arebik.

Allah Yahweh arye, “Kanaan mutuku ara, na mapu koproba, Israel ninye, sik mutuku koproba kipnamake,” nyabuk yupu

⁴³ Aning atouk, Allah Yahweh arye, el mapu koproba, sik Israel nang, yanibuka binamik mutuku nirya ara, dobuka sik Israel ninye dem arebuk. Ara, Allah elce nyalin yupu deice arye, “Kanaan mutuku ara, dipkoprob arepnamsine,” nyabuka, sik apu yapu ati, nyapdeiamuk touk arebuk. Amutuku noutam nirya, arebukopura, el mapu koproba, Israel nang ara, amutuku akunum biyikopura, kanye deibuka, teleb asa talibikce, amutuku noutam dem ulamik.

⁴⁴ Winilamikopura, Allah Yahweh arye, Israel nang, sik apu yapu ati, “Winipnamsine. Ara, anggun amutuku bimunce, umunyopura, na mikip weik deice arye, erebuka talipsinyeba, anggunda amu tam upmunce, teleb asa unamlume,” nyapdeiamuk touk, sik nirya ara, telebuk ulamik. “Anggun olana ati, ton yakirye, min kum opnamsiyake,” nyapdeipmuk touk, telebuk ulamik. Ara, Allah arye, sik Israel nang deice mikip arebukba, sikce Kanaan mutuku ulamik nang nirya ara, olbisilamika deice arye, telebuk ulamik.

⁴⁵ Ati ara, Allah Yahweh arye, sik Israel nang, el mapu koproba ati nyabuk. “Aning ara, winipnamsine,” nyapdeiamuk yupu ara, tonok ning babye, ton kum bataklamuke. Anyalin yupu nyapdeiamuk touk, winipnin yangalamuk. Tonok yupu babye, pia kum kumdanamle.” Anyapdeiamuk touk winilule.”