Yosua 15 - Eipomek

Yehuda yala nang ati, “Amutuku uk unamlume,” nyabukce, bokuka arebik yupu

¹ Yehuda yala nang arye deibikba, dadeipdanin balamik nang nirya, sik ulamik mutuku ati, bokuka doprobik ning ara, ani. Ara, iknapye tam arye, dipdongobuka binamuka ani, Edom mutuku wililamik sukum, arye ubuka, sirya tam biyik ara, Zin mutuku noutam biyuk.

² Iknapye tam sirya ara, weik laut mekwen, el si Ikan Kam Una Kum Mekwen dam arye, dipdongobuka, iknapye tam biyik. Aliptam ara, el si ton, Laut Mati nyabuka, tuba nyanyake.

³ Laut Mati deice tam, iknapye tam bana ati ara, Akrahim mutuku kon tam arye, ubukabikce, Zin mutuku ara, pata mutuku biyik. Ton atouk, Kades-Barnea tam bukni, iknapye tam biyik. Tonda, Ezron mutuku tam kibukabikce, anyapce ubuka, Adas mutuku welebik. Asukum, welebik bukni, Ila tamubuka kepdeibuka, Hakrahim tam yayik.

⁴ Tonda, Hakrahim tam arye, dipdongobuka, Asmon tam biyik nang ara, Mesir mutuku wilinak ara, mek lilun bisikuk ubuka biyik. Winibuka binmeka ani, pia weik laut mekwen, el si ara, Laut Tengah piripna biyik. Yehuda yala nang, sik mutuku tuku bokna ati ara, Allah arye nyapdeipmok touk, Yehuda yala ninye arye, dopropnamik mutuku, iknapye tam tuku wililonak ara, asukumuk.

⁵ Atonun, sik mutuku tuku wililamik otam, keting panalyangan tam ara, weik mekwen ikan kam una kum mekwen ati, el si ara, Laut Mati nyanyak. Alaut mekwen dam arye, dipdongobuka yayuk. Tonda utam ara, Yordan mek dara tam arye, binuka wilipdongobuk.

⁶ Outam mutuku, wililamik ara, Yordan mek dara tam arye, dipdongobuka, asukum arye, ubuka mutuku si Bet-Hogla mutuku welebuka, Yordan mutuku bana, utam tuku wililongon tam biyik. Aning biyik ara, utam mutuku binuka, mutuku wililongon tam biyika ara, mutuku si Bet-Araba outam bukamuk mutuku arye, ubuka utam biyik. Winibikura, welebuka weik mutuku bukamukak uamuk keil, el si Bohan Mutuku Keil si dam biyik. Bohan bira, Ruben birye deiamuk mi, el si ara, Bohan nyabuka si dobik. (Bohan Mutuku Keil si dam ara, Ruben el mi si ati nyalamik).

⁷ Winibik ning ara, mambul weik mutuku, lu nyalamik mutuku ara, Akhor lu mutuku biyikce, Debir mutuku dam biyik. Biyikce, amutuku dipdongobuka, utam mutuku ara, Gilgal tam bukni, Adunim mutuku bukamukak welelamik bisik dam biyikce, amutuku lilun leibuka biyik. Winibuka anyak arye, Adunim lu tam kibukabikce, iknapye tam welebik. Winibikce, mutuku si En-Semes mek pu dam biyik. Welebikce, banmeka ani, En-Rogel nyalamikak panalbiyik.

⁸ Atonun, Hinom mutuku, lu tam kipdopmekce, welebanmeka ani, iknapye tam bumang mutuku deice, welebuka tikilbiyik. Amutuku wilina ati bikilina ara, asukum arye dipdongobuka, banmeka ani, bumang mutuku deice biyik. Ninye si Hinom, elce deiamuk mi, el si sina ati, bumang mutuku deice biyik ara, outam lu tam ati, Hinom mek, pu tam ara, el si nyabuka dobik. Ara, Yerusalem mutuku tam, Yebus yala nang, sik ulamik mutuku bukni, iknapye tam. Anang arye balamika ani, weik mutuku bukamuka dam arye, otam Hinom lu tam ulule. Ara keting kumulban tam ulule. Tonda, weik mutuku luak ara, Refaim mutuku uamukak, binuka panalbiyik.

⁹ Aweik mutuku deice arye, balamika ani, Me-Neftoah mek pu dam mutuku wililamik sukumak biyik. Asukum arye, dipdongobuka balamika ani, Ebron mutuku dam asik dobuka ulamik nang dam biyik. Amutuku wilina ati ara, asukum arye dipdongobuka, Bala mutuku tam wililamikce, Kireat-Yearim nyalamik mutuku tam biyik.

¹⁰ Tonda, Bala mutuku arye, ubuka keting kumulban tam binuka, warikdongobik ning ara, weik mutuku si, Seir mutuku dam, ton si ara, Edom mutuku tam biyik. Adipdongobuka, Yearim mutuku bukni, utam mutuku ara, Kesalon mutuku wililamikak ton, binuka eibik. Tonda, asukum arye dipdongobuka, Bet-Semes mutuku dam biyikak arye, anyapce ubuka, Timna mutuku nyalamik mutuku dam biyik.

¹¹ Amutuku wililamik ati ara, Timna mutuku arye, dipdongobuka binamuka ani, utam mutuku, dabu tam Ekron mutuku binuka eibik. Abinuka eibikura, amutuku warikukabikce, Sikron tam bana ati ara, Bala mutuku tam leibuka biyik. Tonda, asukum arye dipdogobuka, Yaknel tam biyik, sik mutuku koproba, keting kumulban tam ara, weik mekwen laut deiamukak, lilun binuka eibikce, wekelbiyik. Ara, Laut Tengah atia.

¹² Amutuku wililamikak binuka dilamikak, Yehuda yala nang nirya ara, anyak unmeka ak, eibik. Yehuda yalanye birye, deibukba, dadeipdanin yangalamik ninye uk, amutuku noutam ulamik. Ara, Yehuda yala nang bukni, keting kumulban tam ulamik nang ati, tuku bokuka arebik.

Kalep birye, Ebron mutuku ap, Debir mutuku ap, doprobuk yupu

¹³ Allah Yahweh arye, Yosua biti, “Ance winipnamlame, winipnalame,” nyapdeiamuk touk, Yosua birye, Yehuda yalanye, el ninye si ara Yefune, elce deiamuk mi Kalep biti, mutuku ton bokuka arebuk. Atuku ara, ninye si Enak, el li koproba, Arba taleamuk mutuku ati, amutuku si ara, Kiryat-Arba nyalamik. Atuku ton bokuka arebukba, Kalep birye doprobuk. Amutuku ara, Yehuda yala nang, sik taleamik tuku dana tam ton bokuka, Kalep biti, Ebron mutuku arebuk. Arba el mi el si Enak, el li koproba ulamuk.

¹⁴ Enak birye, deibukba, dadeipdanin biyik ninye ara, ani. Ara Sesai ap, Ahiman ap, Talmai ap deibukba, Ebron mutuku taleamikce, amutuku noutam ulamik. Bukni, Kalep birye, amutuku doprobukce, sik Sesai yala nang ap, Ahiman yala nang ap, Talmai yala nang ap, sikce talibuka ulamik noutam, Kalep birye, aninye nirya yakukce, sik taleamik tuku nirya, alabuka doprobuk.

¹⁵ Alubuka doprobukura, asukum biyukce, Debir mutuku ulamik nang ati, “Sikda amutuku una kume,” nyabuka, ‘Amutuku nang yaknamap,’ tenebuk. Amutuku ara, min talak ara, Kiryat-Seper mutuku nyalamik.

¹⁶ Kalep birye nyabuk, “Yatanye birye do, Kiryat-Seper mutuku ati, ‘Narye talipnune,’ nyabuka, amutuku noutam unyak nang yaklirye, sik mutuku doproplinye bira, na kilmu Aksa arepnyeura, anye birye dopnamle,” Kalep birye nyabuk.

¹⁷ Nyabuka ati, Kalep el ka koproba Kenas, elce deiamuk mi si ara, Otniel birye, amutuku ulamik nang obukabukce, amutuku deiyoknye kibuka talibuk. Winibukopura, Kalep el kilmu Aksa bira, Otniel arebukba dobuk.

¹⁸ Akunum dopdarikura, Aksa birye, el akanye Otniel biti, nyabuk. “Ance na ni koproba Kalep biti, moropminyeba, tuku mitik tonun ton, bokuka arepsutue.” Nyabukopura, aminyan talak Aksa bira, el keledai basam balye deice sakuka banmoka ani, el li koproba Kalep dam biyuk. Biyukura Kalep birye nyabuk. “Anda, yata ning pantanmakil ati, yalam do?” nyabuka asipdeyuk.

¹⁹ Nyabuka asibukba, el kilmu Aksa birye, tamubuka, el li koproba, Kalep biti nyabuk. “Kume na nio, na patanmanil ning ara, na unirye mek kwebuka dinamne ati, mek balamle sukum ara, yata wiribuka arepnutum do?” nyabuka asibuk. Ara, “Na ni ance na tuku arepnulumak ara, mutuku si Negeb mutuku bukni, amutuku ara, ilim mutuku arepnuluma ati, ayupu nyabuka moropkine,” nyabuk. Nyabukura, Kalep birye tamubuka, “Mek pu koprop sukum ara, itam babye, mek dara tam babye, anti arepkine,” nyabuka nukuk.

Yehuda yala nang, sik ulamik mutuku bokuka arebuk yupu

²⁰ Wini talak ara, Yehuda yala nang arye deiamikba, dadeipdanin yanganyak nang, sik mapu silip nirya ati, sik ulamik mutuku, bokuka arebikura, talibuka pia ulamik ning ara, ani.

^21-32 Iknapye tam, sik Kanaan tam minop talak ulamik ninye arye, domikak arye ulamik mutuku si ara, ani. Ara Yehuda yala ninye arye obukabikce, aninye yakikce, sik mutuku doprobik ati, nyababe. Ara, iknapye tam ara, Edom mutuku wililamik dam ara, 29 asik dolamik ning, nirya doprobik. Aweik asik dolamik dam ara, mitik asik ton dolamik. Anyasik-anyasik dolamik ning ap, tonda anyasik dam uamukba, dolamik asik si ara, ani. Kabseel mutuku ap, Eder mutuku ap, Yagur mutuku ap, Kena mutuku ap, Dimo mutuku ap ara, Adada mutuku ap, Kedes mutuku ap, Asor mutuku ap, Yitnan mutuku ap, Zif mutuku ap, Telem mutuku ap, Bealot mutuku ap, Hazor-Hadata mutuku ap, Keriot-Hezron mutuku ap, (aning ton Hasor mutuku nyanyak), Amam mutuku ap, Sema mutuku ap, Mola mutuku ap ara, Hazar-Gada mutuku ap, Hesmon mutuku ap, Bet-Pelet mutuku ap, Asar-Sual mutuku ap, Beryeba mutuku ap, Bahal mutuku ap, Iyim mutuku ap, Esem mutuku ap, Eltolad mutuku ap, Kesil mutuku ap, Horma mutuku ap, Ziklak mutuku ap, Madmana mutuku ap, Sansana mutuku ap, Lebaot mutuku ap, Sihilim mutuku ap, Ain mutuku ap, tonda Rimon mutuku nirya, bokuka arebik.

^33-36 Aning atouk bukni, dabu mutuku noutam ara, weik asik ap, anoutam mitik asik ap dobuka, ulamik nang mutuku nirya ara, sik kum talak, Kanaan tam ulamik ninye arye, asik odeikin 14 dolamikce, ulamika ara, Yehuda yala ninye arye, amutuku-amutuku nirya babye alabuka, doprobik. Amutuku si ara, ani. Ara, Esytaol mutuku ap, Zora mutuku ap, Asma mutuku ap, Zamoa mutuku ap, Enlam mutuku ap, Sokho mutuku ap, Aseka mutuku ap, Saraim mutuku ap, Aditaim mutuku ap, Gedera mutuku ap, Gederotaim mutuku ton, amutuku nirya doprobikce, sik mutuku kipdobik.

^37-41 Tonda, aning atouk, weik asik ap, mitik asik ap dolamikbuk, doprobik ning ara, asik 16 mutuku ton doprobik. Ara, amutuku noutam ara, min talak Kanaan tam ulamik ninye arye, mitik asik babye, adolamik ning nirya obukabikce, amutuku nirya doprobik. Ara ani. Zenan mutuku ap, Hadasa mutuku ap, Migdal-Gad mutuku ap, Dilean mutuku ap, Mizpa mutuku ap, Yokteel mutuku ap, Laknis mutuku ap, Boskat mutuku ap, Eglon mutuku ap, Kabon mutuku ap, Lahmas mutuku ap, Kitelis mutuku ap, Gederot mutuku ap, Bet-Dagon mutuku ap, Naama mutuku ap, tonda, Makeda mutuku ap, amutuku nirya alubuka doprobikce, sik mutuku koproba kipdobik.

^42-44 Tonda, min talak Kanaan tam ulamik ninye arye, mitik asik dolamik ning ap, weik asik dolamik ning babye, adolamik ning nirya obukabikce, amutuku nirya doprobik. Anyansik-anyasik dolamik ning nirya dobuka, ulamik mutuku si ara ani. Libna mutuku ap, Eter mutuku ap, Asan mutuku ap, Yifta mutuku ap, Asna mutuku ap, Nesib mutuku ap, Kehila mutuku ap, Akhsip mutuku ap, tonda, Maresa mutuku ap, winibuka mutuku alubuka doprobikce, sik mutuku kipdobik.

⁴⁵ Atonun, Ekron tam ap, amutuku tam bukni, mitik-mitik asik ap, tonda anyasik nirya ap doprobikce, sik mutuku koproba kipdobik.

⁴⁶ Tonda, Ekron mutuku arye diprongobuka, binamuka ani, weik mekwen laut mek lilun dam, anoutam ton binmikce, obukabikce, amutuku nirya, sik kiprobik. Winibuka, weik asik dobuka ulamik nang nirya ap, tonda mitik-mitik asik babye dopdakuka, Asdod mutuku dam bobiyik. Tonda, adip dongobuka, yuk mutuku ton doprobikce, sik mutuku dem kiprobik.

⁴⁷ Atonun, Asdod mutuku ap, Gasa mutuku ap, mitik-mitik asik domik asik ap, weik asik dolamikak ap ara, nirya obikce, asik alabuka, doprobik ning ara, Mesir mutuku mek dandanya bokolan sukum, weik mekwen laut lelun dam ara, eibikce, aning nirya alubuka doprobikce, sik mutuku dem kipdobik.

^48-51 Atonun, mutuku tam ton, weik asik dolamik ning ap, mitik asik dolamik ning ap, dobuka ulamik asik yupa ara, koklombarye (11) ulamik. Amutuku si ara, ani. Samir mutuku ap, Yatir mutuku ap, Sokho mutuku ap, Dana mutuku ap, Kiryat-Sana mutuku ap, (aning ara, Debir mutuku ton nyalamik), Anab mutuku ap, Estemoa mutuku ap, Anim mutuku ap, Gosyen mutuku ap, Holon mutuku ap, tonda Gilo mutuku ap, winibuka mutuku doprobikce, sik mutuku dem kipdobik.

^52-54 Atonun weik asik dobuka ulamik asik ap, tonda mitik asik dolamik nirya ara, toupne barye (9) asik dolamik mutuku si ara Arab mutuku ap, Duma mutuku ap, Esan mutuku ap, Yanum mutuku ap, Bet-Tapuah mutuku ap, Afekah mutuku ap, Humta mutuku ap, Kiryat-Arba mutuku ap, (ara Hebron mutuku ton nyalamik), tonda, Zior mutuku ap, wininibuka mutuku doprobikce, sik mutuku dem kipdobik.

^55-57 Atonun, weik asik dobuka ulamik ning ap, tonda mitik asik dobuka ulamik ning ap nirya ara, takubarye (10) asik dolamik mutuku si ara, ani. Maon mutuku ap, Karmel mutuku ap, Zif mutuku ap, Yuta mutuku ap, Yisreel mutuku ap, Yokdeam mutuku ap, Zanoa mutuku ap, Kain mutuku ap, Gibea mutuku ap, tonda Timna mutuku ap, winibuka mutuku asikbuk, sik mutuku dem kipdobik.

^58-60 Tonda, weik asik dobuka, ulamik ning ap, tonda mitik asik dobuka ulamik ning ap, nirya pinbarye (8) asik dolamikce ulamik mutuku si ara, ani. Halhul mutuku ap, Bet-Zur mutuku ap, Gedor mutuku ap, Maarat mutuku ap, Bet-Anot mutuku ap, tonda Eltekon mutuku asik dobuka ulamik ning ap, Kiryat-Bahal mutuku nyalamik, (amutuku si atibuk, ton si ara, Kiryat-Yearim mutuku nyalamik). Bitinye ning ara, Raba mutuku nyabuka dolamikbuk, sik mutuku dem kipdobik.

^61-62 Pata mutuku noutam ara, weik asik ara, nakub barye (6) ton dolamik. Anyasik dam ara, mitik asik babye adolamik. Anyasik si ara. Bet-Araba mutuku ap, Midin mutuku ap, Sekhakha mutuku ap, Nibsan, (anyasik ara, si ton Garam mutuku asik nyalamik) mutuku ap, tonda En-Gedi mutuku nyabuka dolamik.

⁶³ Anya asik weik tonun, sik mutuku doprobik bukni, sik Yehuda yala ninye arye, Yerusalem mutuku asik, minop talak ulamik nang ara, min obuka, atuku alubuka dopropmanto kum ati, pia pirilamik. Amutuku nang ara, Yebus yala nang nyalamik. Ara, Yehuda yala ninye arye, Yerusalem mutuku talibuka ulamikce, sik mutuku koproba kiyamik bukni, Yebus yala nang ara, obuka kum yakdonokamik. Winyamika arye, wini talak babye, amutuku noutam ara, Yehuda yala nang ap, Yebus yala nang ap, sik neika Yerusalem mutuku ansinibuka aunyake.