Yosua 17 - Eipomek

Manasye yala nang, sik mutuku dolona ati, keting kumulban tam, Yordan mek duman uamuk mutuku ati, bokuka arebik yupu

¹ Yosua birye, Yordan mek koubuka, keting kumulban tam, otam bukamuk mutuku bokuka arepnuyuka ati, elce Manasye yala nang, sik mapu silip bukni, noutam arye bokdeibik nang, sikti, arebuk. Manasye bira, Yusuf elce min yubuka deiamuknye ulamuk. Ati ara, Manasye birye, min yubuka deiamuknye bira, el si Makhir biti, tuku ton bokuka arebuk. Makhir bira, el li koproba Gilead ulamuk ati, el ap, tonye yin talen deiyoknye el si ara, Basan ap, sik anang bitinye ati, Yosua birye sik tam nang, sik mapu silip nirya ati, mutuku bokuka arebuk. Ara, abitinye nang ap, sik mapu silip ap ati, Yordan mek koubuka, otam keting panalyangan tam mutuku ara, Gilead tam ap, Basan tam ap, bokuka arebuk.

² Tonda, Keting kumulban tam, Yordan mek duman ara, Manasye yala ninye bukni, bokikce, ton tam nang, sik mapu silip ati, bokuka arebuk. Amutuku ati, bokuka arebuk yala nang, sik yala nang ara, ani. Ara Abieser ap, Helek ap, Asriel ap, Sekem ap, Hefer ap, tonda Semida ap, sik ayala nang nirya ara, Yusuf birye deiamuknye, Manasye birye deiamuk nang ap, sik mapu silip ap, amutuku noutam ulamik. Sik ap, sik mapu silip yuk-yuk ap ati, deiyok kibuka, taleamik nang ulamikce, amutuku tuku dopromik.

³ Hefer el mi si ara, Zelafehat, el apu koprop ara, Gilead ulamuk. Makhir el mi ara, Gilead, el apu koprop ara, Manasye ulamuk. Zelafehat elda, mapu ton kum deiamuk. Elda kilmapu uk deiamuk. Akilapu, sik si ara, ani. Makhla ap, Noa ap, Hogla ap, Milka ap, Tirza ap, sik winibuka kilapu deiamuk.

⁴ Sik akilapu ara, Allah si eren aik pum pil dolamuknye, imam Eleasar ap, ninye si Nun, elce deiamuk mi Yosua ap, tonda amutuku deiyok kibuka ulamik nang ap, sik dam biyik. Akilapu biyikce, sik anang ati nyabik. Allah Yahweh arye, nunti arepsukak arye, el pil donanye Musa dam nyapdeiamsuka ara, Sik yala ninye nirya ati, amutuku bokuka, arebikce talak ara, sik mutuku koproba, ton bokuka arepnamsinyake, nyapdeiamsuke,” nyabuka, laka nyabik. Nyabikura, sik anang kekebikce, ‘Diba, Allah Yahweh arye Zelafehat, el kilmapu ati nyapdeiamuk touk, nyabaka ati, anyapmak touk winipnuyapʼ tenen, sik akilapu ati, tuku ton bokuka arebik. Tonda, sik kayapu sal babye, ton bokuka arebik. Ara Allah arye nyapdeiamuk touk, ubuka arebik.

⁵ Aning arebik deice arye, Manasye yala ninye ara, Yosua birye, sik ninye ulamik mutuku ara, bokuka ton kum arebik bukni, ninye ton mapu kum deiamik nang, sik kilmapu babye, mutuku ton bokuka arebuk. Ati ara, Manasye yala nang, sik mutuku ara, takubarye arye (10) mutuku ton yuk-yuk bokuka arebuk. Aninguk kum bukni, keting panalyangan tam ara, Yordan mek koubuka, otam bukamuk mutuku, Gilead mutuku ap, Basan mutuku ap ton, bokuka arebuk.

⁶ Ura, Manasye elce deiamuk mapu nirya arye, tuku ton doprobik. Tonda, Manasye birye, deiamuk kilmapu babye, Yosua birye, tuku ton bokuka arebuk. Gilead mutuku nirya ara, bokuka arebukopura, sik Manasye yala ninye arye, doprobikce talibik.

⁷ Manasye yala nang, sik mutuku doprobika ara, amutuku wilina ati, lak kin ning deiamika ara, Asyer yala nang ulamik mutuku arye, ubuka banmana ani, Mikmetat mutuku uamuka, ara Sikem mutuku tam bukni, keting panalyangan tam dipdongamuk. Sikem mutuku bukamuk tam arye, dipdongobuka, koulukuka binarye, iknapye tam selatan arye dipdongobukce, binamuka ani, En-Tapuah yala nang arye, talibuka ulamik mutuku tam, binuka dipdongamuk.

⁸ Ura, Tapuah mutuku ara, Manasye yala nang, sik tam nang arye, amutuku taleamik bukni, Efraim yala nang ara, sik mutuku wililamikak ati, sik Efraim yala nang arye, Tapuah mutuku weik asik domik nang ara, anyasik dobuka, taleamikce aulamik.

⁹ Manasye yala nang, sik mapu silip ulamik mutuku wilina ara, Tapuah mutuku arye, dukdongobuka, kolukuka binamuka ani, Kana mekin binuka dipdongamuk. Amek koubuka, otam mek duman, iknapye tam ara, mitik mek irikna bukni, weik asik dolamika nirya ara, Efraim yala nang, sik asik dolamik. Efraim yala nang arye asik weik dolamikak ara, sik mutuku kum bukni, Manasye yala nang, sik mutuku wilinak ulamik. Manasye yala nang, sik mutuku wilinak ara, mek dam bukni utam ara, dabu tam balamik bisikak, dukdongopbuka binamuka ani, sirya ara, weik mekwen laut deiamukak, Laut Tengah, alaut piripna bukni, amutuku noutam arye binuka wilipdomik.

¹⁰ Winyamikce, Efraim yala nang, sik mapu nirya ara, eitam iknapye tam, (ara selatan) mutuku tam bukamuk mutuku talibuka ulamik. Tonda, Manasye yala nang, sik tam nang nirya ara, dabu tam (arah utara) bukamuk mutuku nirya ara, talibuka ulamik. Tonda, weik mekwen laut deiamukak piripna, amutuku noutam ara, keting kumulban tam arye, binuka sekamuk. Tonda, Manasye yala nang, sik mutuku wilinak utam ara, Asyer yala nang sik mutuku ara, utam arye, dipdongobuka binuka wilipdomuk. Tonda, Isakar yala nang, sik mutuku dam wililamik ati ara, keting panalyangan tam deiamukak arye, binuka sekamuk.

¹¹ Isakar yala nang ap, Asyer yala nang ap, sik ulamik mutuku noutam ara, Manasye yala nang, sik mutuku ton talibuka ulamik. Amutuku ton tabakuka dobikce, asik dobuka ulamik mutuku si ara, ani. Ara, weik asik dolamikak ara, Bet-Sean mutuku ap, tonda Yibleam ap, amutuku noutam weik asik ton dobuka ulamik. Amutuku noutam babye, mitik asik babye, dobuka aulamik. Tonda, weik laut mekwen kup-kup ara, mitik asik dolamik mutuku si ara, Napot-Dor ap, Endor ap, Taanak ap, Megido ap, amutuku nirya ton dolamikce, taleamik. Weik asik adolamik noutam nirya ara, mitikto asik babye ton dobuka aulamik.

¹² Bukni, amutuku noutam, minop talak ulamik nang ara, sik Kanaan tam nang ulamik. Sik Kanaan yala nang ara, Manasye yala nang arye, kum yakamik. Sik Kanaan tam nang ara, mandipna kanye weik bolamik ati, ‘Amutuku tuba unamabe,’ tenelamikce, asukumuk ulamik. Tonda, Allah Yahweh ati, diba kum tenelamik. Ati ara, Kanaan mutuku tam ulamik nang ara, pia tuba amutuku talibuka ulamik.

¹³ Israel nang, sik amutuku binuka ulamik talak ara, keting tamun weik upnin balamikce, ninye likna ap, mikip weik tabaknin balamik. Ara, mikip weik nang ulamik ati, sikce sik Kanaan tam ulamik nang ara, ton kum opyakdonoknamik bukni, Israel nang arye, Kanaan nang ati, “Nun ikin pil talye donamsulume,” nyabuka, ikin pil dilamikba, sik Kanaan tam nang aryuk, apil dolamik.

Efraim yala nang ap, Manasye yala nang ap, sikce, “Keting panalyangan tam mutuku ara, tonap tabakuka arepnusilyame,” nyabuka, morobik yupu

¹⁴ Yusuf birye deibukba, deipdanin yangalamik nang nirya arye, Yosua el dam yanmekce, Yosua biti nyabuka morobik. “Yata deiyok ati, nun mutuku ara, mitik tonunuk bokuka arepsulum do? Nunda, nun ni Allah Yahweh arye melisilye nang, yupa pia weik unyaba ati, tuku ara mitik tonunuk bokuka, arepmasilama ara kume. Tuku tonap tabakuka arepnusilyame,” nyabuka morobik.

¹⁵ Nyabuka morobikura, Yosua birye tamubuka, sik Yusuf yala nang ati nyabuk. “Anggunda, ninye pia weik ululuma ati, Efraim mutuku noutam ara, mutuku weik ubukbuk, anggun ninye weik ululuma ati, anggunce, ‘Nun unak ara, mitik kipsuke,’ teneplum ning ara, atalak arye anggun adiparyuk, Feris yala nang ap, Refaim yala nang ap, sik unyak mutuku binuka dipdeluma ara, sik mutuku noutam weik, yo kan-kan mutuku binuka, asik donak ati, olbinuka lokmunce, asik doplulume.”

¹⁶ Yusuf birye deibukba, deipdanin balamik nang arye, tamubuka Yosua biti nyabik. “Kume, nunda ninye yupa pia weik unyaba ati, asukum ara, weik mutuku bukuk noutam ara, nun una ati, lo ton weik kum ubuk. Tonda, Kanaan tam unyak nang, sik weik mutuku dabu tam, teleb mutuku luak unyak nang ara, sikce ninye olban talak ara, kuda basam, kirikuka tuku deice balamak ning, kereta perang deice tikikirye, tuku deice bobuka banyake. Aning kereta perang talibuka, wininyaka ara, besi arye donyaka ati, mikip weik ulule. Ara, sik Bet-Sean mutuku, mitik asik dobuka unyak nang ap, tonda Yisreel mutuku lu unyak nang nirya ara, Kereta perang besi talibuka unyake. Ati nunda, ‘Se, yata wiriptibya deice arye, sik mutuku doproptibye do?’ tenen, tuba tenenyabe,” nyabik.

¹⁷ Nyabikura, Yosua birye tamubuka, Efraim yala nang ap, Manasye yala nang ap ati nyabuk. “Dib bukni, anggunda, ninye pia weik deiplumce, mikip weik nang ululume. Ati ara, na kanye ara, tonok mutuku uk kum dopropnamlume. Dipkoprob anggun mutuku ton ap, tabakuka arepsiniba, doropnamlume.

¹⁸ Anggunda, abukuk mutuku deice bukni, iknapye tam dopropmomce, weik tikuk yo webuka, cakukapmunce, asik dopmunyeura, amutuku dana-dana tam nirya ara, dopropnamlume. Ara, amutuku noutam ara, ninye una kum mutuku ara, tuba aulule. Amutuku noutam ara, anggunce binuka dopmunce, amutuku noutam nirya ara, anggun mutuku koproba, kipdopnamlulume. Tonda, Kanaan mutuku unyak ninye ara, anggunce obukapmunce, dopdopnamlume. Ara, sik Kanaan mutuku nang ara, mikip pia weik unyak nang ati, ninye mal olalbana ara, kereta perang pia kat ning besi arye deibuka, donyak ning talibuka unyak ninye unyakak babye, anggun Yusuf yala ninye arye, anang nirya ara, yakdonokmunce, sik mutuku alapdopnamlum,” Yosua birye, Yusuf yala nang ati nyabuk.