Yosua 19 - Eipomek

Simeon yala nang arye, talibuka unamik mutuku ati, nukuk yupu

¹ Yosua birye, tuku bokna ati bitinye ning winibuk ara, ‘Simeon birye deibukba, deipdanin yangalamika ani ulamik ninye, sik duweit nirya ati, bokuka arebuk. Simeon yala nang, sik duweit tuku sirya bokolonak ara, Yehuda yala nang sik mutuku noutam arye, binuka wilipdeibuk. Ati, Yehuda tam nang, sik mutuku dana tam ton bokukabukce, Simeon yala nang ati arebuk.

² Sik Simeon yala nang ati, bokuka arebuk ning ara, amutuku si ara ani. Bersyeba mutuku ap, (tonda amutuku bukni, Syeba mutuku ton nyalamik), Mola mutuku ap,

³ Hasar-Suar mutuku ap, Bala mutuku ap, Esem mutuku ap,

⁴ Eltolad mutuku ap, Betul mutuku ap, Horma mutuku ap,

⁵ Ziklak mutuku ap, Bet-Hamarkabot mutuku ap, Hazar-Susa mutuku ap,

⁶ Bet-Leboat mutuku ap, tonda Saruhen mutuku ap arebuk. Amutuku-amutuku nirya ara, bokuka arebuk. Aweik asik dolamik ning ap, amutuku noutam mitik asik ton dolamik ning nirya babye, bokuka arebukba, sikce dolamik. Aning nirya ara, weik asik tiga belas dobik.

⁷ Tonda, Yosua birye, sik Simeon yala nang atibuk, asik winilye ton bokuka arebukba, sik Simeon yala nang arye dolamik mutuku ton ani. Arebuk asik dam ara, mitik asik babye, adobuka ulamik. Amutuku si ara ani. Ain mutuku ap, Rimon mutuku ap, Eter mutuku ap, tonda Asan mutuku ap arebuk. Adumbarye weik asik dolamikak ap, dana-dana tam mutuku ap nirya ara, bokuka arebuk.

⁸ Atonun, anyasik si yuk-yuk sekmap ning ap, asik pia weik dobuka ulamik sukum mutuku dam nirya ap, amutuku dam bukni, mitik-mitik asik dolamik ning ara, weik tonun dobuka ulamik. Anyasik dobuka ulamik mutuku ara, amutuku arye, dipdongobuka binamuka ani, selatan tam Bahalat-Beer mutuku tam binamuk. Bahalat-Beer mutuku atibuk ton si ara, Rama mutuku nyalamik. Amutuku ara, pata weik uamuk arye, mek kum balamuk mutuku sukum tam, el si ara, Negef mutuku noutam uamuk. Amutuku noutam nirya uamuk tuku ara, Yosua birye arebukba, sik Simeon yala nang ap, sik duweit dem arye, aning nirya talibuka ulamik.

⁹ Ara, Yehuda yala nang, sikce talibuka ulamik tuku ara, lo pia weik uamuk bukni, ‘Amutuku nirya ara, sik tuku ton doproptibye,’ kum tenelamik. Ati, Yosua birye, Yehuda yala nang arye dopromik tuku, bokuka Simeon yala nang ati arebuk.

Zebulon yala nang arye, talibuka unamik tuku ati, nyabuk yupu

¹⁰ Yosua birye, tuku bokna ati, lake bikilin ning, el si undi dobukba, Zebulon birye deibukba, deipdanin, yangalamikba ulamik nang, sik duweit nirya ati, bokuka arebuk. Zebulon yala nang, sik duweit tuku sirya bokolonak ara, Sarid mutuku tuku arye binuka bokuk.

¹¹ Wilinak ara, Sarid mutuku arye diprongobuka, binamuka ani, keting panalyangan tam mutuku ara, Marala mutuku dam binuka dukdongobuka, keting panalyangan tam bukamuk mutuku ara, Dabeset mutuku dam binukabukce, sekrobuk. Yokneam mutuku dam bukni, keting panalyangan tam ara, mitik mek, Yokneam mekin binuka dukdongobuk.

¹² Zebulon yala nang, sik mutuku doprobik ning ara, keting panalyangan tam ara, Sarid mutuku diprongobuka binamuka ani, keting panalyangan tam ara, Kislot-Tabor mutuku tam, wilinak arye ubuka, Dobrat mutuku biyikce, welebuka, Yapia mutuku binuka dakdongamuk.

¹³ Yapia mutuku otam arye dipdongobuka, yanamika ani, atam kipdakuka keting panalyangan tam yanuka dakdongobuk. Ara, Gat-Hefer mutuku ap, tonda Et-Kasin mutuku ap, bukamukak yayikura, asukum arye ubuka, Nea mutuku tam ubuka biyukce, Rimon mutuku tamuk sekeibik.

¹⁴ Outam dabu tam mutuku wilinak ara, Hanaton tam arye, dukdongobuka binamuk. Amutuku arye diprongobuka, binamuka ani, tuku wilinak sirya ara, Yifta-El mutuku noutam arye, mitik mek binamuka, lilun tam dakdongamuk.

¹⁵ Tonda, Yosua birye arebukba, Zebulon yala nang, sik mutuku doprobik ning ara, ani. Ketat mutuku ap, Mahalal mutuku ap, Simron mutuku ap, Yidala mutuku ap, tonda Betlehem mutuku ap doprobik. Amutuku nirya ara, Zebulon yala nang ap, sik duweit ap arye, sik unamik mutuku ati bokuka, arebukba doprobik. Zebulon yala nang, sik mutuku nirya ara, dua belas uamuk. Amutuku noutam, weik asik ap, tonda mitik-mitik asik babye, sikce adobuka ulamik.

¹⁶ Adeice tam sekmap mutuku, sik aulamik mutuku nirya ara, Yosua birye, Zebulon yala nang sikti, bokuka arebuk. Weik asik adobuka ulamik mutuku noutam nirya ap, mitik-mitik asik ara, weik tonun ton dobuka ulamik. Ara, Zebulon yala nang, sik yala yuk-yuk talibuka unamik mutuku bokuka arebuk.

Isakar yala nang arye talibuka unamik mutuku ati, nyabuk yupu

¹⁷ Mutuku wililamik ati, Yosua birye lake bikilin ning, el si undi dobuk ning ara, Isakar yala nang ap, sik mapu silip ap arye, talibuka unamik mutuku ati, dobuka arebuk.

¹⁸ Isakar yala nang ati arebuk mutuku ara ani. Yisreel mutuku ap, Kesulot mutuku ap, Sunem mutuku ap,

¹⁹ Tonda, Hafaraim mutuku ap, Shion mutuku ap, Anabarat mutuku ap,

²⁰ Rabit mutuku ap, Kisyon mutuku ap, Ebes mutuku ap,

²¹ Tonda, Remet mutuku ap, En-Ganim mutuku ap, En-Hada mutuku ap, Bet-Pazes mutuku ap, bokuka arebuk.

²² Isakar yala nang, sik mutuku wilinak ara, Tabor mutuku bukamukak arye dipdongobuka, binamuka ani, Sahasima mutuku ap, Bet-Semes mutuku ap, binuka dakdongamuk. Abukni, otam binamuka sirya ara, Yordan mekin binamuk. Isakar yala nang arye, talibuka unamik mutuku ara, enam belas (16) weik asik dobuka ulamik mutuku nirya, bokuka arebuk. Weik-weik asik dobuka ulamik mutuku noutam babye, dobuka sik deice deibuk touk, mitik-mitik asik dolamikce, ulamik mutuku nirya babye, Yosua birye arebukba, dobuka ulamik.

²³ Aning deice tam sekmap asik pia weik, dobuka ulamik mutuku ap, tonda mitik-mitik asik, dobuka ulamik mutuku nirya ara, Yosua birye Isakar yala nang, sik mapu silip nirya, aning talibuka unamika ati, amutuku nirya ara bokuka, sikti, arebuk. Arebuk mutuku ara, sik Isakar yala nang arye, pia ati talibuka unamik mutuku dobuka arebuk.

Asyer yala nang arye, talibuka unamik mutuku ati, nyabuk yupu

²⁴ Mutuku wilinamik ati, Yosua birye, lake bikilin ning, el si undi pamubarye dobukura, Asyer yala nang, sik ap, sik mapu silip nirya arye, talibuka unamik mutuku ara, bokuka arebuk.

²⁵ Sik ayala nang, sik mapu silip talibuka unamik mutuku wililamik mutuku si ara, ani. Helkat mutuku ap, Hali mutuku ap, Beten mutuku ap, Haksaf mutuku ap,

²⁶ Alamelek mutuku ap, Amad mutuku ap, Misal mutuku ap, uamuk. Tonda, keting kumulban tam odipdongobuka, binamuka ani, Karmel mutuku ap, anyapce dipdongobuka, mitik mek Lipna mekin binuka dakdongamuk.

²⁷ Asukum arye binuka dipdongobuka, ila tamubuka, keting panalyangan tam obinamuka ani, Bet-Dagon mutuku binukabukace, otam kibuka binamuka ani, Zebulon yala nang, sik ulamik mutuku tam binuka dakdongamuk. Tonda, Yiftah-El mutuku noutam bong-bong biyuk, arye ubuka utam dabu tam binamuka ani, Bet-Emek mutuku ap, Nehiel mutuku tam arye bukde binamuka ani, utam bukni, mutuku si Kabul mutuku tam dakdongamuk.

²⁸ Adinibuka, otam ton Ebron mutuku ap, Rehob mutuku ap, Hamon mutuku ap, tonda Kana mutuku ap, dipdongobuka binamuka ani, weik mutuku Sidon mutuku binuka deibuk.

²⁹ Asyer yala nang, sik mutuku wilinak ara, asukum arye, dipdongobuka binamuka ani, Rama mutuku tam binukabukce, tamubuka Tirus mutuku binamuk. Tirus mutuku ara, weik cang keil poka dobuka, antanapdongamik mutuku, anyak binuka dakdongamuk. Winibukce, amutuku arye tamubuka, Hosa mutuku birikce, mutuku sirya wilinak ara, weik laut mekwen deiamuka dam arye, binuka sekdobuk. Tonda, amutuku noutam wilinak ara, Mahalap mutuku ap, Akhsip mutuku ap,

³⁰ Tonda, Uma mutuku ap, Afek mutuku ap, Rehob mutuku ap, amutuku tam arye wiliprobukce, dukdongobuk. Yosua birye, Asyer yala nang ati, bokuka arebuk mutuku yupa ara, pia weik ani. Ara, weik asik ara, dua puluh dua (22) arebuk. Aweik asik dam ara, mitik-mitik asik awamuk ning babye, dobuka ulamik mutuku babye arebuk.

³¹ Adeice tam sekmap asik pia weik dolamik ning ap, anyansik-anyansik dam bukni, mitik-mitik asik dolamik ning ap nirya ara, amutuku noutam awamuk. Awamuk mutuku nirya ara, Yosua birye bokuka, Asyer yala nang ap, sik mapu silip nirya ap, amutuku talibuka unamika ati, arebuk. Winibukba, sik ayala nang arye, amutuku nirya, sik mutuku koproba, kibuka taleamik.

Naftali yala nang arye, talibuka unamik mutuku ati, nyabuk yupu

³² Mutuku wilipnamik ati, Yosua birye, lake bikilin ning, el si undi dobukba, nakub barye ning dobuk ara, Naftali yala nang ap, sik mapu silip ap, talibuka unamik mutuku ati, bokuka arebuk.

³³ Sik ayala nang, sik duweit nirya, talibuka unamik mutuku wilinak ara, ani. Helef mutuku arye, dipdongobuka binamuka ani, weik yo ara, Zananim mutuku tikamuk. Ayo si ara, Tarbantin yo, tonda Ek yo nyalamik yo ulamuk sukum arye, amutuku diprongobuka binamuka ani, Adami-Nekeb kipdakuka, Laknum mutuku biyukce, sirya ara Yordan mekin arye, binuka sekdobuk.

³⁴ Yordan mekin adinil binuka sekrobukce, tamubuka keting kumulban tam binamuka ani, Asnot-Tabor mutuku binamuk. Amutuku dinikil, bikyikopura, omutuku tam arye, Hukok mutuku yanuka dukdongamuk. Selatan tam ubuk mutuku nirya ara, Zebulon yala nang, sik mutuku wilinak ubuk. Tonda, Keting kumulban tam mutuku wililonak ara, Asyer yala nang, sik mutuku ubuk. Tonda, keting panalyangan tam mutuku ara, Yordan mek arye wilipdobuk.

³⁵ Weik keil poka dobukabikce dolamik asik ara ani. Zidim mutuku ap, Zer mutuku ap, Hamat mutuku ap, Rakat mutuku ap, Kineret mutuku ap,

³⁶ Adama mutuku ap, Rama mutuku ap, Hasor mutuku ap,

³⁷ Tonda, Kedes mutuku ap, Ederei mutuku ap, En-Hazor mutuku ap,

³⁸ Yiron mutuku ap, Mikdal-El mutuku ap, Horem mutuku ap, Bet-Anat mutuku ap, Bet-Semes mutuku ap, bokuka arebukba doprobik. Amutuku weik asik nirya ap, anyasik-anyasik dolamika nirya ara, mitik asik babye dolamik. Anyasik nirya ara, 19 dolamik.

³⁹ Adeice tam sekmap mutuku si nirya ara, sik Naftali yala nang sik mutuku ara, sik ayala nang arye, talibuka ulamik. Weik-weik asik ap, mitik-mitik asik dobuka ulamik ning nirya ara, amutuku noutam uamuk. Awamuk mutuku nirya ara, Yosua birye bokuka, Naftali yala nang ap, sik mapu silip nirya ap arye, amutuku ara talibuka unamika ati arebukba, sik ayala nang arye, amutuku nirya, sikce taleamik.

Dan yala nang arye, talibuka unamik mutuku ati, nyabuk yupu

⁴⁰ Mutuku wililamik ati, Yosua birye, lake bikilin ning el si ara, undi tekbarye dobuk ning ara, ‘Dan yala nang sik mapu silip nirya arye, amutuku talibuka unamakʼ tenen, amutuku ati, dobuka arebuk.

⁴¹ Sik Dan yala nang ap, sik mapu silip arye talibuka, unamik mutuku wilinak ara, ani. Zora mutuku ap, Esytoal mutuku ap, Ir-Zemes mutuku ap,

⁴² Shalabin mutuku ap, Ayalon mutuku ap, Yitla mutuku ap, tonda

⁴³ Elon mutuku ap, Timna mutuku ap, Ekron mutuku ap,

⁴⁴ Elteke mutuku ap, Gibeton mutuku ap, Bahalat mutuku ap,

⁴⁵ Tonda, Yehut mutuku ap, Beneberak mutuku ap, Gat-Rimon mutuku ap,

⁴⁶ Me-Yarkon mutuku ap, Rakon mutuku ap, tonda Yope mutuku noutam uamuk mutuku nirya ara, Yosua birye bokuka arebukba, sik Dan yala nang arye doprobik.

⁴⁷ Dan yala nang, sik mutuku ara, yuk nang arye, sik tuku ton alubuka dopromik ati, ton tam mutuku ara, sik Dan yala nang arye, talibuka kum ulamik. Winyamikba, sik Dan yala nang arye, Lesem mutuku biyikce, Lesem mutuku asik dobuka ulamik nang ati, sik dam binuka obisibikce, Dan yala nang arye, Lesem mutuku ulamik nang ati, parang ya arye obisibikce, atuku tonap tamubuka, alubuka doprobikce, amutuku talibuka ulamik. Dan yala nang arye, Lesem mutuku alubuka doprobik ati, amutuku si ara, yuk si dobik. Ara Dan mutuku nyabuka, si sibik. Ara, sik ni Dan birye deiamukba, dadeipdanin yangalamik nang ati, amutuku si babye, sik apu si Dan nyabikce, asik dobuka, amutuku noutam ulamik.

⁴⁸ Adeice sekmap weik asik ap, mitik-mitik asik nirya ara, amutuku noutam uamuk. Awamuk mutuku nirya ara, Yosua birye bokuka, Dan yala nang, sik mapu silip nirya ati, amutuku ara, talibuka unamika ati arebuk. Winibukba, sik Dan yala nang arye, amutuku nirya, sikce taleamik.

Mutuku bokonmoka ani, sirya akunum bokeibuk ning ati, nyabuk yupu

⁴⁹ Amutuku-amutuku noutam uamuk tuku nirya ara, sik Israel nang akunum bokuka doprobikura, ton tuba aubuk mutuku ara, sik dopropmik mutuku tuku ara, sikce bokuka, ninye si Nun, elce deiamuk mi, Yosua biti arebik. Arebikura, elda amutuku tuku talibuka ulamuk.

⁵⁰ Allah Yahweh arye, “Aning ara, winibuka winipnamlume,” nyapdeibuk touk, sikce Yosua biti, arebik. Ara, Allah min arye, “Sik Israel nang ara, Yosua birye, “Amutuku tuku ara, na arepnululume,” nyabuka, morobukopura, atuku ara, anggunce el tibuk areplulume,” nyapdeibuk. Tonda, atalak babye, Yosua birye, “Nara, Efraim mutuku tam ubuk mutuku si, Timnat-Serah mutuku uk arepnululume,” nyabuka morobuk. Moropbukba, sik Israel nang arye, amutuku dobuka arebik. Arebikura, Yosua birye, amutuku noutam nirya ara, talibuka ulamuk.

⁵¹ Adeice tam sekmap mutuku si nirya ara, Allah el si erena asik pum tam, pil dolamuknye, Imam Eleasar ap, ninye si Nun, elce deiamuknye Yosua ap, tonda, Israel nang nirya, sik yala yuk-yuk ulamik touk, sik duweit yuk-yuk ati, deiyok kibuka taleamik nang arye, wibuka deiamikba, anang nirya arye, ‘Yata yala ninye arye, amutuku doprobikirye, unamak do?’ tenen, lake kilin ning, el si undi dolamik. Undi dolamik deice arye, Allah Yahweh elce, ‘Winipnuyakʼ tenen, laka kin ning deice arye nyapdeibukba, Anyapdeibuk touk binuka, amutuku nirya ara, akunum bokdeiamik. Abokna pil donmik mutuku ara, Silo mutuku uamuk. Silo mutuku ara, Allah el si erena ati, tiya ati tenda arye, doltakna asik domikak. Anyasik bisik bublan dam arye, apil donmek. Aning nirya winibuka pil donmeka ani, undi eibikce, amutuku nirya bokuka, arenmeka ani, akunum winibikura, amutuku nirya ara, dobuka sirya bokik.