Yosua 20 - Eipomek

Israel nang, sik mangkau arye, sik kayapu yuk nang ton, opnarye binuka ulamnebuk, tamubuka ninye omne nang, kwang kum daklamik asik ton, kintinip deibik yupu

¹ Ura, Allah Yahweh arye, Yosua biti nyabuk.

² “Ance sik Israel ninye ati, binuka nyapnulyame,” nyabuk. Ara, min talak na Allah arye, Musa dam nyapdeiamsiba, Musa birye, an dam akunum lake nyamkuke. Ara, “Yatanye do nirya, sik Israel nang kan-kan arye, mangkau arye sik kayapu yuk nang, obice nang, kwang dakalana ati opmanto nang minop dungnulban, asik ton kintinip deipnalume,” nyapdeiamse. Amutuku ara, mangkau arye, yuknye oplirye, bai sakuka, amutuku bilyopura, yuk nang arye, kwang dakna ati, anye kum opnamnyake. Deiyok ara, kwang dakalana ati, ninye kum opmanto mutuku ton kintinip deipnalume,’ nyapdeiamse. Ati, wini talak ara, ance winina ati, amutuku ton wipdeipnulyame.

³ Mangkau arye, yuknye ton opmalinye bira, aopmalinye, ‘Se, el tam nang arye, kwang dakna ati, tamubuka opnicakʼ tenen, ilil upliba, bai sakuka bilirye, akintinip deipnalum mutuku uk binamlule. Amutuku akunum bilyopura, min arye opmalinye, el tam nang arye, anye kwang dakalana ara, sik anang arye, anyasik binuka kum opnamake.

⁴ Mangkau arye ninye opmalinye, ilil upliba, bikbik abuka banmalya ani, awipdeiplum mutuku noutam arye, tonok asik dolamikcak, ton bilyopura, amutuku noutam bana ati, bublan wekelban bisik, weik bisik bublan dam kalikinyakce, yupu lipsisikna ati, deiyok talibuka unyak nang, sik dam bilirye, el winipmalye ning nirya binuka, lake nyanamlule. Winipliba, amutuku talibuka, deiyok kibuka ulamice nang, sikce el anye biti, “Telebe, anda amutuku bimince, binuka talye kanye bobuka unalame,” nyabice sukumuk bilirye, asukumuk binuka unamle. Yuk nang arye, kwang dakalana ati, ‘Anye opnuyabe,’ tenebica babye, ninye opmalinye, akintinipnamlum mutuku, akunum bilyopura, sikce elti, pia kum opnamake.

⁵ Tonda, ninye opmaliba, dipmalinye, el tam nang arye, ‘Aopmalinye opnamapʼ tenen, dobolbanmaca ani, amutuku bica babye, amutuku noutam ulamice ninye arye, “Anye bira ayanmale,” nyabuka, kum dobuka arelyanganamake. Ara, ‘Yu arye anye obicakʼ tenen, sikce lelipdongobikiba, kum opnamnyake. Deiyok ara, anye yu upmalibuk, ‘Na kwit opnune,’ pia kum tenepmalye bukni, el mangkau arye opmaliba, dipmalya ati, ‘El babye opnamapʼ tenen ati, el anye bobuka, lak sukum ara, pia kum delilyanganamlume.

⁶ El anye bira, ninye opmalya deiyoknye, tuba amutuku noutam ulamlye bukni, ninye nirya wekuka, dinmace sukum arye, yupu talibikirye, lipsisikuka teleb kililanamake. Tonda, imam nang nirya, sik weik deiyoknye, akunum diplyopura, anye elda, dan mutuku ulamlye bukni, batakuka binmalye do? Abatakuka binmalye mutuku uk adiparyuk tamubuka yanamlule. ‘Aning ara, wininamlume,’ nyabuka, sik dam binuka, lake nyapnulyame. Allah Yahweh arye, Yosua biti nyabuk.

⁷ Ayupu nyabukopura, Israel nang sikce, “Sik mining Israel nang, mamun mangkau arye ulamlye bukni, obikirye balon nang, kwang dakna ati kum opmanto mutuku ton, winilye kintinibuka, deibikce dolamik. Ara, Yordan mekin, keting kumulban tam uamuk mutuku, noutam ton kintinip deibik. Amutuku si ara ani. Ara, Naftali yala nang sik mutuku ara, Kedes mutuku iknapye tam buk, Galilea mutuku deice kintinip deibik. Tonda, Efraim yala nang, sik mutuku noutam ara, iknapye tam, Sikem mutuku deice kintinip deibik. Tonda, Yehuda yala nang, sik mutuku noutam ara, Ebron mutuku deice kintinip deibik.

⁸ Aning atouk, Yordan mek duman otam, keting panalyangan tam ara, mek wininga dem uamuk mutuku deice, keting panalyangan tam bukni, Yeriko mutuku dam tam, mutuku erebuka bukamuk mutuku, kintinip deibik. Mangkau arye winilamlyak, el kwit opmalinye balon ati, mutuku si ara, ani. Ruben yala nang, sik ulamik mutuku noutam ara, Bezer mutuku kintinip deibik. Amutuku ara, ninye weik una kum sukum. Ara, mekwen ap, yo kan-kan ap, kum uamuk mutuku noutam kitinibik. Ton ning ara, Gad yala nang, sik ulamik mutuku noutam, mutuku si Ramot mutuku asik bukni, Gilead noutam arye, kintinip deibik. Tonda, Manasye yala nang, sik ulamik mutuku noutam ara, Galon mutuku asik dobuka kintinibik. Amutuku ara, Basan mutuku noutam, amutuku wibuka kintinibik. Amutuku nirya ara, Manasye yala nang, sikce talilamik mutuku noutamuk kintibik.

⁹ Amutuku asik domika deiyok ara, ani. Ara, yatanye do, Israel yala nang do, yuk mutuku ninye anyasik nang arye do, sikce mangkau arye winilamniak, el kwit opmananye, wekelban mutuku, akunum weklyopura, opmalinye el tam nang arye, kwang dakalana ati, anye adiparyuk kum opnamake. Ara, Israel yala nang arye, ninye ton mangkau arye opnopura, akintinyamik mutuku, ninye kum opmanto mutuku uk, minopce balolamik. Tonda, sik ninye asik nang yanamanbuk, Israel nang ap, neika ulamna ani, sik babye, mangkau arye ninye ton opnopura, sik ton, kwang dakalana ati, ninye kum opmanto mutuku minopce balolamik. Ara, ninye kum opmanto, mutuku kintinip deibik mutuku uk wekelbalamik. Amutuku nirya ara, sik Israel nang aryuk kintinip deibik. Ara, mangkau arye winilamne ak, el kwit opmalinye biti, ‘Opnamanʼ tenen, dobonmakiba, amutuku noutam bilyopura, pia telebuk unamle. Winibuka amutuku noutam binuka ulyopura, kum opnamnyake. Tonda, yupu bokolina deiyok nang arye, el anye biti, ninye weik wekmace sukum arye, yupu lipsisikuka, teleb kililanamake. Adiparyuk kum opnamnyake. Allah arye nyapdeibukba, sik Israel ninye arye, anyasik dobik.