Yosua 14 - Eipomek

Kanaan mutuku noutam bukni, Yordan mek koubuka, keting panalyangan tam, otam uamukba, atam keting kumulban tam uamuk mutuku bokuka arebuk ning ati, nyabuk yupu

¹ Asekuk laka nyan yupu noutam ara, Kanaan mutuku noutam bukni, sik Israel ninye arye, binuka doprobikce, sik mutuku koproba, kibuka ulamik ning ati sekupe. Amutuku-amutuku bokuka arebika deiyok nang ara, imam Eliazar ap, ninye si Nun, elce deiamuk mi Yosua ap, tonda Israel nang yala yuk-yuk, talibuka ulamik deiyok-deiyok nang ap, sik nirya arye, amutuku tuku nirya bokuka arebikura, sik Israel yala nang weik tonun doprobikce, sik mutuku koproba kibuka ulamik. Amutuku arebik ning nirya ara, Kanaan mutuku noutam bukni, Yordan mek otam uamukba, keting kumulban tam mutuku anyak arebik.

² Amutuku tuku doprobik ning ara, Allah Yahweh arye, Musa biti, “Winibuka winipnamlume,” nyapdeibuk touk, bokuka arebik. Ara, ‘Dan tam nang arye dopropnamaka do?’ tenen, bikilin ning, el si undi arye, winipdeyik deice arye, “Atam tuku ara, ayala nang arye dopropnamake, otam tuku ara, ayala nang arye dopropnamake,” nyapdeipmuk touk, bokuka arebukba, doprobik. Yordan mek koubuka, otam keting kumulban tam mutuku ara, ninye yala toupne barye (9) yala nang ap, tonok yala ton, Manasye yala nang bukni, ton tam nang bokuka ulamikba, amutuku tuku bokuka arebikba, doprobik.

³ Ura, Israel nang dam bukni, bitinye yala nang ap, tonok yala ton dana tam ning ap ati, Yordan mek koubuka, otam keting yangan tam mutuku tuku nirya ara, Musa arye, nyapdeibukba, atuku noutam bokuka arebik. Bukni, sik Lewi yala nang ara, tuku ton bokuka, kum arebuk.

⁴ Ura, Yusuf birye deibukba, dadeipdanin yangalamik yala nang ara, sik si Manasye ap, Epraim ap, sik dem amutuku noutam nirya ara, arebukba doprobikce, asukum dem taleamik. Bukni, sik Lewi yala nang ara, tuku ton pia kum arebukba, kum doprobik. Sik Lewi yala nang ara, tuku ton kum bokuka arebuk bukni, sik unamikak ati, amutuku noutam uamuk asik ap, tonda Lewi yala nang arye, weilamik kam ning, domba basam ap, kambing basam ap, sapi basam ap ara, sik dina ati, maning palamuk mutuku ton, bokuka arebukba doprobik.

⁵ Aning ara, Allah Yahweh elce, “Winipnamlyame,” nyabuka, akunum nyapdeibuk touk, Musa birye nyapdeibukba, sik Israel deiyok nang arye, sik Israel nang ayala-yala nirya ati, Kanaan mutuku noutam nirya ara, wilibikce bokuka, yuk-yuk arepdayikura, Israel nang ayala-yala nirya doprobikce, sik mutuku kibuka ulamik.

Hebron mutuku ara, Kalep birye doprobuk ati, nyabuk yupu

⁶ Tonok sum ara, Yehuda yala nang nirya yayikce, ‘Yosua ap epdanamabʼ tenen, tonok mutuku si, Gilgal mutuku anyak wibuka yayik. Sik Yehuda yala nang dem bukni, tonoknye bira, Yefune, elce deiamuk mi Kalep bira, Kenas mutukunye birye nyabuk. “Yosuao, an ni Allah Yahweh arye, el pil dolamuknye, Musa biti Kades-Barnea mutuku noutam arye, nyapdeibuk yupu ara, an akunum bikamlume. Ara, Allah arye, na ap, an ap ati, nyapdeiamsuk yupu ati, anti nyapkine,” nyabuk.

⁷ Nyabukura, ayupu ton nyabuk. Na dibin keting tamun, empat puluh tahun (40) akunum upnuk ati, Allah Yahweh el pil donanye, Musa wipdeibuknye birye, ‘Kades-Barnea mutuku arye bimince, otam Kanaan mutuku tam dilbilnamlyame. Ara, nun Israel nang arye, Kanaan mutuku warikuka olbinamaba ati, anda minpola, amutuku nang ulamice ning bikna ati, dilbinamlyame,’ nyabuka, wipdeipnuk. Wipdeipnukura, Kanaan mutuku dilbinamsirye, amutuku nang ulamik ning ati, Musa el dam bisirye, dipkoprob yupu dem bobuka, laka nyalbinamse.

⁸ Winipse bukni, Kanaan mutuku dilbana ati, na ap neika binamupu nang nirya ara, Kume, Kanaan mutuku ninye ara, kum obisiptibye,’ nyabuka, yuk yupu ton laka nyabikura, atalak sik Israel nang kekebikce, ilil weik ubukba, ‘Se, Kanaan mutuku nang ton kum olbenamabe,’ tenebikce, sik kanye ikin ubuk. Ikin ubuk bukni, Na ap dilbenamubu nang arye, amalye yupu laka nyabik bukni, nara, kanye talima bokoltona kumce, na kanye pia na ni Allah atibuk, dipkoprob teleb yupu dem nyapse. Allah Yahweh arye, ‘Winamlulume,’ nyapdeipsuk touk, narye aning dem winipse. Nara, dipkoprob yupu dem laka nyapse.

⁹ Aning winipsa ati ara, Musa birye, asum aryuk nyalin yupu ton nyapdeipnuke. Elce nyapnuk ning ara, ani. Ara, ‘Anda dipkoprob yupu dem laka nyalyanmasilama ati ara, Kanaan mutuku dina ati, aeipmalamce, yanibuka dinmalum mutuku noutam nirya ara, bokuka arepnamkine. Arepkinyopura, an ap, ance deipminyeura, dadeipdanin banamak ninye arye, amutuku tuku doprobikirye, sik mutuku koproba, kibuka unamake. Sik tuku dem pia talipnamake,’ nyapdeipnukce, nyalina yupu nyapnuke. Kalep birye, Yosua biti nyabuk.

¹⁰ Nyabukce, ayupu ton dukdongobuka nyabuk. Ati ara, wini talak ara, ance na ton eipnilame. Allah Yahweh arye, Musa biti nyapdeibukba, Musa birye, ayupu nyapnuk talak arye diprongobuka, yangalamupu ani, wini talak ara, keting tamun yupa weik, empat puluh lima (45) keting tahun ton akunum ulamupu. Allah Yahweh arye, elcuk nati kalikuka melilamnuk deice arye, na tuba wini talak babye kam unune. Aketing tamun noutam nirya ara, nun Israel nang nirya, mek kum ati, ninye kum ulamik sukum, pera weik mutuku balamupu ani, wini talak ara aunmabe. Ati, wini talak ance dipdenilyame. Wini talak ara, na kam unun keting tamun yupa ara, delapan puluh lima (85) keting tamun unune. Ati ara, akunum wisi dase.

¹¹ Bukni, na pil dona ara, Kanaan mutuku dilbana ati, Musa birye wipdeipnuk talak, mikip weik ulamse touk, wini talak babye, pia mikip weik arye, tuba pil donune. Na Kalep bira, mikip tuba upnuk ati, nun mal olan nang ati mal olana do, talye pil dona do, dana-dana tam mutuku bana talak nirya babye, nara mikip tuba unulule. Yata pil do, pil ayala-yala nirya tuba doptinye.

¹² Ati ara, Allah Yahweh arye, “Kalep biti, amutuku dobuka arepnamlyame,” nyabuka, nyalina yupu deice arye, nyapdeiamuk mutuku ara, iknapye tam ara, na ap, na melina nang nun nirya ap, neika unmaburye, laka nyana yupu bobuka, laka nyalyanamupu nang ati, amutuku bokuka arepnusilyame. Atalak ara, nunce nyapdeibupu ati, an Yosua birye, kekenmalum ning ara, tuba biknulyame. Ara, nunce nyapmapu ara, ‘Pia teleb mutuku oulul bukni, amutuku noutam unyak ninye ara, nong cang weik nang unyake. Sik si ara, Enak nang unyake. Tonda, sik aninye nirya ara, keil pala kat keil deice arye, aik dobuka, poka dobikce unyak ara, sik asik dobuka, antanap dongamika ati, sik asik ara, ulubuka daklopmanto kum ninye unyake. Dipkoprob, mikip weik nang unyake. Na walwal bukni, na kanye ara, Allah Yahweh arye, nati melipnilyopura, winipniliba, narye sik aninye nirya ara, obuka sirya daknirye, yaknamne. Ara, Allah Yahweh, elce nyapdeiamuk touk, winipnamabe tenepne. Kalep birye, Yosua biti nyabuk.

¹³ Ati ara, Yosua birye, Yefune el mi Kalep biti, ‘Allah arye Kalep melipnamleʼ tenen, Allah ati morobuk. Winibuk ning ara, Hebron mutuku noutam nirya ara, dobuka, Kalep bitibuk arebukba, Kalep doprobukce, el mutuku koproba dem kibuke.

¹⁴ Amutuku noutam nirya ara, wini talak Kenas mutukunye, el si Yefune, elce deiamuk mi Kalep, elce deibukba, dadeipdanin balamik nang nirya, doprobikce, sik mutuku koproba kipdobik. Yosua birye, Kalep biti amutuku nirya, arebuka deiyok ara, Kalep elda diksukum ulamuk ati, arebuk. Tonda, Israel nang ati, pia kalikuka melilamuk Allah Yahweh arye, ‘Winipnamlyame,’ nyapdeibuk yupu, Kalep kekebukce, aninguk talibuka ulamuka ati, Yosua birye, Hebron mutuku bokuka, Kalep ap, el mapu silip ap ati, arebukba, sikce amutuku doprobik.

¹⁵ Ura, minop talak ninye arye, Hebron mutuku ara, mutuku si Kiriat-Arba mutuku nyalamik. Arba nyalamika deiyok ara, minop talak amutuku noutam pia mikip weik ulamuknye, el si ton Arba nyalamik. Yosua birye, amutuku bokuka, Kalep bak arebukopura, amutuku noutam una ara, mal olana ap, ikin kanye bona ap kumce, pia teleb deice aryuk ulamik.