Yosua 2 - Eipomek

Yosua birye, ninye bitinye nang wipdeibukura, Yeriko mutuku dilbirik yupu

¹ Ninye si Nun, el mi Yosua birye, ninye bitinye nang wipdeibuk. Ara, ‘Kanaan mutuku noutamak bukni, mutuku si Yeriko mutuku dilbinamdak’ tenen ati, anang wepdeibuk. Yuk nang ton, laka kum nyabuk bukni, elcuk abitinye nang wipdeibukce, Sittim mutuku arye wipdeibuk. Dopdeibukce nyabuk. “Anggun bitinye nang ara, Kanaan mutuku nirya dilbinamarume. Tonda, weik mambul ning ara, weik ninye asik donyakak ara, Yeriko mutuku dipdenamdurume,” nyabuk. Nyabukura, abitinye nang ara, Yeriko mutuku birikopura, sal arye yo bok arebuka, talye-talye yoldalamik kil, el si ara Rahab, el aik wekdikce, tia talak ati aunmarik. Anyaik wekdika deiyok ara, ‘Yu nang arye opsicak’ tenen, dungnubuka birik.

² Asum lukunyan aniryuk, amutuku nang arye, Yeriko mutuku taleamuka deiyoknye biti, nyabik. “Se, alukunyan, Israel nang bitinye arye, ‘Yeriko nang opnamap’ tenen, nun kalikna ati, ayanuka maprake,” nyabikopura, kekebuk.

³ Ayupu kekebukce, el mapu ton wipdeibukura, Rahab dam biyikce, nyabik. “An aik yanmarak nang ara, ‘Amutuku ninye opyaknamap,’ tenen, kel kina ap, kalikna ap ati, nun mutuku dilyanmasirak anya arye, adiparyuk anang bobuka boyanulyame,” nyabik.

⁴ Nyabik bukni, akil Rahab ara, abitinye nang akunum dungnupmoka anya arye, Rahab arye tamubuka nyabuk. “Diba, ninye bitinye ton, na aik yanmarak bukni, anang ara, dan mutuku nang do, na walwale.

⁵ Tonda, sintam mapnamapu talak arye, bindopmarunge. Ara, nun asik arum sirya ak, poka dobukak, bublan dam ara, lukunyan min kum tirikmapu talak aryuk, bindopmarunge. Sik bindopmarungu bisik, ton kum eipmanue anya arye, kum bikmane. Ati, sik akunum bindopmarake. Bukni, anggun adiparyuk, minopce dobolbinamlulume. Winipmunce, bisik noutamak arye, abitinye nang eipdamunce, tomopnamlum do, kum do? Ati, bikbik abuka dobolbilulume,” nyabuk.

⁶ Rahab birye nyabuk bukni, minopce, akil arye, abitinye sik Israel nang bitinye ati, “Na aik alip tam kat ning arye, dobupu pala deice ara, cang maning bulukropa atonun ning, mikdeipmanuak arye, aning amu tam binuka dungnupdurume,” nyabukba, binuka duknupmarik.

⁷ Akil arye, sik Yeriko mutuku nang ati, “Sik Israel nang bitinye binmarakak ara, na walwale,” nyapmoka ati, amutuku yin talin nang kekebikce, sik Israel nang bitinye binmarik bisik, bikbik abuka banmek. Sik banmek bisik ara, ninye arye, ‘Yordan mek koubukam otam binuyap’ tenen, balamik bisikuka. ‘Sik Israel nang, Yordan mek otam binamaraka anya arye, adiparyuk binuka sekdongopnamap’ tenen, biyik talak ara, anyasik poka pakdeipmek bublan ara, Yeriko mutuku nang arye, tirikdongobik.

⁸ Abitinye nang kum maprik talak ara, Rahab birye, anang dam, alip aik biyuk.

⁹ Biyukce, anang ati nyabuk. “Na kele, amutuku ara, Allah el si Yahweh arye, anggun Israel ninye ati, ‘Arepnamsine,’ akunum tenyamsuka anya arye, amutuku nang nirya ara, anggunti, ilil pia weik ulule. Yata nang do nirya, nun mutuku noutamak unyak ninye nirya ara, anggun Israel nang ati, ilil pia weik usilibuk, nun kanye talima daksaksuke ati, nun mikip kum upsile,” nyabuk.

¹⁰ “Tonda, Mesir mutuku arye, batakuka bisik yangalalum talak ara, anggun ni Allah, el si Yahweh arye, weik mekwen, el si Teberau cepdeibukba, amekwen noutamak bukni, mek cepdobuk bisik yanamlum ning ara, nun akunum kekebupe. Tonda, Yordan mek keting panalyangan tam, Amori mutuku weik deiyok nang, kibuka taleamdik nang bitinye, sik si Sihon ap, Ok ap, sik tam nang ap, anggun Israel nang arye oplumce, sirya dakdongoplum ning ara, nun akunum kekelamabe,” nyabuk.

¹¹ “Ayupu akunum kekebupu talak ara, nun ilil deice arye ulamupu ning ara, ilil pia weik upsukba, nun kanye talima daksaksuke. Aning ara, talye ati kum bukni, dipkoprob anggun ni Allah, el si Yahweh ara, im ap, tukwak ap nirya, talinanye ulule,” nyabuk.

¹² Nyabukopura, ayupu ton nyabuk. “Ati ara, narye anggunti, ‘Bicoʼ tenen, melibuka, na aik dungnupmasin anya arye, na moropsine. Anggun ni Allah el si Yahweh, el si deice arye nyapnamnurume, ‘An ap, an aik ninye, an mapu silip nirya ara, bico tenebuka melipnamabe,’ nyapdeipnamnurume. Anggunce, na tam ninye ati, namin kipsumunce, kum opnamsulume. Narye, ‘Ura, sik dipkoprob namin kipsikirye, kum opnamsiyake, tenepnirye kel biknamne’ tenen, lak kin ninguk, kintinipnamnurume,” nyabuk.

¹³ “Winiprumunya deice arye, na ni ap, na nin ap, tonda, na kwit capu silip ap, tonda, nun tam ninye nirya ap ara, ‘Anggun Israel nang arye, kum opnamsiyake,’ tenepnamne. Tonda, anggun melipsumunyeura, yuk nang arye, kum oplopnamsiyake. Utenena ati moropsine. Ati ara, na kel kipnirye, dib tenepnamna ati, lak kining tonok arepnamnurume,” nyabuk.

¹⁴ Rahab arye, nyabukba, abitinye nang arye, tamubuka nyapdik. “Ance melipmasilamce, lyepmasilam touk, nunda ance moropmasilam touk, an tam nang nirya lyepnamabe. Amutuku noutamak unmanam ning ara, ance Yeriko mutuku deiyok nang ak, laka kum nyapmasilame. Winipmalama ati, aminyan talak ara, nun ni Allah, el si Yahweh arye, amutuku nirya, nun arepsilye talak ara, nunce an ap, an mapu silip nirya ap ati, kum opnamsiyabe. Nunce bico tenebuka, teleb kipdeipnamsiyabe. Kum opnamabe. Nunce nyapmanam touk, dipkoprob winipnaname. Ance melibuka lyepmasilam touk, nun babye aminyan talak ara, an ap, an tam nang ap, melibuka lyepnamsiyabe. Nunti ance moropsilamba, nunce nyapdeipmakinam yupu deice arye, lak bikne ato ning arepkiname. Dipkoprop an ap, an tam nang ap, kum opnamsiyabe,” nyapdik.

¹⁵ Rahab birye, amutuku bai tam poka domikak ara, el aik apoka balye tam, aik ulamuka anya arye, ayupu nyapdikopura, adiparyuk abitinye nang, jendela kin-kin bisik arye, tapu kirikuka dopkwetebukura, bai tam sakuka birik.

¹⁶ Winibuk talak ara, Rahab birye, anang ati nyabuk. “Amutuku deiyok nang arye, ‘Nun eipsicak’ tenen, bikbik abuka, mutuku dam tamuk birumunce, like winilye benduka, duknupnamdurume. Dungnupmarumun bukni, amutuku talibuknye birye, el mapu bokeipliba enmasica, tamubuka amutuku yakibuk, anggun atalak aryuk binamadurume,” nyabuk.

¹⁷ Nyabukura, anang arye tamubuka, Rahab biti nyaprik. “Telebe an nyapmasilam atonun, winipnamkiname. Winipnamkinam bukni, nun nyapnukinam yupu ara, dipkoprob upnalame.

¹⁸ Bukni, anyapnunam ning ara, moubuka bikmince, dipkoprob winipnalame. Kumopura, nun atalak ara, ‘Winipnaname,’ nyapmanam yupu ara, batakmince, kum winipminyopura, talyeuk upnalame. Ara, amutuku ninye olyanupye talak ara, lak kina ati, ining bi tapu, jendela bisik kin-kin, nun dopkwetepmasilamak anyuk, kiriknamlyame. Tonda, atalak babye, an ni, an nin, an tam nang nirya bulubuka, an aikuk deipnamalyame. Atalak ara, sik yukak unmacopura, kum lyepnamsiyabe,” nyaprik.

¹⁹ “Tonda winipmanto, anyaik wekmace ninye ton, bai tam kubuka bikiba, Israel nang arye obicopura, anye bira, el babye malye winiplya deice arye, sikce elti, opnamak ning deiyok ara, el bidamnye arya. El opnamak ara, nun deiyok kuma ati, nun deice ikin kum upsutue. Anggunce ton, ‘Aobice ning adano?’ kum nyaptume. Bukni, an aik noutamak unyak nang nirya ara, yuk nang arye obicopura, nun bitinye ikin upnamsile,” nyaprik.

²⁰ “Tonda nun bitinye arye, amutuku dilyanmanam ning ati, ance ninye yuk nang dam nun wininmanam ning, laka nyapminyopura, an moropmalam ning ap, nunce an lyena ati, ‘Winibuka lyepnamsiname,’ nyabuka, nyalin yupu nyapmanam ning ap ara, bataknaname. Aning ara, dukdongobuka, anggunti kum lyepnamsiyabe,” nyaprik.

²¹ Sik abitinye nang ap, Rahab ap, yupu akunum talibikopura, Rahab arye, “Yo, anggunce nyapmanurum ning ara, winipnamane. Anggun dabidurume,” nyabukba, anang batakukba, birik talak ara, akil arye ining bi tapu dobuka, anang jendela kin-kin bisik binmarikak, anyuk kirikdongobuk.

²² Yeriko mutuku bikna ati, dilyanamrik nang bitinye, adiparyuk, mutuku dam like winilye benduka duknupmarikba, Yeriko mutuku deiyoknye birye, el mapu dopdeibukopura, amutuku bisik nirya enmika ani, sik Israel nang bitinye kum ebika ati, sikda tamubuka, Yeriko mutuku uk biyik.

²³ Yeriko mutuku nang akunum tamubuka biyikopura, abitinye nang amutuku dam arye, panabuka yarikopura, Yordan mek koubuka, otam birik. Ninye si Nun, el mi Yosua ulamukak birikce, sik winilamdik ning nirya, binuka laka nyaprik.

²⁴ Sik anang arye nyaprik. “Dipkoprop amutuku nirya ara, nun ni Allah, el si Yahweh arye, nunti arepnamsile. Amutuku unyak nang nirya ara, nunti ilil pia ulule. Ati, sik nong ap, mikip ap ara, akunum mitang upmale,” nyaprik.